بنات تعالو وخبروني شورايكم بافكاري في التخلي عن الخادمات وخلونا نتفق ونشجع

[اميرة بلا قصور]

بسم الله الرحمن الرحيم

السلام عليكم ورحمة الله وبركاته

والله يابنات عندي افكار تجيني مرات في راسي لكنها جهنمية وحبيت اطرحها واطلعها من راسي

عشان نستفيد ونفيد غرنا .

المهم نجي للجد ياجد , وخبروني شورايكم بافكاري في التخلي عن الخادمات وخلونا نتفق ونشجع


بعض والي عندها أفكار حلوه ومفيدة تكتبها اهنيه عشان نستفيد وان شاء تنحل مشكلتنا بس انتم قولو


ا امين .

فكرتي يااخواتي ليش مانخلي عيالنا يعتمدون على اعمارهم في ترتيب غرفهم وتنظيف حماماتهم

بنفسهم ويغسلون ملابسهم بنفسهم او يكون في غرفة كل واحد فيهم غسالة يغسل ملابسه ولا تكون

غساله واحه كبيرة في حمام للغسالة والام ترتب جدول لهم على حسب وقتهم وجيتهم للمدارس وكل

واحد بيكون مخلص في الوقت الي امهم معلمتنهم والام طبعا اتعلمهم طريقة الغسيل , الملابس

العادية اشلون والملابس المطرزة والملابس ووو.

ووقت النوم في ساعه محددة ووقت المراجعه ومذاكرة الدروس ايضا في وقت محدد يعني لو كل وحده

مسوية جدول روتين يومي حق هالاشياء كان انحلت مشاكل كثير في البيوت , وكذا ان شاء الله

مانستعين بخدامه , وبعدين خلوا عيالنا تواجه الصعوبات شوفيها ؟

من هنيه بيتعلمون شي من الحياه عشان باكر اذا كل واحد تزوج وعشان في بيت بروحه اكيد بيتعلم و

بيعلم عياله ومابيشوف حياته صعبه عشان يستعين بخدامه .

الحين هذي هي الفكره بس في شي ماقلته بعد وهو ان يكون لكل واحد راتب شهري , هذا بس الي

بيعتمد على نفسه في كل شي وكذا اكيد بنشجع عيالنا على الاعتماد بالنفس , وممكن انخلي راتب

الابناء الي من الدوله مخلتنه 500 او 600 على مااعتقد هوحق الابن يكون لكل واحد فيهم اخذ حقه

واستفاد منه من عرق جبينه وكذيه بنتعلمهم قيمة الفلوس , وبعد بنتعلم كيفية القضاء على البطالة

المنتشرة في الدولة .


هااااااااااا شو رايكم يابنات ؟

انا في انتظار ارائكم بالنسبة لموضوعي واقتراحاتكم وافكاركم الجهنمية .

المزيد من آخر المواضيع من نفس القسم:

• طريقة ازالة الدهون من الاوني بسهولة وفعالية
• طريقة عمل منظف للزجاج طبيعي في المنزل
• خطوات تنظيف المنزل بوقت قليل وبدون تعب
• افضل طرق تعطير غرف النوم سهلة وفعالة
• طريقة عمل معطر هواء طبيعي في المنزل حصري
• طريقة تنظيف العباية السوداء من بقع المناكير
• طريقة تنظيف الجينز بسهولة وفعاليه
• طريقة تنظيف حوض المطبخ بسهولة وفعالية
• فوائد تخزين القهوه في الفريزر
• كيفية استخدام الخل لتنظيف السجاد

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[فن وأبتكار]

يشرررررفني اني اول وحده أرد..:22 (8): ....ورايي الغاليه محد فهالزمن يقدر يستغني عن الخدامه خصوصا لوكان البيت كبير والعائله كبيره..كل واحد وراه أشغال.تقولين كل واحد بيعتمد على نفسه؟صدقيني شووووي بس اللي بيقولون نقدر اما الباقي بيقولون مب فاضيين ووو وبالاخر كل الاشغال بطيح عالام:1 (4): وحرام نتعبها والمفروض نريحها.:1 (5): ...نحن عندنا 3 خدامات ومب ملحقين....ومانقدر نستغني حتى عن وحده..:1 (6): هذا رايي وننتظر آراء البقيه...........



...

[قرموشة]

فكرتج حلوه بس عيال هل الزمن غسلي ايدج منهم هم الدراسه وركظي وراهم وما ملحقه يشردون من يسمعون طاري الكتاب تبينهم يغسلون ويكون
حلم يمكن عند اعيال المصرين لنهم منظبطين

[wed]

ياريت والله نعتمد على عمارنا ..... أنا أكره الخدم من الخاطر بس منو نافعنا غيرهم... مشكله لو تبين تروحين مكان ضروري وين تحطين عيالج عند منو غير الخدامه؟؟؟ وأنا هذي مشكلتي لأن ماعندي حد أحط عيالي عنده غيرها لأنهم صغار...بس شو نقول غير الله كريم بس والله فكرتج واااااااااايد روعه وعيبتني إن شاءالله أطبقها يوم يكبرون عيالي....

