مقهوووووووووووووره

**بنتكم الصغيرة** · 2009-10-29, 07:41

من صغري واهلي الله يهداهم ما زرعو فيني الثقه بنفسي

في حياتهم ما قالولي كلام يرفع المعنويات

وما قالو لي مثلا ماشا الله عليج شاطره ،، حلوه ،، الخ من كلمات اللي ترفع المعنويات

لين كبرت وانا احس عمري خسفه ،، وما اتشاهد

هالكثر اخسر على كشختي واتريا حد يمدحني لكن محد او نادر جدا

والمديح كله لغيري

مع اني اللي البسه كله ماركات والماسات وعلى الموضه وايد

ادري بتقولون لي ليش تتريين مديح الناس

لازم،، كل وحده مثلا يوم العيد تتمنى حد يمدح اناقتها خاصه اهل زوجها

لكن اهل زوجي لا ،، ولا حتى زوجي

ربيعتي تقول يمكن هم من الناس اللي لو يشوفون شي حلو ما يرمسون

كيف ما يرمسون ؟؟ وهم يمدحون وحده من صوبنا ولو شفتو لبسها الله لا يبليكم

مال قبل 6 سنوات

وانا محد يقول لي شي

والله انقهر // ابغي حد يمدحني يقولي شي اووووووووووووف

ادري كل وحده بتدخل موضوعي بتقولي سالفتج سخيفه ،، بس عادي كل وحده فينا مرات اييلها قهر سخافه ..

اتريا ردودكم

المزيد من آخر المواضيع من نفس القسم:

**Pink Touch** · 2009-10-29, 07:49

يمكن يشوفونج حلوة وكاشخة عالآخر فعشان جي محد يكلف عمره يمدحج ^^

مرات تصير لنا مثل هالمواقف لما نكشخ ونكون آخر أناقة ومحد يعطينا كلمة حلوة

بس عادي انتي خلج واثقة بعمرج واهم شي تكشخين لنفسج مب حقهم

ترى أهم شي الثقة بالنفس خيتو

**~..أم الدويس..~** · 2009-10-29, 07:51

قلتيها..يمدحون وحده لبسها مال 6 سنوات قبل .. معناها ذوقهم مختلف

مب شرط اللي يعيبج يبيبعهم..

الناس اذواق المهم انتي كوني واثقه من نفسج والبسي اللي يعيبج وخلاص..

اذا عن الريال هذا طبعه مايمدح.. انا يوم اصبغ شعري مايرمس ولا يعلق وهذا تغيير

هم جيه ها طبعهم اغلب الرياييل...

**شمايل العين** · 2009-10-29, 07:55

ههههههههههههههه

فديتج والله انتي وااايد حساسه خلج كول ولا تهتمين باللي حولج اهم شي انج انتي راضيه فاللي انتي اتسوينه لا تترين من حد يمدحج خلج واثقه من نفسج....

اتلبسي واتكشخي وخلج عاديه اهم شي انج انتي تتكشخين لريلج حتى لو انه هوه ما يمدحج اهم شي انج انتي مش مقصره معاه ..

والسموحه منج ...

**ريم الحزوم** · 2009-10-29, 07:57

هلا اختي
بالعكس سالفتج مب سخيفه
كل انسان يحب المدح وخصوصا النساء لانه يرفع المعنويات ويزرع الابتسامه على الوجه ويزيد الايجابيه عند كل حد فتكون ردة فعله تجاه كل شي حواليه حلوه ومشرقه

المدح مهم جدا لكل حد
بس ماادري ليش هلج وهل زوجج جذيه بالله عليج كلهم كلهم جذيه
الله يعينج ياختيه
تدرين انا لو مكانج ببدأ بزوجي وبقوله بطريقه غير مباشره يمددحني وشوي شوي بيتعود
يعني بير الكلام ير منه ههههههه

والا دور ليج صديقات ايجابيات وفرفوشات يعوضونج
ويامرحبا الساع

**نيازي** · 2009-10-29, 07:58

اختي عادي تصير هالمواقف البعض مايمدح خاصه اهل الريال لانهم شوي يغارون خاصة اذا جافوج حلوه بس عادي كلنا يصير ويانا انا اهل ريلي نفس الشي لدرجه مرات ارباعتي وكل اللي يجوفوني يمدحوني ومن الكلام الزين وبس احصل عمتي وحمياتي يبدأون انتقاداتهم الا شو هاللبس واخييييييه ومب شي وشو هالذوق ومن الكلام اللي يسم البدن مع كل وحده غيرهم طبعآ تمدح لبسي وتقول روعه اللا هم بس عرفت ان كل هذا بسبب الغيره فقمت اطنش وانتي عادي حبيبتي لاتتريين اطراء او مدح من اي حد اهم شي انج انتي عاجبه نفسج وجايفه نفسج حلوه وبس

