تعبانة من ريلي ...

**ونة ندم** · 2009-10-15, 17:29

السلام عليكم ورحمة الله وبركاته...

بسرد موضوعي .. واتمنى ألاقي حل منكم.. ولو سمحتوا مابي رد يسم البدن .. مب ناقصة غلاسة من حد... أنا إلي فيني مكفيني وزووووود...

بنات انا تعبانة نفسيا ً... أحس اني مكبوته ... مالي خلج لشي ... انا ما عندي عيال صارلي جم سنة والعالم الله إذا بيصير يوم من الأيام أم... ربي لا تذرني فردا ً وأنت خير الوارثين .. العيال مش همي الكبير ... مشكلتي ريلي .. مشكلتي الملل إلي عايشة فيه ... مشكلتي أني بعيدة عن أهلي ... مشكلتي أني ما عندي حد غير ريلي .. قبل كان غير وألحين صار غير ...والبيت صار فاضي ... الكل عرس وما بقا حد فيه ...

والمشكلة الكبيرة والأهم في ريلي ....ريلي يحب دوامه وايد.. وانا احترم فيه هذا الحب والأخلاص ... لكن مشكلته ان حبه وأخلاصه في دوامه على حساب بيته وحسابي وأهم شي حساب صحته ... صاير مهمل وايد وهو مب حاس ...صاير يومنا بهذي الطريقة ... يظهر الدوام الصبح ... يخلص دوامه على الساعة 4 ... والحبيب يقعد لين الساعة 5 أو 6 أو 7 بالليل... يعني ما عنده أي إشكال ... يرجع البيت يقولي حطيلنا غدا .. طبعا أنا ما أحط شي في حلجي لاني أعرف أنه ما ياكل شي... يغمضني وايد..طول القعدة وهو يخبرني بتفاصيل دوامه...وأنا اتناقش معاه ...أحسسه أني مهتم فيه... عقب الغدا<<<<<< صار عشا مب غدا... يقعد على الجرايد أو بيقعد على الإيميل وأغلب القعدة يخبرني عن دوامه .. وانا بعدني آخذ وأعطي معاه ... عقب إذا بنظهر .. تعالوا عاد فالسيارة طول الوقت رمسة عن دوامه ... إذا بتكلم عن شي ثاني ... يرمس إشوي وعقب يرجع يسولف .. أنا أحاول أظهر مواضيع أبيه ينسى الدوام .. يتناقش إشوي عقب يرجع مرة ثاني ... عقب الرجعة .... إذا بنتعشى طبعا ما يخلى العشا من سوالف الدوام ... قسما بالله ما أبالغ ... طول اليوم دوام دوام دواااااااام...

مرات أكون نايمة ... يتصل فيني ... يقولي بليييييييييز روحي على كمبيوتري وطرشي لي الملف الفلاني .. طبعا ملف دوامه ... ولا يقولي صميمي الشي الفلاني للدوام ... وفوق هذا انا أقوله إن شاء الله ... حاضر ... وأسوي أي شي يبيه عشان يرتاح...

بس تعالوا .. لما أقوله خذ إجازة عشان شي معين ... بزول العيادة نشوف سالفة العيال .. المهم نسوي شي ..يقولي لا كيف أخلي الدوام ... أقوله ليش شو بيصير فالدوام ... يقول ما أقدر أخليه وبالضرابة ياخذ إجازة ...

ومرات وايد أتكلم معاه .. أسولف معاه عن أي شي ... في نص السالفة ألاحظ انه مش معاي .. أعصب .. يقولي ما سمعت لاني كنت أفكر بسالفة الدوام ... يرتفع ضغطي وأعصب ..يقولي خلاص خبرني السالفة من أول ... ومرات وايد أقوله قوم نروح مكان يقولي تعبان ... طبعا من دوامه ..

يعني لدوامه ما يقول لا لكن لي يقول تعبان ... اناتعبت منه ومن دوامه ...

تناقشت معاه وأقوله أنا ما اتحمل هالعيشة ...يقولي لازم تتحملي ... افهمه ما يجوز هالشي إلي تسويه يقولي انزين قوليلي شو أسوي في دوامي .. انا دوامي جيه ...أقوله وأنا ؟؟؟؟ يسكت ... يقولي شو ناقصنج .. انا ما أشوف نفسي مقصر معاج... اقوله تغيرت عن قبل ,, يقول لا ما تغيرت ...

