سكن .. سجن .. طالبات ..؟؟

[فوح الخزام]

اليوم حبيت اخبركم عن سكن طالبات جامعة الإمارات مثل ما احب اسميها (( او مثل ما يسميها البعض جامعة العين )) .. عشان تعرفون كيف هي سكناتنا تشرح الصدر و اتساعد ع الدراسه ..
بشرح لكم ترتيبها ..
فالبداية نحن عندنا 6 مقامات (( مقام 1 – مقام 2 – مقام 3 – مقام 4 – مقام 5 – مقام توام )) اعتقد ان سموها مقام بسبب المنطقة اللي اهي فيها .. ما اعرف والله بس احب اتفلسف ..
المقام الواحد عبارة عن ارض وسيعة محوطة بسور و فيها بوابه وحده .. المقام فيه 6 مباني .. المبنى الواحد فيه 3 طوابق .. الطابق الواحد فيه 6 او 5 اجنحه و الجناح الواحد فيه 7 او 8 غرف .. و في الغرفة الواحد فيها 3 بنات .. و الحمامات (( عزكم الله )) طبعا مشتركه .. هي (4-8) حمامات و (2-4)مغاسل .. (( لغز مب مقام هذا .. )) .. و لكل جناحين مطبخ مشترك .. (( قحط حمدلله و الشكر )) .. و فالمقام في "جمعيه" على قولتهم يعني .. << ما صدقت البنت تشرح بالتفصيل الممل

المهم .. ندخل في محور حديثنا ..هل نحن عايشين بسجن ولا سكن طالبات

انا بطلع اللي بخاطري و انتو احكموا ..

اولا ان يحطون ثلاث بنات فغرفه وحده و اهي ما تسد الا لبنتين او بنت حتى .. الغرف وايد صغيره و حتى اثاث الغرفة اصلا اللي اول ما يدخل بيحس انها لشخصين أو لشخص .. بس شي سرير اضافي محطوط بالغلط ؟؟

ما عليه .. عديناها .. بس ان الجناح اللي نحن فيه ما فيه لا تلفزيون ولا شي .. مقطوعين من العالم .. يعني يا انكم اتسيرون النادي الاجتماعي (( اهناك شي تلفزيون و كل بنات خلق الله موجودين و كل وحده تبا القناة على كيفها )) يااا انكم تنطمون ..؟؟

ممنوع أي بنت تطلع برا غرفتها بعد الساعه 12 .. لييييييييش ؟؟ .. استعمار ؟؟ منع تجول ؟؟ شو السالفه ؟؟ .. طبعا البنات مطنشات و اذن من طين و اذن من عجين ..

طبعا اللي بتقرون تحت كان هذا النظام الجديم بس احينه خوزو اليدار ^^


ممنوع أي بنت ساكنه فمقام مثلا 3 اتسير لمقام 1 بعد ما تسكر البوابه .. (( الفرق بين المقامين باب )) .. ليييييييش ؟؟ ..
هذا بصوب و الاسلاك الشائكة اللي حاطينها على السور بصوب .. وين عايشين فلسطين .. اسرائيليين ؟؟ .. هلكونا .. يعني لو وحده نست شي فهاك المقام و تباه ضروري تتريا لين باجر .. ولا وحده اختها او بنت عمها محتاجتنها مريضة فيها شي البنت .. تبا حد يساعدها شو اتسوي ؟؟ .. او بنت عندها امتحان او كويز ؟؟ و مش فاهمة الدرس .. شو اتسوي ان شاء الله .. المشكله ان المطعم يكون مشترك بين مقامين .. فعادي انسير المقام الثاني طول اليوم بس بعد ما تسكر البوابه .. ممنوع و تعهدات و حالتهم لله ؟؟..

انيي لمشكلة الغرف .. ممنوع البويلر فالغرفه (( مسخن الماء )) و ممنوع السشوار و ممنوع المكوة .. كل شي فيه كهربا ممنوع .. لوعو جبودنا .. عبالهم اطفال فالروضة ما نعرف نستخدم هالاشياء ..؟؟