**دبي 1313** · 2009-10-29, 08:00

انتي حلوه وانيقه وراقيه وكشيييييييييييييييييييييييييييييييييييييييييييييخه وطيبه و عصبيه بعد << مدحتج ^_^

الغاليه يمكن ذوووقهم مال اول و بعد خيتووووووو بعد لو انتي مب حلوه ومب عايبتنهم جان ما خطبوج لولدهم و جان ريلج ما خذااج لا تكونين حساسه

**بيلساااان** · 2009-10-29, 08:03

تعرفي لييييييييش ما يتمدحوووون فيج

لأن ما عندهم كلماااااااااات حلوه تنقال فيج

فديييييييييتج والله

**بنتكم الصغيرة** · 2009-10-29, 08:18

مشكورين كلكم على الردود

بس صدق اتفاجأت ان معظمكم مروا بمثل هالموقف اللي انا ماره فيه

صدقكم ،، اهل الريل يغارون تقريبا ،، بس بعد يمدحون هاذيج اللي قتلكم عنها اللي ذوقها مال 6 سنوات قبل وانا لا ...

يتطالعوني من فوق لين تحت ولا يقولون شي

ولا حتى من وين خذتي ها ؟؟

انا قمت اعاملهم بالمثل

ما امدحهم ولا امدح لبسهم ولا لبس عيالهم

بس مرات اشك بعمري وبلبسي ،، اقول ليش جي انا شو لابسه ؟؟ ولا بلاه لبسي ؟؟ اشك والله

**LADY 4 DUBAI** · 2009-10-29, 08:29

غناتي يمكن لانج دوووم متكشخهـ و متزينهـ ..

و متعودين عليج بهالشكل ... ف عشان جي ما يقولون شي ..^؛^

لا تتضايقين حبيبتي ... اهم شي انج عارفهـ شو تسوين ...(:

||

**الأصالة** · 2009-10-29, 08:34

الحمدلله احنا يوم نشوف حريم اخوانا لابسين لبس يديد او عباه او اي شي يديد
نمدحهم وطبعا حتى هم بالمثل
احس ان موضوعج مب سخيف بالعكس كل بنت تتمنى اللي يمدحها ويمدح جمالها ولبسها وكل شي فيها
بس كل حد ذوقه غير عن الثاني يمكن انا اشوفه حلو بس غيري يشوفه مب حلو نوعي في لبسج مرات الغالي ما يكون حلو كثر البسيط والرخيص والله..

**eyonan** · 2009-10-29, 08:38

أختي لا تزعلين

تعرفين انا بيت اهلي بس عمتي تمدح وتقولي كلام حلووو ، وتقول ملابس حلووو واكسسورات

بس احياااانا في ناااس انتي تشيرين اشياااء حلوه حتى ما يقول لج حلووو ، واذا هم يشترون شي حتى مب حلوووه تقعد تقووول هذي انا شريتها بكم وما اعرف شووو تقعد تمدح اغراضها بس ما تمدح غيرهااا لانهاااا هي تبه هي تكون افضليه .

انا شراتج

بس اهلي يقولن وااايد حلووو عليج

اما اهل ريلي بس عمتي تقووول حلووو ، اما الباقياااات ما يبون يعطون رايهم ، لانهم يشوووفون انتي اغراضج احلى ما يبون يقارون ...

**نواظر** · 2009-10-29, 08:48

بادري انتي بسؤال ريلج..شرايك فيني اليوم..! حركي عنده المشاعر لفتي نظره لج بالسؤال مب باللبس والكشخة من غير ولا كلمة منج..لأنه أحيانا كثيرة يكون هذا برستيج وعادة كل حرمة تقريبا الأناقة والكشخة فالكل يكون تعود عليها جيه
لكن تعالي حق اللي تتكشخ في المناسبات فقط أكيد بتلفت النظر لأنها مسكينة توها غيرت من شكلها وهم بعد سواء زوجها أو أهل زوجها ماينلامون توهم يشوفونها متبلورة ومتعدلة خلاف اللي دوم كاشخ يصبح الأمر عادي عندهم
بس ماعليج الحلو حلو

**Ana Ahwak** · 2009-10-29, 09:03

ما عليج منهم الغالية .. أهم شي انج واثقة من نفسج وعارفة انج ستايل مدحوج ما مدحوج هذا شي راجع لهم..

يمكن ذوقهم غير عن ذوقج فشان جي ما يمدحونج ويشوفونج غير عنهم

**منورة** · 2009-10-29, 09:23

فديتج والله انا لاحظت شي اكسري الروتين شوي يعني البسي اشياء مال قبل مب عيب هذا المفروض لبسنا سوي مخورات والبسيهن لان الاهل ما ايعيبهم لبس الموضة بس البنات بعضهم بعض ايعيبهم حتى ريلج بيعيبه لبسج وبيكون تغيير يمكن لبسج اغلبه بناطلين البسي مخاوير وكثري منهم واسمعي المديح

الموضوع: مقهوووووووووووووره

أدوات الموضوع

عرض