قبل كنت اتناقش معاه بهداوة ألحين صرت ما اتحمله ...المشكلة اني اقوله انا صرت ما اتحمل .. مليت .. أقوله شوفي لي شغل .. يقولي من بعد الأزمة ما في شواغر ... اقوله نروح نشوف سالفة العيال ..يقولي انا تعبان ... بنشوف الويكند انا الحين تعبان من الدوام وما عندي وقت ...

جم مرة قلت له .... افصل بين الدوام وبين بيتك ... حرام عليك تعبتني ... يقولي لازم اشتغل ولا الشغل بيتراكم وما في حد يشتغل غيري ... اقوله لا تخلي الدوام يغطي علينا ةعلى الصحة إلي انت هاملنها ... يقولي شو أسوي مابإيدي حل ...

كل يوم ضرابة ... بنات انا مليت كرهت نفسي ... أقوله خلني بروح بيت أهلي جم يوم أغير جو .. يقولي لا ... تمي عندي ... انا ما أحب أقعد بدونج ... يعني بس أهم شي عنده راحته وانا ولا شي ....
أقوله تالدوام أهم مني ؟؟؟ يقولي لا ... بس انا دوامي جيه ...

بنات انا تعبت .. والله تعبت لاعت جبدي ... أحاول أشغل نفسي بأي شي .. عسب يمر الوقت ... جم مرة أقوله انا مستعدة أسمعك وآخذ وأعطي معاك لكن بحدوووود... عطي حقي وأنا مستعدة لأي شي ,,, لكن لا حياة لمن تنادي .... أهم شي شغله ,,,,

صرت عصبية وايد رغم ان طبعي مب العصبية ... لكن من الضغط إلي هو حاطني فيه صرت ما اتحمل شي .... أمس رحت أزوووور أمي .. تقولي شو فيج صايرة عصبية .,,, أقولها ماعرف ... مابي أحطه جدام أهلي بصورة مش حلوة ....

كرهت نفسي ... بنات بلييييز محد فيكم يقولي سويييييييييله ليالي رومنسية وماعرف شو ... هو أصلا مش متفيج لي عشان يتفيج لليالي الرومنسية ... هو يبي بس يشتغل شغل الدوام .. والحين طالعة بنقشة يدية .. كل يوم والثاني يايب شغله البيت .. ومرات وايد كنت أساعده ألحين مليييييييييت .. قبل كنت احب اسويله .. الحين صرت أركه أسمع شي يخص شغله ,,, وقمت أقوله في ويهه ,,,

سامحوني كلامي ملخبط .. حبيت أفضفض ...

قبل ... كان أهون عن الحين .... تخيلو بنات

المزيد من آخر المواضيع من نفس القسم:

**ليش يا دنيا** · 2009-10-15, 17:52

الله يعينج و يهوون عليج
حاولي اتفهمينه انه شغله مو كل شي ف حياته
الشغل له حق وانتي لج حق ,, المفروض عقب ما يطلع من الدوام ينسى الشغل وكل شي
بس ريلج شكله عااااااااااااااشق الدوام لدرجه مثل ما اتقولين يرمس عن الدوام طول الوقت

واذا هو مو راضي يسير وياج عسب سالفة العيال ,, سيري روحج بس بعد هو لازم يسير يمكن يطلع العيب منه
او هو خايف انه يطلع العيب منه عسب جي يأجل ( حااولي وياه ) خليه يحس انه عندج فراااق و وقت ضايع ما اتعرفين ش اتسوين فيه

الله يرزقج بالذريه الصالحه و يهدي ريلج

**مـــــريم** · 2009-10-15, 17:52

الله يهديه..

**%Om_Khalid%** · 2009-10-15, 17:52

الله يعيينج بس انتي كلميه وقوليله الشغل في الشغل .. يوم تدخل البيت لازم تعطي وقتك حق اهلك .. قوليله انته راع ومسؤول عن رعيتك الحياة مب كلها اشغال في اشياء ثانية غير الشغل .. العمر يخلص والشغل مايخلص ..