المطعم و ما ادراك ما المطعم .. أكل استغفر الله بس مووووووول مب شي ..صح نحمدالله على هالنعمة .. بس والله ما نقدر ناكل الاكل من كثر الدهن اللي فيه .. والله اتحس انك تاكل دهن مب اكل .. استغفر الله العظيم ..(( لاعت جبدي و انا اتذكر )) .. معظم بنات السكن ما يسيرون المطعم .. و اذا بيسيرون بيسيرون غصبا عنهم ..(( لان لازم ياكلون كيف بيعيشون )) .. بس الاغلب يعيش ع الاندومي و الكورن فليكس .. 24 ساعة ما عندنا غير هالاكل او ننزل الجمعية .. و الجمعية روحها قصة ؟؟ .. بس المطعم مسوين لهم راس ممنوع اتشلين اكل من المطعم تاكلينه مكان ثاني .. يعني من سابع المستحيلات .. بس فرمضان و ايام امتحانات الفاينال .. و لا حاطين لهم وقت محدد حق الريوق ( فطور ) و الغدا و العشا .. يعني مثلا الغدا اهم وجبه لنا لان بس هالوجبة اللي يضبطونها .. عفاني الله .. من الساعه 12 و نص الين 3 و ربع .. يعني بعد هالوقت كيفج دبري عمرج لين وجبة العشا اللي تفتح 7 و نص ما ادري 8 ..

جمعيتنا المحترمة .. عبارة عن كرفانة .. هيه كرفانة حجم صغير بعد ؟؟ .. ماشي مجال اتضيعين .. بعد شي منظره ان عن حد يسرق شي .. فيها تقريبا تقريبا كل شي .. الاشياء اللي انقزر عمرنا فيها الين ما انرد بيوتنا .. الحمدلله و الشكر .. بس المصيبة الاستغلال الواضح يعني عيني عينك يستغلون .. اذا شي سعره درهم بيبيعونه 3 دراهم و اذا شي شبس مثلا بنص بيبيعونه درهم او درهم و نص .. ترا ماشي مكان ثاني .. يعني بتشترين من عندهم بتشترين .. غصبا عنج بتدفعين عشان اتسدين حاجتج ..؟؟ .. هذا غير ايام القحط اللي اتييهم .. يوم اتكون الجمعية ما فيها شي .. الحمدلله و الشكر

بس اكبر مصيبة الهنود .. اونه يعني " سكن طالبات " ان ما فيه غير البنات و ممنوع دخول الرياييل (( الرجال )) .. انا عادي عندي ان يكون موجود الهندي من الصبح للعصر يعني قبل ما اتغيب الشمس يعني بحكم مثلا يصلح الكهربا او يسقي الزرع او ان يصلح مكيفات الغرف او أي شي ثاني .. بس ان انلاقي هنود موجودين الساعه 12 فالليل .. والله حرام عليهم البنات ما يكونون منتبهات احيانا ..يدخلون و يطلعون .. صح ان تكون معاهم خدامات و يلسون يصارخون ريال و ريال .. و البنت تركض حليلها عشان تنخش عن يشوفها .. بس احيانا ان الهندي يكون بروحه ولا خدامة وياه .. والله ان ربيعتي كانت تبا تدخل سكنها .. فتح الليفت (( المصعد الكهربائي )) ولا اتشوف بويها ريال هندي .. هذا كله الساعه 1 فالليل .. اتخيلو .. ان يعني هذا الهندي يبا يركب المصعد عشان ينزل .. جان اتسكر المصعد على ويهه و تحبس عمرها داخله لين ما نزل فالمصعد الثاني ؟؟ ..و غير المواقف اللي استوت للبنات ..؟؟ و الهنود ما يصدقون عيونهم بعد شوي بتطلع من مكانها ..
التمام .. لازم انتمم كل يوم .. التمام يعني ان البنت لازم اتسير عند المشرفة (( و في بعض الروايات تسمى المدام )) عشان تثبت انها موجوده .. كل يوم .. حشااا ما ادري وين سايره البنت .. بس هذي تهون عند باقي البلاوي ..

بوابة المقام اتسكر الساعه 10 .. يعني البنت تبا تطلع لأي سبب مثلا مرضت تبا تطلع او شي جي يعني ان المهم تبا تطلع بعد الساعه 10 ممنوع منعا باتا .. يذلون اهلها لو تطلع .. لو حتى ابوها اتصل طلعو بنتي ما بيخلونها تطلع اتخيلوا .. سجن سجن يعني اذا الاب موافق .. و المشرفات مب موافقات .. ما بيطلعونها .. ليش اهي بنت منو ؟؟ .. ؟؟ يقهرون .. بس اذا البنت يت من برا بعد الساعه 10 عادي بس يا انها بيوقعونها تعهد او ان بيمشون الوضع ..

ماشي نزله بالخميس ..خاصة ايام الامتحانات الميدتيرم او الفاينالز او ايام الاجازات اذا كانت بنص الاسبوع .. يعني ان الباصات ما راح تكون موجوده عشان اتنزل البنات لإماراتهم .. عشان ما انتعب السايق .. رب الحمد بالاسبوع مره ينزلهم (( الخميس )) و بالسبت يرجعهم ؟؟ .. هذا غير الباصات المشتركة (( يعني أكثر من مقام يشتركون فباص واحد لفس الامارة )) ..

