أبغي أفضفض بس

[خيال أنثى]

السلام عليكم
والله صار لنا أسبوع أوأكثر وإحنا عايشين جو مليئ بالمشاكل والهم والغم والله مختنقه وايد شو أقول لكم بس صارت كراهيه بينا الخوات حتى والوالدين . والمشاكل من سنوات الصراحه ومثل ماتعرفون مافي بيت يخلى من المشاكل بس مرات أقول مشاكلنا غير عن مشاكل الناس ليش وصلنا لهذه المرحله ؟؟!!!!
أنا الحين بقول لكم سالفه اختي (ع ) من النوع اللي يحب يرمس وايد وماتوزن الرمسه وعليها إسلوب تفر رآس أمي علينا وايد أنانيه تبغي أمي تحبها بس وتكرهنا كلنا نبغي أمي تشاورها في كل شيء حتى لو شيء يتعلق فينا كلنا خلت أمي تكرهنا ألفت علينا أشياء وأشياء حتى لدرجه قالت حق أمي إنه إربيعتي أنا مسوية لي سحر في الهديه اللي عطتني وعشان جي إحنا وايد ويابعض!!!! يعني بالذمه صديقتي وياها وايد ونتبادل الهدايا يعني مسويه حقي سحر شو هذا الكلام عقب أمي قالت لي لاتكلمين هالبنت وشلت الهديه ما أدري وين حطتها حتى ماعطوني مجال إني أدافع عن ربيعتي وضرابه في الليل وفي النهار الين قلت خلاص مابسولف وياها في التليفون يكفينا الجامعه بس والله بنات احنا كنا نسولف عن الدراسه ويوم هيا تضايج من شيء تخبرني وانا بعد يعني علاقتنا مب إعجاب أو خرابيط .. المهم ومرت الايام وتخرجنا والبنت تزوجت والتهت بحياتها وطبعا ريلها ماقام يخليها ترمس حد وانا عذرتها وخلاص من بعدها قمت اعرف اخبارها من صديقاتها وشكلها أختي ارتاحت بعد مادرت عن الموضوع .
وبعد مرور خطبني واحد وقعدت اختي مضايجه واضاربت وياي لانها مانخطبت وانا أساسا مارديت على أهل الريال اذا كنت موافقه ولا لأ وفعلا عقب ماارتحت جان اقول ما ابغيه وارتاحت اختي قالت لي هذا الريال مايناسبج لانج خسفه !!!!!
ويوني وايد خطاطيب وكل مره تقعد اتصيح وتصارخ اختي غيرانه والله كذا مره رفضت الرياييل بسببها قلت حق امي كلما حد بيخطبني وجهوا الخطيب حق اختي خليها اختي تزوج وكلما حد بيخطبني ظهروا اختي أنا ما ابغي عقب اختي استانست وظهرو اختي بدالي بس ماصار نصيب هيا ماتقتنع مرات ومرات أهل الريال ما يبغون مواصفاتها ومرات يشوفونها كبيره على ولدهم الين آخر شيء تزوجت وطبعا لما تزوجت قامت ظهرت أسرار البيت كله حق ريلها حتى قالت له إنها كانت متعقده لانه كبرت في العمر وماتزوجت !!!! وقالت له إنه خواتي مب مثاليات مثل ماتتوقع خواتي مجرمات مايبغوني أتم في البيت ولا تتوقع أنه أهلي مثل أهلك لا بالعكس أهلك أحسن عن أهلي !!!!! والمشكله إنها تقول لنا ..
والله بنات اشكثر كلمناها قلنالها مهما تكون المشاكل في بيت أهلج المفروض ماتخبرينه وبعدين بيعايرج في أهلج ومهما شو كانوا أهلج مردج لهم .
صج بنات الكل كارهنها حتى لما إتزورنه تعتبر نفسها غريبه تقول انا أبغي أشرب لبن بس ما أدري انتوا ترضون أشرب ولا لأ حتى لما تقعد على الكمبيوتر تقول أنا بقعد على الكمبيوتر عادي ؟!! يعني قبل الزواج كانت تقعد على الكمبيوتر وتآكل وتشرب وتسوي اللي تباها شو هالحركات هذه حتى أمي مره عصبت عليها قالت لها شو هذه الحركات البايخه حتى ريلها مستغرب منها لانها في بيت أهل ريلها تآخذ راحتها في الأكل والشرب والسوالف والضحك حتى قال حق أمي ليش بنتج جي ؟؟ أمي قالت له ما أدري إسألها .. عقب قال لها يمكن انتوا ظلمتوها وايد لانه قالت لي وايد أشياء !!!! أمي قالت له مثل شو ؟؟ قال : ولا شي ولاشي وظهر من البيت .