[امطار شرقية]

مرحبا اختي الكريمة " اميرة بلا قصور " بكل صراحة فكرتك جدا ممتازة وتنم عن شخصية تحب الاعتماد على نفسها وذات تفكير اقتصادي ، وقد تفيد من يسكنون الشقق او البيوت الصغيرة عكس الفلل الكبيرة والتي تحتاج الى جهد كبير حتى يتعاون الجميع وبالخص اذا احتوت على حديقة كبيرة وتحتاج الى اهتمام كبير وعن نفسي تعجبني فكرتك واطبقها عند اجازة الخادمة لدي لمدة شهر ،
ولكنها تحتاج لتعاون رب الاسرة ولكن هيهات لمن تنادي ! شكرا جزيلا عزيزتي وابارك فيك روحك المدبرة ^_^

[ابتسامة نور]

الله كريم .. الخدم شر لا بد منه .. بس فكرة الراتب وايد حلوه وتعلم أصول الإنفاق والاستثمار وتنمي ذكاء الطفل

[اميرة بلا قصور]

ابتسامة نور

صحيح فكرة الراتب وايد حلوة حتى لو الوحده كثر عليها الشغل ممكن تستعين بالخادمات الي يشتغلن ساعه او ساعتين او حتى يومين بس. بس احس لو فكرنا شوي او عصرنا مخنا اكيد بنلاقي حل ان شاء الله

[عـذبـــــــه]

ماعندي صغاريه بالبيت

صحيح البيت مو كبير كثير والعدد قليل بس قادره اسيطر علي الوضع بروحي

ولما اكون تعبانه اجيب فى وحده تشتغل لي بالساعه متعوده عليها من سنه تقريبا

لا تفكرون الخدامه شارده من كفيلها هههههههههههههههههههههههههه

مستحيل ادخل بيتي وحده تكون شارده

امي ربتنا على النظام والنظافه وإن شاء الله اذا تزوجت بعلم عيالي نفس الشي

فى خدامه بالبيت بس لازم احنا نسوي اشيائنا

فكرتها ان لازم كل واحد يسوي حاجاته بنفسه، وتزفنا وتقول كيف احنا عشنا

سنين عمرنا كله من غير خدامه والبيوت قبل تنظفيها صج يهد الحيل ومع هذا عايشين

[بحيرة المحبة]

والله افكرة وايد حلوة

[yasyeyah]

ماعندي صغاريه بالبيت

صحيح البيت مو كبير كثير والعدد قليل بس قادره اسيطر علي الوضع بروحي

ولما اكون تعبانه اجيب فى وحده تشتغل لي بالساعه متعوده عليها من سنه تقريبا

لا تفكرون الخدامه شارده من كفيلها هههههههههههههههههههههههههه

مستحيل ادخل بيتي وحده تكون شارده

امي ربتنا على النظام والنظافه وإن شاء الله اذا تزوجت بعلم عيالي نفس الشي

فى خدامه بالبيت بس لازم احنا نسوي اشيائنا

فكرتها ان لازم كل واحد يسوي حاجاته بنفسه، وتزفنا وتقول كيف احنا عشنا

سنين عمرنا كله من غير خدامه والبيوت قبل تنظفيها صج يهد الحيل ومع هذا عايشين

عذبه ..ما فهمت كلامج..يعني البيت بيتج و اهلج قاعدين عندج ؟؟ وكيف في خدامه في البيت و انتي تيبين خدامه بالساعات ؟؟ وتقولين ما عندي عيال في البيت كانج متزوجه و ما خلفتي بس بعدين تقولين يوم بتزوج!! فيوزات مخي تشربكت:1 (7):

اما بالنسبه للموضوع ..انا ما عندي خدامه لين الحين ... و ناويه اييب ان شا الله
تعبت صراحه ..والعيال صغار وايد ما يقدرون يشتغلون الا اشيا وايد بسيطه و اذا كبار ما يتنزلون و ماعندهم وقت

[قرموشة الماريه]

انا مع الاخت قرموشه للدراسه ياالله ياالله ... وين تبينهم ينظفون غرفهم ويغسلون ثيابهم والحين احنا ما نصبر عن الخدامات لانهن يسدن التنظيف والغسيل والكواي واحنا بعد عندنا انشغالاتنا.

