ليــــش جي يقووولي؟؟

**طموحه انا** · 2009-11-04, 03:40

السلام عليكم
خواتي انا عندي مشكله واللي هي اني ابا اكمل ماستر
طبعا انا يوم بطلت الموضوع مع ريلي عصب علي وقالي اذا فكرتي اتسيرين ورقتج وراج؟؟
تخيلوا ليش جي يقولي ؟؟

يقولي عقب عقب مب اللحين ....وليش عقب وشو الفرق من عقب واللحين
انزين لو ما يباني اسافر بروحي تراني اقوله تعال وياي
للعلم انا ما ما بسير الا عالامتحانات بس يعني بالسنه مرتين او ثلاث مرات.. يقولي دوامي وما اقدر اهده
انزين قلت له بشل واحد من اخواني في اي مره انت ما تكون فاضي فيها
يقولي انتي خلج حق بيتج وحقي اللحين ويبي لنا ياهل وعقب يصير خيرررر
بنات انا معرسه من شهر 4 يعني اللحين تقريبا صارلنا 8شهورر
وللحين ربي ما رزقنا بياهل
بنات انا احس اني بخاطري اكمل اللي بديته انا درست ست سنوات طب اسنان وخاطري يكون معاي ماستر اانا احس اني فيني حماس ..ودام ان ربي ما رزقني ببياهل اكمل فرصه ليش لا
يقولي عيل انتي تاخذين حبوب منع حمل عسب اتكملين دراستج..انا منصدمه هو يحبني يتوقع مني انا اسوي جي
بصراحه انا عفت الدر اسه وحتى الوظيفه عفتها
احس اني ما ابا اسوي شي خلاص ولا ابا شغل ولا ابا وظيفه
يقولي لو فكرتي اتسيرين اتكملين ورقتج وراج ..

شو اسوي شورن علي ..ترا الماستر منحه من الدوله لو رفضته خلاص راحت عليك يا صاحبي
وكمل عقب على حسابك الشخصي
انا مضايقه وااااااايد

المزيد من آخر المواضيع من نفس القسم:

**الهوى دانة** · 2009-11-04, 03:44

ماشاءالله عليج ربي يحفظج .. والله اختي ماعرف شوه اقولج غير ربي يسهل لج امووورج وييسرها عليج وتسيرين

وتدرسين وتيييب المـــاستر ياااااااااااااارب العالمين

**صعبه المنالي** · 2009-11-04, 03:45

ماعرف شو اقولج.. بس دامه مب راضي خلاص طبي الموضوع.. حافظي ع بيتج وريلج اخير لج الغاليه

مااقول لج الشهاده مب زينه بس دام عندج قولي الحمدالله ولاتعورين راسج ولاتفلعين عمرج وعقب تصيحين قالج مايبا قوليله فالك طيب خخخ يختي من مايبا الراحه الحين لو انا مكانج ولا افكر اتحرك من بقعتي خخخخ الاخت عيازه

احس اني خربط ع العموم حبيت اساعدج ^^)

**مخيمه فالكراج** · 2009-11-04, 03:45

خلي حد من الاهل يقنعه
الله يوفقج

**ملكة الاحاسيس** · 2009-11-04, 03:46

مدري شو اقولج اختي .. الشور شور ريلج .. يعني اما يقتنع عن طريق شخص فاهم وواعي من اهل الاسرة .. او ما يقتنع والله يكتب لج الي فيه الخير يارب

**طموحه انا** · 2009-11-04, 04:06

انا خليت مره اخوي يرمسه..جان يرد عليه بكل سهوله انا ما ارضى مرتي تسير كل شوي وتسافر عني
انا مب معرس عسب اتم بروحي بليا حرمه
حسته اناني في تفكيره..هو ما كان جي ..قلت له اليوم انااني وما تحب تشوفني ناجحه
الصراحه غمضني وحسيت انه رقد وهو مضايج وما رمسني من بعد هالكلمه...انا بنفجررر والله ماشي وقت
اخر وقت لتسليم الاوراق يوم 18=11

والظاهر ان مافي امل يقولي الموضوع غير قابل للنقاش واحمدي ربج انج تشتغلين واني راضي

**tOffee** · 2009-11-04, 04:43

الله ييسر أمورج ..

**tOffee** · 2009-11-04, 04:46

هالسلم لازم وايد حريم يمرن فيه .. الله يعينج اختي .. ويوفقج ف دراستج وحياتج الزوجية .. ما انصحج تتنازلين .. بس بعد ممكن تكملين عقب ..

**LADY LOVE** · 2009-11-04, 04:52

أنصحج نصيحه لوجه الله لا تخربين على عمرج وتدمرين زواجج ترااااااااا والله صح انتي طموحه وعندج حلم وتبين تحققينه بس زوجج هو الأولى والأبدى
انتي توج في بداية حياتج الزوجية طيعيه وان شاءالله بتكملين دراستج يوم الله بيريد
ولا تسمعين كلام اي وحده تحرضج على ريلج لانه فالنهايه انتي الي بتضيعين ريلج من ايديج مب هن
مره وحدة اتصلت البث المباشر اتصيح تقول انا كنت طموحه وكانوا ايون يخطبوني وارفضهم كانت دراستي اهم شيء عندي
درست برع ويبت احسن الشهايد ولكن في شو فادني انا عمري 40 سنة خاطري اعرس وايب عيال تقول لو يرد الزمن بختار اتزوج
ولا ادرس واحصل شهايد !!!!!!!!

