مجروحه من الكل !!!

[أنسه مطعونه]

السلام عليكم يابنات المنتدى أنا توني مسجله فالمنتدى كنت اتابعكم فيه بس بدون مشاركات

اليوم سجلت في المنتدى لأني أحس أن ماعندي أحد أشكيله لا من أهل ولا أخوات ولا صديقاتي


باكتب لكم كل شي بالتفصيل أدري ان في أشياء غلط فرجاءً اللي تدخل ياتقولي كلام فيه خير أو تدعي لي

وممكن أكون نسيت شي بس إن شاء الله راح اذكره



المهم


أنا عمري 29 سنه اللحين يوم كان عمري 23 سنه حبيت واحد طبعاً من ورى أهلي عن طريق النت وشوي شوي لين تطورت علاقتنا للهاتف وبعد فترة تقدم لي واحد إلا أقوله يافلان في واحد متقدم لي قالي كلمة لي يومكم أذكرها ترن في قلبي مهب في أذني لأنها طيرتني من الأرض وحسيت أني أسعد بنت في العالم

قالي : بس أنا أبيـــــج

من يومها وكل من يدق بابي اطفشه هو كان يدرس برع ورجع بعدها للبلاد أو من سنه وشوي لأنه تخرج
وهالفترة في ناس ماشاءالله عليهم تقدمو لي يمكن 4 وكالعادة اطفشهم لين الفترة اللي طافت صار لي شي مثل الحادث في حياتي قلب حياتي كلها وصحاني وفهمت كل شي وشفت الحقيقه بعيوني واللي وصلتني لهذي الحاله اللي انا فيها اللحين



من 3 أسابيع تقريباً جاني معرس وجاتني الحاله نفسها مااقدر اكل ولا أفكر ولا أضحك ولا ألبس أهمل في عمري بطريقه لا شعوريه ماني قادره ارده ولا أقدر أوافق والقلب متروس أو أقدر أقول بالوهم ...


دخل علي أخوي الصغير عمره 20 سنه ما أدري وش فيه صرخ علي أنا اذا اناديج أو اكلمج تسمعين كلامي أنا رجال وكان ماسك عصى وقام يضربني بالعصى العصى كبيره بحجم عصى المخمه يضربني بلا رحمه مع كل ضربه كنت انادي واصرخ انادي امي اختي محد يسمعني أول مره أحس اني مكسوره ومالي حيله ولا ضهر يحميني أسمعت اختي صراخي بعد ماضربني جات تركض بس هو تركني على الارض اتلوى وأصيح واصرخ وينكم ليش ماتسمعوني ليش تركتوه يضربني قامت اتصيح أختي لين شافت ذراعي وهي منتفخه وامي قامت تركض وودوني المستشفى والحمدلله ماانكسرت ايدي بس اعتقد رضوض


بعد هالحركه اخوي اختفى لمدة اسبوع من البيت ماله وجه يجي البيت لأنه يقول ماني عارف ليه ضربتها رجعوه أهلي واخواني الكبار المتزوجين للبيت بس الالم اللي تم في قلبي من ناحيته كرهته مااحبه جرحني بدون سبب وأنا لي يومكم احس بغصه فقلبي

رحت كلمت اللي المفروض يكون حبيبي أو اللي بيعوضني عن هالضرب
قلت له : يفلان تعال أخطبني
هو : ساكت
قلت له اللي صار لي وقلت له تبيني أرسل لك صورةأثار الضرب اللي في أيدي(أم أم أس)
قال : لاء تحملي ما ابغي اشوفج بهالمنظر
قلت : تقدر تجي تخطبني
قال : لاءءءءءءءءءءء
ولي يومي هالكلمه هزت قلبي
قلت : ليش مش مستعد ( للعلم أنه يشتغل وأنا أشتغل بعد)
قال : أي مهب مستعد
قلت : ليش ماأبي شي منك
قال : أبوي مب راضي


طعني في صدري وصدم قلبي وهز كل مافيني ليششش ابوك مهب راضي يقولي خواتي بعد كلموه بس هو يصد ويسكت


هذا على حد قوله ... حسبي الله ونعم الوكيل

اللحين أنا محطمه نفسياً من كل شي حتى أختي اللي كنت معاها في غرفه وحده تركتها وصرت أنام بروحي فنفس الفترة صار لي موقف معاها أصرخت علي وتمت تتكلم عني بطريقه مهب زينه قدام الكل الكل الكل

انا تعبانه شكيت همي لأعز صديقاتي اللي وقفت معاها في كل ضيقه وفي كل وقت حتى في الوقت اللي كانت بتطلق فيه .. لقيتها تصرفني وماترد على اتصالي ماترد إلا على مسجاتي بطريقه اتصرفني فيها .. والغدار خلاص اللي بينا اضن انتهى بس أنا لحد أللحين أحبه والله أقولها وأنا مستحييه بس هذا قضيت فترة من عمري معاه وهلي ولا حد منهم يفكر في مشاعري ولا إحساسي همهم إن أخوي اللي ضربني بدون سبب مايحبس روحه فالغرفة وأنا مالي إلا رب العالمين قمت أصلي وأدعي لكن خلااااص لادعاء يسمع ولا قلب يحن صرت أقول ليش عايشه إذا مالي قدر عند أي أحد يارب أموت لأن موتي وحياتي مالهم قيمه خلاص والله تعبت ما اقدر أكتب أكثر ادعولي أو قولو لي أي شي يطيب لي خاطري لأني تعبااااااااااااانه

المزيد من آخر المواضيع من نفس القسم:

• لأنّه جعل الفقير ييعش مع المؤمنين لا مع...
• الإكتئاب طاعون العصر الحديث بحث مرجعي...
• كيف تكون إيجابيا ؟
• كيف تتعامل مع ذاتك بطريقة صحيحة؟
• كيف تقوي ذاتك؟
• كيفية تطوير الذات بطرق بسيطة
• افضل طرق لتطوير الذات وزيادة الثقة بالنفس
• اهم المهارات التي تحتاجها لتطوير الذات
• طرق تطوير الذات في مجال العمل
• اقتباسات ~ مُهرة القَصر

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[موت أحبهم لكن]

السلام عليكم ورحمه الله وبركاااته...

أختي الغااليه.. ^_^.. اول شي.. ياليت تغيرين النك نيم لأنه حزيين وايد والدنيا ما تستااهل

هالحزن كلهاا.. تعرفيين ليش.. لأننا معووضين عن كل شي محرومين منها في هالدنياا

الدنيا دار اختباار وبلااااء .. ولازم نكون اقوياااء عشاان نستمر في حياتنا بكل قووه..

.. وهذا الي ترمسينه.. الله يساامحه... ابصم لج بالمليووون انه يالس يلعب من البدااايه

والدليل موااقفه الي طريتيها.. اتركييه انسييييييييه..ما يستااهل ذرره من دمووعج

بتقوولين ما اقدر صعب انسى... لأنج في مووقف صعب بتقولين هالكلاام لكن ربناا خلق لنااا نعمة النسيااان

وبتنسيييييينه مع الاياام وبيااخذج وااحد يقدررج ويصووونج يالغااليه...

شووفي الغااليه... اكثري من الاستغفاار وصلي القياام بس لفتررره معينه وشووفي حيااتج كيف بتتغير

وبتسألين عمررج ليش وصلت عمري لين هالمررحله؟ وبتشووفين انه المشكله ما يستاهل اسووي كل

هالمناااحه وخااصه لوااحد لعوووووووب ....

شووفي عمررج اهتمي بعمررج ابدي حيااة يديده.... اشغلي عمررج.. فكري بالايجاااابيه

.. وهذه الي اتقولين عنها ربيعتج مب ربيعتج .. ^_^... تخلت عنج في اصعب اياامج فأنسيهاا..

