ريلي والموت

**منال الشريف** · 2009-09-20, 00:53

السلام عليكم

بنات صارت حق ريلي سالفه تخوف والسالفه وما فيها إنه ريلي من أسبوع سوا حادث فظيع يقول بدون سبب السياره تمت اتلف به وسط الشارع على خط بوظبي العين وفجأة انجلبت فيه ثلاث أربع جلبات وآخر شي اسكنت عطرف الشارع

يقول السياره ما اتشاهد ومستويه قوطي وما يعرف كيف طلع منها ما صارله شي يا غير إيدينه انكسرت لكن إلي مخوفنه إنه طول ما السياره يالسه تنجلب به كان هو يالس يغني مقطع من أغنيه كان يسمعها وهو يسوق ويقول كلما انجلبت السياره جلبه كلما صوته تم يرتفع زياده وإنه يحاول يسكت ويقول شي ثاني وألا يدعي ما رام كان يحس إنع عقله يقوله أسكت بس لسانه يتحرك اروحه

ويوم طلع من السياره كان يتنافظ حتى من الرهبه ما رام يوقف عريوله ويلس فالشارع وكان بعده يغني ويتنافظ وواحد من الريياييل إلي وقفوا سياييرهم يوم شافه على هالحال يلس حذاه يقوله تعوذ من إبليس ويقوله كلام يردده ويقول إنه غمض عيونه و تم يقول شرات الريال فجأه سكت ويلس يحمد ربه إنه ما مات ذيج الساعه ويقول إلي قاهرنه إنه شي ناس كانوا يصورون إلي صار وهو صوته كان وايد عالي وهو يالس فالشارع حذا السياره ويتنافظ ويغني

يوم خبرني بالسالفه خفت وثلاث أيام ما رمت أرقد لأني أنا إلي معلمتنه عالأغاني من كثر ما أشغلهم وايد في البيت والسياره حتى عيالنا محفظينهم أغاني وايد بس هو حلف عليه من هالك اليوم ينه الأغاني ما تدخل البيت وأنا من خوفي من الي صار وافقت بدون ما أناقش
أصعب شي لو كان مات على هاك الحال

نحن عايشين حياتنا عادي لا ملتزمين ولا متحررين وسط بس ادعولنا الله يهدينا نحن محتاجين

الله يحسن خاتمتنا وخواتيمكم أجمعين

المزيد من آخر المواضيع من نفس القسم:

**رعبوبة99** · 2009-09-20, 00:56

الله يهدي ويحفظ يميع المسلمين والمسلمات ياارب

**AL-Doomah** · 2009-09-20, 00:57

تستاهلين سلامة ريلج ختيه ><!

الحمدلله ربي سلمه

والله يهديكم ويهدينا

**منال الشريف** · 2009-09-20, 01:00

الله يسلمكم يارب ويهدينا أجمعين

**غاايه** · 2009-09-20, 01:03

الحمدالله ع سلامته
الله يهدي الجميييييييع يااارب

**عائشة الكندي** · 2009-09-20, 01:03

خليه يودر هالاغاني اللي ما تنفع

ويسال الله الهدايه وحسن الخاتمه ..

**still night** · 2009-09-20, 01:05

حبوبة سبحان الله هذه يمكن انذار حق ريلج وحقكم الله يهديكم ويهدي الجميع والحمد الله عالسلامة

**ام عمر1** · 2009-09-20, 01:06

الحمدلل عسلامته،،والله يحسن خاتمتنا،،
وان شا الله يكون لكم من الحادث عظه،،وسبب للهدايه،،
الله يوفقكم ويثبتكم،،

**أم عبادي وحسوني** · 2009-09-20, 01:08

سبحان الله

قولو الحمدلله انه مامات على خاتمة سؤ

الغاليه خلاص الله يحبكم ويباكم تنتبهون عاد والله ان الأغاني تجيب اكبر هم ومصايب بالدنيا

خلاص حفظو عيالكم قرءان والتزمو وخلي ريلج يحط قران بالسياره واحاديث وقصص اسلاميه احنا كله جي الحمدلله

انا مره كتبت موضوع ان يوم كنا انا وريلي والعيال طالعين وكنا بنسوي حادث فضيييييييييع بس الحمدلله الله سبحانه نجانا باخر لحظه الحمدلله والحمدلله كنت اصلا يالسه استغفر واقرأ أذكار المساء سبحان الله

**منال الشريف** · 2009-09-20, 01:09

تراه هو حلف عليه ما شغل أغاني في البيت عسب جي أقول أدعولنا لأنا نحن صراحه مب ملتزمين والوضع يخوف أنا لين اليوم خايفه من إلي صار ومب قادره أستوعب الموقف ادعولنا بالهدايه وإنا نبعد عن هالأشيا بس ادعولنا

**Miss Awawy** · 2009-09-20, 01:09

الحمدلله ع سلامه ريلج اختي
وحاولي اتبدلين الاغاني اللي عندج بأناشيد او شلات ...
يالله بحسن الخاتمه .....

**نور_العيون** · 2009-09-20, 01:12

الحمدالله على سلامته

من كثر سمع الاغاني ما قدر يذكر ربه

ترى سمع الاغاني وايد تخلي الواحد يغني على طول وحتى لو توه ناش من الرقاد يغني

انا ما اقولج ما اسمع اغاني اسمع بس مب وايد

بس يوم اكون يالسه على الكمبيوتر ولا سيارتي الحمدالله مافيها اشرطه

وعندي قرآن احط قرآن واذا دق في راسي اسمع اغاني احط الإذاعه

بس احاول ما اسمع وايد واخفف وابتعد عنها

وعلمي عيالج يسمعون القرآن ويحفظونه من الصغر لان في الكبر بتتعبين معاهم وما بيهتمون به كثر ما بيهتمون بالأغاني

والله يهديني ويهديكم ويهدي الجميع ان شاء الله

**سما دبي 2** · 2009-09-20, 01:13

ياااااااااااااااربي سبحااان الله الواحد صدق لازم يتعظ بس تعرفييين الله يحبكم بس كان يبى ينبهكم ويعطيكم درس ولو ماكان يحبكم جان خذ ريلكم منكم صدق الله تواب رحيم والله يهديييكم ويريح بالك انشاء الله

**الخفاشه** · 2009-09-20, 01:15

تستاهلين سلامة ريلج ختيه ><!

الحمدلله ربي سلمه

لا تشغلين بالج يعني من الصدمه تم يردد الاغنيه

**منال الشريف** · 2009-09-20, 01:16

الله يسلمكم ويهدينا ويهديكم أجمعين والحمدلله إنه مثل ما تقولن الله سلم ذاك اليوم الحمدلله ألف مره ومره

الموضوع: ريلي والموت

أدوات الموضوع

عرض

ريلي والموت

المزيد من آخر المواضيع من نفس القسم:

المواضيع المتشابهه

عيون احمد بين الحياة والموت

اوانه يعني اوانه!ريلي يحبني؟ريلي سوالي؟ريلي خذلي؟ريلي و ريلي و ريلي..موضوع للنقاش

بين الحياه والموت...ارجوكم