سريلانكا

**houbara_uae** · 2007-03-12, 15:18

ممكن وايد منكم يستغربون
من سالفة السياحة لسريلانكا

وتضحكون على اللي
يروحون لهذي البلاد

واول شي ممكن اتفكرون
فيه اذا احد اقترح عليكم هالمكان (آآآآآآآآآآآآخ
،، وصخة)

بس الواقع شي ثاني
ووايد مواطنين قاموا ايروحون لها

البلاد جدا نظيفة
واهلها يتكلمون انجليزي

اللي حاب يقضيله اسبوع
وبسعر جدا مناسب ،، وفوق هذا ممكن بعد ايسوي
شوبنغ

ممكن ايروح لسريلانكا

هذا تقرير لاحد العائلات
الاماراتية

السلام عليكم
...

العيد اللي طاف سرنا سيريلانكا .... ..واايد
استانسنا ...

بصراحه مكان وايد حلو كطبيعه تجنن .. والجو
ماعليه كلام ..

والحلو ان عندهم مصانع للملابس .. سرنا وخمينا
خم ... تشيرتات لولدي ب 3 دراهم بس !!! وملابس
البيت لنا على 10 دراهم ...

عندهم مركز اسمه ODEL اييب ماركات ... أنا سرت
المصنع ماله ... وشريت شغابات لي ولخواتي ..
حلوات ... على 3 دراهم بس ....

والصحون شو أقول عن الصحون اللي هناك قمه
فالروعه ....

أحلى شي كانت الشلالات اللي ماتنتهي .. جوها
استوائي ... لا بارد ولا حار .. لكن في منطقه
سرنالها كانت بارده ... حتى الفندق فيه دفايات
وما فيه مكيف ..

وأمطاااااار على كيف كيييفج سبحان الله ....
يوم ينزل المطر محد يقدر يشوف شو جدامه الدنيا
تصير بيضه !!

بالنسبه للنظافه العامه .. نظيفين .. تكرمون
حتى الحمامات اللي كنا ندخلها عالخط كانت
ممسوحه مسااااح ولا نقطه ماي تحت وكله ريحته
ديتول ... !!

ما أكثر كلام .. وأخليكم مع الصور ..

مشينا من المطار لين منطقه كانت وايد فوق
.... فوق الغيوم .. وهاي الصور .. من بلكونه الحجره
..

تونا وصلنا .. ويطيح مطرررر ...

الفندق كان يطل على بحيره ... وحديقه .. وعشان
نروح الحديقه .. لازم نركب على جسر .. نفس اللي
كنا نشوفه فالرسوم .. هذي صوره الحديقة ...

وانتي تعبرين الجسر ... على يمينج بحيره ..
وعلى يسارج شلال على مد البصر ... بنزل تحت
تحت تحت ...

وهذي صورة الفندق ..

وهذا الجسر .. سايرين الحديقه ..

ما يستوي العصر .. الا تشوفين الغيوم تسحب
صوبج .. تغطي الجبال كلها .. حتى آخر شي تشوفين
ان انتي صرتي وسط الغيم ... من البلكونه حتى
ما يبين تحت واضح ...

الفجر ... تشوفين الشمس تطلع من تحتج سبحان
الله ... وتشوفين الدنيا الوان عجيبه ... وقوس
قزح مرسوم فالسما ...... السناجب تحت فالحديقه
.. والسبلان تركض صوب البحيره ... فوق تشوفين
الصقور تطير ... لكن كل الحيوانات تختفي يوم
اتي حزه الريوق ويوم يطلعون الناس ...

هذي المنطقه كانت روعه ... عقب انتقلنا مكان
ثاني ...

فالدرب ...

الحريم اللي يشتغلن في مزارع الشاي ... تشوفينهم
كل مكان

كل مكان ... شلالات .. وخضره على مد البصر ......

وقفنا عند كوفي شوب يطل على هالمناظر .. وانتي
تشربين كرك من الزين تشوفين هالمناظر الحلوه
جدامج ...

