رحلتي للكويت ...

**BinKhadim** · 2009-01-22, 18:28

الحمدلله وصلت بالسلامه البارجه من الكويت ... وكانت وايد رووعه ...

الجو بارد ... اكثر عن جو الامارات ... ودرجه الحرارة كانت من 9 الى 15 درجه ...

سكنت في شقه مفروشة ... أرينزا للشقق المفروشة ... في منطقة السالمية وهاي احسن منطقة عندهم في الكويت ... كل شي يكون عدالج ... وكان فندقنا قريب وايد من الجمعية ... وخذنا الشقة غرفتين وصالة + مطبخ + وحمامين ...بـ 25 دينار ... والسعر الاصلي كان 30 دينار وريلي كلمهم وسوو لة خصم ... والحمدلله كان المكان نظيف وزين ... وعلى فكرة الاسعار بتبدأ ترتفع عندهم علشان مهرجان هلا فبراير ...

واجرنا كامري 2007 من المطار بـ 10 دنانير ... وبترولهم وايد ارخص عن بترولنا وسياراتهم ما تصرف وايد ... ونصيحه خذو معاكم تلفون فيه نظام تحديد المواقع (GPRS) ماجلان ... لانه صدق نفعنا وايد هناك ...

والاكل ... وما ادراكم ما الاكل في الكويت ... الكويت ابكبرها كلها مطاعم ... والله ما اظن انهم يطبخون في بيوتهم هناك ... في كل سكة بتحصلون مطعم ... واغلب مطاعمهم تيك اوي والا دليفري وما فيهم قعدة ... بس نصيحه جربو مطعم الصاج الي في سوق المباركية ... والله ان اكلة رووعه وحتى يلستة حلوة يالله اتحصلين طاولة ... ويحطون لج دفاية والا كوار جدامج من البرد لان المطعم مفتوح ... وبتيج قطوة تحت الطاولة تحطين الها اكل ... والحلويات خذو من الكنفنجي ... كنافة بين نارين بالقشطة وايد حلوة بعد ... وتقدرين تتصلين لهم ويوصلون لج ورقمهم 1888000<< حلو صح ...

والاسواق ... عندهم الافنيوز ... وهو كبير مثل الامارات موول ... وعندهم مجمع نقرة الشمالي ونقرة الجنوبي وعندهم بدل وفساتين بعد وايد حلوة ... وواحد فيهم يبيع فساتين الكبار .. والثاني لفساتين الصغار << وفصلت لبناتي 5 فساتين وخلصوهم في اقل من يومين ...
وعندهم سوق العربيد ويبيعون فيه الجلابيات ... وما حصلت شي عيبني لان التشكيلة الي نازلة كلها شتوية .. والكولكشن اليديد قالو لي بينزل على نهاية شهر 3 او 4 ... ولا تنسون تكاسرونهم لان كل الي يبيعون في المحلات سيلانيات ويوم ايونهم الخليجيات يرفعون السعر ...
وخذت فساتين من سوق الحمرا ... واسعارهم ارخص من المحلات الي في سوق النقرة ... لاكن ما عندهم تشكيلة كبيرة ...

ولا تنسون تزورون الاكواريم ... تراة وايد حلو ومرتب انصحكم فيه ... وفيه قاعه للعب الاطفال وفيه ممشا يطل على البحر ...

وقبل لا انسا ... الدينار الكويتي = 13.2 درهم اماراتي ... ولو تصرفون في الكويت احسن ...
وحجزي كان على طيران الجزيرة ... وكل ما حجزتو بدري كان السعر اقل ...

المزيد من آخر المواضيع من نفس القسم:

**فيونكا** · 2009-01-22, 20:17

ماقصرتي تسلمين و الله الكويت ما ينمل منها و الحياة عندهم مستمرة بالليل تحسين انه بعده تو الناس و اللا هي الساعة 3 بس غريب ما سرتي المنتزه الالعاب واييييد حلو المنتزه و الحديقة المائية اذا عندج يهال وايد يستانسون...... ربي يهنيكم دوم

**بدر0البدور** · 2009-01-22, 21:52

إن شاء الله أستانستوا

**M!Ss AD** · 2009-01-22, 21:59

وناااااااسة ما شاء الله

**المهجه** · 2009-01-22, 23:27

وحشنــــي شوف الكويـــت

**عيون قصيد** · 2009-01-22, 23:44

الحمد الله على السلامة

**om_hamad** · 2009-01-23, 00:05

الحمد لله على السلامه ونورتي الكويت

ضحكتيني يوم قلتي ما أظنهم يطبخووون

المطاعم إللي شفتها في المناطق التجاريه والمناطق التجاريه ما يسكنونها الكويتيين
الكويتيين لهم مناطق برا السنتر .
وحياج الله الغاليه في ديرتج الثانيه الكويت .

**قلب غاليها** · 2009-01-24, 02:15

يااااي فديت الكويت انا

**missuae3003** · 2009-01-24, 03:40

الحمدلله على سلامتكم ^_^
خاطري اروح الكويت .... الحين هههههه

**مهره 85** · 2009-01-24, 06:33

يااااااااااي متولهه ازور الكويت

**Ayesha** · 2009-01-24, 19:47

أنا ابغي اروح الكويت بعد..

**ايشوووت** · 2009-01-24, 22:42

حلوووووو خاطري أرووح ,,

**rose_dxb** · 2009-01-25, 00:41

الحمدالله ع السلااامه

بس وين احسن مكان يبييع فساتيين

؟

**كويت 88** · 2009-01-25, 00:50

ههههههههههههههه ســــــــــــوق لمباركيه هههههههه تصدقين ما رحتله منزمان ذكرتيني فيه
نورتي الكويت يالغاليه ......
كل شي بالكويت حلووو ورخيص اما سالفه المطااااعم هههه ريوووق وغدا وعشا عل المطعم ههه

**dala dubai** · 2009-01-25, 00:57

يالله يرزقناااااا زيارة الكويت

الموضوع: رحلتي للكويت ...

أدوات الموضوع

عرض