فندق المروج روتانا

**شمائل** · 2009-01-25, 14:36

السلام عليكم شخباركم يا بنات حبيت اشاركم بزيارتي لفنادق دبي .....

(اليوم مبين من اولو)

يوم 2/1/2009 كان ذكرى زواجي فحبيت افاجأ ريلي فحبيت احجز بفندق حق ليلة مع اني حبيت فندق (فيستيفال سيتي) بموضوعي الاول بس قلت لا خليني اغير (وياريتني ما غيرت) المهم دورت في موقع فندق دوت كوم عن الفنادق والاسعار المهم بعد تقريباً 3 او 4 ايام اخترت فندق المروج روتانا وهو خمس نجوم.....كان المفروض دخول الفندق يكون الساعة 2 الظهر....

ببدأ لكم من الخميس 1/1 رتبت الشنطة وحطيت كل الي نحتاجه فيها (من أ الى ي) و عطرت وبخرتها عشان الريحة تكون حلوة المهم قالي ريلي خلي الشنطة في البيت لما اروح آخذج من بيت اهلج بحطها بالسيارة قلتلا اوكي رحت عند اهلي ونمت عندهم ورتبت شنطة ولدي عشان ينام عندهم المهم قمت صباح الجمعة 2/1 وعبال ما تجهزت وتكشخت استوت الساعة 2 ونص (مسكين ريلي قلتلا لا تاكل عشان ناكل مع بعض) المهم روحنا عشان نتغدى في ابن بطوطة ونحن نازلين من السيارة حسيت انه في شي غلط قلت حق ريلي اريد اشوف الشنطة قالي في الكرسي الي ورا فتحت الباب و تخيلوا شو لقيت آآآآآآآآآآآآآآآآآآآآآآآآآه ريلي ياب الشنطة الغلط المهم بعد الصدمة واني انا مب يايبه معاي غير الفستان الي فوقي وريلي الحمدالله ياب معاه كناديره دخلنا وقلنا بناكل و نفكر بعدين شو نسوي اكلنا وخلصنا وقررنا نشتري من ابن بطوطة ونمشي امورنا وبعد ما شترينا وصلينا وخلصنا امورنا استوت الساعة 5 العصر والمفاجأة الثانية بسبت التعديلات الي موجودة في دبي حاليا ضيعنا و سألنا عسب نوصل للفندق واخيرا وصلنا كانت الساعة 6 وربع المغرب الحين المفآجأة الثالثة لما دخلنا عشان نرتاح بعد الفيلم الهندي الي استوالنا قالولنا انه مافي غرف اونه الغرف كلها مب نظيفة وان مافي غير غرفة وحدة فيها سريرين وبلمونه عسب يستوي سرير واحد ما عجبتني السالفة وهاوشتهم بس مب صراخ وريتهم اني معصبه فاخيرا وليس آخرا عطوني نص جناح الحمدالله الغرفة كانت جدأً عادية ولا التلفزيون كان مخترب بعد والله يعزكم الحمام صغير المهم مشينا امورنا......بس المنظر كان مطل على مول دبي والفطور كان بوفيه رووووووووووعة ومطل على حديقة يعني الفندق حلو ومب حلو في نفس الوقت........

واعذروني اذا طولت عليكم حبيت اشاركم تجربتي

المزيد من آخر المواضيع من نفس القسم:

**MAHA AL3AIN** · 2009-01-25, 14:50

وين الصور
ياليت صورتي حقنا الفندق وكل شي
مشكوورة

**شمائل** · 2009-01-25, 15:20

عسب ماتزعلون هذا صووووووووووور بس من الانترنت

تشبه الغرفة الي كنت فيها
http://www.sarhwing.com/images/photo...525-200154.jpg

وهذا الفندق من داخل
http://farm2.static.flickr.com/1003/...67679eda44.jpg

وهذا الفندق من برع
http://motiva.jeeran.com/al%20murooj...es.2.Large.jpg

واسمحولي

**Bint El.Noor** · 2009-01-26, 08:21

هههههههههه

يحليلج

اهم شي استانستو

**أم المر** · 2009-01-26, 08:27

الفندق هذا كل يوم سايره وراده عليه انا هههههههههه مجابل اطول برج فالعالم

**أحبـ M ـك** · 2009-01-26, 16:00

انا كان خاطري اسير ها الفندق

وتسلمين الغاليه ع الموضوع .. وان شاء الله اياكم كلها عسل في عسل

**شمائل** · 2009-01-26, 16:11

تسلمون يالغاليات على الردود الحلوة

**قلبي من ألماس** · 2009-01-26, 18:01

هههههههه يالله تعيشين وتاكلين غيرها

يالله ما عليه فديتج تغيير ... عشان صدق ما تنسين ذكرى زواااجكم هالسنة..

انزين حبيبتي .. تنصحييييينيييييي احجز في هالفندق والا ..

وكم اسعاااارهم ..؟؟

**(ام اليازيه)** · 2009-01-27, 18:07

وانا بعد في خاطريه احجز ع الاسبوع الياي
نحجز ولا مب اوكيه

**زعابية غاوية** · 2009-01-28, 01:51

نزلت أنا بهالفندق يوم عرسي مستواه من الداخل((الغرف)) أبد مايخصه بالشكل الخارجي الغرف ضيجه والحمامات صغيره يعني ماعيبني وااااايد

**سيده طموحه** · 2009-01-28, 04:10

اهم شي غيرتوا وعشتوا تجربه غير خخخخخخ

**نور*الشارقة** · 2009-01-28, 04:39

اذكري الاشياء الحلوة واللحظات الي ستانستي فيها لا تكدرين عا عمرج..

**faa2** · 2009-01-28, 07:05

بارك الله فيج
عزيزتي وموفقه بإذن الله

**شمائل** · 2009-01-28, 11:27

عزيزاتي مثل ما قالت الاخت (زعابية غاوية) الغرف مايخصها بالشكل الخارجي وايد عادية والحمام الله يعزكم واااااايد صغير.....هو ينفع إذا حابين تروحون دبي مول الفندق جريب منه.....اما غير شذي الغرف جداااااااااااااا عادية بالمقارنة مع الفنادق الثانية

**ام وعووودي** · 2009-02-02, 01:13

انا حجزت فيه وكان عادي بس نظيف والقنوات كلها موجوده والتلفزيونات كلها شغاله والخدمه بعد اوكي واحلى شي فيه المطاعم واااااااااايد روعه خصوصا المطعم الهندي اكلهم لذيذ والمطعم فعلا راقي

والي تبا تحجز خلها تحجز لانها تجربه حلوه بتكون خصوصا لوتقومون الساعه 7الصبح وتتريقون تحت اصوات العصافير تجنن احس شرات المنتجع لانه فيه جلسات حلووووووووووووووه تحت وفيه سبا ومساج والمساج مالهم رهيب وانا وريلي جربناه
الصغاريه استانسو عالمكان وهذا كان اهم شي عندي

وهو بعده يديد مب جديم

انا اهم شي عندي نظافة المكان الي بسكن فيه والموقع

ومن طبعي احب التغير وتقريبا يمكن مجربه جميع فنادق دبي

وكل مااسمع بفندق يديد لازم انجربه يوم انسير دبي

بنات التغير حلو بس حق عيد زواج او مناسبات خاصه ثانيه لاماينفع لازم تحجزون في فنادق مجربه

عالعموم هذي وجهة نظري وهذا الي انا شفته بنفسي عن الفندق واي استفسار عن الفنادق انا حاظره
بالي اقدر عليه

الموضوع: فندق المروج روتانا

أدوات الموضوع

عرض