شوفوا شو شفت فالكوفي شوب ؟ ... هذا الغوري
صغير شوي أكبر من كفه اليد .. ومعاه كوبين
..

واحد ينحط فوق الغوري كأنه هو الغطا ماله
.. والثاني عادي محطوط يمه لكن شكله يجنن والنقش
اللي عليه وايد رااقي ..

هذ صغير قد كفة اليد ... وقسمين .. فوق الغوري
وتحت الكوب .. انيق وايد .. حق يوم الواحد يدلع
عمره .. ولا حق الدوام ..

هذا المنتج .. عجيب .. تحطين داخله الشاي الورق
.. وتحطينه فالماي أو الحليب ... ويصير جاي
..

نفس فكره أكياس الجاي بس بأشكال حلوه ...

آخر شي ... كانت
محطتنا الأخيره .. كولومبو .. يلسنا هناك فالهلتون
.. وانتي يالسه فاللوبي ..

تشوفين هالمنظر يمج ....

الأكل فالفندق كان يجنن .. خصوصا يوم الأثنين
يكون عندهم يوم المأكولات البحريه .. همممم
بصراحه عمري ما أكلت نفس هاك الربيان .... والحلويات
.. كل شي كان وايد لذييييذ ...

لكن طوول ما نحن في كولومبو كانت امطار فظيعه
ما قدرنا حتى نطلع مكان ..

هذا من الحجره ..... أمطاااااار طوول اليوم
..

هذا مركز ODEL في كولومبو ... مركز راقي .. وأسعارهم
تقريبا نفس أسعارنا .. بس لو دورتي ممكن تحصلين
أشيا أرخص ......

من كثر المطر .. آخر يوم ونحن سايرين المطار
.... شفنا الدنيا غرقانه ...

حتى الماي كان داخل البيوت .. !! والسيلانيات
واقفات برع يتناقشن .. واليهال يتريون باص
المدرسه

والكل مستانس ويضحك ... وفي شاحنه كانت مغرزه
... الكل كان يتكلم عنها ... والناس تركض تشوفها
... هههههه بصراحه كان ربشه ... وكان خاطري انزل
امشي فماي المطر

وعقب أخذت قصطا من الراحه ... وتمتعت بكيت
كات .. همممم تحيدونه هالكيت كات ؟؟ هههه

جدول الرحله

--------------------------------------------------------------------------------

بسم الله نبدا ..

طرنا من مطار أبوظبي على طيران الاتحاد ..

التذكره كانت 1800 للشخص لانا تأخرنا في الحجز
..

وكان موسم عيد .. زحمه ..

وصلنا سيريلانكا بعد 4 ساعات ونص ..

في مطار سيريلانكا .. يوجد الكثير من المكاتب
السياحيه .. وأسعارها مناسبه

وعندهم خصومات في الفنادق .. وبعد الأحلى
ان عندهم جداول سياحيه جاهزه ..

يعني ممكن تختارون الجدول اللي يناسبكم ..
او ممكن ترتبولكم الجدول بنفسكم ..

المكتب اللي تعاملنا معاه كان يشتغل فيه
عربي مولود في سيلان .. اسمه زهراني ..

أخذ منا المبلغ في المطار .. 800 دولار .. شامل
6 أيام مع فطور في أفضل الفنادق في كل منطقه
..

(لان في بعض المناطق لا يوجد 5 نجوم .. وافضل
فندق يكون 4 نجوم .. )

وفرلنا المكتب ميني باص + سايق يتم معانا
24 ساعه ..

طلعنا من مطار كولومبو إلى مدينة كاندي
..

وهي مدينه سياحيه تبعد 5 ساعات من المطار
..

وسكنا في منطقه بجانب كاندي أعلى منها وتبعد
20 دقيقه عنها ..