هذا اللي طلع .. و ما خفي أعظم بس يالله .. الله المستعان .. و الله يصبرنا على تخلفهم >> عن انطرد من السكن بس خخخخ

>>


منقول

المزيد من آخر المواضيع من نفس القسم:

• استفسار عن جامعه
• استفسار عن جامعات رخيصة
• كلية الأفق جامعية ؟ شو رايكم فيها
• طردوني من كليات تقنية سؤال في مجال أرجع؟
• الجامعة الامريكية في دبي
• علوم البيئة أو التصميم الداخلي (((جامعة...
• بنات جامعة زايد وجامعة الشارقة استفسار
• طالبة وبتخرج .. استفسار ضروري
• Syria
• قبول الاجانب في معهد ابوظبي للتدريب

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[UAE_CONDOR]

شنسوي الي بتدرس لازم تصبر

انا الحمد لله طلعت و ارتحت و بصرااحة مب السكن بس يلوع بالجبد البنااااااااااااااااااااااااااات غير شكل استغفر الله


الله المستعان و تسلمين

[روح قاليها]

الله يعينكم

[ورود مجففه]

الله المستعان

[الأنيقة]

والله لازم الإنضباط و النظام بالسكن المشترك
و ليش البنت تحتاج تطلع عقب ال 12 بالليل و ين صارت هي
يعني مثلا لو هي ببيت أهلها يسمحوا لها تطلع 12 بالليل لبيت جيرانها و حتى لو بيفصل بينهم باب
و ان كان الأهل اتصلوا و قالوا خلي بنتي تطلع لازم ما يسمحوا بالشي لأن هالشي يسبب فوضى و الأب يلي مب عاجبه يستأجر لبنته سكن خارج سكن الطالبات و يتركها تطلع و تدخل من غير ما تخرب باقي البنات
و طبعا الكهربائيات ممنوعة (احتساب للحرائق)
و كل سكن الطالبات و الطلاب حول العالم فيها قوانين


و عن وجود الرجال الهنود بالليل هاي عجيبة بصراحة
و ما اتوقع انها صحيحة (كونك كاتبة منقول يعني مب تجربة عايشتيها)
و ان كان صحيح وين أهالي الطالبات يعنرضن على هالسلوك الخاطئ

[هواجس الزيودي]

الله يعينهم

[قلبي خالي]

ويييييييييه بعدها
احس نفسسسسس الشي بالضبط نفس المكلام يوم كنت ادرس من 10 سنين لووووووول
بعدهم على هالحال

الله يعينكم

يالله فتره وبتعدي وبترتاحون باذن الله تعالى

[شكوة الحرمان]

الله يعين
انزين اشتري الاغراض اللي محتايتنها من اي جمعيه قبل ماتسيرين الجامعه

[أم ميثوووه]

الله المستعااااااان

اللي تبا تدرس تدرس باي كليه وجامعه ثانيه مب لازم جامعه الامارات

هيه قبلكانت تسمى جامعه ما الحين صارت مقر للمصخره

طبعن هب الكل

[بنوته ذووق]

الله يعينكم ..

[ام بدر]

اسمها جامعه الامارات ..ودليل انها تستقبل جميع طالبات الامارات

وبالنسبة للقوانين كل الجامعات الي في البلدان عندهم قوانين ونظم ..كل حد حسب طبييعه مجتمعه وعاداته وتقاليده

هاي مسوؤلية وهم ما حطو هالقوانين اله لمصلحه الطالبة ..ومن البلاوي الي شافوها من ورا البنات

انا بعيني شايفه البنات في السكنات يتمشن بدون شيله والبجايم

والبنت الي تذمر من اغراض الجمعيه اتييب لها اغراض تكفيها من امارتهم

والي تعترض على الاكل تشتري اكل من داخل الجامعه وله تطبخ لها >>مب عباله

الواحد يقول الحمدلله غيرينا مب لاقي جامعات وله سكنات

[بنوته2008]