... شووفي مصاايب غيررج بتهوون مصيبتج والله...

... الله يووفقج ويفرررج همج يااااااااااااااااارب

[خدن امورد]

ماعرف شقولج الغالية هل اعاتبج ع غلطج اول احاول ابرر غلطتج بس برد وبقول الغلط غلط واحين لازم تتعلمين من

الغلط وما تعيدينها واي حد يدق بابكم اذا كان زين وخايف ربه فيج وافقي عليه مثل ما شفتي محد ياخذ وحدة يعرفها

وها درس حق كل بنت دخلت في مثل هذه العلاقات وانتي احين ادعي ربج وتوبي واستغفري يوميا وعيشي حياتج

هاي مب اخر الحياه اللي ما يباج لا تصيح تبغيه .. دوم البنات هن الضحايا الشباب يحبون فترة وينسون ويدورون

فريسة ونحن قلوبنا الضعيفة نتعلق باي حد بسرعة بدون ما نفكر بالعواقب وانتي خلي ايمانج قوي وانسي الماضي

ايام وراحت وابدي صفحة يديدة وارسمي خطط للحاضر والمستقبل ولا تتريين حد يساعدج قوي نفسج بنفسج هب مهم

انه حد يكون وياج او يسندج نحن الصراحة عايشين جنا في الغابة القوي هو اللي يعيش والضعيف هو اللي ينكسر

خلج قووووووية وازرعي الامل في نفسج وتاكدي انه ربج يحبج لانه خلصج منه ومن امثاله وحاولي ما تثقين في

حد ما منهم امااان وما وراهم الا عوار القلب حاولي تشغلين نفسج بشي زين مثلا تنمين هواياتج تظهرين تتسوقين

وربي يكتب لج كل خييير

وبالتوفيج خيتوو

[قمـآري }..]

اتوقع خلاص اتعلمتي من هالتجربه المريره ..

الله يصلحج دووم ويبعد عنج كل من يريد السوء لج ،، ..
ويرزقج الزوج الصالـح ،،
بس ماعندي شي ثاني أقوله ..

[أم حتوس]

الله يعينج اختي انتي حطيتي نفسج بهالموقف حاولي تنسين هالحب لانه من اساسه غلط واتقربي من الله اكثر والله عطانا نعمة النسيان انسي ماضيج وعيشي يومج والله يرزقج بولد الحلال

[للأمل بريق]

غاليتي .. الكلمة الي لازم ترن بإذنج : ان الي يبدأ بالغلط .. نهايتة بتكون بالمثل
مابعتب عليج بالماضي لأن الي راح انتهى ولا يمكن يعود .. الدموع الي تذرفينها كل ليله لا تزيد ولا تنقص
عمرج ضيعتيه عشان واحد ماعنده ضمير واستغل فراغج العاطفي وقدر يستدرج .. (( هذا انسيـــــة ))
انتي ما تحبينه والله قولي كيف نفسج الغاليه ترخص عشانه ؟؟ انتي ما تحبين روحج؟؟
الي يحب نفسه عمره ما يرضى اي شي يهينه ولا يجرحه ..
نصيحتي لج : ابدي حياتج من يديد .. قعدي مع نفسج وفكري فيها
شو النواقص الي في حياتي اقدر امليها ؟
نفسي كيف اسعدها ؟
كيف مقصرة بحق ربي؟
تذكري : " ومن اعرض عن ذكري فإن له معيشة ظنكى "
اذا انتي بعيدة ربج هذا حال دنياج .. الايمان مب بالعبادات لا ياغاليه
الايمان خضوع القلب واستشعار فيها والله راح تلاقين لذة ترخصين الدنيا عشانها ..
الله يهونها عليج يارب ..

