قولولي شوه اللي صارلي

[مشاعرالقلب]

اليوم رحت العياده عشان عندي حرقان البول الله يعزكم وحكه داخل حتى ما اروم احكك كلمت مرت حميي قالتلي شربي ماي هالشي يصير بالحمل عادي وانتوا تدرون اني سويت تحليل دم وطلع نسبتة الحمل عندي ضعيفه ورحت اليوم قالتلي انه عندي التهاب حاد بالعنق الرحم وانه عندي دم متجمع تحت بطانه الرحم وسوت لي تحليل دم وبعد قالتلي فيه حمل نسبة ضعيفه قلت دكتوره حاولي ارجوج قالتلي هذا باليد الله ونعم بالله قالتلي ما عليه راح تحملين ع طول شهر الياي وانشاء الله راح اعطيج علاج احسن وراح تحملين ان الله راد دكتوره نزيه تحاول اطمني وانا ماشي اصيح تتدرون احتجت لامي اتكون معاي صح ريلي معاي بس احتجت لها ليش ما ادري رحت لبيت امي وانا اصيح حطت بحضنها اقولها اماه ادعيلي قالت اشفيج بنتي طمنيني ريلج سوى فيج شي قالج شي عمتج قالت شي شوه بلاج خوفتيني اول مره من عرستي دشين بيت وانتي اتصحين قلت لا مضايجه ما ابي اخبر حد كنت حاسه انه هالحمل ما بكمل من جذي حلفت ريلي ما يخبر اهله ولا انا لين ما يثبت حملي كنت ادعي ربي بكل صلاه واستغفر واقري سورة البقره يوميا وما خليت شي ما سويته ابتعد عن كل حد وحبست نفسي بالغرفتي والله تعبت واتحطمت يوم اكثر ساعه 3 الفجر رحت الحمام الله يعزكم نزلي دم شرات الكسره لونها الحمر اول مره بحياتي اشوفه بعاده بالدوره ينزلي دم عادي قعدت اصيح واصارخ بحمام الله يعزكم لحق عليه ريلي قوليلي شوه فيه قلت شوف قال شوه هذا قلت ما ادري قالي قومي البسي عباتج بوديج طواري قلت لا ما بروح بقتلوا ولدي واانا خلاص منهاره ابي اكلم مرت حميي بس بروحها مشغوله بالتطهير بولدها ابي اعرف شوه هذا اللي صارلي ريلي كان مستانس واتغير مره وحده كله يقولي الله كريم اقوله لا ما صار شي انا حامل والله قعدت اتكلم بدون حاسيه وانا اكتب لكم ايدي ترتجف من صياح ريلي يقولي رقدي الصبح بوديج العياده مب قادره بس ادعي ربي لا ترحمني يارب انا يتيمك لا ترحمني يارب ما ادري شوه اسوي قلت بكتب لكم يعلكم اطمنوني الله يطمن قلبكم

المزيد من آخر المواضيع من نفس القسم:

• أسباب آلام الركبة بعد الولادة وكيفية علاجه
• ماهو الطلق البارد والطلق الحقيقي والفرق...
• اهم أسباب التهاب الجيوب الأنفية أثناء الحمل...
• افضل طرق الاستعداد لفترة النفاس
• اهم فوائد الحليب للمرأة الحامل
• افضل عشرة طرق طبيبعه لتسريع الولاده خاص...
• اهم نصائح للحامل البكر في الشهور الأولى
• اهم أسباب الجوع المستمر عند الحامل وطرق...
• افضل مسكنات طبيعية تخلصك من الألم أثناء الحمل
• طرق للتخفيف من آلام الظهر بعد الحمل حصري

[إماراتيه مظلومه]

شوفي حبيتي أنتي الحينه معرسه يعني صرتي حرمه وخذي كلامي قاعده لج ....الحرمه يوم تعرس تتعرض لأشياء ما تعرظت لها قبل يعني تحملين وطرحين ..و يستوي ألتهابات .. كله عادي يستوي لأي حرمه ..لا تخافين والعمر جدامج بتحملين مره ثانيه وثالثه ..لا تخافين وكوني قويه مب ظعيفه ..الحياه تجارب...ألحينه انتي روحي العياده روحي عند دكتوره نفيسه مستشفى الزهره الخاصه ألي بشارقه وخليج عند دكتوره وحده يعني لا تغير وخذي العلاج المناسب للألتهبات وبعدين وقفي الحمل ثلاث شهور ..على حسب ما تقرر الدكتوره وحاولي تحملين مره ثانيه ,,,وعلى فكره أي دكتوره تارجعين عندها لا تغير لين ما تخلصين علاجج ..الله يوفقج

[ألوان الطيف]

تعرفي الغاليه الضيق بروحه مب زين عشان الحامل والخوف أنه الحمل ما يكتمل بعد هب زيين ...

المهم أختى شكلج نزلتي بس هاي مو نهاية الدنيا لانج توج بداية حمل ...عليج بالاذكار وحصني نفسج دوم وأقري قران .....وأنشالله بأذنه الله بيعوضج بحمل قريب عاجلا غير أجلا أنشالله ...

فيه حريم على طول يحملن بس خلى نفسيتج مرتاحه ...مريت بنفس تجربتج بس الفرق أني رايحه المستشفى ما متأكده أني حامل وعلى طول من سوتلي الدكتوره فحص داخلي بطلتلي النفس وعندها على طول نزل الدم ...وهي قالتلي دوره بس ما صدقتها رحت عند دكتوره ثانيه وقالتلي حمل ونزل ...


والحمدلله بفضل الله حملت والحين أنتضر أربي ...

[دلوعة الدرمكي]

الله يعوضج خير االغالية

[خوله الشحي]

الله يعوضج خير حبيبتي ولا تحتاتين انتي توج عروس واكيد رب العالمين بيعوضج خير (وعسى ان تكرهوا شيئا وهو خير لكم ) اكيد هذا خير لج ولريلج بس انتي ريحي بالج ولا تفكرين في الحمل وايد وان شاء الله الشهر الياي تبشرينا بالحمل