.. تقرير عرسي .. [ أم حمـد . ] ..

[أم حمـد .]

السلام عليكم ورحمـه الله وبركآتـه ..
شحآلكم عروسـآت .. ومعفنـآت
اليوم تفيجت وقلت بحط لكم تقرير مُبسـط عن عرسي ..

تاريـخ 5-3-2009 [ ليلة الحنـآ ] .. كآنت ليلة حنتي أحلى وأروع من ليلة عرسي بمليون مرة
والحمد لك يارب اني سويت هالليلة قبل العرس .. عشآن احس ولو ذرة إحساس اني عروس ..

ليلة حنتي كآنت في البيت ..
الكوشة سوينآها رواحنـآ ..
طلعت صورتهآ من النت ..
وخآلتيه يزآها الله خير اشترت الأغرآض اللي احتجنآها للكوشة الي وللعلم طلعت احلى عن كوشة عرسي
واشتغوا عليها خالتي وامي وخواتي في نفس اليوم .. ^^
حطينا دي جي اسلامي بيتي .. واغلب الاغاني عيمي العرج الله يسلمكم ..
خواتي يمعوا الاغاني المسحوبة من النت .. واستأجرنا سماعات مع طاولات البوفيه اللي بعد سويناه في البيت يعني بس اجرنآ طاولات عشآن ييلسون المعازيم ..
لبست ثوب نشل بحريني .. و لبست الذهب .. وطآسة ومرتعشة والخواتم .. وهالسوالف .. مال اول
ومكيجتني اختيه في البيت مكياج خفيف عشان اتغير يوم العرس وسشوورت شعري في الصالوون
نرجع للبوفيه .. يزآها الله خيييير عمـة اختيه ماقصرت في الاكل ..
بيضت ويوهنـآ في هاليوووم والله ..
كآن فخآطري اييب مصورة .. بس قلت مايحتآي بنتصور رواحنـآ .. وندمآنه اني مايبت مصورة
ع الأقل كآنت بتوثق لحظآت حلوة في احلى يوم .. بس بعد اختيه ماقصرت صورتنا بس في صور تفشل
خلص اليوم .. وسآر ريلي .. واونهم زفونآ وقالولنآ ارتاحوا باجر وراكم يوم بتتعبون فيه .. قسم بالله ماتعبت فيه نص اي نص ربع التعب اللي تعبت فيه في ليله الحنـآ .. صدق وناسه
المهم ماماتي قالت لي برايج يلسي واستـآآآنسي .. فديتهآآ والله ..
المهم .. غيرت الثوب اللي كنت لابستنه لانه كان ثقييل ولبست ثوب خفيييف كنت مفصلتنه بس ما اقتنعت فيه ورديت للحفله ..
واسميهم خواتي وبنآت عمتي وعمي رقصواااا وهزوااااااا
رببببببببشة والله .. وجآن اقوم ارقص انا بعد مع اني ماعرف ارقص خخخخخ
بس هزيت شوي عن خآآطري ..
وبس تعبنـآ .. وكل واحد روح بيته .. وجآن اقوول حق بنت خآلي [ صديقة طفولتي ] يلسي ويآآي بنسوي حفلة توديع العزوووبية انا وانتي خخخخخخ
وبآتت عندي .. واختي رقدت ويانا ف حجرتي .. عندي صورة تصييح .. ونآسة
وخلص هاليوم .. ويينـآ لليوم اللي عقبه .. ^^

المزيد من آخر المواضيع من نفس القسم:

• صور تورتة اعراس غاية الجمال والرقي
• خلطات طبيعية سريعة ومضمونة لتطويل شعر العروس
• طريقة عمل ماسك الموز للعناية بشعر العروس
• صور بدلات عريس انيقة وجميلة
• صور ديكورات اعراس شتوية ساحره
• صور ديكورات طاولات زفاف راقية لحفل زفاف انيق
• اجمل تصاميم كروت زواج انيقة وعصرية
• كيكات زواج انيقة ومميزة باللون الازرق
• اجمل اشكال كيكات زواج لاعراس موسم الشتاء
• تنسيقات طاولات زفاف بألوان مبهجة وعصرية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[أم حمـد .]

