نعم ... أقبل الزواج من متزوج

[سيده عجوز]

السلام على من اتبع الهدي...

شفت وايدات منزلات موضوع يستفسرون عن الزواج من شخص متزوج فقلت بقول اللي عندي لأنكم خواتي وأبالكم الخير وما با منكم غير دعوة صادقة

ردي بيكون قصةمن واقع حياتي لوحدة من ربيعاتي ( قصيدة )
هاي يا طويلات العمر كانت أكثر وحدة معارضة انها تتزوج واحد متزوج ليششش يا حلوة ؟؟ لأنها ما تبا تبني سعادتها على تعاسة انسانة ثانية؟؟؟وها يمكن تفكير وايدات (( ع فكرة هي انسانة قمة في الدين والخلق وحتى الجمال في الشكل والروح المرحة الطيبة)
المهم ربج كتب وتقدملها واحد.....لكنه متزوج وعلى طووول وبدون تفكير كان الرفض من طرفها
تقدمها مرة ومرتين وكان مصرة يباهاوهي مصرة على رايها لكن قالولها انتي استخيري واللي ربج كاتبنه بيصير وخاصة انج وصلت فوق الثلاثين استخارت والله شرح صدرها ووافقت بس على شروط خاصة بأهلها
المهم أول ملجت شوفوا شوا استوا لها ما شاء الله لا قوة إلا بالله)
1- يتها ترقيه من الشغل اللي فيه واللي من سنين اطالب فيها
2- خذت الليسن بعد عناء وتعب وووو
3- خلصت دورة كانت كارهة عمرها فيها وتترياها متى تخلص
وكل هذا بفضل الدعاء والله انها اقول : كان سلاحي الوحيد وتوجهت لربي بكل حالاتي وفي كل وقت واتصدتقت وسألت الله وألحيت في الدعاء ان كان الأمر خير انه ييسره وان كان شر رب يصرفه عنه
والنقطة الأهم انها تعرفون لمنوا دعت تمت تدعي لمرت الريال الأولى -- تخيلوا-- تدعيلها ان خبر زواج ريلها ينزل على قلبها مثل الماي البارد وتتلقى الخبر بنفس راضية ومطمئنة وانهم يكونون شرات الخوات وربج ما خذلها وعطاها ما تباوهالمواقف تأكد هالشي:
1-تتصل فيه وتسأل عنها وعن عياله ودوم توديلها ولعياله هدايا
2- اتزورها البيت وتتغدا ولا تتعشى عندها وطبعاً تكون مسوية شي وماخذتنه وياها
3- تنادي زوجها باسم ولده العود اللي هو ولد الأوليه
4- مره يت عندنا الدوام - كانت عندنا مناسبة- واستوت تعرف الكل عليها: هذي أم فلان وهاي بنتها إخت بنتي لا ووصلتها لين البيت
والله ان كلنا استغربنا من العلاقة ما بينهم - ما شاء الله لا حول ولا قوة إلا بالله رب لا يفرقهم- بتقولون بتم الضرة مرة- بقولكم : هي لكن دام القلب صاف النية ربج يلين القلوب

فلا تنحرجين اختي من الزواج بواحد متزوج دام انه على دين وخلق ،، استخيري واسئلي عنه وعن طباعه وعن صلاته أهم شي في المسجد وعن علاقته بأهله واللي حوليه ولا تنسين مثل ما قلتلج الدعاء فهو سلاح المؤمن وتذكري ان سهام الليل ما تخيب وان شاء الله بتصيب لكن ربج يحب اللحوحين ويحب يسمع مناجاتش له وصوتج وانتي تدعينه ويحب يشوف دموع الخوف والرجاء في عينج في السحر .. وبعد اتصدقي بالنية اللي تبينها
رب يوفج الجميع ويرزق أخواتنا وجميع المسلمات أزواج صالحين أغنياء بدينهم وما لهم واخلاقهم ويسعدهم دنيا وآخره

والسلام ختام ( كلام دار في الخاطر فباحت به الأسطر)

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

[دلوعه فزاع]

