ولدي يعاني من التفرقه

[أسرار قلب]

السلام عليكم ورحمة الله وبركاته
شحالكم خواتي عساكم بخير
حبيت اطرح مشكلتي اللي أعاني منها .. وايد تعبانه نفسيا من الموضوع
تميت أدور وأدور في القسم على مشكله نفس مشكلتي علني استفيد لكن ما حصلت
مشكلتي هي ولدي
ولدي هو الثاني في العايله وولد عمه الاول
فهذاك حصل الحب والاهتمام والرعايه والحنان وكل شي ممكن تتصورونه وانا كنت حامل هذيج الفتره وكنت فرحانتله والله وبالعكس احبه مثل ولدي وكنت اتصور يوم بيي ولدي بيلقى نفس القدر من الاهتمام والمحبه من العايله
لكن يوم ربيت انصدمت وانصدمت وانصدمت وكل يوم انجرح اكثر من الثاني واكتم في قلبي والله قلبي يحترق على ولدي
قبل كنت اقول يمكن صغير ما يتجاوب عشان جي ما يلعبونه ولا يسوون له سالفه لكنه الحين كبر ماشاءلله عليه وقام يتجاوب ويضحك ويناقز ويتحرك ويسير لأي حد لكن محد معبرنه
وولد عمه بس من يشوفون ظله تقوم الدنيا من السوالف والضحك والتعليقات عشانه
انا مب حاسدتنه ولا حاسده امه اتمنالهم الخير بس الحق على اهل زوجي اللي مفرقين بين الاثنين
والله خلاص مب قادره استحمل اكثر عن جي باجر ولدي يوم بيكبر ويفهم بيتعقد
هو الحين يوقف ويطالع ويشوفهم يوم يلعبون هذاك وهو ولا مسوين له سالفه
وانا قلبي يحترق ماظن في وحده غير بتستحمل اللي يسوونه في ولدي
من غير التعليقات عليه
قبل يوم يصيح يقولون حشره والحين يضحك ويسولف (يلعب روحه) بعد يقولون حشره
ما عرفت شو يبون
مع انه علاقتي فيهم وايد وايد وااايد زينه فوق ما تتصورون ويحبوني ويقدروني بس ولدي ماعرف ليش مهضوم حقه
حبيت افضفض لنه فيني ضيقة الله يعلمبها
ادعولي بنات الله يفرج ضيقتي وويحفظ لي زوجي وولدي
تحياتي
أسرار قلب

المزيد من آخر المواضيع من نفس القسم:

• لأنّه جعل الفقير ييعش مع المؤمنين لا مع...
• الإكتئاب طاعون العصر الحديث بحث مرجعي...
• كيف تكون إيجابيا ؟
• كيف تتعامل مع ذاتك بطريقة صحيحة؟
• كيف تقوي ذاتك؟
• كيفية تطوير الذات بطرق بسيطة
• افضل طرق لتطوير الذات وزيادة الثقة بالنفس
• اهم المهارات التي تحتاجها لتطوير الذات
• طرق تطوير الذات في مجال العمل
• اقتباسات ~ مُهرة القَصر

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[يا ورد]

السلام عليكم ورحمة الله وبركاته

الغاليه

انتي أبداّ لا تخلين الولد يهتمّ بهالشي

يمكن الولد الكبير له ميزه انتي ما تشوفينها .لانج تحاتين ولدج

خلي ولدج على طبيعته ...ولا ترمسين جدامه وتقولين يحبون فلان اكثر

صدقيني ما في يدّ ما يحب حفيده .. بس بمستويات تختلف

ولا تنسين غلاة الأول غير

وشوي شوي بتحسين انه اللي تفكرين فيه بدى يتلاشى

ولا تحسسين اهل ريلج انج مضايقه من هالشي و يمكن تصير مشاكل انتي في غنى عنها


والله ايسرّ اموركمّ يارب

[ام حامد العين]