6-3-2009 [ ليلة العرس ] ..
قبل كل شي .. أنا الحمد لله كنت نعووومة بشهادة الكل ..
لدرجة اني انا حبيت عمري
تمكيجت عند هند الاميري خذت عني 4500 لانها يتني للقاعه ..
وندمت صراحه لاني خليتها تيني القاعه .. قلت لو سايرتلها انا احسن
تعرفون الماكييرات مايحبوون الزحمة في الحجرة وهم يمكيجوون العرووس ..
وماشاء الله انا حجرتي كآنت فل ..
عمتي وحميآتي وامي تمكيجوا في القاعه ويآي بس كانوا يايبين العنود وكانت طبعاً يالسه مكان العرووس وتمكيجهم .. بس صراحه واااايد تأخرت فيهم .. فيوم يتني هند ع طول دشت الحجرة الثانية مالت المعرس .. لانها لاصقة في حجرة العروس بس ماكان فيها حد للحين .. ومآطاعت تمكيجني الا هنآآك .. قالت يا امكيجها داخل يا ما بمكيجها ..
والصراحه عندهآ حق يعني الحجرة كآنت حفلة .. فووق الـ 10 تنفار داخل ><"
وانا اسمع صراريخ من كل صووب وحياتكم اني احس الدنيا تلف بي .. ويوم قالت خلاص مابمكيجها بسير .. وما ادري منو قالها خلاص سيري او شي جي زين ما اغمى علي !!
ودخلت الحمآآم قلت حق خالتي خلاص مابا اتمكيج ولا بعرس !!
من الغييييظ .. لان كل حد كان يفاتن من صوب ويعق كلام ورمسه .. وانا روحي من اصبحت وانا ازاااوع وحيلي منهد .. مول ماكنت ناقصه مشاكل هاك اليوم ..
اللي كنت خايفة منه .. انهم يخلون العنود تمكيجني .. وانا نهائياً ماحب الاسلوب اللي تمكيج فيه .. لان ستايلي وآيد هآدي وماحب الدفاشة ..
المهم .. مادري شو صار واقتنعوا او رضخوا انها تمكيجني في غرفة المعرس .. ودشت ومكيجتني وبسرعه خلصت ماشاء الله عليها .. والحمد لله عيبني المكيـآآج وايد ..
القهر .. انا كنت مقررة اتصور ويا ريلي قبل ما اطلع للمعازيم .. بس مالت الشعر الله يسامحها وااايد تأخرت علي .. وانا كل شوي اتصل في هند واقولها مالت الشعر تأخرت .. لين ماشرفت حضرتهآ .. وبدت فيني .. كانت الساعه 7 ونص او 8 الا ربع يعني ماشي فايدة اتصوور وياه قبل لان عرس الرياييل كان ف نفس اليوووم ..
خلصت شعري وكآن روووووووعه .. وآيد عيبني .. حتى اختيه اللي نآدر مايعيبها شي عيبها شعري
وساعدوني خالووتي واختيه العودة في لبس الفستـآآن .. وانا متووهقة مب عارفة كيف البسه عدل خخخخ .. لبسته وخلصت .. وبدينا تصوير .. يابت لي اختيه حمص وتبوله وقالت لي كليلج شووي من الصبح مب ماكله شي .. كلت عن خاطري وكملت تصووير .. شوي والا انتبه اني مب لابسه طقمي ><" وبسرعة بسرعة يابت لي اياه حميتي يزاها الله خير من الكبت ولبسته وكملنا تجكجيك .. الين ما حانت لحظة الصفر .. يوم اني بطلع ..
نسيت اخبركم عن كوشتي .. سواها ربيع ريلي .. بس ماكانت هآك الزود .. يعني مب كوشة عرس .. لا كوشة ملجة .. بس عديتهآ .. ويوم حد يقول لي كوشتج مب حلوة اقولهم لا حلوة انا عايبتني .. اقص ع عمري يعني .. عشآن مازيد عمري هم فوق هموووومي
المهم انا كنت حاطة ف بالي بسوي حركة مميزة ف عرسي .. بس للاسف ماسويت شي لان كانت عندنا حالة وفا قبلها بشهر فقلت ماله داعي اسوي شي .. بس اللهم خليت هنتين من بنات خالي يمشن جدامي .. كانن مطقمآت ..
صح نسيت اقولكم.. ترى فستآآن عرسي كان [ بيبي بينك ] افتح درجآآت الوردي .. يعني كنت صدق بآآربي
طلعت على زفتي اللي مسوتنها عند احلى عروووس .. باسمي .. عقب مايلست .. بشووي يو ربيعااتي يسلموون علي ويتصورون ويآآي .. اتلفلف عشان ازقر المصورة ><" وينهآآ ؟؟ محد ><" قلت حق اختيه شوفي المصورة وين ابا اتصور ويا ربيعااتي ..
