الكلام ,,,,

**شاي ملكي** · 2009-09-10, 02:26

مرحبا بنات ,,
حبيت اشتكي لكم من مشكله اعاني منها ( ريلي ) انا توني مالجه وعرسي بعد شهرين بس احسه مايهتم فيني ومايتصل ولا يسأل عني ماحسسني اني عروس رمسته وياي عاديه جدا والبارحه صدمني يوم قال انتي ليش ماتسولفين !!! بس قابضه السماعه وساكته

وهاي ثاني مره يكرر علي هالموضوع مع اني اسولف يا واضحك وحتى وياه بس احس الحوار بينا مقطوع مادري ليش ووايد احاتي باجر شو بسوي وياه ولا يهتم اذا رمسني او لا عادي عنده ، وتخيلوا انه مايرمسني الا مره وحده في اليوم بس !!! شوروا علي شو اسوي وحاطه في بالي اني مابرمسه اليوم عشان يفتقدني اسوي هالشي او لا ؟؟؟

المزيد من آخر المواضيع من نفس القسم:

**عذبة الأطبـاع** · 2009-09-10, 02:29

امممم !! قوليله استحي ومش متعوده اسولف مع غريب يوم بتعود بسولف وبتشبع سوالف !!
لا تقوليله غريب قوليله على انسان مش متعوده عليه وبس !
وعلى شان انه مايتصل مب شرط انه مايهتم فيج حاولي تتقربين منه وطرشيله مسجات نفس ماتولهت ؟؟؟
الله يسر امورج

**دلوعه2008** · 2009-09-10, 03:08

ان شاء الله البنات يفيدونج

**غـنـاتےَ K** · 2009-09-10, 03:09

عادي حبيبتي انا جي اول ما ملجت يمكن ريلي قالي مليون الف مرة انتي ليش ما تسولفين وانا وايد كنت أزعل منه عشان هاي السالفة .. انا طبيعتي اذا مب متعودة ع حد ما ارمس وكله كلامي بالنقط واستحي وايد ..
مرة قالي انتي ليش ما تسولفين ما عندج سوالف رديت عليه وقتله اذا بدق وبتسمعني هالكلمتين لا ادق احسن!! طبعا هذا قبل 8 شهور خخخ.. وبعد ما كان يدقلي وايد يمكن ع اليومين مرة .. ما حطيت فبالي ان مب مهتم فيني بالعكس قلت يمكن شغله يمنعه ..بس انا حسيت انه وايد احسن.. مب حلو ارمسه كل يوم وكل ساعة ..

و الحين عقب ما تعودت عليه لالاافرق وايد وهو بعد قالي اني اتغيرت اول هو كله يسولف وانا يالله يالله أرد .. لكن استوا العكس انا اللي اسولف ولا اسكت بعد .. !!

بس الحين هالشهر وااايد مهمل ههه كله شباب وسهرات وارقااد .
عاااااادي مطوفة .. صابرة ما باقي شي عن العرس >> (شو يخصه في الموضوع !! هع)

هيه بعد بقولج انا بعد وايد كنت اقول اليوم ما برمسه عشان يفتقدني لكن من يتصل ارد خخخ وايد كنت اقول بس ما قدرت ومرة سويتها سألني ما عرفت اجذب عليه بشي قتله الصدق ههه

وصدقيي مع الايام كل شي بيتغير وبتحسينه اقرب انسان لج فالكون

الله يوفقج حبيبتي واسمحيلي طولت عليج

**كلي_جاذبيه** · 2009-09-10, 03:18

يمكن افكاركم مختلفه وشكلكم متزوجين زواج تقليدي
بعدين مايتصل بج وايد لانه مب حاس صوبج بشي يعني ماشي شوق >>> مجرد احتمال

المهم اذا اتصل قوليله شو تحب شو تكره اعرفي شخصيته اكثر شو اهتماماته شو مشاكله
وانتي خبريه عنج اكثر
اتفاهموا من الحين احسن هاي احلى فتره بينكم

**شاي ملكي** · 2009-09-10, 03:33

المشاركة الأصلية كتبت بواسطة غـنـاتےَ K

عادي حبيبتي انا جي اول ما ملجت يمكن ريلي قالي مليون الف مرة انتي ليش ما تسولفين وانا وايد كنت أزعل منه عشان هاي السالفة .. انا طبيعتي اذا مب متعودة ع حد ما ارمس وكله كلامي بالنقط واستحي وايد ..
مرة قالي انتي ليش ما تسولفين ما عندج سوالف رديت عليه وقتله اذا بدق وبتسمعني هالكلمتين لا ادق احسن!! طبعا هذا قبل 8 شهور خخخ.. وبعد ما كان يدقلي وايد يمكن ع اليومين مرة .. ما حطيت فبالي ان مب مهتم فيني بالعكس قلت يمكن شغله يمنعه ..بس انا حسيت انه وايد احسن.. مب حلو ارمسه كل يوم وكل ساعة ..