بس انتي لا تضاربين وياه ان شاء الله شوي شوي بيتغير ... يبالج صبر .. بس احمدي ربج انه ريلج مب مغازلجي ولا يضربج ... يعني حطي في بالج انه مشكلتج اهون عن غيرج بوااايد عشان تهونين على عمرج شوي

موفقة

**principess** · 2009-10-15, 18:01

أنا متفهمة وضعج لأني مثلج تقريبا.... الله يعينج....
حاولي اتكلمينه يوم يكون مزاجه أوكي... و قوليله انج متفهمة وضعه... بس قوليله انه الدوام مهما كان مهم بس يضل دوام... والإنسان الحكيم يعرف متى يفصل بين الشغل والحياة العائلية.. وترى الدوام ما بينفعه اذا طاح مريض أو اذا زادت المشاكل من بينكم....
أنا ريلي يحاول انه ما يشتغل في البيت خاصة عقب ما شاف إن الدوام مأثر عليه صحيا ونفسيا... بس اذا ما اشتغل يتكلم عن الدوام...

مليت أنا بعد... بس الوحدة لازم تتحمل...
انتي بعد حاولي تشغلين نفسج بأي شي عشان تفتكين من الملل..
والله يعينج ويوفقج..

**مرحباني** · 2009-10-15, 19:05

الله ييييعينج

وهنيييين يارب ويحنن قلبه عليييييج

والله يسعدج

**جرحني غلاك** · 2009-10-15, 19:42

الله يهديه..

**$العامرية$** · 2009-10-15, 19:58

الله يعينج الغلا

عسى ربي يرزقج الذريه الصالحه ويرتاح بالج

**ومــVIPــن** · 2009-10-15, 20:01

الله يهديه

**piano** · 2009-10-15, 20:16

الله يهديه ان شاء الله
و الله يرزقج بالذرية الصالحة يا رب

**قماري** · 2009-10-15, 20:31

اشتغلي دوريلج شغل لا تمين يالسه قوليله مثل ما تشتغل بشتغل

**مريم الجناحي** · 2009-10-15, 21:21

الله يعييينج اختي

و الله يهديه يارب
اقنعييه انه هل ويك اند اتروحون برع المدينه و تاخذون شاليه او فندق
عل اقل انتي اتغيرين جو خليه يتكلم عن الشغل
استحملي بس المهم انتي تستانسين

و ويك اند ما اعتقد بيقول لا لانه اجازه

**أبنةأمنة** · 2009-10-15, 21:22

وااااااااااااايد رييايل جذي الشغل عشقهم,,,,,,,,,,,,

بس........

شوفي الجانب الايجابي ....

افضل من الخيانات والعلاقات بنساء اخريات,,,,,,,,,,,,,

اصبري وتمي اكدي علي موضوع العلاج........

**meshad** · 2009-10-15, 21:37

حبيبتي اسمحيلي انتي غلطانه

حاولي تشغلين نفسج باي شئ و ما تحطين ريلج فراسج 24 ساعه

انسيه

احمدي ربج انو ما يفكر فشئ تاني بس دوامه

هو يحاول يتبت نفسه فدوامه المفروض انج تساعدينه ما تأنبينه

و شئ تاني انتي سالفه الاولاد الي تاعبه اعصابج

حاولي تملي حياتج بأشئ تانيه

و سموحه

**كيمي 2** · 2009-10-15, 21:58

الله يعينج وويرده لج بعقله وتفكيره
لايكون هو مدرس ؟؟

الموضوع: تعبانة من ريلي ...

أدوات الموضوع

عرض

العرض المتطور

تعبانة من ريلي ...

المزيد من آخر المواضيع من نفس القسم:

المواضيع المتشابهه

تعبانة بموت من ريلي

تعبانة والله تعبانة .. مدري كيف بصوم باكر ساعدوني

تعبانة نفسيتي للآخر أول مرة ريلي يمد ايده علي....

ادعو لأم ريلي وايد تعبانة

اوانه يعني اوانه!ريلي يحبني؟ريلي سوالي؟ريلي خذلي؟ريلي و ريلي و ريلي..موضوع للنقاش