أغرب قصة ولادة

**زهرة السوسن** · 2009-05-07, 13:47

هلا يا حلووووات

حبيت اشاركم وتشاركوني باغرب قصة ولادة صارت لج او لامج اختج عمتج خالتج بنت يرانكم المهم سمعتي فيها شفتيها لو سمحتي تتشرفين وتكتبينها ...

القصة الاولي
اماية كانت تسوي الريوق حست بويع وقالت عندي موعد بسير المستشفي احسن بشوف شو السالفة ولما وصلت دخلت الحمام عزكم الله ما مدها تقعد عشان تقضى حاجتها الا وياها ويع قوي قعدت ع الارض والحمدلله طلعت انا يازيني ويا حلوووي ... ربت في الحمام مال المستشفى ولما دخلت بالغلط عليها حرمة تمت تصارخ وتزقر السسترات عشان يشلوني .... وبعد الساعة وحدة الظهر رجعت البيت في نفس اليوم والعالم مستغرب شو السالفة متى ربت طبعاً رابع ولادة عادي عندها الموضوع .... بس تدرون انا اكره اقعد في الحمام اكثر من 10 دقايق ..

القصة الثانية
وفي وحده من جماعتنا دقها الويع وهي ساكنه في المناطق الخارجية وريلها فليل ودها المستشفى وهو في الطريج تقوله بسرعة الماي نزل بسرعة احس شي بيطلع وقرب المستشفى وقفته الاشارة حمرا وقبل لا يوقف يكلمها بس ما ترد لما وقف سمع صوت مثل الياهل لما التفت شاف الام شاله الياهل ع ايديها وكانت رابع ولاده ويابت ولد بس الريال من الروووع ما عرف طريق المستشفى وتم يصيح ولا يعرف شو يسوي المهم وصل المستشفى ودخل يصارخ ع العالم الموجودة والكل يركض بس مب عارفين شو السالفة ....

المزيد من آخر المواضيع من نفس القسم:

**حلم صيفي** · 2009-05-07, 13:54

ههههههههههههههههههههه

حلوووووة وانشالله نسمع باقي القصص من البنات

مشكورة حبيبتي على الموضوع يلي يشيل الخوف من قلوب البنات ...

سبحان الله لو اراد الله الولادة تكون سهلة بتصير باي مكان ....

يسلمووووووووووو

**شوشو_24** · 2009-05-07, 13:58

سبحان الله !!

انا اعرف وحده كانت حامل بتوم ماشالله ويابتهم قبل التاسع وحده طلعت بالحمام والثانيه بالسياره ... !!

ووحده ثانيه بعد ربت قبل ماتوصل للمستشفى يعني بالسياره ههه!!

الله يجعل كل ولاداتنا سهله ميسره آمين يارب العالميــــــــــــــــــــــــــــــــن

**موزة سويدان** · 2009-05-07, 14:06

سبحان الله هاليهال مادري على شو مستعيلييين ههههههههههههه انا من جيه من اييني الويع ولا ينزل الماي اسير المستشفى و اتم امشي هناك لين تلوع جبدي .. كله و لا اربي في السيارة و لا في الحمام احس قلبي بيوقف من الزيغة و ما بعرف اتصرف

موضوعج روعة

**زهرة السوسن** · 2009-05-07, 14:08

يزاكم الله الف خير ... والله يسهل ولادة كل حامل يارب بس تكون في المستشفى

بنشوف الباقي وينهم ؟؟؟؟

**أثير الماضي** · 2009-05-07, 14:21

أميييييييييييييييييييه أخاااااااااااف ههههههههههههههههههههههههه
قصص عجيييييييييبه

**هنوده1** · 2009-05-07, 15:05

ههههههههههه قصص عجيييييبه

أنا أعرف وحده ربت فممر فندق فالخارج سبحان الله وريلها يخوز الناس عشان ما يشوفون شي وسبحان الله حطوا القصه فالجريده

الله يسهل عالجميييييييع إن شاء الله

**ام مهاري25** · 2009-05-07, 17:17

للرفع

**تاجره ف كل شي** · 2009-05-07, 17:42

اميييييييييييه لا تزيغوني
انا روحي ف حاله،،عايشه وسواس وكوابيس لذاك اليوم
كله كوم واني اربي ف السياره او ف الحمام كوم ثاني

**um 3weesh** · 2009-05-07, 18:00

ههههههههههه سوالف حلوووه ...

