بعد 28 سنه.....حامل‏

[om-7mdan]

قصة عجبتني وحبيت انقلها لكم



انا تزوجت وكان عمري 20سنه من زوج اكبر مني بـ 5 سنوات
كان الزوج المثالي كان الزوج الطيب والحنون كان يحبني وانا احبه
تزوجته وهو الي علمني اشياء كثيره ماكنت اعرفها

مر الشهر الاول والشهر الثاني والشهر الثالث ولاكن لم يكن هناك اي بوادر حمل
وكان زوجي متشوق مرره للحمل لحبه للاطفال

وكان كل مانزلت الدوره يقول معليش الشهر الجاي ان شاء الله يكون فيه حمل
مرة 8 شهور على زواجنا ولم يحصل حمل
رحنى المستشفى وطبعا كشفت وفحصتني الدكتوره وقالت عندك ضعف في التبويض وانا هنا ماعرف وش تبويض وش بويضات
طبعا احنا يابنات زمان مانعرف اصلان وشو البويضات

اعطتني تحاميل اخذتها وانتظر الفرج من الله

مرت سنه وسنتين وثلاث واربع وخمس وانا ماخليت دكتوره ولا مداويه شعبيه الا رحت لها مافي فايده

مر على زواجنا 11 سنه من غير حمل

قررنا نسافر مصر للعلاج

سافرنا مصر وقالو عندك انسداد بالانابيب يبغالها توسعه

سويت التوسعه هذي ورجعت بلدي السعوديه

انتظر الفرج من ربي لاكن ربي ما اراد لي الخلفه

كان زوجي يصبرني ويقول انا مابغى عيال انا ابغاك انتي انا ابغاك بس تكونين مبسوطه ومرتاحه معاي

دايم كنت اقول له يمكن ربي ماكتب لك مني اطفال يمكن يكونون من زوجه ثانيه

كان يقولي اذا ماجو الاطفال منك انا مابغى عساهم ماجو اهم شي انتي بدنيتي

مر على زواجنا 17 سنه واصبت بمرض السكر وكان عمري 36 سنه

وهنا احبطت وزعلت ويئست من الحمل
كانو الناس يقولو لي اللي مريضة سكر ماعمرها تخلف ولا تجيب اطفال اصحاء

مريضة السكر تجيب اطفال معاقين, خلاص كان عندي امل اني احمل واجيب بس من بعد اصابتي بمرض السكر فقدت الامل ومن كلام الناس المحبط

كنت اروح المستشفى ادور لي علاج للحمل لاكن بعد مرض السكر كنت اروح لاجد لي علاج لسكر وخوف من مضاعفات السكر

مر على زواجنا 21 سنه ولاكن بدون اطفال بدون فرحه
انا كنت ساكنه في مدينه بعيده عن اهلي واهل زوجي

طبعا زوجي اشترى ارض وبناها فله دورين كل دور له مدخل خاص
الدور الاول كان لنا نسكن فيه اما الثاني فاجرناه

كانو جيراننا عندهم 4 اطفال وكنت بس اتسمع لاصواتهم وبكائهم ولعبهم وانتظرهم يجون عندي الاعبهم وافرح فيهم
بعد 25 سنه من الزواج الان صار عمري( 44 سنه)
تعتبر الحرمه هنا ستدخل سن اليأس
بدئت ام زوجي وابو زوجي الله يذكرهم بكل خير في هذي السنه يلمحون لزوجي ولي اني انا خلاص صار عمري في الاربعين ولو بحمل كان حملت وكانو يقولون ماحملت وهي بصحتها تحمل وهي معاها السكر الله المستعان
جات الصيفيه وراح زوجي لاهله في المنطقه اللي يعيشون فيها بعيده عنا بكثيير
وانا جلست بالبيت قالي كلها اسبوع وبرجع لك قلتله انا انتظرك
وانا جالسه ببيتي انتظر الاسبوع هذا يخلص عشان يجي زوجي يونسني قتلتني الوحده
مر اسبوع ولا جاء قال بجي الاسبوع اللي بعده