و الحين عقب ما تعودت عليه لالاافرق وايد وهو بعد قالي اني اتغيرت اول هو كله يسولف وانا يالله يالله أرد .. لكن استوا العكس انا اللي اسولف ولا اسكت بعد .. !!

بس الحين هالشهر وااايد مهمل ههه كله شباب وسهرات وارقااد .
عاااااادي مطوفة .. صابرة ما باقي شي عن العرس >> (شو يخصه في الموضوع !! هع)

هيه بعد بقولج انا بعد وايد كنت اقول اليوم ما برمسه عشان يفتقدني لكن من يتصل ارد خخخ وايد كنت اقول بس ما قدرت ومرة سويتها سألني ما عرفت اجذب عليه بشي قتله الصدق ههه

وصدقيي مع الايام كل شي بيتغير وبتحسينه اقرب انسان لج فالكون

الله يوفقج حبيبتي واسمحيلي طولت عليج

مشكوره اختي كلامج ريحني بس الواحد لازم بيزعل وبيحط في خاطره واتصل 4 مرات ولا رديت عليه ومب عارفه شو اقوله باجر ابا احس بقدري عنده مع انه الكل يحسده علي مب غرور بس هالصدق لكنه مب محسسني بهالشي ,,

**شاي ملكي** · 2009-09-10, 03:36

المشاركة الأصلية كتبت بواسطة كلے جاذبيـــﮧ

يمكن افكاركم مختلفه وشكلكم متزوجين زواج تقليدي
بعدين مايتصل بج وايد لانه مب حاس صوبج بشي يعني ماشي شوق >>> مجرد احتمال

المهم اذا اتصل قوليله شو تحب شو تكره اعرفي شخصيته اكثر شو اهتماماته شو مشاكله
وانتي خبريه عنج اكثر
اتفاهموا من الحين احسن هاي احلى فتره بينكم

مشكوره اختي على الرد هو صح زواج تقليدي بس بعد في الفه المفروض وانا من صوبي حاولت اتصل فيه في البدايه وكل صبح اطرش له مسجات ماكان يرد عليها ولا جنه حد قال له شي الا مره وحده تخيلوا رد علي صباح النور والسرور حبيبي وبسسسسسسسسسسسسسسسسسس تخيلوا شو بتحسون عاد انتوا انه مايبا يكلمج كل وقت وانا مابيدي شي اسويه بعد يحسسني ان هالتصرفات مال يهالوه وامور تافهه وحتى يوم قتله وينك ليش ماترد عصب وقال لي اترفعي عن هالامور خليج اكبر عن جي يبا يحسسني اني عيوز وماله داعي لها كله مع اني اصغر عنه بعشر سنين ,, وسالته عن طبعه و و و يرد علي ماشي عادي الله يعيني عليه والله ,

**بنوته18** · 2009-09-10, 04:21

الله يسعدج ويتمم لج على خيير ياارب اللهم آميييين

**مسألة وقت** · 2009-09-10, 04:38

شوفي يا شاي ملكي نصصصصصصصصيحه لوجه الله تعالى الريال مايحب الحرمه اللي طايحه عليه اسمحيلي على هالكلمه بس هذا لمصلحتج شوفي الرياييل شخصيات يمكن انتس شايفه بنات من أهلج أو ربعج يرمسون بالفون بالساعات بس لا تقارنين نفسج أو ريلج فيهم لأنه الظاهر أنه مايحب يرمس وايد بالفون نفس حالتي يوم كنت مالجه في البدايه كل يوم سوالف نتعرف على بعض وجي وبعد شهرين قالي بيتصل مره كل يومين عشان نشتاق للسوالف فعادي لا تحاتين مو معناته انه مب مهتم فيج بعديييييييييييين تعالي بخبرج نصايح من خبرتي في الحياه الزوجيه أنا صار لي متزوجه ألحين خمس سنوات :
شوفي كوني وحده راااااااقيه في تعاملج وياه ونصيحه اذا هو ما دق انتي لا تدقين خلج كووول شوفي كم ما بيتصل يوم أو يومين بعدين بيتصل واذا سألج ليش ما تدقين قوليله كنتي منشغله بشي المهم الريال يتخبل عل الحرمه الثقيله والله اللي ماتطيح عليه بس هههههههها ماتطنشينه دايما مب أوكي جي بعد انتو في فترة الملجه مثلا مره جي ومره جي . صدقيني جربي اليوم لا تدقين وشوفي لو هو دق لاتركضين على الفون تريي يرن مرتين ثلاث بعدين ردي بصوت دلع على ثقل شوي أونه حركات وعودي نفسج على هالشي من اليوم ورايح ، خلج وحده شي جدامه صدقيني الرياييل أنواع وشخصيات مب كلهم نفس الشي فلازم تعرفين كيف شخصيته وتفهمينها بس أنا لو كنت مكانج مادقيت حقه شو يعني يومين ثلاث آخرشي هو بيتصل أكيد بيقول هاي شوفيه أو شاغلنها عني تراهم جي الرياييل الوحده المتفيجه حقهم مابغوها اللي لابستنهم ركضوا وراها .............