ومن فتره قلت حق أختي (خ ) هذه أكبر مني بسنه انه أختي (ع ) وايد تراها حاطه علينا وترمس عنا وخاصة انتي ما أدري ليش واحنا لازم نوقفها عند حدها لاني أمي منقلبه علينا من سوالفها البطاليه وكل خواتي وإخواني ماقاموا يزورونا بسبب تأليفاتها والفتنه اللي تسويها .
ومرت الايام وهيا على هذا الحال إتزورنا وتألف رمسه علينا وتقول حق امي لا تخلين خواتي يرمسون في التليفون وايد ولا يقعدون على النت ولا يظهرون ترى الناس ترمس وريلي يقول اللي تظهر من البيت إتيب حق عمرها الرمسه يعني إذا ما صانوا عمارهم الناس ما بتصونهم هني أنا عصبت قلت ريلج قليل أدب عقب سكتت تفاجأت من دخولي الغرفه وإني رديت عليها والمشكله إنه أمي تقتنع بكلامها الفاضي والمشكله الثانيه إنها قاعده تعطي مجال حق ريلها إنه يدخل في حياتنا فأنا إكتفيت بجمله (رسلج قليل أدب وهو ملزوم فيج وفي خواته ) عقب أختي اللي أكبر مني(خ ) بعد ردت عليها وقالت لها إنتي مايخصج فينا ..............الخ
عقب أمي ظهرت من الغرفه وهيا مضايجه وايد ..
واتفلسفت إختي و قالت أنا ما أقصدج في الرمسه أنا أقصد إختنا (خ ) قلت لها ليش شو مسويه لج .؟؟؟ قالت شاله في قلبي عليها من سنين وهيا ملسونه وما تحترمني أبدا وأبغي أمي تضارب وياها وما أبغيها تترقع في حياتها وتمت تدعي عليها وأختي (خ ) عاد ما قصرت وحاولت أهدي الموضوع ما قدرت عقب ظهرت وسرت الصاله أطالع التلفزيون وانا بالي مب في التلفزيون وأحس إني بنفجر أبغي أصيح وبعدين راحت أختي (ع ) ولا أشوفها متصله تقول ما ابغي أشوفكم ولا تشوفوني ولا تزوروني وأزيدكم من الشعر بيت تقول هالرمسه جدام ريلها وتقول يالممثلات تتحرون عماركم طيبات .............الخ .
ألحين هذه شو دواها بالذمه ملينا منها اخواني قبل لايزورنه يتصلون يتأكدرون إختي موجوده (ع ) أم لأ .
والله الكل كرهه هيا بنفسها تخلي الواحد ينجذب إتجاهها وبنفسها اتخلينا نبتعد عنها ونكرهها حتى خواتي وإخوان من سنين ما يرمسونها من كثر ماتدخل في حياتهم وملاحظه إنه أمي يوم تسولف ويا أختي تتعب وايد لدرجه إنوديها المستشفى ولما نوديها المستشفى تقول قومي عنها بتمرضينها زياده !!!!!
ليش ؟؟ أنا شو مسويه لها في السنوات السابقه كنت أرد عليها أدافع عن نفسي وكان بصراخ وعقب قلت هذه ما إيجيب وياها الصراخ التفاهم أحسن وعقب قلت الواحد يسكت عنها والحين بنفجر منها خلاص وخواتي وإخواني يقولون لي لا تسكتين عنها هذه لما تشوفج تسكتسن هيا تزيد وأنا أدري بهذا الشيء بس صج بالذمه شو تبغوني أقول لها مليون مره قلت لها لا تدخلين فينا حتى اليوم قلت لها هالرمسه قلت لها إذا ماتبغين مشاكل لاتدخلين فينا تعالي سولفي إضحكي شرات الكل مب إتين تسوين مشاكل وتروحين والله تعبنا وطبعا تسكت عقب تقعد تدعي علينا بعدم التوفيق في كل شيء وتشمت ويدا حتى لما نمرض تقول من كثر الذنوب !!!!

انا اليوم كتبت لكم ذره من أفعالها وبغيت أفض فض لكم لانه مثل ماتعرفون هذه أشياء ماتنقال مرات حتى حق الصديقه .

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية