قلبي دق

[قلبي الوافي]

السلام عليكم ورحمه الله وبركاته

شحالكم خواتي الحبوبات

بصراحة مب عارفة شو اسوي

بس صج محتاجة اشاور حد في موضوع يخص حياتي

واللى تقدر تساعدني اتمنى ما تبخل علي بالنصيحة والرشد


السالفة وما فيها أن قلبي دوم كنت قافلة بقفل ومب سامحة له انه يطلع لبرع لاني بصراحة محتفظه فيه لشخص اللى بيكون ريلى وبس وغير جي ممنوع وغير مسموح به رغم اني رومانسية وعاطفية بس بعد ما احب اطيح في المشاكل اللى بنات يالسة تطيح فيها


هذا اللى كنت احسبه اني قادرة اسوي كنترول على قلبي بس اتضح ان قلبي اصلا ما كان لاقي الشخص المناسب عشان يحبه

وفجئة بدون سابق انذار ...


حسيت بأعراض غريبة فيني حسيت اني قلبي يدق بسرعة غريبة وجسمي كله يعرق لمه اشوف شخص معين

صرت انتظر اشوفه بشوف ..

بتقولون منو لي ها الشخص هو ربيع زميلى في الشغل

طبعا هو متعود اي لزميلى في الشغل يوم معين في الأسبوع فها اليوم يكون يوم السعد بالنسبة لي

ما اقول لكم شقايل كأنه يوم العيد ..

بس طبعا ما ابين ها الشئ لأي شخص حتى بيني وبين نفسي كنت مستغربة من اللى صاير او اني مب قادرة اصارح نفسي بها الشئ

مرات احس الحب انهزام عشان جي ما ابغي انهزم في يوم فأحاول اطنش وايد لكن احسسي بالشوق هو اللى يسيطر علي

اللى ما تعرفوه ان علاقتي بزميلى قوية لدرجة اني ازور اهله البيت واعرف خواته وطبعا عنده رقم مبايلى وايميلى بعد

المهم اني اعتبر زميلى اخوي وهو بعد يحكى لي عن كل صغيرة وكبيرة بحياته ويقولي انه يرتاح يتكلم معاي اكثر حتى من خواته ..

المهم نرجع لمحور حديثنا لو ان اللى طاف مرتبط ببعض

كنت اصلى لله ان يبين لي ان كان ها الانسان بنظراته اللى اشوفها في عيونه حب وله لا وانتظرت يمكن 4 اشهر وما فيه اي تقدم غير اني اشوفه في الاسبوع يمكن ثلاث مرات لانه زاد من زيارات زميلى اللى هو ربيعة .. وكنت احس بوناسه

وبعد صار بدل ما يدق على زميلى بمبايلة يتصل على المكتب وما كنت عارفة هل هو يسوي جي عشاني وله مجرد صدفة

لاني ما كنت حابه اترجم الموضوع لصالحي عشان ما اطب واطيح في الهيمان والسرحان اكثر من اللى انا فيه

عموما انا عاد ما صدقت على الله لمه شفت مسجه بس شو سويت طنشت المسج وما رديت عليه بأي شئ

مرت بعد اكثر من 3 أشهر

وحصلت اضافة على المسن عندي من إيميل غريب بس والله العظيم احساسي قالي انه هو بس ما كنت متأكدة

عموما انا ما احب ادخل المسن وايد عشان جي مالتقيت في الشخص اللى ضايفني إلا بعد فترة طويله يمكن شهرين بعد

وطبعا بعد تكلمنا رغم انه يحاول يخفي شخصيته وهو منو بس انا كنت حاسه فيه واخيرا اعترف انه هو

اتفجأت فيه بعد انه يرسل لي رسائل على المبايل

وطبعا لا تسألوني من وين ياب الرقم والإيميل اكيد من عند ربيعة وعلى قولته سرقهم بس ما اعرف صح ها الشئ وله له متفقين هو وياه مع بعض(ما اقدر اوثق بأي شخص بداخلى مخاوف)

عموما صرنا نكلم بعض عن طريق المسجات والتلفون اكثر من ثلاث شهور وبعدها لمه قلت له شو نهاية ها الشئ قالي ما شئ

حسيت انه فيه مشاعر خاصة صوبي بس نفس الوقت هو من النوع اللى يلف ويدور مب صريح

حسيت انه يحاول يشتت احساسه وقالي ان هم لازم يتزوجون من بنات العائلة بس وقطعنا علاقتنا على ها الاساس خاصة بعد اني اكبر منه سنا

المهم مرت فترة 9 شهور وكل واحد منا بعيد عن الثاني

ما اقول لكم شقايل تعذبت في بعده

وما اقول لكم شقايل صليت لله انه يخرجني من اللى انا فيه

وتفاجأت بعد ها المدة يرسل لي ايميلات

وحصلته على المسن وكلمني بعد

بس على اساس انه بس خطرت بباله مب عشان أي شئ

اعرف انه يمكن ما يكون جاد

واعرف اني بعد اكن له مشاعر خاصة

بس شو فايده ها الحب لو كان بدون فايده

قلت يمكن فيه طريقة

ممكن نصيحتكم بنات

انا ما راح انزل نفسي له

ولا راح اذل نفسي لأي شخص

بس صج من خاطر احبه واتمني اكون معاه بس بالحلال

المزيد من آخر المواضيع من نفس القسم:

• حساااب لبيع الانتيك الاشيا الاثريه القديمه
• ساعدوني .. محتاجة لدكتور قلب اطفال في دبي
• السلام عليكم
• المانيكير الاسلامي
• ترتيب ادوات المنزل
• أبا هالبرقر
• عجبني هالفستان من موقع فلوري داي
• عجبني هالفستان من موقع فلوري داي
• علاج ادمان المخدرات
• ديجي فاضل في أبوظبي

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[كيلو غلا]

الله يكتبلج اللي فيه الخير

[اسبرانسا]

الله يكتب لج الي فيه الخير

لو الله كاتب لج هالشخص فلو ابتعدتي عنه شهور وسنين بتلقينه يرجع

بس الواحد ما يعيش على الامل
فعيشي حياتج عادي
وان حاول يكلمج فخلج عاديه ورسميه معاه كانه عميل عندكم بالدوام
ولا تضيعين وقتج ولا راحتج في التفكير بهالامر لانه بتلقينه ياخذ من وقتج ومن سعااادتج الوقت الكثير
وبتلقين نفسج ضايعه مب عارفه اهو شوه قراره بالنهايه

توكلي على الله ومشى امورج مثل ما كانت ماشيه قبل

[قلبي الوافي]

مشكورات خواتي على النصيحة

مثل ما قلتي اختي اسبرنسا..

هو المفروض اني امشي حياتي عادي

بس التفكير يقتل

تصدقين احاول اشغل نفسي بأي شئ

وانا مؤمنه لو أن ها الانسان من نصيبي باخذه

ولكن هو الضعف اللى احس فيه احيانا بحاجتي له ولسماع صوته

دعواتكم ان الله ينسيني الأمر لو ما كان فيه خير ومصلحة لي

[نفسجة]

وانتي ما لقيتي الا بنات المنتدى تشاوريهم

الله يعينك

بعد شوي بتلاقيهم اكلوكي اذا ما انحذف الموضوع لووول

نصيحتي حبوبة سويله ديليت من حياتك

احيانا نحس انغياب شخص معين من حياتنا خسارة

بس الواقع ان وجوده بحياتنا هو الخسارة

الله يهدي بالك

[أم عايشة]

يمكن الريال متزوج عشان جيه يتهرب من الزواج ويمكن حاب يتسلى بس انتي ابتعدي عنه وتحملي وحاولي انج ما تضعفين ولا تكلمين لا بالمسن ولا بالايميل لو بغا الحلال بيي عندج ومثل ماخذ ايميلج ورقمج يقدر بعد اييب عنوانج ويخطبخ من أهلج أهم شيء انج تفكرين ان المكالمات والعلاقات الهاتفية غلط والله يوفقج ويهديج لطريق الصواب ولا تنسين من ترك شيئا لله عز وجل عوضه الله خيرا منه
وعليج بالاستغفار بنية تحصلين الزوج الصالح والله يهديج ويهدينا أجمعين

[وآقـــعيـــة]

حبيبتي جد تأثرت بكلامج .. وحاسه باللي تمرين فيه هي فتره صعبه جدا ويمكن ما تقتنعين باللي يقولون لج امسحيه من حياتج .. لكن هذي الحقيقه اللي عقلج الراجح راح يقتنع فيها من نفسه .. لا تضغطين على نفسج بالنسيان صدقيني راح ينتهي من حياتج بكل سهوله كلها مسألة وقت .. واللي مثلج تستاهل واحد يقدر مشاعرها وعقلها الكبير وشخصيتها قبل كل شي اللي مثلج صار نادر يا اختي فلا تفرطين بمشاعرج لأي واحد ممكن للحظه انه يتهاون فيها .. عليج بالاستغفار والدعاء وجددي نيتج لله انج انتي تركتي هذا الشي لله وربي راح يعوضج خير اسمعيها من اختج اللي جربت حبيبتي ربج كريم وراح يرزقج باللي يقدرج ويحترمج ويحبج .. دايما ادعي وقولي يارب انا تركت هذا الشيء لله فعوضني خيرا منه .. وصدقيني انا متأكده راح يجي اليوم اللي تتذكرين فيه كلامي وبتدعين لي
دعواتي لج حبوبه .. توكلي وفوضي أمرج لرب العالمين .. الله يسعدج ويبعد عنج عيال الحرام انتي وكل خواتنا في الله

[rozee]

اتخذي قرار مصيري في حياتج اطلبي نقلج من القسم أو غيري شغلج ورقم تلفونج بدون مايعرف صديقه اللي هو زميلج بالدوام واطوي الصفحه من حياتج والله بيرزقج باللي أحسن منه لأن معنى الرجوله التزام ووعد وعهد

[صدى101]

لا تعيشين بوهم حبيبتي . .

