عطوني رايكم

[ام هويدي]

مرحبا خواتي بغيت اخذ رايكم انا ابغي اغير ديكورات غرفتي يعني الاثاث بخليه مثل ما هو لانه يديد انا امعرسه من سنه ونص يعني ما كملت وايد من خذت الاثاث وورق الجدران بخليه مثل ما هو بس بغير الفراش والكراسي والستاره والتحف البسيطه ولون اثاثي بني غامق والورق الجدران بيج وغرفتي الحاليه لونها بني يعني كل شي بني فالحين محتاره اختار اي لون بالنسبه للفراش والستاره والديكورات انا شفت ان انسب لونين بيناسبون لون الاثاث وورق الجدران والزوليه الي في وسط الحجره هو التركواز الغامق او البرتقالي المحروق انتو شو تنصحوني اي لون واذا عندكم الوان ثانيه خبروني

المزيد من آخر المواضيع من نفس القسم:

• احدث ديكورات مكاتب منزلية بتصميمات انيقة...
• ديكورات داخلية باللونين الأخضر والبني...
• صور ديكورات مطابخ لعشاق الرقي والاناقة
• صور ديكور غرف نوم مفعم بالرقي والفخامة
• اجمل تصاميم غرف طعام انيقة للعزومات والضيوف
• اروع تصاميم ديكورات مداخل غاية الرقي والجمال
• صور ديكورات مداخل منزل انيقة وعصرية
• احدث تصاميم غرف اطفال جميلة وعصرية
• اجمل ديكورات غرف طعام لاناقة منزلك في...
• ديكورات مكاتب منزلية غاية الرقي والاناقة

[Elyaziah]

اختي ..

انا من فتره غيرت ديكور غرفتي .. بس ما غيرت الاثاث .. اثاثي نفسج .. بني غامق محروق و صبغ الغرفه كان بيج .. كنت حاطه ديكورات بالعنابي .. ومليت منه .. و اختي نفس الشي غرفتها .. بس ديكوراتها كانت بالازرق و البيج مع الاثاث البني المحروق


احين غيرنا الصبغ ..
بالنسبه لي .. سويت جدارين باللون التركوازي الفريش ... مب غامق و لا فاقع .. لونه حلو .. (( نفس فندق الكوف روتانا)) .. ولبست الكنب الي عندي باللون البيج الغامق شوي .. غيرت الزوالي / السجاد .. حطيت بيج غامق و داخل فيه بيج فاتح .. يعني انا خليت اغلب الاثاث بالبيج عشان اغير المفرش و الاكــسسوارات كل كم شهر بالالوان الي اباها .. لانه البيج يناسبه كل شي تقريبا


مفارش السرير سويتها بيج ساده .. نفس ستايل الفنادق .. بس حطيت المخدات الي ورا تركوازي .. و كوشنات تركوازيه على الكنب و نفس الشي بالنسبه للحمام (وانتوا بكرامه) ..

بفكر بعد فتره .. اكسر اللون التركوازي بلون وردي .. بيطلع وايد حلو مع الصبغ و الاثاث ..


بالنسبه لغرفه اختي .. صبغت جدارين باللون البرتقالي .. و غييرت الزواليي و المفارش ..

وصارت الغرف كأنها جديده بالكامل ...


اهم شي انج ما تحطين الوان قريبه من اللون الي انتي كنتي حاطتنه .. يعني البرتقالي المحروق ما ينفع .. اذا خاطرج في برتقالي .. سوي البرتقالي العادي .. لانه المحروق قريب من البني .. يعني ما بتخسين بتغيير ..


على فكره .. انتي اثاثج بني و ورق الجدران بيج .. يعني اي لون للمفرش و الزوليه و الاكــسسوارات يناسب ..

الاخضر الليموني .... الارزق التركوازي .. الفوشي ( بيطلع روعه ) .. الاحمر .. الاصفر ( وايد حلو .. بس يباله اكــسسوارات فيها الوان ثانيه تكون فريش عشان يكسر اللون شوي)

وان شاء الله تتوفقين في اختيار اللون المناسب لج

^_^

[ام هويدي]

اشكرج على الرد