اختي طردتني من بيتها

[ريـا]

السلام عليكم ورحمة الله وبركاته

بنات نفسي تساعدوني وتعطوني رأيكم

العام في رمضان طلبت مني اختي اني ما ادخل بيتها والله حزت بقلبي كلمتها بس ثاني يوم تفاجأت فيها تدخل بيتي لأن الفطور كان عندي ( زوجي وزوجها اخوان وفطورنا في رمضان كل يوم على واحد واهل زوجي معنا ) المهم لما شفتها دخلت بيتي وجايه تفطر عندي وكأنها ماقالت لي لا تدخلين بيتي عرفت ان زوجها غاصبها لأنه مايحب المشاكل وهي في كل رمضان لازم تسبب مشكله لدرجة انها في يوم حطت الفطور وراحت لغرفتها وما أفطرت معنا ؟؟ المهم انا مع اني طنشت كلمتها وصرت ادخل بيتها بس مو مثل قبل اولا لأني ما ابغى اضحك العالم علينا يعني أهل زوجي صعبه اخوات ونتهاوش قدامهم المهم صرت ما ادخل بيتها الا اذا عندها ضيوف مع ان شققنا متقابله والباب على الباب بس ما ادخل بيتها واذا احتجت لشي اطلبه وانا على الباب وهي كذلك بطلت تزورني الا اذا عندي ضيوف
المهم انا كل ماتذكرت طردتها لي احس بغصه ومره متضايقه نفسي اردها فيها بس مايجيني قلب ونسيان والله مو قادره انسى

وبصراحه وبدون مجامله احس اني طيبه واخواتي يستغلوني يعني أي شي يطلبونه مني اسويه واحيانا زوجي يعصب وينقهر من طيبتي مع اني لي كم شهر متغيره واحاول ما انفذ طلباتهم

خلاصة الموضوع طردة اختي مضايقتني ابي حل ؟؟

شكرا لكم والله يوفقكم

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[لوليتا2006]

حبيبتي انتوا خوات وشوه يعني طردتج تستوي امور اكثر عن جذه والاسباب عديدة لكن في النهاية لا تخلين الشيطان يدخل بينكم ... والظفر عمرة مايطلع من اللحم ...

وشوه ما سوت تراه يوم بتقولين ...أخ.... هيه أول أنسانه عند راسج ... صح ولا...

[ريـا]

شكرا لوليتنا

والله يوفقك ويسعدك

[لمعة]

ليش ما اتقوليلها كل اللي في خاطرج مهما كان انتو خوات وقوليلها انا احنا خوات وعلاقتنا المفروض ما تكون بهاي الطريقة المهم اترمسينها في الموضوع ها مشكلة اللي يبادلون او ياخذون اخوان
بس هي ليش طردتج؟؟؟؟؟؟؟؟؟؟؟؟

[Rouge]

مرحب الغالية..

الله يهديكم خواتي.. هذا وانتوا خوات عيل لو غرب شو بتسوون :1 (39): .. الانسان ما له غير أهله.. حاولي تيلسين وياها وتفتحون قلوبكم لبعض .. ومثل ما قلتي لا تخلون أهل ريلج يلاحظون أي شي وتستوون مضحكه لهم.. وادعي لها بالهداية..واتعوذوا من ابليس.. ترى هذا كله من الشيطان :12 (39): ..


السموحه حبيبتي..

تحياتي لكم،، :22 (21):

[رجاااااااوي]

خذي كلام الرسول عليه الصلاة و السلام:::خيرهما من يبدأ بالسلام....

[اوهــــــــــام]

صح كلام رجاوي

خذي كلام الرسول عليه الصلاة و السلام:::خيرهما من يبدأ بالسلام....

[شجون_الإمارات]

حبيبتي في فرق بين الانسان يكون طيب وبين الانسان يكون ساذج ويستغلونه الناس يعني ممكن اكون طيبه بس مب لازم تسوين لهم كل شي يبغونه على حساب راحتج حتى لو كان زوجج ، افرضي شخصيتج وانج بعد انسان وله حق يستانس في هالحياه ...يعني خلج قابضه العصى من النص لاطيبه زايدة لا نحاسه وعناد ... واختج روحي كلميها وعامليها بطيب خذي مابخاطرها يعني حاولي وتعالي على نفسج شوي وبجذي سواء انها رضت بيكون هالشي زين والحمدلله بس اذا تمت على موقفها بيكون انتي اديتي الي عليج وزياده بعد
مثل ماقالو في الامثال ( الطيب يعايي الطبيب ) يعني بطيبتنا ممكن نغير اشياء وخيرهما الذي يبدا بالسلام

والسموحه منج

اختج_شجون الامارات

[ريـا]

لو أقولكم على المشكله بتضحكون والله

المشكله ان اكلها مايعجبني لأن كله ثوووم وأنا ما أحب الثوم ودائما اقولها اني ما احب الثوم واليوم الي طردتني فيه كنا مجتمعين مع اخواتي وقلت لها الاكل اليوم كله ثوم وكملت كلامي وقلت اليوم الي يكون الفطور عندك اكون جوعانه وما كأني اكلت وبس ما دريت الا البنت انقلب وجهها ومن الضحك تحول للغضب وتعصب علي وتصارخ وبالاخير قالت اكلي ما يعجبك خلاص لا تجيني من جد اليوم الي الفطور عندي لا تجين خلاص ما ابيك تدخلين بيتي انا لما شفتها معصبه سكت وجلست اضحك واخواتي كانوا يردون عليها ويضحكون على اسلوبها وبعدين حطو اللوم علي الي قاهرني ان الموضوع تافه مايستاهل الطرد واحنا متعودات ننتقد بعض ونتريق على بعض بدون مانزعل بس يمكن وقتها كانت معصبه ما ادري ؟؟