عادي حبوبه مافيها شي انا ابوي ماخذ امي الاوليه وحرمه ابوي الثانيه والحمدالله والله خوات امي الله يرحمها يوم تعبت حرمه ابوي اعتنت فيها حتى سبحتها عادي لان امي ماتشوف وكانت اقرب لها من الاخ والصديقه واذا امي محتاجه شي حرمه ابوي تسويه واذا حرمه ابوي تبا شي امي تسويه لها ودوم يدعون لها وضحك وسوالف واذا صار زعل بس دقايق ويردون يضحكون عادي الله يرحمها ويغمد روحها الجنه ويطول بعمر حرمه ابوي وام اخواني . امممممممممممم اخوي متزوج 2 والحمدالله صديقات ودوم يكلمون بعض ويتزاورون عادي وهدايا والحمدالله

[مسك دارين]

قليل من حريم من تقبل بالزوجه ثانيه اخت وصديقه لكن مب مستحيل بس سؤال يقرقع في قلبي شو الاسباب الي تخلي الر ياال يعرس ع مرته دامنها قايمه بدورها ولا ينقصها من السنع شيء ,, وفي شي مهم جداجدا انا اشوف الزوجه تدري من قبل بزوااج زوجها احسن مليون مرة من انها تعرف من الناس مايكون الخبر عليها مصيبه التهيا النفسي لها النقطه مهمه واايد ,,, عاارفة طلعت شوي من موضوعج بس كان في خاطري بس وقلته ..

[زهرة السوسن]

الله يوفق الجميع انا بعد اختى هي وعديلها عادي يتكلمن مع بعض ويتزاون بس صار هذا الشي بعد فترة زواج طويلة وبعد ما كبرو العيال ....

لابد من التنازل اذا الوحده تريد ريلي يبقى لها لان المشاكل بطفشه من صوب وبتقربه من صوب ثاني يعني مصائب قوما عند قوما فوائدو

[بيني و بينك]

ما شاء الله لا حول ولا قوة إلا باللهربي لا يفرقهم

[دخوون]

السلام عليكم ورحمه الله وبركاته,,
اكيد هذا الشي يحرق قلب كل وحده
حتى امهات المؤمنين كانت بينهم غيره,,
بس دامهم يعرفون ربهم ويخافون منه
الله بييسر في علاقتهم هم الثنتين
واذا وحده منهم بس اعلنت الحرب
من البدايه بيتمون طول عمرهم في ضرابه
وبيطفشون الريال ويمكن ياخذ عليهم ثالثه
ورابعه ولا يطلقهم هم الثنتين,,
الله ماشرع 4 حريم الا لحكمه بشرط العدل
اهم شي يكون الريال عادل بينهم لان
اذا ماعدل بتزيد المشاكل,,

انا عن نفسي قلت اذا تعديت ال35 سنه وتقدم
لي واحد متزوج وماينعاااب مابرده,,
بستخير ربي وع قولتهم النصيب يصيب
وفي الاخير هالشي مكتوب قبل لا ننولد,,

ربي يسعد ربيعتج مع زوجها ويوالف
بينها وبين حرمه ريلها,,

[((خفايا روحي))]

فلا تنحرجين اختي من الزواج بواحد متزوج دام انه على دين وخلق ،، استخيري واسئلي عنه وعن طباعه وعن صلاته أهم شي في المسجد وعن علاقته بأهله واللي حوليه ولا تنسين مثل ما قلتلج الدعاء فهو سلاح المؤمن وتذكري ان سهام الليل ما تخيب وان شاء الله بتصيب لكن ربج يحب اللحوحين ويحب يسمع مناجاتش له وصوتج وانتي تدعينه ويحب يشوف دموع الخوف والرجاء في عينج في السحر .. وبعد اتصدقي بالنية اللي تبينها
رب يوفج الجميع ويرزق أخواتنا وجميع المسلمات أزواج صالحين أغنياء بدينهم وما لهم واخلاقهم ويسعدهم دنيا وآخره

والسلام ختام ( كلام دار في الخاطر فباحت به الأسطر)

كلامج جميييل جدا جدا وهذا هو المطلوب
عيبني واقتبسته يوحي بالاجتهاد والتفاؤل والامل والتوكل على الله والرضا بالقضاء والقدر
بارك الله فيج ونفع الله فيج ان شاء الله وجعل هالقصه نفعا لكل بنت مسلمه ان شاء الله
والدال على الخير كفاعله .. بارك الله فيج

[سوووسو]

[SIZE="5"]صدقتي يا أختي ...