اللي مكتوبلج بتآخذينه ولـآ تحطينه فبالج لانج بتتعبين . . الحياة تعلمـنا من الأشيا اللي نجوفها . .
علاقات الحـب اغلبهـا تكون زايفـة وغالـبا . . ما تقع في مشآكل لا حدود لها , ,

حبيبتي فكري بعقلج لا تفكرين بقلبج . .لان القلب بيضيعج والله . .


أنا انسانه عاطفية افكر كله بقلبي . . بس والله لين ايلس مع نفسي . . افكر بالايجابي اكثر منه السلبي اصيح أتضايج بس فالاخيـر اعرف ان عقلي هو الصح . .

خلج قويه ولا ترضخيـن للعواطف ترا والله بتضيعج . .

الله يرزقج الزوج الصالح وينسيييييج هالوهم ولو كان هو من نصيبج بتاخذينه . .

الله يكتبلج اللي فيه الخير . .

[samauae]

أنا أحس ان هالريال يبا يلعب وبسسسسسسسسسسسس


السموحة اختي..!

[قلبي الوافي]

وانتي ما لقيتي الا بنات المنتدى تشاوريهم

الله يعينك

بعد شوي بتلاقيهم اكلوكي اذا ما انحذف الموضوع لووول

نصيحتي حبوبة سويله ديليت من حياتك

احيانا نحس انغياب شخص معين من حياتنا خسارة

بس الواقع ان وجوده بحياتنا هو الخسارة

الله يهدي بالك

هلا اختي

مشكورة اولا على تعنيج وبحثج لي عن حل ونصيحتج القيمه فعلا

اما ليش اخترت احط الموضوع في المنتدى لاني بصراحة ابغى استشير حد غريب عني يعني هب من اهلى لاني محتاجة حد ينصحني

لاني لو خبرت وحده من ربيعاتي ما اضمن وله من قريباتي

باجر لو صار ما صار يفتحون الموضوع ويضيقوبي

اما عن المنتدى فانا وايد حسيت العضوات متفاعلات في الموضوع

واللى بترمس عني الله متطلع وشايف

وانا الله العالم ما ابغي اغلط لا في حق نفسي ولا اهلى ولا ديني والله الشاهد على

ولو جان غير الرمسة اللى اقولها ما بحسها ها السالفة مشكله اصلا

والله يعيني على اني انساه لانه فعلا ما قلتي

لازم اسوي له دليت من حياتي

وجانه يباني بصدق بيعرف يوصل لي

[وردة راك]

الله يكتبلج اللي فيه الخير

[stars]

حبيت هالجملة ((احيانا نحس انغياب شخص معين من حياتنا خسارة

بس الواقع ان وجوده بحياتنا هو الخسارة )) وءأيدها

حبيبتي سمعيني وانا اختج . .أولا زميلج وقح اذا عطى ربيعه ايميلج ورقمج وهو يعرف ان ربيعه لاعاب واذا هو سرقهم منه فهو اكيد حط في باله انج لعابه وعشان جي خذ رقمج لأن مثل ما تكلمين ربيعه بتكلمينه (يعني سهلة المنال) (لو صدج يعتبرج اخته جان ما سواها تتوقعين يعطي ربيعه رقم حد من خواته) الغاليه مافي ريال محترم ويدور عروس محترمه يرضى ياخذ وحدهشايف رقمها عند ربيعه (لأنه قويه في حقه والريال ما يرضى على شرفه) مليون بالمية كان مجرد ومجرد يبا يلعب وياج لا اكثر.

[دهن_العود]

تسمعين رمستيه ....

سويله دليت هذا شخص حاب ايلف وايدون لو يباج جان من زمان دق بابج

... ولو شارنج جان من زمان لقيتي نفسج زوجته


بس انا اقولج دوووووووسي على قلبج .... وانسيه لاتقولين ماتقدرين ؟؟؟؟؟
تقدرين صدقيني .... حاولي تتقربين لله اكثر وادعي انه الله ايصبرج واينسيج ..
والله ايوفقج حبيبتي....

وربي ايصبرج ...

[قلبي الوافي]

انا اشكر كل وحده يات في ها الموضوع وعطتني رايها وشورها

وبصراحة حسستوني بأخوتكم في الله تعالى

وان شاء الله كل وحده قدمت لي النصيحة الله يأجرها خير الأجر

ويوفقها ويسعدها يا رب العالمين

واكيد انا استفدت من نصائحكم

واكيد انا بمشى على نصائحكم

والتمسك بالدين هو اللى يخلى الإنسان في طريق الصح والصواب

والله يبعد عيال الحرام عن كل البنات يا رب