مر اسبوعين وشرف العريس







ايوووووه عريييييييييس

راح الديره عند امه وابوه وزوجوه بنت صغيرونه عمرها 26 سنه

هو جاء من المطار وكان وجهه متغير اشبك يافلان قال والله انا ماقدر اخبي عنك ولو ماتعرفين اليوم بتعرفين بكره

انا رحت لديره وابوي وامي زوجوني

انا فكرته اول شي يمزح معاي واضحك قلتله مبررررررررروك منك المال ومنها العيال

والله والله يابنات ماجاء على بالي ولا واحد بالميه انه يتزوج علي

لانه كان يقولي انا ابغاك انتي ان مابغى اطفال انتي عندي بالدنيا وكنت اصدقه للاسف

بعدين قالي يارحمه انا ما امزح ان صادق
انا هنا بديت اصدق
وقلت له صدق؟؟؟
قال ايوه والله وانا الحين جيت واخذت لها شقه مفروشه وهي هناك الوحدها

!!!!!!!!!!!! !!!!!!!

انا انهرت ابكي هنا وهو يهديني وانا اقول له انا اقول من يوم رحت وحريم الجماعه كل شوي وحده داقه علي وسوالف ويسئلوني متى يجي زوجك وليه مارحتي معاه

انا هنا حسيت اني راح انفجر من الغيظ والقهر

قلت له وانا اخر من يعلم؟؟؟

ليش الشغله حرااام ؟؟
ليش ماقلتلي حلالك بس كان قلتلي خبرتني اول

قال والله هذا الوالد مارضي اقلك قال بترفض مافيه وحده توافق ان زوجها يتزوج
قلت له انا مابغاك تاخذ الاذن مني انا بس بغيتك تخبرني

قال عاد يابنت الحلال حصل اللي حصل

اااااااااااااااااااااااااااااا اه ياقلبي لا تحزن
انا طالعت فيه واقول له طيب؟؟
قال والله هي بالشقه الوحدها بروح اشوف وش تبغى وكذا وجايك اليوم عندي لك كلام كثير واتفاقات

انا دخلت المطبخ ولا كلمته وماسمعت الا صوت مفتاح الباب يقفل طلع

بكيييت بكييت بكييت

وادق على امي وقولها وامي بكت واتاري امي عرفت بس ماحبت تقولي

قامت امي تهديني وتقول هذولي الرجال كذا ماحد له كلمه عليهم

جات الساعه 11 ونص الليل وشرف العريس حتى الوقت مانسيته

ويحاول يهديني ويقرب مني وويسوي نفسه بعد نفسه فيني

وانا مو معطيته وجه
وقام يتفق معاي يقول ليله عندك وليله عندها
هنا انفجرت من الصياح
قال اجي من الدوام على طول عندك واليوم اللي بعده من بعد الدوام عندها

انا ما ارد عليه
قام دخل الغرفه ونام
وصحي تكشخ وراح العمل او الله اعلم راح للعروسه












المهم عدو شهرين من اسوء شهرين على قلبي
كان كله مجاملات وكذب ومسوي نفسه بعد يبغاني
بعد شهرين واسبوع من زواجه قامو الناس يتباشرون بحمل زوجته الثانيه


انا قالت لي بنت اختي قالت ياخاله مادريتي انو زوجت زوجك حامل !!!

