حريم اخر زمن ..

[خفقـــة قلــب]

السلام عليكم ورحمة الله وبركاته

شحالكن خوااتي عساكن بخير وما تشكن بااس !!

انا عضووه يديده اخبركم اني يديده يعني فرحانه لوول

المهم خوااتي عندي مووضوع ضاربتني غصه منه بكل صرااحه وخااصه اللي معرسات

وعايشات بيت اهل زوجها بسالكن انتن تشاركن في مصروف البيت

تسدن شي تقولن حق ريالكم شاركوو اهلكم في مصروف البيت!!

صرااحه انا بتكلم عن حريم خوااني امره مايسدن شي ولا يهتمن في البيت معناا قبل لا ناخذهن

نسمع العرب يقولون والله انهن حريم وراعيات بيت ومناك ماشي منه اونه وينشن الصبح

وهن رقادات لين الظهر والعصر ولا يظهرن من حجرهن الا المغرب

خواتي نحن مانباا شي منهن الحمد الله نحن ماعليناا قاصر بس الي نسمعه من الحريم عن حريم عيالهن غير ينشن الفير ويسدن البيت والمطبخ ويشاركن في مصروف البيت

نحن اللي عندناا كل يوم مخيطه ثياب وكل يوم عباه وتشريات ما يوقفن في اليوم تخسر فووق
30 الف درهم عنبوه ها يور الصراحه وحليله اخويه هب هي اللي اداوم دوم وتنش
وتم واقفه في العثره ..

يالله بنات خالناا نتناقش بكل صراحه وكل وحده تقول لنا شووه تسوي بيت اهل ريالهاا

وشووه يقولون اهل ريلهاا عنهااا !!


سبحان اللهم وبحمدك اشهد ان لا اله الا انت استغفرك واتوب اليك

المزيد من آخر المواضيع من نفس القسم:

• مندوب يختلس 800 ألف درهم من شركته
• والد طفلة يتهم مستشفى بارتكاب خطأ طبي عند...
• إلزام مطلقة برد 187 ألف درهم لطليقها
• التمييز في دبي تقر أحقية الدائن بالورقة...
• إطلاق ساعد لتخطيط الحوادث البسيطة برأس الخيمة
• الحبس والإبعاد لآسيوي اختلس 49 ألف درهم من...
• حكم بأحقية امرأة في أداء شيك حرره زوجها...
• محاكمة 3 آسيويين بتهمة ترويج المخدرات...
• يقتل صديقه تحت تأثير المشروبات الكحولية
• 100 ألف درهم تعويضا لعامل أصيب بحادث سير

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[ام فطامي3]

بصراحه انا عايشة فبيت اهل ريلي
وكمل دراستي, يعني اكون فالكلية, وعندي 3 عيال 2 يدرسون وواحد صغيرون
ويوم اروح ايكون مع عموه يالس والبشكارة, واذا عالطبخ اطبخ ع حسب المزاج, يعني يوم اتفيج
او يوم يكون فخاطري اطبخ حق ريلي
والغالية الوحده مهما كان ماترتاح الا فبيتها
ونا يوم فالعزايم الحمد لله ماقصر, وريلي يعطي عموه مصروف كل شهر
وبرايهم لو حريم خوانج مايطلعون مب اجبار
يعني هي ويين تاخذ راحتها غير فغرفتها
وكل واحد حر فحياته
والسموحه لو طولت عليج

[в6яααŋн]

اممممممممم
اناا ساكنه برووحي بس لوو كنت سااكنه ويااهم اكيد بنشاارك ف مصروووف البيت .. بس سالفة انش الفير واجاابل مطاابخ ومادري شوو ما اعتقد اني بسويها ^_^ البيت فيه الخدم شو حقه انا ارز عمري ف المطبخ وبعدين اذا الي موجوودين ما يدشون مطاابخ يت على حرمت الاخووو << داايمن حاطين دووبكم من دوبهاا انا المهم عندي ريلي رااضي عليه وبسسسسسسسسسسس ..
هييه صـــح وع سالفة اظهر من حجرتيااا ترى مب طوول الووقت بتم متقيده بلبس حشيم وحالتي حاله << ابى اكشخ حق ريلي والاهل لاااااااحقه عليهــم

[أرض دبي]

والله كلامج سليم .... 100%

طبعا انا ما اشمل كلامي لكل الجنات

بس فيه جنات .. جنها قاعده في فندق ما تجيس شي !!