آخذه أنا بنت بلاده ولا تاخذه الوافدة والأجنبية ، على الأقل أنا بنت بلاده بحن على حرمته الأولية وبعدها أختي وبحاول أتقرب لها وعياله بعتبرهم عيالي والحمدلله شايفة خير وهدفي في الزواج الستر ومرضاة الرب ، لكن الوافدة بتاخذه وبتدمر بيته وبتبهدل عياله وبتفر مخه عليهم وهدفها في الأخير هو الجواز والفلوس .[/SIZE]

[اخت بوحميد]

الزوج قسمه ونصيببببببببببببببببببببببببببببب

[نور حياتي]

كل واحد و نصيبه ....


الله يرزقنا ان شاء الله

[NaNa.x]

صح الي كاتبنه الله بيستوي ... والطيبات للطيبين ... الحرمه الزينه وغير الحقوده ... يازينها ..

بس عنجي نقطه مثلا ابوي تزوج وحده وهي وافده والله انه لوعت بجبده وامي طيبه وياها وجي وووايد تحب عيالها بس حرمة ابوي تمنع عيالها عن زيارتنا وتسوي عليهم وتسب ابويه سب وتكرهنا فيه , طبعا ابوي ندم ان خذها بس شو يسوي علشان العيال بس صابر..

وفي وحده ثانيه مني ترمس ربيعتها وخذت رقم ريلها وتمت ترمسه لين خذته وطبعا بعدين دوم تسوي مشاكل ...


والله يرزق كل بنات بالزوج الصالح المؤمن والمحافظ على صلاته حتى لو كان معرس يعني حرمته مهملتنه ومب عاطتنه حقه , والعزابي الي ماتزوج يارب ادعي لكن من كل قلبي .. والي يعوضكن خير .. أمين ..

[judy abbott]

ما احس تصرفها غريب بالعكس...

اي وحدة خايفة ربها بتتصرف بالضبط نفس تصرفها..

لانه الزوجة الاولى مالها ذنب وغلط انها اتنكد عليها عيشتها...

لو في غيرة فالقلب...الحرمة الاصيلة ما بتتصرف على اساس هالغيرة و ما بتخليها اتسيطر عليها...

واكيد في حريم شر و يسون اخس عن المسلسلات....

بس ممكن اعلق تعليق بسيط...

احس ماله خص الليسن و لا الترقية بموافقتها بالزواج..

------

نسيت اقول شي...

انا صح اني متزوجة...

بس لو ما ياني نصيب ما بقبل بريال متزوج...

صح انه حلال ...وصح انه الريال له حق ياخذ اربع...

بس انا ما اتمنى اكون منهن...ومثل ما قلتي قلبي يعورني عالحرمة الاولى..لو اني ما بظلمها...

وبعدين شو يضمن لي ان الريال هب عينه فارغة كل ما شاف حرمة يبا ياخذها لو حرمته هب مقصرة...

يعني بيسير ياخذ فوق راسي الثالثة و الرابعة...

واضيع انا في الطوشة...

[غشيمه 1]

الله يوفقنا باالزوج الصالح

[الولهـانه]

ف النهاية اللي اللــــــــه يكتبه يصير سواء

الزواج من متروج والا عازب....

[أحب الزين]

في واايد مزوجات من مزوج سعيدات في حياتهن ومستقرات أكثر من الي مآخذة واحد عزوبي المهم الخوف من الله والريال يكون زين وعادل وأنا أشوف وايد بنات تغيرت نظرتهن نحن عدنا في الدوام وايد بنات مزوجات من ريايل عندهم حريم وما يشكن بأس وسعيدات اعتقد النظره تغيرت بعدين السعادة مش أني أملك ريال يكون حقي بروحي وهو مناك ما يتحمل المسؤلية ولعاب وملعوزني المهم الريال الي يخاف من الله وايد مزوجين ولعابين بالعكس الريايل الي مآخذين حرمتين وايد ناضجين ومستقرين أكثر والحرمة الاصيلة هي التي تعرف تكون سعيدة مع زوجها بدون ما تخرب على حرمته الاولية المهم في كل شي الخوف من رب العالمين وأتقيه في كل شي أسوية وإن شاء الله يوفق كل بنات بلادي وما تم وحده بدون ريل يحن عليها ويحميلها