قلت لها لا والله مادريت والله يوفقهم

هنا حسيت قلبي بيتقطع على نفسي

زوجي كان طااااااير من الفرحه وكان يقولي والله هيه طيبه والله كمان تقول الولد اللي راح اجيبه لك انو ولدها قبل لا يكون ولدي
قلت له ليه هوه هديه يوم تقول ولدها قبل لا يكون ولدي !!!
هنا زوجي طلع المستاجرين اللي فوق وسكن العروسه ام ولي العهد المنتظر
انا قلت له لا اعرفها ولا تعرفني
هو وافق هنا

انا الى الان ماعمري شفتها

صار الرجال مو معاي خلااااااااااص قلبه وروحه معلق فوق في الدور الثاني

وكبر حملها وكل يوم يكبر تعلقه وفرحته فيها

يوم من الايام جاءني يقول لي اليوم رحنى المستشفى سوينا اشعه وشفنا الجنين كان يتحرك واول مره نشوفه يتحرك

عارفه يارحمه تمنيت انو هذا الولد لي انا وانتي!!!

وانا غاصه بعبرتي والحزن ملا قلبي
انتهت التسعه اشهر وجاء ولي العهد وكان يووووم كله فرحه وجوال زوجي ماوقف من المباركين

ورحمه ؟؟؟
رحمه منكسره مهمومه حزيييينه على قدرها
باركت لزوجي وبكيت وحضني وقال والله يارحمه هذا الولد ماراح ينسيني العشره اللي بينا
الولد هذا مابيغير حبي لك
وانا منهاره ابكي

المهم زوجي صار لمن يجيني في ليلتي كان بس يبغى يقضي يومه ياعلى النت يا على التلفزيون يبغى اليوم يمشي بسرعه عشان اليوم اللي بعده يروح لزوجته وولده الله يحفظه له
كان يجيني بس مثل اللي يسكتني يعني انا جيتك اليوم لا تزعلين

كبر الولد وصار عمره 7 اشهر وعمري ماشفته حتى صوره بجوال زوجي ماعمري شفتها
مو كره للولد لا والله هو طفل ماله ذنب
بس عشان مايتقطع قلبي ولا اتعلق فيه
كنت اسمعه يبكي واحزن لعمري


جاء يوم ربوع وكان اليوم فيني
دخل زوجي الساعه 5 ونص العصر وكان بيده طفل جميل دبدوب لابس بربتوز لونه احمر
وكان الولد ماسك في قميص ابوه حق العمل
دخل وقال يارحمه وانا اطالع في الولد
الولد طالع فيني وقام يبكي
تنكر مني
انا ابكي والولد يبكي
قال هذا عبدالله ولدي وولدك بعد
مابتتشيلينه
جيت اشيله والولد قام يصيح بزياده تنكرني بزياده
بوسته وهو على كتف ابوه وقلت خلاص طلعه لامه لا تسمعه يبكي تقول وش سوت لولدي هذي

طلع من هنا وانا من هنا منهاره كالعاده

يوم كمل الولد 9 اشهر قال زوجي انو امه حامل بالثاني

يوووووووووووووه هنا خلاص طاح كرتي عند زوجي

لمن صارت بالرابع وولدها كمل سنه انا هنا كلمت امي واخواني وقلت خلاص مالي عيشه معاه
كم بقى من العمر انا برجع لك يايمه
صار اللي صار ومناقشات وهواش لا مابطلق الا طلق لحد ماطلقني وارتحت
رجعت بيت امي بعد زواج 26 سنه بدون اطفال
امي كانت مريضه كانت تغسل كلى رحمة الله عليها
جلست في بيت امي 7 شهور فقط وتوفت الله يسكنها جنات النعيم
هنا حسيت الدنيا سودت في عيوني لا اب ولا ام ولا زوج ولا عيال
هنا صار عمري 46 سنه
رحت لاخواني عشت معاهم
كانو يعاملوني مثل امهم مو اخت لهم
بعد سنه من موت امي تقدم لي رجل عمره 64 سنه
ماتت زوجته وعياله متزوجين يبغاني اكون له عون في الحياه بس
انا هنا ترددت واخواني قالو لا احنا مو عجزانين عنك
نعطيك هذا الشايب ويموت وترملين عليه خليك كذا احسن لك
انا استخرت الله ووافقت عليه
قلت اكسب فيه اجر واشيل همي من قلوب اخواني
تزوجت وكان في قلبي حزن على قدري اني اعيش من غير اطفال وفعلا لو يموت زوجي وارجع لاخواني ارمله من بعد ماكنت مطلقه
زوجي طيب معايا ومريض سكر وضغط وكرسترول
وانا مريضة سكر الحمد لله رب العالمين