كانت حميتي الله يسامحها ماخذتها تتصور ويا بعلها ><" وقته هآآ ..
المهم .. ربيعاتي تمن يسوولفن الين ما المصورة حضرتهآ شرفت .. صورتها صورة ع السريع .. وردت شردت ><"
ما انتبهت انها راحت الا يوم ركبوا بنات خالي الثلاث سلموا علي ويلسوا يبون يتصورون .. ماشي مصووورة !! زقرت اختيه الثانية حليلها كانت ترقص وقلتلها شوفيلي المصورة .. وسارت بعد بس هالمرة مايت تموا بنات خالي حوالي الـ 10 دقايق والمصوورة مايت .. افتشلللللللللت فيهم والله .. قالولي خلاص مب مشكله المهم سلمنا عليج .. قلتلهم لا مايستوي اصبرواا بس هم حسوا ان شكلهم غلط فنزلوا وانا تميت متلووومة .. ووايد حزت في خااطري هالحركة .. وبلعتها ..
عقب مانزلوا بنات خالي بشووي .. ردت المصورة وتفيجت تستأذن وقالت لي انا هني اذا بغيتي اي شي .. كنت مقهورة بس ماقلت لها شي .. صخيت عنها .. يو عقب بنات عمـآآتي وبنات عمي وبنات خوالي وخواتي وخالتي وتصورنا صورة جماعيه .. بعدنا يالسين نتصوور جان يقولون المعرس بيدش ..
كيف بيدش !! والله اني مالحقت استاانس .. يرضيكم يهديكم ماشي بيدش يعني بيدش .. اختيه فولت .. قلت لها ماعليه .. مشيها عشان خاطري .. لاتخربين ليلتي اكثر ما هي خربانة ومتكهربه ومتكركبه
يابولي غطآ الراس .. كان عبارة عن مظلة ومغطينها بقطعه طويله عشان تغطيني بالكامل ..
وش المعرس .. اللي فرحني .. ان ابوي واخواني كانوا حواليي ..
قطعنا الكيكة وكلناها وشربنا العصير وخلاص الحين حزت الطلعة عشان نسير نتصور ..
تخيلوا خلص العرس !!
قسم بالله اني مقهووووووورة قد شعري راسي .. انا اللي كنت احلم بعرس لا صار ولا استوا .. عرسي كآن اكبر مصخرة ..
صارت وآآيد مشاكل تافهة وماترزآ .. عكرولي مزاجي قبل و عقب العرس
نسيت اقولكم .. انا كان خاطري في الياقوت عشان التصوير .. بس ..... ! .. حجزنـآ في اضواء المدينه .. لا تسألون ليش .. بس صدق .. ماحسيت ان العرس عرسي والله ..
المهم .. خلص العرس والحين لازم ننطلع للفندق ..
يوم اختيه عرست امي وصلتها لباب الفندق .. وكنت اتمنى انها توصلني انا بعد ..
لكني والله مالومها .. ع كثر ما امي فرحتلي لاني بعرس .. ع كثر ماضايجها زعلي .. فديتها والله بنآت ادعولي ان الله يخليلي امي .. والله ماحصل شرآتها ام
طلعنا انا وريلي .. طبعا امي ماخلتني وراحت .. ترييت لين ما تحركنا انا وريلي وعقب هي تحركت ..
وسرنآ بيتنـآ لان كنا محملين اغراض حق امي .. المهم نزلت وسلمت ع خواتي وصحت وصآحوا ويآي .. حتى حرمة اخوي العوود زين ماصيحوهآ .. لانها كانت توها مطرشتلي مسج الف مبرووك والله يرزقج الذرية الصالحة ومن هالكلام .. وتوهآ مطرشه المسج الا انا ازاقر عليهآ فطوووووووووم انا هني خخخخ تقول والله تحريت عمري اتخيل صوتج .. لبست بسرعة ونزلت وشافتني ..
والله اني صحت صيآح هاك اليوم .. لان لا انا ولا خواتي استانسنآ بالعرس
مع ان الكل كان متحمس ويآآي .. من امي وخواتي وحريم اخواني وخالتي وبنت خالي وبنت عمتي قبل العرس بفترة ونحن نتيمع ونسووي التوزيعات ونسووي بطايق العرس لان سويناهم في البيت ..
بطاقتي كانت عبارة عن سيدي قرآن .. والبطاقة من تصميمي ..
والتوزيعات من تصميمي بعد وع نفس ديزان البطاقه .. بس ويت الديزان لخالي وسوالي اياهم في المطبعة واللهم ان نحن ترسنآ العلب .. لان التوزيعات كانت عبارة عن علب ..