[Juana]

انا يوم كنت حامل ،، ريلي يترجاني اييب خدامه ،، لانه مل من اكل المطاعم ومن شغل البيت وانا الصبح دوام وبالبيت اكون وايد تعبانه من الحمل

وعقب يبت بشكارة لاني عايشة بعيد عن اهلي وولدي محتاج رعاية

المهم ما طولت البشكارة وراحت عقب 6 شهور بسبب مرض زوجها !! فريلي اقترح انه نستغني عن البشكارة وانحط ولدي بحضانه لانه كان عمره 6 شهور

ضحكت عليه الصراحه ،، المشكله انه عقب بيتم يطفر ويبي البيت نظيف والاكل جاهز !!! انزين كيف اذا انا الصبح دوام والمسا بكون لاهيه بالولد ،، ما يصير

انا اكره ايب خدامه بس شو اسوي ،، غصب عني ،،

[بسمه وحب]

:1 (22): فكره حلوه ولكن صعبة التنفيذ في الوقت الحالي
الام تشتغل - الاولاد في المدرسه وبعدين واجبات - الاب يبغي يرتاح
يعني مافي مجال

[LACNOR Lady]

الفكرة حلوة بس ماتنفعنا 100%

لأنه مثل ماقالوا الخوات عيال ألحين مشكلة مب مثل الأوادم

ماعندهم الا اللعب والمشاري والطلعات ووووووووووووووو

بس أختي احنا صح مانقدر نستغنى عن الشغالة موليه ,, لاكن ممكن نحد من مسؤوليتها الكاملة في البيت يعني كيف؟؟

1- مثلا الأم تعلم عيالها ( عاد اذا كانوا يفهمون مب الصغار موليه ) بأنهم اذا كلوا شي يقومون يرمون الورق والقراطيس بالزبالة كرمكم الله.

2- اللي يبقي ماي بروحه يسير يشرب طبعا تحت اشراف الأم لأنهم بيصبونه عالأرض أدريبهم!!

3- اللي يغير ثيابه يقوم يحطي الثياب الوصخة في الزبالة كرمتوا.

4- غالبا يكونون العيال ويا الأم والأبو مانعقهم عالشغالات الا بالطلعات ممكن أو بالمراكز عشان تتسوق الأم على راحتها. وبعد مب دايما هالشي.ولازم الأبو ويانا مب بروحنا نسوي كل شي مابنقدر أكيد.

5- الحلو انه نسويلهم جدول اذا كانوا فاهمين شوي بعمر المدارس يعني.. مثلا ,,

نشة الصبح للمدرسة الساعة 6 ص-

فترة الغدا من 2 لين 3 ض

وبعدين الواجبات مثلا لين 5 المسا

وبعدين لعب لين 6 ونص

عقب يتسبحون وممكن اذا عندهم واجبات بعد يكملونها

الساعة 7 ونص العشا

تقريبا عال 8 ونص أو 9 الرقاد

عيالي ماسويتلهم جدول لأنهم بعدهم صغار مابيتقيدون بهالشي. بس جدولي اليومي روتيني نفس الشي للمغرب وخلاص بعدين داخل عندي أهيئهم للرقاد. الا بالأجازات طبعا غيي وبعد مرات ماقدرلهم يشوفوني عالنت مشغولة وهم يشتغلون بسوالفهم بروحهم..

لاكن أتمنى والله أخليهم مرتبين أكثر لأني ماحب طلعات الليل يعني عادي عندي أرقدهم 8 أو 8 ونص المهم من أسبحهم في الليل وأعشيهم خلاص الشغالة تشل الثياب وتسير.. مب معتمده عليها عقب بشي وحتى اليهال ماعتمد عليها بتربيتهم الا اذا كنت طالعة للضرورة أو بالألعاب أو بيت الأهل.. غالبا أنا وأبوهم المسؤولين عنهم..

لأنه اذا ماقدر أخليهم عند حد محد بيتحملهم مثلنا..

بس الشغالة بحياتي ضرورية عشان البيت كبير وشغله كثير من غسيل ثياب وكوي وتنظيف حمامات كرمكم الله وتنظيف البيت والخمام بروحه سالفة.. بس أنا وياها بالتنظيف يعني أشيل وأحطي طول اليوم ترتيب ماحب شي طايح.

الله يعينا بس لازم فعلا نحد منهم وخاصة اللي تعق عيالها عندهم طول اليوم.. وأستغرب من الأمهات اللي مخلينهم يأكلونهم ويرقدونهم ويشربونهم الأدوية بعد وهم طالعين..

الله المستعان أختي.

[swana]

انااا اييد هالفكره وبشده يعني انا رافضه تماما انه يكون في بيتي خدامه ,,

وبدال الخدامه استمتع بوقت التنظيف والطباخ وغيره مع عيالي وابونا وانخليه جو من المرح والعب بنفس الوقت ,,
على الاقل يكون ترربيه وتعليم بنفس الوقت موو كل شي على الشغلات ..

ويعطيج العافيه