وبس هذي الحكايه كلها ههههههههههههههه ادري تافهه بس قاهرتني لأنها قالت لي لا تدخلين بيتي وهي اصغر مني وعادي نتكلم ونسولف ودائما نتقابل عند امي بس انا مقهوووره من كلمتها وحاولت قد ما اقدر مانجتمع في رمضان بس زوجي مو موافق يقول ماتبين تدخلين بيتها لا تدخلينه بس جمعتنا في رمضان ما اقدر اغيرها
يعني الي يشوفنا يقول مابينا شي بس والله انا مو قادره انسى مع ذلك اضحك معها واسولف واساعدها وداائما تطلب مني اساعدها اذا عندها ضيوف وارتب البيت معها يعني عادي حياتنا بس قلبي مو قادر ينسى كلمتها


وأشكركم جميعا فعلا ردودكم ريحتني

الله يوفقكم ويسعدكم ويبعد المشاكل عنكم

[misso]

انا اقول كلميها عن السالفه
وقولي حقها ترا الموضوع وايد حز في خاطري
وصدقيني في نفس الوقت هي بتشرحلج ليش قالت جذه وانها غلطانه
وبتنسون كل شي في وقتها وبعدين يوم بتتذكرون بتيلسون تضحكون على عماركم

انتو خوات وحرام انه يستوي من بينكم كل هالحزازيه والمشاكل

واذا انتي ما تبين اتقولين حقها وصي وحده من خواتج انا اذا كنت متضايجه من اختي اخبر
اختي الثانيه اتقولها وهاذيج اتقول انا سويت جذه وجذه عشان جي وبعدين ننسى ولاجنه شي صاير

الله يهديكم وان شالله ما يتكرر هالشي

[نــــوره]

حبيبتي ما عليه

المسامح كريم

لا تفكرين تقولين بردلها الطرده

بالعكس خلج الاحسن و ادعيلها بالهدايه

الدنيا ما فيها خير.. كم بيعيش الواحد

و انتو خوات مالكم غير بعض

سامحيها و كلميها .. خذيها مكان هادي بروحكم .. خليها تفتح قلبها .. شو فيها شو سبب هالاشياء الي تسويها فيج

[Traneem]

الله يهديج اختي، وحليلها، الرمسه اللي قالتها يت و هي معصبه! عقب يوم كامل في المطبخ و صايمه و تعبانه! ما فكرت فيها مسكينه، و الدليل انها يتج ثاني يوم لبيتج! يعني ما كانت قاصده!
عيوني حطي عمرج بمكانها،من الصبح تكرفين في المطبخ و انتي صايمه، و اخرتها اتي هي و جدام باجي اهلج اتقول اللي انتي قلتيه، شو بتكون ردة فعلج؟؟؟ اذا بتيودين عمرج هي ما رامت!! لا تاخذين الامور بحساسيه، تراكن خوات، و كل شي ينقال ما بينكن عادي!
عيل انتي لو تسمعين رمستنا انا و خواتي، يتقولين حشا عدايل، مب خوات! لكن و الله لو شو عصبنا، ما ناخذ ع بعض، و انرد نسولف عقب نص ساعه! المهم، صفوا النفوس، و لاتخلون ابليس ما بينكم!
و الله يهديكم للخير ان شاء الله:1 (68):

[غلاالسعودية]

طيب هي ملت من كثر انتقادك لاكلها من جد حرام طول يومها تطبخ وانت تجين تقولين لها لا صرت عندك اجوع ومااكل اكيد بتنقهر صح ماالمفروض يوصل للطرد بس انت بديتي عليها ولكل فعل رده فعل رأي اعتذري لاختك وقوليلها انك ماراح تنتقدين اكلها بعد كذا وبعدين قوليلها ان طردتها لك من بيتها زعلتك وفي النهايه مالكم الابعض فلا تخلون الشيطان يلعب بكم

[ريـا]

أشكركم خواتي

وبصراحه تفاجأت لما قلتوا أن الخطأ مني

وأشكركم كثير لأنكم فهمتوني وان شاء الله بعد كذا ما انتقد اي شي

شكرا لكم والله يسعدكم

[*كـراميل*]

يقولج
الكلمه الطيبة صدقة
وقل خيرا او اسكت
والرسول عليه الصلاه والسلام ماكان يقول هالاكل مب حلو

انتي لو كنتي ببيت ضيوف واكلهم كله ثوم
بتقولين لهم هالكلام اللى قلتيه لاختج؟؟!!

اكيد لا
بس لانها اختج تكلمتي بصراحه
لكن عزيزتي مب كل الناس
يتحملون الصراحه والانتقاد
خصوصا اذا كان قدام جماعه

انا اشوف انج مخطئة
المفروض تاكلين او لا تاكلين بدون تعليق
ومثل ما قلتي هي تعرف انج ما تحبين الثوم
لكن هذا اسلوبها بالطبخ
وانا بصراحه ما اتجرأ اقول لاختي
انا اموت من الجوع كل ما ييت عندج
الصرراحه الكلام هذا خالي من الذوق

والمجاملة والكلمة الطيبة هي اللى تجمع القلوب
صحيح ان ردة فعلها شوي مبالغ فيها
بس الخطأ بدى منج
اشتري لها هدية
وزوريها وراضيها وقولى لها
انج كنتي تمزحين وان اكلها حلو

سلام عليكم