اختى الصراحة صراحة
انا وياج انه في وايد اشياء في الجامعة ما تعيبنا احن البنات بس كلها في صالح البنت وانت شكلج بعدج ما كملتى ثلاث سنوات في الجامعة بس بعد مرور الوقت بتعرفي قيمة هذه القوانين .
اما بالنسبة لين الهنود الى في السكن فيا حبيبتى في بنات يشوفون انه وايد هنود ولين الساعة 12 بس يمرون عادى ولكنه ريال موجود يمكن علشان هو مو مواطن وانت تعرفي كيف لبس البنات يعني الحشيمه بتحشم عمرها حت لو كانت الساعة اربع الفجر .
اما بالنسبة لين البنت ما تشوف وتطلع هذه واردة وما اقدر اقول فيها اي شي لانه سبحان الله وايد اشياء تصير والمدامات نفسهم ما ودهم بس اكيد ما بيكونن موجودين من غير حاجة يا اختى .
اما بالنسبة للمطعم يا اختى تقدرين تشتكين الى المدام الموجودة في المطعم تراها مو تابعة للشركة الى تسوى الاكل وما بيمر يوم ان شاء الله والا وهي متصرفة وبتقول لهم انهم يسوى لاى تبون بس انتوا تكلموا وخبروا المدام الى موجودة في المطعم .
اما بالنسبة للسجن لا تنسي يا اختى ان النساء كيدهن عظيم هذا وهم مباعدينيعنى كل مقام بعيد عن المقام الثاني الا في الفترة الاخيرة بعد ما جمعوهم في حرم واحد ما عدا توام وانت ادرى شو يسون وهم كانوا متباعدين عيل لو كانوا كلهم في نفس المكان شو بتسوين ( اضن وايد اشياء تصير وانت ادرى لانج بعدج في الجامعة ) .

لاتنسي يا اختى انه الى موفر لج في السكن امن مو سجن لانها مسؤولية كبيرة حتى على المدامات نفسهم وهم ملزمين انهم ينفذون الى ياخذونه من اوامر وانا ما اقول انه الاوامر مول مو صارمه بس هي تضمن انه البنات ما يكيدون لبعض في بعض الاجيان وامان على البنت من نفسها في بعض الاحيان .

يا اختى انا مجربة واعرف حياة السكن زين ما زين
وشفت وايد ناس مثلج يذمرون في الجامعة ويقولون نفس
الكلام فيا اختى يوم عن يوم الجامعة تنفتح ويصير فيها تساهلات اكثر عن اكثر

بس بسالج سؤال يا اختى انت شو تبين من الجامعة ؟ او سؤال اكثر دقة
انت ليش يايه الجامعة ؟

للدراسة
للعب
للوناسة
للطلعات
للفكة من البيت
علشان تتطورين وتشوفين كل الناس والجنسيات
علشان المسابر وغيرها من الاشياء الى يسوينها البنتات
ترا يا اختى بتشوفين في الجامعة كل النوعيات من هذيل الى ذكرتهم فوق بس انت حددى انت شو وبعدين مول مابتهتمين الى تقولينه لانه عندج هدف انت يايه عشانه

وتقبلى مرورى يا عزيزتى
ترا ني ما ودى اجرحج بس ابي افتح عيون البنات انه في وايد اشياء
لازم ما ينسكت عنها
والكل يعق الكلام على المدامات لانه اغلبهن وافدات لا وبعد يقلن ادبهن
عليهن معنهم معظمهن طيبات الا ما ندر طبعا فئة
معينة من البنات مو كل البنات طبعا .
واسمحييييييييييييييييييييييلى

[*عيون الدماني*]

اختي انا معاج في بعض الي قلتيه بس بعد في مبالغة في بعض النقاط

انا كنت في مقام توام يعني عشت حياة السكن وشفت شو الي يصير من بلاوي
وعن القوانين الي تقولين عنها ترا ما حطوها الا لانها في مصلحة الطالبات
<< الصراحه البنات بوجود هالقوانين ولاعبات لعوبهن ومب مقدور عليهن كيف اذا خلوهن عكيفهن (( طبعا ما اقصد الكل هذي فئه معينه)) << الله يهدي الجميع ان شا الله

[سوارة]

اعرف سالفه وحده ربيعت اختي حجزوها في السكن يوم الاجازه 10 ايام والسبب المشرفاات مضيعين بطاقة التصريح يعني الغلط منهم وهي يحليلها من عمان وما تسير عند اهلها الا في هذي الاجازه او الاجازات الطويله وتخيلو كله تامه في السكن وما حد فيه والله البنت تقوول اني خايفه ويحليلها من طيبها ما قالت حق اهلها عشان ما يوونها من عمااان والمشرفااات الله يغربلهن ان شاء الله ولا مهتمين

ان شاء الله يغيروون النظااام اللي عندهم

ابصرحه وااايد انقهرت يوم عرفت السالفه لانها كانت تكلم اختي وانا عندها انا مقهوووره واختي مقهوووره

الله يعين

[شلال محبة]

والدخوووووون بعد ممنوع...