حتى لو في خدم .. بس ع الاقل تحسس اهل الزوج انها تسوي شي وحرمه بيت لو تصب قهوة للضيوف

اعرف جنات .. ما يسوّن شي ... جنهن اميرات .. وهن كانو بشاكير في بيت ابوهن .. ما يعرفن شي اسمه بشكاره

وفوق هذا بيزاتهن في البنك ما تطلع منها روبيه وحده حق البيت اللي ساكنه فيه


الله المستعان

واتمنى كل زوجـه لو كانت من هالفئه .. تراجع حساباتها وتعرف ان الدنيا ديـن
باجر تييج حرمه ولدج وتسوي مثل ما كنتي تسوين قبل مع اهل زوجج


والله يهدي الجميــع

ومشكووووره ع الموضوع الطيب

[لوكل]

انا ساكنة بيت اهل زوجي

ريلي يدفع مبلغ للبيت مثلة مثل اخوانة

طبعا ايلس واساعد عمتي في اي شيء تطلبة مني

[لوكل]

انا اعتقد اذا اهل الريل يحسسون الجنة بالحب والتعاون وووو هي بتساعد وبتسوي اما اذا شيء تفرقة بين الجنات او مشاكل ما بتظهر من حجرتها طبعا

ولكن في جنات ما يتعاونن وشيء اهل زوج ما يتعاوونن يعني الموضوع من الطرفين

[قلب انسانه]

الله لا يراوي احد الحياة ويا اهل الزوج ماتخلا من النكد والوحده مهما سوت بعيونهم غريبه والكلمه محسوبه عليهاها اللي صارلي من خواته وانا ياغافلين لكم الله بس امه كانت البلسم ونور البيت الله يخليها فوق روسنا آآآآآآآآآآآآمين .واذا كان على المصروف الواحد ظروري يساعد اهله سواء ساكن وياهم او لا.

[RaiN]

اعتقد المشاركه حلوة وحتى بوجود الخدم ...

انا عن نفسي ماكنت اول ماعرست ماكنت اسوي شي والصراحه ارقد بس الين الضحى

وعقب اسير لان اصلا بيتنا كان مايخلا من الضيوف ومب حلوة اني ماكون موجوده ...

وشي طبيعي ان ريلي يساعد في مصروف البيت ...

والعلاقات الطيبه مهمه في حياتنا وايد ورضا الزوج من رضا الله واتوقع

ان مافيه زوج في الدنيا ما بيستانس لو لقى حرمته علاقتها حلوه مع هله ...

يعني أولا وأخيرا الوحده لازم تشوف نفسها وتحاول تصلحها من العيوب

وتحاول تحب اللي حولها ..مع عيوبهم لانا مانخلى من العيوب


بالنسبه حق حريم اخواني الحمدالله ماشفنا منهن الا كل خير ...

واكثرهن يلسن عندنا فتره الين جهزن بيوتهن وانتقلن في حفظ الرحمن ..

وماحد يخلى من العيوب ...

ووجودنا في هذه الدنيا لمرحله قصيره ... فأحلى شي أن نخلي علاقاتنا

باللي حولنا طيبه ..

وفعلا في فئات للأسف ماهمهن غير المظاهر والتكشخ وفئات كل همها الزوج ...

وتنسى ان علاقاتها بأهل زوجها مهمه جدا ومن رضى الرحمن ..

والسموحه ..