**esm_3la_msama** · 2009-11-04, 04:53

المشاركة الأصلية كتبت بواسطة الهوى دانة

ماشاءالله عليج ربي يحفظج .. والله اختي ماعرف شوه اقولج غير ربي يسهل لج امووورج وييسرها عليج وتسيرين

وتدرسين وتيييب المـــاستر ياااااااااااااارب العالمين

**ورد جـوري** · 2009-11-04, 06:14

المشاركة الأصلية كتبت بواسطة 2008 عرسي

انتي ما تفقتي معاه قبل العروس واضح انج طموحه واذا ماحققتي طموحج بتكونين تعيسه في حياتج واذا هو من بداية حياتكم مايباج تكونين سعيدة وتحققين طموحج اعتقد بدي مصلحتج عليه ولو صدقة غاليه عنده وتهمينه بيقبل واذا طبقج لا سمح الله معناته هو من الاساس بايعنج وعلى اي مشكلة في حياتكم او خلاف بيطلقج

شو هالرد شو بيطلقج وبايعنج بارك الله فيج..

اختي وايد رياييل جي.. توكم يعني ما كملتو سنة!! اصبري شوي.. عقب ان شاء الله بتتعودون على بعض اكثر وما اعتقد بيمانع..
بس اي منطق يقول انه عشان شهادة او جراسة الوحده ما تطيع ريلها!!
دام ما عندج وقت وموعد التسجيل جريب.. ردي اقنعيه حاولي.. او خلي حد يرمسه للمرة الاخيرة..

واذا ما طاع.. ان شاء الله عقب تكملين شو المشلكة يعني..
ما عليج منه.. توكم معاريس ما شاء الله.. الظاهر انه يبا يهددج اونه عسب تخافين ولا تييبين سيرة الموضوع

والله يوفقج غلاية.. ويسهل امورج

**نهّووود** · 2009-11-04, 06:34

اختي العزيزه
لا تضايقين بعمرج ولا تكدرين نفسج
كل وحده منا عندها طموحات .. بس أحياناً تصير أشياء توقف في طريق تحقيق هذي الطموحات
واذا ما حققنا بعض من هذه الطموحات ما بيوقف العالم .. ولا بتتوقف حياتنا
يمكن سبحان الله .. الله مارايد لج انج تكملين الدراسه لمصلحتج .. ويمكن مع مرور الأيام زوجج يوم يشوفج انج طعتيه وخذتي بشوره الله يسخره لج ويغير رايه .. ماتعرفين حكمة رب العالمين في هالشي
لا تحطين في بالج ان زوجج قال لج هالكلام لأنه ما يباج تكملين الدراسه او انه أناني .. لا .. حطي في بالج انه يحبج ومايباج تكونين بعيده عنه وخصوصاً انكم توكم متزوجين .. والزوجه اللي تطيع زوجها الله يعوضها خير

وعلى فكرة .. انا كنت ادرس في كلية الطب اتزوجت وطلعت من الكليه في السنه الأولى وكنت وااااااااااااايد متضايقه لأن حلم الطفوله اني اكون طبيبه يوم اكبر .. لكني استخرت والخيره فيما اختاره الله .. والحمدلله اتزوجت ويبت عيال وكملت دراستي الجامعيه في تخصص ثاني بامتياز والحين موظفه في مكان زين ودرجتي الوظيفيه الحمدلله والشكر راضيه عنها
ما حققت طموحي وحلم طفولتي.. لكن ربي عوضني بالأفضل له الحمد والشكر

والله يسخر أمورج يارب وتحققين كل طموحاتج برضى زوجج

**دبي 1313** · 2009-11-04, 07:12

شهادتح ما بتنفعج يوم بتخربين الي بينج وبين ريلج ما يباج تكملين مب غصب

يوم ان الطمووح و الشهاده اهم من العايله عندج ليش عرستي !!!!!!!!!!!

اسمحيلي اشووفج نتي الغلطانه

**بربرينه** · 2009-11-04, 07:24

الله يفرج عليج كربتج كثري من الأستغفار ربج أكرم وصبري أختي الصبر زين والله يسعدج ويرزقج الذريه الصالحه

**yara du** · 2009-11-04, 07:47

انا اشوف كل ردود البنات قاسيه عليك حبيبتي ..والبعض ممكن عنده غيره ماادري ...
. كلها وجهات نظر لكن ما اتفق اللي تقول بدك تكمللي دراسه ليش تتزوجي غلط انه الدراسه تحرم البنت من الزواج او انه الزواج يكون عائق في تكملة الدراسه....!!!!! اتعجب الكل يقول مادام تحبي الدراسه ليش تتزوجي؟؟؟؟
اول شي ممكن ما اجتها المنحه الا وهي متزوجه يعني بهذا الوقت جاتها الفرصه ..(تضييعها) الفرصه مره وحده بالحياة....
. تاني شي الواحده لتنتظر تكمل دراستها تكون عنست وهي تريد تتزوج وما تعنس وبنفس الوقت اذا ربي موفقها ومتفوقه ليش ما تكمل ايش ناقصها ودام تقول ما عندها اولاد يعني ما في اي عوائق .... ومدام الله ابتلاها بزوج بهل العقليه لازم تصبر وتدعي ربها ويمكن يكون خير لالها .... بس استغرب توها عروس ويقوللها اطلقك اذا تكمللي !!! اصبري حبيبتي اصبري عليه...... وبنفس الوقت خللي احد من الاهل يقنعه.
عسى ربي يجعلك الخير بكل خطوه ويوفقك حبيبتي

الموضوع: ليــــش جي يقووولي؟؟

أدوات الموضوع

عرض

ليــــش جي يقووولي؟؟

المزيد من آخر المواضيع من نفس القسم:

المواضيع المتشابهه

ولدي فيه صفار بويهه بليييييز الي عنده نصايح يقووولي بلييييز

ليــــش ماتفتحـــون قسم لل..............

ليــــش يا رأس الخيمة ؟؟؟