الدوره كانت ملخبطه عندي يعني مره تجي وعشره لا


قلت اكيد تبغى تقطعني عشان كذا تجي شهر وتجلس 7 و8 شهور ماتجي


جاتني الدوره قبل زواجي بـ 6 شهور ولا زدت شفتها
بعد زواجي بثلاث شهور من الشايب الله يطول بعمره
حسيت بالم في اسفل بطني مغص مثل الدوره
والم بصدري وحراره استمرت اسبوعين
قلت بسس هذا اعراض مرض خبيث ولا شي اعوذ بالله من الشيطان الرجيم


صبرت اسبوعين والشيطان يلعب براسي


وقلت لزوجي وخاف علي قال يلا بوديك المستشفى
رفضت رفضت
واخر شي وافقت من خوفي
رحت المستشفى لدكتورة النساء
قلتلها الاعراض طبعا هيا اخذت معلمومات عني في كل شي عمري وكم سنه متزوجه وهل عندي اطفال وش سبب عدم الانجاب
قالت اطمني ان شاء الله خير
قالت لي هما الحريم كذا لمن تبغى الدوره تقطعهم
قالت اشربي مويه كثير وتعالي اسوي لك اول شي سونار
طلعت من عندها وطنشت رحت البيت وقلت لزوجي انا متوكله على اللي فطرني
مابغى اخوف نفسي
وجلست اسبوعين ثانيه نفس الاعراض وكمان جاني فقدان شهيه للاكل
رجعت لدكتوره وانا شاربه مويه جاهزه قلت لها هيا سوي السونار قالت وين رحتي اشبك خرجتي مارجعتي لي قلت انا خايفه ومدري ايه
واتكلم معاها وهي بالسونار على بطني اقولها انا ربي كاتبلي الشقاء يادكتوره
قالت فرج الله قريب يابنتي
بس هذا اللي قالته لي
راحت على مكتبها وسوت لي ورقه قالت هذا تحليل روحي سويه
رحت المختبر وقالت لي السستر اللي تسحب عينة دم مدام حامل؟
انا قلت لا بكل برود
وسكتت
قالت النتيجه بعد ساعه
خرجت بالاستراحه وجلست سوالف مع الحريم
بعد ساعه جاء زوجي يناديني ويقول لي ادخلي ادخلي لدكتوره وهو يضحك كذا في عيونه فرحه
دخلت لدكتوره وقالت لي مبرررررروك يارحمه انتي حامل اهو في حمل


ورب الكعبه حسيت قلبي يدق يدق يدق وحسيته يدق ببطني وحسيت بدوار براسي كذا


شعور غرررررررررررررريب
قلت كيف حامل؟؟؟
قال ازاي كيف افهمك يعني ولا ايه وتضحك
وانا اقلها وضعف المبايض وانسداد الانابيب؟؟
وكيف احمل وانا عمري 47 سنه
قالت ارادة الله
اذا ربي اراد شي يقول له كن فيكون
لا اله الا الله
قمت اسلم على ايديها وابكي ابكي ابكي
واسيب الدكتوره واطلع لزوجي بالسيب واقف وفيه رجال واسلم على ايديه وابكي واقوله تعال شف الدكتوره وش تقول وهو عارف اني حامل قالو له بالمختبر
طبعا دخل معاي والدكتوره انصدمت انو هذا الرجل اللي انا حامل منه لانه شايب
ههههههههههههه