الغالية لاتكبرين الموضوع خلي الأمور عادية انتي عوضي ولدج من هالناحية لاعبيه وخليهم يحسون أنج أنج مب حاسه بهالتفرقه وحاولي تلاعبينه هو ولد عمه مع بعض خليه يحب ولد عمه لان الياهل حساس وإذا حس انهم يفرقون بينه وبين ولد عمه بيكرهه خليج اكبر من هالسوالف أنا مريت بهالسوالف قبلج بس مب من الكل من جدة عيالي كانت وايد تفرق بين عيالي وعيال بتنها بس الحين كبروا العيال وعيالي هم لي يحبهم جدهم أكثر خلي ولدج على طبيعته والله يخله لج يارب ويحميه ويسخرله قلوبهم يارب

[نااعمه]

خبريهم عن شعورج قولي لهم بتعقدون الولد بتصرفاتكم عالاقل جاملوه ولدكم هذا مب ولد ناس غرب قولي لهم لو استمريتو جذي بظطر اظهر من البيت واروح بيت اهلي ليما ريلي يحصل لي بيت لانه مابا ولدي يكره اهل ابوه

[جروح_دمية]

انا اقولج يوم يلاعبون ولد عمه قولييلهم بمزحه اشمعنى ولدي ما تلاعبوونه؟؟!!<< بس قلت بمزحه هاااه خخخخخ

او مثلا قوليلهم لاعبووه وريحوني شوي اباه بتعود عليكم دوومه عندي وجيه بيهتمون فيه..

[أسرار قلب]

يا ورد

هلا فيج اختي ولدي بعده صغير ما كمل سنه حتى يعني بعده ما يفهم بس خوفي من باجر يكبر ويحس بالفرق .. هو مش انه ما يلعبونه او ما يهتمون فيه ... بس المقادير تختلف ... المفروض كل شي بالمساواه .. لكن مافي مساواه.. وانا كم طنشت بس ماقدر اتعب نفسيا والله اتعب .. احاول اتغاضى .. بس ماقدر .. وانا ابدا ما بينتلهم اني مضايقه من هالشي .. حتى هم ما يدرون اصلا .. بس الله يعين
ومشكوره على الرد الطيب

ام حامد العين
هلا اختي الله يعينا بس .. انا الحمدلله مهتمه في ولدي واعطيه كل الحب والرعايه والاهتمام .. واقول انا اسده .. وانا ما انكر انه بعضهم مهتمين فيه .. بس البعض الاخر يهتم في طرف ويهمل الثاني .. يالله الله يعين ان شاءالله ... وبالنسبه لولد عمه هو ياهل وما يفهم شي .. وولدي يحبه وايد.. ومشكوره اختي

ناعمه
هلا اختي .. انا مافكر ابدا اني افاتحهم بالموضوع .. خلاص يوم هالشي مش من خاطرهم .. ما ينجبر قلب على قلب .. هم مش انهم ما يحبون ولدي .. بالعكس يحبونه .. بس فرق شاسع بين محبة الاثنين .. وشكرا على الرد

جروح داميه
لووول مثل ما قلت لاختي ناعمه .. مافكر اني اكلمهم ولا اشحت اهتمام لولدي .. انا وابوه نسده .. والبقيه اللي يحبونه ويموتون فيه .. والله يعينه ... مشكوره اختي على الرد ^_^

[هوى البال*]

من رايي يا اختي انج تصارحينهم و تفهمينهم موقفج قوليلهم لو عيالكم ما بترضون عليهم
و انتي عوضي ولدج عن دلعهم و اهتمامهم .. ودييه الالعاب

[lailee]

حبيبتي مثل ما قالوا البنات يمكن لان ولد عمه اول فرحتهم , بس عشان اتحسين بموقفهم اتخيلي عند ولد غير ولدج هذا والاثنين عندهم عيال معقوله اتحبين واحد وما اتعبرين الثاني بنقبلها بخصوص العم والعمه مع انه نادر ما يصير هالشي فما بالج بالام الي هي يدة العيالمستحيل تدرين انا عمتي كانت وااايد تتشكى من مرت ولدها الكبير بس اتموت في عيالهم حتى مب مشكله عندها اتزوج ولدها على حرمته بس العيال ما يخصهم بالي بين الكبار وانتي علاقتج زينه باهل ريلج يعني يمكن الامور عاديه وانتي حساسه شوي.