[أم حمـد .]

المهم .. نرجع للمهم .. عقب ماخلصنـآ صيآح انا وخواتي .. بديت موآل ويا اميه .. وصاحت وصاحت وصاحت لدرجة اني انا قلبي عورني بس قالت لي شي ..، مستحيل انسآه .. قآلت لي طالما انتي ويا [ فلان ] انا مطمنة عليج .. وما حاتيج .. ياربي فديت قلبج يا امي .. يالسة اتذكر واصيح امي هالانسانة الحنونة اللي ع كثر مانزعلهآ ماتلحق الا وتنسى وترضى .. قلبهآ يشل الكون هالام .. الله لايحرمني منها .. خلصت مناحة ,, وركبت السياارة .. طبعاً طول الدرب وانا اصيح ..
عورت قلب ريلي .. جان يوقف السيارة ع صوب وقال لي تبيني اردج بيتكم عند امج .. قلت له هيييييييييه والله ماصدقت .. والله انه لو ردني لو جان يلست عندهم .. لاني صدق عقب هاليوم كرهت كل شي .. حتى عمري .. ماكنت اتخيل في يوم اني بفارق امي وبيتنا .. !!
رد سألني تبيني اردج جان اقوله هيه ردني ابا امي واكمل صيآآح ..
جآن ينزل واييني من الصوب الثاني وفتح الباب ..
قلت استووت الخايسة .. بيخليني ارد مشي
بس فديته والله .. قال لي انتي ليش زعلانة .. زايغه مني ؟ جان اقوله هيه
بس صدق كنت خايفة منه .. وكيف بتكون حيآتي ويآه بعدين .. وهل انا تسرعت يوم اني عرست .. لاني عند قوم امي كنت مرتاحه ومافي حد كان مستانس اكثر عني ..
انصدم فديته صدمت حياته يوم قلت له هيه زايغه منك ..
ورد ركب السيارة وتحرك .. وتميت انا ساكته طول الدرب ..
بس ويا راسه .. ماردني انا قلت زعل يعني بيردني عند امي ..
ماسوالي سالفه وسرنا الفندق [ فندق كمبنسكي ] ..
طبعاً انا ماقدرت ارقد ع طول لاني طوول الليل وانا افكر في اللي استوا في العرس وكيف اني ما استانست ولا لحظة
المهم .. عقب موت رقدت .. ونشيت ع الساعه 12 قمت وخذت لي شور وبدلت ..
الحمد لله اني يوم نشيت كانت نفسيتي احسن .. ونش ريلي ع الساعة 2 جنه .. وسبح وبدل .. وكلنـآ الكيكة مالت العرسآآن
كانوا حاطيلنا كيكة مكتوب عليها هابي هاني مون ..
طلعنا من الفندق وسرنآ بيت قوم ماماتي .. واستقبلوونآ كلهم ونثرت علينـآآ ماماتي فديتها ..
ويلسنا نسوولف وشربنـآ عصير .. بس ماتغدينا لان كنا بنتغدا عند قوم عمتي .. طلعنا من عند قوم ماما .. عشآن نسير نتغدى .. بس طبعاً انا بعدني ماشبعت منهم وماما شكلها ماشبعت منا .. جان تقوول لنا عشااكم اليوم عندنـآآ .. تسمعووووون .. سمعاً وطآعه يا أحلى أم في الدنيآآ
طلعنا عن قوم ماما .. وسرنا بيت الزوجية استقبلتنا عمتي بالتيبييب .. وعقب سرنا تغدينـآ ويلسنـآ .. عقب ريلي سآر اييب التذاكر لان كنا اليوم اللي عقبه بنطير ع ماليزيآ .. المهم اتصلت فيه .. هآ حبيبي انته وين ؟ قال انا بسير اختار موكيت للغرفه .. لان الغرفه ماكانت جاهزة وجهزت ونحن في الهاني مون .. قلت له لاترووح من دوني بسير ويآك >> لزقة .. كيفي خخخ
وسرنآ اخترنـآ .. وعقب ردينـآ عن قوم أمي .. سوولنـآ هآآك العشـآآ وهاييج التبوووله الغاوية