اخترناها لانها منطقه هاديه .. والفندق (اللي
موجوده صورته فالموضوع الأول) اسمه (هانس
فولس) 4 نجوم ..

الأماكن اللي زرناها في كاندي :حديقة
الفيله

مصنع المجوهرات والأحجار الكريمه

عرض ليلي .. رقصات شعبيه واستعراض المشي عالنار
..

حديقه كبيره وفيها مناظر روعه ..

وجولتنا أغلبها كانت في الفندق لانه منتجع
وفيه بحيره والمنظر فيه كان يجنن ..

مدة الاقامه كانت يومين فقط ..

ثم توجهنا إلى نورإليا ..

في الطريق زرنا مصنع الجاي السيلاني ..

يم المصنع فيه استراحه حللوه ونظيفه .. وألعاب
لعيالكم الحلوين ..

ويقدمولج فيه اللي تطلبينه من الجاي بكل
النكهات ..

وممكن بعد تشترين الجاي من هناك ..

وصور الأكواب اللي كنت حاطتها كانت من هناك
..

وصلنا نورإليا ..

تبعد 5 ساعات عن كاندي

مدينه مرتفعه جدا .. تقريبا أكثر من 5000 قدم
..

والجو بارد .. 19 كحد أقصى ..

اقامتنا كانت في فندق (جراند هوتيل) 5 نجوم
، وهذا أحسن فندق هناك وانصحكم تيلسون فيه
..

الأماكن اللي زرناها في نورإليا:

كان وايد مطر .. ومع المطر الحلو تعشينا في
مطعم هندي مقابل الفندق .. لذيذ الأكل فيه
ونظيف ..

ونزلنا نتمشى في الفندق في ألعاب للأطفال
.. وفيه نافوره .. باختصار المكان تقولين في
اوروبا ..

وديزاين اوروبي ..

والسبب يرجع إلى ان كان عندهم استعمار انجليزي
.. وراح الاستعمار .. وظلت المباني الانجليزيه
الستايل موجوده ...

وزرنا السوق الشعبي .. وشرينا جاكيتات حلوه
ودافيه .. واللي شاف جاكيتي تخبل عليه يتحروني
شارتنه ب 200 و 300 ..... وهو سعره تقريبا 20 درهم
..

مدة الاقامه كانت يوم واحد ..

اليوم الثاني توجهنا إلى كولومبو

خذنا 4 ساعات من نورإليا إلى كولومبو .. وكنا
نوقف على الاستراحات اللي تيي فالدرب بين
مزارع الجاي ..

يلسنا فالهلتون .. والفندق كان أنظف فندق
موجود في كولومبو حسب ماعرف .. 4 نجوم لكن نظيف
وكااامل من كل .. فيه مطعم يقدم سي فود لكن
شي عجيب !!

واللوبي مريييح جدا .. وأكله لذيذ .. وهادي
.. ويطل على منظر جميل بتحصلونه في

الموضوع الأصلي ... وفيه سوق صغير .. ومكان
لشراء الحلويات والشوكليت ..

الأماكن اللي زرناها في كولومبو:

مصنع ODEL: يبيع منتجات من الماركه بسعر المصنع
.. عنده ملابس، ملابس أطفال، جاكيتات، صحون،
أغراض للبيت، زوالي، أكواب، العاب، اكسسوارات،
شنط .... ووايد عيبتني الأشيا الموجوده ..

مركز ODEL: مركز فيه ماركات عالميه .. والأسعار
نفسنا .. وكبير .. للأسف ما درناه كله لضيق
الوقت ..

ومركز فاشن .. هذا يبيع باسعار المصنع .. وممكن
تحصلون عنده بجايم وملابس للعيال .. وألعاب
وشنط تقليد وميك أب تقليد .. 4 طوابق .. والأسعار
يا بلاش ..

وكان مطر وااايد ... ما قدرنا نسير مكان ..

اقامتنا كانت يومين ..

الموضوع: سريلانكا

أدوات الموضوع

عرض

العرض المتطور