[كسرتيم77]

تسلمين ع الموضوع

بصراحه حلو النقاش فيه

ومعاج ان الخوان يكونون ايد وحده

ويسدون من مصاريف البيت باللي يقدرون عليه

والحرمه اللي هيه حرمه هيه اللي تنصح ريلها

حتى لو شو ما شافت من اهله تراهم بيتمون هله

وترا الدنيا دواره يوم بزين فعمتيه وعمتيه

باذن الله حريم عياليه بيزينون فيه عقب

[الحلا مبتليها]

على حسب يمكن هي ما تظهر لانه من بينكم حساسيات وما شالله نحنا الحريم نحاسب على الذرة


وطبعا لو اسوي حسنات واي يوم تصير مشكلة ينسون الحسنات ويذكروووووووووون السيئات والسلبيات


وطبعا المصروووووووووووووف سواء موجود بالبيت و لا عايش بروحه لازم اخووووووووج يدفع المصرووووف

إلا إذا هو من قبل ما يصرف على البيت من قبل لا يعرس قصدي وتعود ؟؟؟

[lailee]

في شي لازم يفهمونه اهل الريال واحنا فاهمينه ومريحين راسنا وراس اخوانا عمرهم حريمهم ما اشتكوا منا اخوانا نادرا ما يساعدون الوالده بصرف البيت واحنا البنات ما انقصر لا ومرات يوم اخونا المتزوج يقصره شي انساعده دام الوالده مرتاحه وتحب عيالها الاولاد وااايد احنا ما عليناغير انا اندور سعادتها اكثر ليش انكد على حياة الريال الحياه قصيره وحريم اخوانا عمرهم ما طرونا بالشر علاقتنا حلوه وما نبا غير ان البيت ما يكون فيه مشاكل ولو كل خوات ريال اعتبروا ان تنازلهم عن اشياء وايده فيها سعاده لابوهم وامهم جان ما سووا مشاكل لان اي مشكله اتأثر بنفسية الام والابو وهم مب قاصرين ناس كبار ويكفيهم الي فيهم .

اما بالنسبه لزوجة الولد فانا على كثر الي اجوفه من الحريم وانهن يشتكن ويمكن كلامهن ايكون صح بس ابدا ما اشجع ان حرمة الولد ما اتخلي الولد ايساعد اهله حتى لو كان ظاهر عنهم الرسول صلى الله عليه وسلم يقول (انت ومالك لابيك) والولد مجبور باهله مب مثل البنت الي اتكون مجبوره بس في حالة انها تشتغل وبعدها ما اتزوجت وهذا الكلام من شيخ دين سمعته وبصراحه قبلها ما كنت اعرف ان البنت مجبوره بشي اتجاه امها وابوها بس للفضل الكبير للام والابو في الاسلام جبر العيال بمساعدتهميوم يكبرون يا حريم كل الي اتسونه باهل الريال يرجع لكم كما تدين تدان انتي كيفج ويا اهله بس ابدا لا تحاولين تمنعينه يساعد اهله (السموحه على الاطاله)

[swaaan]

اما انا قصتي قصه مع اهل ريلي...ايام ما عرست كنا ساكنين في بيت واحد...الله لا يوريكن الي شفته انا وحرمة الاخ الكبيره..والله العظيم عاملتنا حماتي نفس الخدم..من الصبح انش..وكله كراف وشغل لين اللليل...حتى اهلي ما كنت اسير الهم الا في الشهر مره...اونه عيب البنت تعرس وتروح بيت اهلها..حتى دراستي ما كملتها تقول حماتي عيب البنت يوم تعرس تدرس وتودر بيتها وريلها...ااااه يا بنات وربي حتى الخياط ما كنت اسير له الا لازم عمتي معايه...وكل يوم هواش ومشاكل وريلي ما يتكلم يقول الشور شور امي وبس..المشكله كنت صغيررررره ما عرف اشلون اتصرف...انا يوم عرست كانت جدامي حرمة اخو ريلي العود..وكانت وحليلها ضعيفه ما عندها كلمه وكل المشاكل ع راسها وانا كنت اقلدها في كل شي..عبالي الزواج جذيه... والحين عقب فتره الي سافرت ويا ريلها والي ريلها يشتغل بمكان ثاني ..يعني شويه ارتحنا...بس عمتي بعدها ما تغيرت والله العظيم مب انسانه طبيعيه ومستحيل اي وحده تعيش الي عشناه ...حياتنا كانت نفس البشاكير وقوم عمي كانو مرتاحين وعندهم شغاله بس شغالتهم ما كنت تسوي شي بس تمسك ولدهم الصغير يعني مربيه..واحنا كل شغل البيت ع روسنا...الله المستعان ..والي كاتبته نقطه في بحر...