[أم حمـد .]

جآن يقول بابا هآ متى بتسافروون .. قلناله باجر ان شاء الله .. سأل ريلي منو بيوديكم المطار .. قاله للحين محد .. جان يقول باباتي فديته خلاص عيل انا بوديكم .. والله اني شوووي وبطييير من الفرحه .. وامي قالت بتسير ويآآنا .. قلت الحمد لله امس ماوصلتني للفندق بس بتوودعني وانا مسااافرة من دونهآ .. بس يافرحه ماتمت .. فعلاً الله يسامح كل من كسر فرحتي في هاليوم .. رغم انه ظل شرخ في قلبي .. ورغم انا انا اللي اتصلت في امي وقلتلها اسمحيلي يالغالية مابنتعبكم ويانا .. ومايحتاي تضربون خط للمطآر وتوصلونـآ .. بس يوم يقولون قلب الام .. حست والله حست اني منكسرة .. وقالت لي ماعليه يا امي .. اصبري واحتسبي الاجر عند رب العالمين .. وتروحون وتردون بالسلامة .. وقلبي ويآج .. بندت عنهآ ودمعتي ع عيني بالضبط شرآت ماهي ع دمعتي الحين وانا اكتب لكم هالكلام ..
واللي اني ما اتمنـآلكم تعيشون اللي عشته ولا تذوقون مرارة اللي جربته يا بنـآت ..
ساعات اقول طيبتي ملعوزتني .. بس عقب ارد واقول هالشي خير لي ...
سافرنـآ ..وانا وغلاتكم مافي حد ويآي .. لا امي ولا ابوي ولا اختي ..
في هاللحظـة منو ماتتمنى ان امها اللي حملت فيها 9 شهور وتعبت ويآها 22 سنة انها تكون ويآها في هاللحظة !! وتوصيها ع عمرهآ قبل لاتسـآفر ..
بس والله فديت امي ماقصرت .. قالت لي خلج ع اتصال وياي .. وانا ع كل خطوة اسويها اتصل فيها واخبرهـآ .. وصتني وصآيا الام الحنون ع بنتها.. بس للاسف ع التيلفون .. لا هي قادرة تشوف دمعتي ولا انا قادره احس بفرحتهآ .. لاني مثل ما انا كنت مكسورة هي بعد كانت مكسورة اكثر عني ..
بس ماحسستني .. والله يعوضهآ في أعراس خوآتي ان شاء الله .. ومايذوقهآ اللي ذاقته من همي ..
طارت طيارتنا .. وامي فديت قلبها كانت يوميـاً ع اتصال فينـا .. اذا انا ما اتصلت هي تتصل
وردينـآ البلاد .. والحمدلله اموري ماشية على مايرام .. بس كل ما اتذكر العرس وشو اللي صآر في العرس اتضايج وازعل .. واصيح ..