للرفع ...

**زهرة السوسن** · 2009-05-09, 22:54

وين قصصكم ؟؟؟

**Blo0owi** · 2009-05-09, 23:34

خخخ
ههههههه

حلوه والله

على العموم صدقها الاخت اللي قالت ان هالقصص تشل الهم شوي

**جورجي6** · 2009-05-09, 23:46

الله يعينا على الولادة وبلاويها ...

ربيعتي ولدت في مصعد المستشفى وهي يالسة على الكرسي ...مستعيل الياهل ما يقدر يتريا

ومرة رايحة مستشفى الا اسمع في السيارة صوت ياهل يصيح والممرضات يتراكضن كل وحدة شالة شي في ايدها ..
يوم سألت عن السالفة قالوا الحرمة مربية في السيارة ..

بس فشلة كيف بتنزل جدام الناس ..

**أمورة** · 2009-05-10, 00:06

بخبركم سالفتيه ويا ولادات امايه

السالفه الاولى في ولادتها باخويه ايام حرب الخليج. كنت في الصف الثالث داخله الرابع.
كانت اتسولف و يانا انا و اخويه و اتخبرنا عن ايام اول و كيف ولدتنا الخ. جان ينزل عليها الماي و كان الوقت بعد نص الليل (سهرانين يعني)
انا و اخويه من الزيغه ركضنا عند اخويه العود و كان عمره 11 و انوعيه من الرغاد قووووووم امايه بتولد و هو محتشر علينا شو يخصني انا اللي بولدها!!! ههههههه

جان نركض بيت خالي و اندق عليهم الباب و الجرس و كان ايامها خالي مستظيف عائله كويتيه ايام الحرب. طلعت لنا ام الكويتيين (الله يذكرها بالخير) و قلنالها امي اتربي الحينه و محد عندها.

جان تيي هي و خدامه خالي ولدو امايه في البيت ههههههههه فلم على اصوله.

و الولاده الثانيه يوم كنت في الصف السادس و راده من المدرسه يوم توزيع الشهادات (في إجازه الربيع)
حدرت على امايه الحجره و حصلتها متيبسه عند باب الحمام. و انا اتحرطم اقولها شو ها ما عطوني الشهاده..خليتني اروح عالفاضي

و هي مب متفيجه و اتقولي سكتي...اختج نزلت!!

و انا مب مستوعبه شو السالفه جان اركض بيت خالي (يحليلهم لعوزناهم في ولادات امايه هههههه) و ادق على حرمته الباب و الجرس زين ما كسرت الباب. بس محد رد عليه. و ايامها ماشي موبايلات خخخخخخ.

رديت حجره امايه جان احصل اختي (النونو) ملفوفه بشيلة الصلاة في ايد امي و الحبل السري بعده و هي تسألني زغرتي مرت خالج؟؟ هههههههه

اسميني اتيبست في مكاني و انا اطالع البيبي و شويه مرت خالي يت و اتصلت بالاسعاف وودو امي المستشفى.

و الولادات الثانيه وياها بس في المستشفى طبعا كنت اكبر و افهم.

ووووووبس

**قلبي من ألماس** · 2009-05-10, 01:18

انا ياني الويع حزة طلعة الناس للدوامات .. وانا ساكنه برع بوظبي .. واراجع في الكورنيش..

بغيت اتتخبل في السيارة .. من صوب فيني ويع .. ومن صوب ثاني .. زززززحمممممممة .. وميتة خوف اني اربي في السيارة ههههههههه

بس الحمدلله .. من نزل علي الماي .. لين ما وصلت المستشفى .. كملت ثلاث ساعات وانا فيني ويع .. اول ما وصلت المستشفى سيدة ودوني غرفة الولادة بدون ما يلعوزوني

والله يسهل على كل حامل ان شالله

الموضوع: أغرب قصة ولادة

أدوات الموضوع

عرض

أغرب قصة ولادة

المزيد من آخر المواضيع من نفس القسم:

المواضيع المتشابهه

بنات منو عندها فكره عن ولادة للأم اللي عندها خلع ولادة......هل يأثر ولا؟؟؟

أغرب أغرب وأغرب

أغرب وردة ...... أغرب قطه

ولادة مواطــنــة ( ولادة جــويـــة ) !.