قالت مبروك المدام حامل
هو قال الحمد لله والشكر لله اللهم لك الحمد
شفتي يارحمه ربي رحمك وعوضك
وانا شغاله بكي
قالت بس في شي بقووله لكم
وشو ؟
قالت السكر
السكر له اثار كثيره على الجنين ولازم الان اعطيك تحويل على قسم الباطنيه ولازم تنويم
رحنا الباطنيه ونوموني ونظمولي السكر
واعطوني بدال الحبوب ابر انسولين
بعد اسبوعين رجعت لدكتوره وسوت لي سونار وسمعتني صوت قلب النونو
يووووووووه هنا بطير من الفرحه واتذكر امي رحمة الله عليها نفسي انها عاشت فرحتي
رحت البيت قلت لزوجي بعلم اخواتي واخواني بحملي
قال لا انتظري
والله انتظرت ولمن دخلت الشهر الرابع علمت اخواتي وهم قامو بالمهمه نشرو الخبر
بس فيه ناس ماصدقت اني حامل بعد هذا العمر





تم حملي ولله الحمد بعد جهاد وعلاجات لسكر وحميه وتخويف الدكاتره الجنين فيه وفيه


مرت الشهور مثل السنين
بدئت احس بحركة النونو ببداية الرابع مثل الغازات كذا او الرعشه
ومومصدقه
رحت لدكتوره وورتني هوه يتحرك ببطني يلعب وحواليه مويه
وتذكرت فرحت زوجي الاول لمن شاف ولده يتحرك ببطن امه ولمت نفسي اني انقهرت وبكيت ليه مافرحت له؟؟
اخيرا حسيت بالشعور اللي يحسون فيه الحريم
اللهم لك الحمد يارب
بدا بطني يكبر وفرحتي تكبر معاه
بديت اشتري ملابس حمل اللي طول عمري امر من جنبها واقول الله يعلم هل بيجي يوم البسها؟
بدا بطني يكبر زياده
اوقف على الغساله ابي اتوضا واطالع في بطني مو مصدقه انا سرت كذا؟
اطالع في بطني قدامي وصارت حركات النونو تبان
اجلس على الكنبه واطالع ببطني واحمد الله
كنت اطالع بالحريم اللي حوامل واقول كيييييييييف؟؟
كيف يحملون ياربي؟
كيف يحسون في شي ببطنهم يتحرك ؟
انا الحين سرت مثلهم
اتذكر مره شفت حرمه شحاذه بالشارع حامل تطلب فلوس وكان يدور ببالي اقول كيف حامل هذي كيييييييف؟
حتى الشحاذين يحملون وانا لا
استغفر الله العظيم بس من كثر مافي قلبي من حزن وشغف للحمل
بديت اجهز لنونو من يوم قالو لي ولد بالشهر السادس
الله مو مصدقه
اخيرا سرت ادخل هذي المحلات حقت الاطفال واشتري وانا واثقه
الف حمد وشكر لك يارب
كانت هذي المحلات ممنوعه انيادخلها بس اطالع من برا فيها
كنت ما اصدق وحده تولد واقول لزوجي يلا نجيب لها هديه بس عشان ادخل محل الاطفال واجلس اتفرج واتخيل اني اجيب هذي الاغراض لولدي او بنتي المنتظر
الحين اشتري وانا فرحانه
جهزت كل شي لنونو وجهزت لي انا بعد اغراض لنفاس


دخلت الشهر التاسع جلست 3 ايام بس وقرر لي عمليه الدكتور استشاري
قال البيبي بدا يكبر وانتي معاك سكر وكمان حمل عزيز لازم نخرجه قبل لا يصيبه مضاعفات
هنا بديت اخاف مو على نفسي لا والله على ولدي
هل بيطلع طيب وبخير؟
هل بيطلع سليم مافيه اعاقات؟
في 22\8\1428
هذا اليوم اللي لن انساه هو يوم ولادة ولدي (سلطان)
رزقت بطفل جميل


اللهم لك الحمد والشكر يارب
ربي عوضني في زوجي الاول وصبري
ربي رحمني في رحمتي لهذا الشايب اني وافقت عليه وهو مريض وبدون زوجه
ربي كتبلي الحمل في هذا السن وبعد 28 سنه زواج
26 سنه زواج من زوجي الاول
وسنه وحده فقط من زواجي بزوجي الثاني