[هواجس الزيودي]

الله يعينج الغالية والله ايسر امورج

[شموسه حلوه]

الله يعينج ويوفقج ف كل شي وف كل خطوه تخطينها صح يمكن اني اكون اصغر منج بس تقبلي نصيحتي ترى كل الانسان يغلط بس الشاطر اللي يدارك الغلط ويحاول يصلحه وانتي عرفتي شو غلطتج فهذا ما يمنع انج تصلحين غلطج ولا تقولين ما في وقت وانا كبيره ..لا ..في الحياه ومدام انتي عاشه في وقت وحاولي تنسين الشخص اللي حبيتيه واشغلي عمرج بأشيا ثانيه..
تقبلي مروري ..

[العمر لحظه]

صدقيني انتي بس انوي انج تنسينه وبتنسينه انا ادري انه صعب في البدايه بس عقب بتضحكين بينج وبين نفسج على هالايام وبتندمين عالوقت الي ضاع كله مع هالانسان فكري بمنطق قولي بينج وبين نفسج انا لو تزوجت اول واحد تقدم لي كنت عندي عيال ينسوني الدنيا وما فيها والله مايسوى كل الي قاعده تسوينه بنفسج وبعدين انتي مب صغيره عشان اضيعين الي باقي بالانتظار ست سنوات مب شوي الواحد ما يضمن يعيش لحظه وانتي تصيحين على واحد مايحبج لو يحبج جان قدر يقنع ابوه الريال محد يقدر يفرض عليه شي والله يوفقج مع الانسان الصالح

[دلوعه فزاع]

لادعاء يسمع ولا قلب يحن ؟؟؟؟؟؟؟؟ الله قريب من العبد حبوبه ادعي بنيه والله يوفقج

[((خفايا روحي))]

(( إن الله لا يغير مابقوم حتى يغيروا ما بأنفسهم ))

تراجعي وتوبي لله واستغفريه من كل ذنب ومعصيه
وقوي إيمانج بالله .. قوي إيماااااانج


وأول خاطب يتقدم لج ان شاء الله.. وافقي عليه
هذا طبعا من بعد الاستخاره وفوضي أمرج لله وتوكلي عليه

الله يهديج ان شاء الله ويصلح حالج وبالج ويسر امرج لما يحبه ويرضاه

[bint-ad]

الله برزقج بزوج الصالح الي يعوضج ويسعدج

[كلي جروح]

الله يوفقج الغالـــــــــــــية ..

و هذا درس و تعلمتي منه و ياليت لو تطوي صفحات الماضي و تعيشي حياة كلها أمل و تفاؤل
مب معناة أن الواحد غلط غلطة خلااااااص-أنتهت حيــــــــــــاتي- لا حبوبة كل واحد فينا يغلط يقول خلاص تعبت و محد حاس فيني و ما بنسى و ما أقدر ..الخ..

الدنيا كلها أختبـــــــــارااات..منو الي ايماانه قوي و بيتحمل هموم و مشاكل الدنيا و يقول الحمد لله لك يااارب..و الي ايمانه ضعيف من أول مشكله خلااااص صكت الدنيـــــا بويهه..

لا تأمني بأي حد..و الحمدللة أنتي موظفة و شغلج بيساعدج تنسين و ربج مسامح و كريم..

موفقــــــــــــــــــــــــــــــــــــــــــة..ا لله يرزقج من خييييره..!!و السمـــــــــــوحة

[ثنوي]

الله يعوضج باحسن منه
ويوفقج في حياتج
ويبدل الحزن لفرح
الغالية اكثري من الاستغفار والتضرع لله

[mao]

الله ييسر لج اموورج حبيبتي

وهاذي دعوة مني من الخااطر انه الله ييسر لج امورج ويوفق لج

ترا الحيااه حلوه اذا شفناها نحن حلوه

لا تيأسين من رحمة رب العالمين عزيزتي

الله ينول لج مرادج ان شااء الله آآمين