**درة الكعبي** · 2009-09-10, 04:57

عادي كلنه بالبدايه هيج بعد الزواج بيتغير الله يتمم بخير انشاء الله

**.. محتارهـ ..** · 2009-09-10, 09:34

..

لا اتحاولين تحقرينه وما اتردين عليه .. !! حاولي اتصارحينه و اتواجهينه ..

طرشيله مثلا ليش ما تسأل عني .. أو وينك ولهت عليك .. و من هـ الكلام .. صدقيني بيدقلج كل ثانيهـ ..

يوم اتعاندون بعض .. بتطيحون بـ مشاكل الله يبعدكم عنها ..

لو مثلا قالج انتي ما اتسولفين .. قوليله أوكي خبرني عن شو تبانا انسولف .. افتحو مواضيع ..

و ربي يوفقج ..

..

**MAHA21** · 2009-09-10, 12:04

مممم مدري شقولج
ذكرتني بشي ماحب اتذكره طول عمري
انا قبل كنت مخطوبة لواحد بليد المشاعر عديم الاحاسيس ما يتصل ولا يسال وكل شي بالعافية بس ما قدرت اتحمل هالعيشة بسبب تباعد الافكار من بينا

انتي حاولي تسولفين له عن يومياتج شو سويتي شو مادري شو يعني عشان تغيرون جو وتطلع سوالف وهو بيبادر بعد وان شالله خير

**رقيقة** · 2009-09-10, 12:11

اتغلي عليه بيركض وراج ههههههه

ماعليج بعد العرس بيكون كل شي غير
انتي اكسبيه بشطارتج

**نادية الاميري** · 2009-09-10, 13:02

الله يعينج اختي وحاولي تسكتين وتطنشين هالامور لانج بعيده عنه ويوم بتكونين وياه بيختلف الوضع والله يهنيج ويسعدج يارب ..

**حرم المهيــري** · 2009-09-10, 14:35

انا احس انهـ بعدكم مافهمتوا بعض يمكن ومع الوقت بيتغير هالشي بأذن اللهـ

وانتي عااد لا تاخذين عليهـ بالكلمهـ .. ولاتتضايجين .. لانهـ اذا تميتي تدققين

قالي وصدمني ومدري اشوهـ ماابتعرفين تسوين شي

ف اذا هوهـ ماايتصل غير مرهـ.. وانتي خايفهـ من هالشي انتي اتصلي

وبداال مااتكون مكالمهـ خليهن مكالمتين

واللهـ جد

واليوم اللي ماا يتصل فيهـ اسألي عنهـ لو بمسج

واذا يتضايج من سكوتج حااولي تفتحين اي حوار ويااهـ

حااولي تعرفين منهـ هوهـ شوهـ يحب وشوهـ اهتماماتهـ وناقشيهـ في اهتماامااتهـ بتلقينهـ هوهـ روحهـ يتصلبج

وبالعكس لازمـ يكون شي بينكمـ سوالف وثرثرهـ عن حيااتكم كيف بتبنون مستقبلكمـ عيالكمـ بيتكمـ عن عرسكم

ف لو انتي ماتعرفين شقايل تبدين ويااه زهبي الامور اللي بتناقشينها فياه بهالمكاالمهـ

حتى لو عساج يبتي ورقهـ وقلم وكتبتي

بس لاتكونين جريئهـ ولا خجولهـ خلج وسط بين الجرأهـ والخجل لاني حسيتج خجوولهـ

بس واللهـ يوفقكمـ

الموضوع: الكلام ,,,,

أدوات الموضوع

عرض

الكلام ,,,,

المزيد من آخر المواضيع من نفس القسم:

المواضيع المتشابهه

أحب الكلام الى الله وأبغض الكلام الى الله عز وجل *****

كيف اعلم طفلي الكلام طرق سهلة لتعليم الكلام لطفل ساعدي طفلك على الكلام ..طرق تعليم ا

بعض الكلام‏

أساليب التهرب من الكلام .. وأساليب التواصل مع الكلام ..