انا كتبت قصتي لكم للعضه والعبره
وان الرزق يجي اذا ربي راده
لا ضعف تبويض ولا تكيس ولا انسداد انابيب


انا ماحطيت ببالي ولا واحد بالميه اني احمل ولا اجيب طفل


لا تقنطو من رحمة الله
ربي رحوووووووووووم


رحوووووووووووووم يابنات
اتمنى من الله عز وجل ان يصلح سلطان ويخليه لي ولابوه الشايب
الحين عمر سلطان حبيبي سنه وشهرين ربي يحميه
ابوه عمره 65 سنه وامه عمرها 48 سنه


سلطان غير حياتي فديته


وهذي صورة لسلطان ربي يحفظه ولد الشيبه والعجوزه هههههه




قولو ماشاء الله






قلنا


قولو ماشاء الله

ماشاء الله تبارك الله


ماشاء الله تبارك الله





ماشاء الله تبارك الله





ماشاء الله تبارك الله





ماشاء الله تبارك الله

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[رويــانــة]

ما شاااااااء الله .. ربي يبارك لها في سلطااااان يارب ويقدرها انها تربيه وتشوفه عريس

من أرووووووع القصص اللي قريتهااا

سبحان الواحد الغفار الرحمن الرحيـم

تسلم يمناج ع القصة العذبة

[طفولية]

مشاء الله وتبارك الرحمن الله يخليه لج ولايحرمج منه انشاءالله

[مسكاويه]

يالله

يامنت كريم يارب على قولت اخوان المصرييين

سبحان الله ما كتب لج عيااال من زوجج الاول

الله يحفظ لج سلطاان ويلحقونه إخوانه إن شاء الله ...

[ثلوج الصيف]

سبحان الله
هذا كله مكتوب من عند الله
وإبصراحه كنت مندمجه بالقصه .. ابغي أعرف أخرتهاا
وأنا أقرا الموضوع مره عيوني أدمع .. ومره اضحك

وماشاء الله على سلطان .. وعقبال ما اتشوفينه معرس
وربي يحفظه ويخله لكم

[عود معطر 2007]

ما شاااااااء الله .. ربي يبارك لها في سلطااااان يارب ويقدرها انها تربيه وتشوفه عريس

[3osha]

سبحان الله على كل شيء قدير
وقصه رووعه واكثر من روعه
تسلمين على النقل الجميل

[Sweetest]

ماشالله وربي يحفظه
عسى ربي يجعله قره عيني ابويه ويسعدهما
مشكووووووووووورة الغلا على القصة
صراحة بكتيــــــــــــــــــــــــــــني
الحمدلله الحمدلله وعسى ربي يفرج كربة كل محتاج دينا واخرة

[umm zayed]

الله يبارك فييه و يخليه حقج انشالله و تشووفيينه معرس انشالله

[نور القرآن]

ما شاءالله عليه الله يحفظه ويجعله من الذريه الصالحه والله قصتج تعور القلب بس ما شاءالله عليج ام صالحه والله يسعدج دنيا واخره

[** ام زايد **]

ماشاء الله تبارك الرحمن الله يحفظه ويخليه لامه وابوه
الصراحه قصة تعور القلب

[الأمينه]

ما شاء الله واللهم بارك والله يرزق كل وحده ما عندها عيال وفرح قلبها ويهدي عيالنا يارب وجزاج الله خير وكل شي بايد رب العالمين

[umsa3ed]

ماشاء الله ماشاءالله ماشاء الله ..

[$سكون حلم$]

تبارك الرحمن...ربي يحفظه...أنا بعد أعرف وحدة متزوجة من 15 سنة و من شهرين ولدت و يابت توم بنات

[إمارتيه]

ربي ما ينسى عبادة ,,,, الحمد لله
وربي يحفظ سلطان من كل شر