[واقع بس خيال]

اختي مادري مجرد اقتراح :
اذا هو كبير شو ويقدر يرمس وجيي.. جربي مرة تشترين هدايا بسيطة وخليه يوزعها على يدته وعماته ..
او وانتي قاعده معااهم ..قوليله رووح عند عمتك عطها بووووسه كبيييييييييرة
او انتي قولي لوحده منهم ..فلااانه علمي ولدي هذييج الحركة الحلوة اللي تسوينها دايما ..( مثلا بوسه ولا ابتسامه ولا حركة مميزة تسوينها )
وشوفي كيف يتجاوبون من اول مرة ..اذا نجحت الخطة استمري على جي
خلي ولدج يختلط فيهم بهالطرق
وتلقائيا بتحصلينهم يذكروونه ..تحييييدووون وتذكرووون فلان يوم كان صغير شوكان يسووي

يوم تكلمينهم بالتلفون ..خليه يرمسهم ..علميه اسمائهم وخليه يقولها بالفون وجي

ولا مثلا سوي عمرج مشغووولة وخلي ريلج يدق لوحده من خواتج ويقول لها شو احلى قصة تناسب اليهال ..كيف تبيني اقص شعر ولدي هالشهر نبا نغير الاستايل شوي وقلت بسألج .. طبعا هي بتستغرب شوي بس عقب بتفكر وبتهتم شوي ..والمرة الياية بتقول الله هاي القصة اللي انا اخترتها له ..


طبعا يختلف من عايلة لثانية ..ما اعرف انتو كيف ويا بعض ..بس تقدرين تغيرين اشيا بحيث انها تناسبكم اكثر..



والسموووحه عالقصووور

[jumana]

لا ترمسنهم ولا شياته عن اتييج الرمسة وووووو

[أخت القمـر]

وهذا خوفي انا

من البيبي الياي

اعرف انه بيعاني من التفرقه

والله هذا الي مهيأة نفسي له

وسامحيني دخلت موضوعج عشان اقرا الردود واستفيد وياج ^_^

[*فراولة*]

يا ماما عادي الشيء ....تسير فترة و بعدين الك مع بعض خبايب ...

لا تحطي الموضوع اكبر من حجمه ...لان يمكن ولدج صغير بالنسبة لهم و خايفين عليه من لعبهم - دفشيين -
الموهيم ولدج بيعرف كيف ينسجم معاهم و يخليهم ينسجمون معاه ...لا تتدخلين عسب لا يكون فيه تحسس ماله داعي ...

بس تمي راقبي من بعيد ...و اذا كبر ولدج و الحال مثل هو .....صارحيهم ...و حاولي انج تكوني موضوعية وبدون انفعال و وضحي لهم ان الي يسونه غلط و ما يرضا الله و لا رسوله و لا يرضيج ....

و الله يوفقج

[بيونكا]

انا استغرب من هالتفكير

عندي جيه حد من خواتي نحبها ونحب بنتها بس هي عندها عقدة اننا ما نحبها واننا نحب بنت اختي الثانية اكثر من بنتها .. مع العلم اختنا هذي ساكنة بعيد ونشوفها بالحسرة ويوم نشوفها نستانس عليها وعلى بنيتها بس الصغيرووونة تصيح يوم حد يشلها وتصاااارخ بعكس بنت اختي الثانية اللي كله تضحك وتلعب وبعدين اختي الثانية ساكنة قريب بيتنا وكل يوم هي وبنتها عندنا في البيت .. فعادي نتعلق ببنتها اكثر من اختي اللي ساكنة في امارة ثانية

[طيرالحبارى]

السلام عليكم .

حاولي انج اتعوضين ولدج..
دلعيه ولعبيه ولا اتخلينه ينتبه عالل يصير ..

الله يحفظلج ولدج ويجعله من الصالحين ..

[راعية اللكزس]

لا تكبرين الموضوع بنفسج عشان ما يكبر بنفس ولدج ...لانه شعورج لا اراديا بينعكس عليه ...

و باجر ولدج يوم بيكبر ...بيزيدون عدد الاحفاد ...فما اظن بيحس بهالتفرقه اللي تقولين عليها ...لانهم بيعاملون كل اخوانه و اعيال عمه معاملته ...و الله يصلح امورج