[~Senzi~]

موضوع حلو .. وجرئ ..

انا من وجهة نظري ,, ان أهل الزوج أغلبهم مب الكل .. ماخذين موقف سلبي من زوجة ولدهم ..

الكل يحب يمارس دور * الحماه * على زوجة ولدهم

في زوجات .. دبلوماسيات يعرفن يتفادن هالنوع من الناس .. بالسياسة والحنكة.. وتكسبهم في طرفها ..

وفي زوجات .. يستسلمن .. ويصيحن صياح تكتمه العبرة ,,

وفي زوجات ,, طاااف عندها والحياه حلوة ,, وكله واحد رضوا ولا رضوا عنها .. هههههه

انا متزوجة .. وساكنة بيت اهل ريلي ,,

وخواته ماشالله 9 ,,, وكلهن معرسات ,,
والغريب انهن كلهن رياييلهن خواتم في صبوعهن ..

واذا شافوا ريلي او سمعوا بس ,, انه يلبيلي طلباتي .. او طلعني نتعشى برع ,,
يقولون ,, لااازم يدلعها .. مستقوية عليه ,, ماكلة مخة ,,

هههههههه الحمدالله والشكر ,,

ليش ما قالوا الله يهني اخوانا بحرمته ويتمون دوم مستانسين ؟؟
صرت اتحاشى ايلس وياهن ..

بس مو معناته اني اقاطعهن .. بالعكس احب اكسبهن من صوبي مرات ..
عشان ما تستوي حساسيات ..
وفي الاخير تراهن عمات عيالي ,..

بس نحن الحمدالله .. انا اشارك في المصروف وريلي بعد ما يقصر

ودوم اقوول حق ريلي انا اهم شي عندي رضاك ورضا امك ولا خواتك .. مالي خص فيهن

وحتى ,, لو الزوجة .. صرفت 100,000 .. في اليوم .. عادي .. دام انه ريلها عادي عنده

ومشكورة عالطرح اختي خفقة قلب ... وخلج حنوونة مع حريم اخوانج ..
وحاولي تتوددين لهن .. سيريلهن حجرهن وسولفي وياهن

ترى الوحدة مرات تحب تاخذ راحتها فاللبس مثل ما قالت الاخت بطرانة ..

[زيوريخ 2005]

حبيبتي المشاكل بين حرمة الولد وأهل الولد ما تخلى
يا اما يطلعون أهل الريال مب زينين يا أما حرمة الولد تكون شينه
ونادر ما تحصلين وحده مرتاحه في بيت أهل ريلها لازم تبا بيت بروحها
وتاخذ خصوصيتها حتى لو أهلها طيبين
والواحد لازم يتساعد بمصروف البيت دام أنه مطبخنا واحد وأكلنا واحد
وغرييه أنج تقولين حريم اخوانج يصرفون 30000 في يوم ليش شو مستوي
شو بياخذون هذيلا كل يوم وهم درهم واحد ما يشاركونكم فيه

[~Senzi~]

سالفة ال 30000 هذي ,, احس انها مبالغ فيها وااايد ..
وحتى لو كان صدق ... عاااااااااااااااااادي دام الزوج ما يبخل عليها .. ليش لا!!

الزوجة ترى مب ملزومة تصرف في بيت اهل الزوج الا اذا كان برضاها ..
هذي مسؤولية الزوج واهله ..

الزوجة بتصرف في بيتها اللي تحس انه مملكتها وتتعب فيه