سامحوني طولت عليكم حبيبـآتي .. بس حبيت اعطيكم نبذة قصيرة ..
بس اضني اني طلعت كل اللي ف خآآطري واللي خآشتنه من زمآن

بنـآت ادعولي ان الله يثبت حملي .. ويرزقني ابنوتـه عسل عشآن اسميها على ماماتي ..
وارد لهآ شويـه من الجميـل اللي تعبت فيه عشـآآآآني .. يآآرب ..

[احتاجك..]

الله يهنيج غنناتيه والحمدلله اني اول من يرد عليج^-^


بس بغيت اخيرج ان عرسج والحمدلله كان مرتب والحندلله ان ريلج طلع ريال يخاف الله فيج ويحبج وها أهم شي^-^

[روح الورد21]

ما شاء الله يبن كان كل شيء مرتب و حلو
و كان عرسكم ربشه ^^
الله يوفقج حبوبه و يثبت حملج و يرزقج بالذريه الصالحه يا رب ^^

[مكيااجي]

الف مبروك غناتي عادي كل عرس الا تستوي فيه هالاشياء اهم شي الحين حياتج ويا ريلج
الله يثبت حملج ويسعدج ويا ريلج

ونرتيا الصور

[momo88]

يالله فديتج أنا روحي دمعت عيني ...الله يحفظ لكم الوالده ويبعد عنكم الشر ويسعدج دوووووم ويه أهلج ...والحمدلله اللي عوضج بزوج حنون هذا روحه كم يسوي ؟؟ الله لا يغير عليج إلا بالأحسن ويثبت حملج.

[***دهن العود***]

والله دمعت عيوني صحت وايد
أحس ما اتخيل اني بفارق أمي بفارق خواتي
و عشت كل لحظة كتبتيها و صحت معاج ههههه
عرسج كان حلو و مرتب شرات ما قالت الاخت
و بالبركة عليج مؤخرا
و الله يثبت لج حملج و يرزقج الذرية الصالحه

[لسعه شقاوه]

تصدقين عيبني وااايد سردج لتفاصيل العرس
واندمجت... جني عشت الموقف ^_^
لا تتضايقين حبوبه....
يكفي ان الله رزقج ام حنونه وطيبه
وزوج يخاف عليج ويحبج...
تحمدي ربج على هاي النعمه العظيمه
ربي يحفظ لج محبينج
ويثبت حملج..
ويرزقج البنوته اللي تمنينها
وتسميها ع امج الحنون
آاآمـــــين
....

[الظبـي]

،
،

عۈرٺي قلبي . ./
مآعليه حبيبٺي خيره ، ،
ۈآلله يهنيج ۈيسعدج ۈيثبٺ حملج يآرب !

[ஐ عَـفـرٌة ஐ]

بالبركـة يالعـروس
.
.
.
.
^^

[$العامرية$]

سلمت يمنااج على هالتقرير اللي مكتوب من القلب قبل الايدين اتصدقين يالسه اقرا ودمعه على عيني ....

عسى ربي يوفقج ويسعدج ويرزقج بالذرية الصالحه وأكيد أكيد ربي يحفظ الوالده لج والعوض ان شاء الله لج ولامج في عرررس خواتج .....

[buss-girl]

ام حمد فديت روحج

ماباج اتمين متضايقة جيه


غناتي مب كل شي يستوي فالعرس على هوانا .. مثل ما قلتي يمكن طيبتج الزايدة خربت عليج فرحتج بعرسج


بس ما عليج دام ريلج يحبج و يعزج و الحين بتيبين لنا احلى نونو .. ليلة العرس الا ليلة وحدة وخلاص انتي وراج الحياية الياية و حاولي انج تتحكمين فيها و تستانسين فيها ومحد يخرب عليج ..

و فديتج خاطري اشوف شكلج فالعرس كيف خخخخخخخخ

[جـــروح]

بالبركه

الله يوفقج في حياتج ويسعدج