تقرير مصور عن رحلتي مع عائلتي الصغيرة لتايلاند....

**أم أسعود20** · 2008-11-07, 21:55

السلام عليكم ورحمة الله وبركاته

اول مره اكتب تقرير مصور إنشاء الله يكون مفيد لكم
الوجه إلى : تايلاند
الاشخاص : انا وزوجي وولدي وبنتي
تاريخ الرحلة : من 9-10-2008 إلى 19-10-2008
الطيران : طيران الاتحاد
وخططنا : ثلاث ايام في بانكوك وثلاث ايام في شنغماي واربع ايام في بانكوك
راح نبدأ من مطار أبوظبي

رحلتنا كانت الساعة 9 الصبح سرنا المطار الساعة 7:30 لان نحن سايرين المطار بدون الشنط طبعاً لانه وديناهم قبل موعد الرحلة بيوم لمكتب الطيران ( ميزة حلوه بطيران الاتحاد) ولما وصلنا المطار قلنا خل ناكل لنا شئ وخاص اليهال يواعه سرنا كوفي ويلسنا وكلنا خفايف وهذه صورة بنتي في الكوفي وطبعاً العربانه شي مهم في السفر للصغارية.

وهذا ولدي يالس ياكل كرواسون طبعاً بعد ما جهزته له.

وبعدين ركبنا الطيارة وخلاص بنبعد عن بلادنا الغالية وهذي صور عيالي في الطيارة وبعض الصور للغيوم ( المنظر كان روعه وقلت لازم اصوره لكم ).

وهذي صور بنتي يالسة تتسمع ومستانسه

راح اقولكم موقف صار لي في الطيارة والسبب عيالي
نحن ماخذين ثلاث كراسي على الطرف يلسنا انا وولدي وبنتي وزوجي يلس حذالنا بس في النص وكان يالس واحد ورى زوجي معها وحده اجانب طبعاً ، وولدي طبعاً كان شبعان رقاد وما رقد في الطيارة وكان ماذني كنت اخوفه بالريال الا يالس ورى زوجي لانه اسمر كنت اقول لولدي شوف الحرامي الاسمر راح يعصب عليك ، وبعدين قام ريلي من مكانه وسار ولدي يبي يلحقه جان يمسكه الريال ويقوله ايلس انا انصدمت جني ما سمعت عدل طالعة الريال قالي ماذنكم صح وانا ما عرفت شو ارد عليه من الفشله رديت على ورى ولا كلمه ولا حركة وطينها ولدي لما قال ما ما شوفي الحرامي الاسمر ولما رد ريلي مكانه قلته انه الا وراك مواطن ريلي انصدم ، وبعدين ريلي قال لولدي ايلس لانه عمي بعصب عليك لانه ولدي كان يالس يلعب معاه قلت بخاطري نحن خلينا فيها عمي ، بس وحليله ما قال شئ طول الوقت يلعب مع عيالي .

وصلنا مطار بانكوك الساعة 6 المغرب بتوقيتهم صورة السيارة الا خذناها من المطار طبعاً عايشين الجو .

هذا لليوم وباجر إنشاء الله راح احطي الجزئ الثاني.

السموحه

المزيد من آخر المواضيع من نفس القسم:

**@swanky@** · 2008-11-07, 23:22

waaaaaaaaaaaaaaaaaw
ذكرتيني بتايلند الله لا يرد ذيج الايام
ما حبيتها مرة انا من اول يوم تميييييييييييت متملله وطفرانه وتمنيت ارد البلاد
تايلند وايد وصخه واللي فيها اوصخ (سوري عالكلام بس من الي شفته)

**الجـــــوهرة** · 2008-11-07, 23:50

هاهاهاها بصراحه موقف ايفشل الى صار لاج ان شاء الله ما يصير لى شرات موقفج

يالله نتريا باقي التقرير والصور حبوبه

^^

**قمره** · 2008-11-07, 23:57

بصراااحه شوقتينا سردج للرحله ممتع

ننتظر باقي الرحله

مشكووووووره عالتقرير
متاابعه

**السيدة الأولى** · 2008-11-07, 23:58

آب آآآب

**الشوووخ** · 2008-11-08, 00:04

هههههههههههههههههه ... يالفشلة لو أنا جان عقيت بعمري من الطيارة

**إمارتيه** · 2008-11-08, 00:10

كملي يالغلا ونحن في انتظار باقي الرحلة ..
لانه شكلها من البداية مشوووووقه

**عزوونة95** · 2008-11-08, 11:57

في الانتظااااااااااااااااااااار ؟؟؟؟

**أم أسعود20** · 2008-11-08, 14:16

[SIZE="3"][SIZE="4"][SIZE="3"]
أم سعود عن وعدها اليوم راح نكمل الرحله

أول شئ بغيت اخبركم عن الجو انه الجو معتدل وفي بعض الايام يكون هوء بارد وأخر يومين لنا كان مطر .

بعد ماطلعنا من المطار نحن ما كنا حاجزين الفندق طلبنا من السواق يودينا مكتب السياحه هذا المكتب كنا متعاملين معاه شهر 3 الاطاف وكان تعاملهم وايد مريح ومكانه قريب من شارع العرب اسم المكتب ( BANGOK JOURNEY LTD. PART ) عند الجسر الثامن ، والا تبي رقمهم طرشلي على الخاص.

حجزنا في فندق (لافينكس ) وسعره ( 3800) بات ، وموقعه بداية شارع العرب بس من ورى الفندق نظيف بس حسينا انه كتمه والغرف ضيقه وتعاملهم وايد بطئ وهي صورة بنتي مع السكيرتي أول ما وصلنا الفندق شالها ويلس يلعب معاها ، وهي ما صدقت عاد.

اسمحولي ما صورة الفندق من داخل . سرنا الغرفه وحطينا اغراضنا وعلى طول على شارع العرب طبعاً لانه كان ليل وما عندنا وقت نسير مكان غيره ، عاد كنت انا المرشد السياحي للعائله لان انا وولدي كنا سايرين شهر 3 الا طاف بس ريلي وبنتي اول مره يسيرون ، تمشينا شويه وشفنا هالفيل الصغير يالس يتمشى في الشارع .

وبعدين اتعشينا في مطعم شهرزاد وسرنا صرفنا عند الصرافين ( هم يعطونكم اكثر من الصرافين الا برع شارع العرب) وبعدها قلنا خل نرد الفندق نريح لباجر ومرينا على سوبرماركت سفن شرينا التوست ما افوته كل يوم اخذ منه طعمه لذيذ ، وصلنا الفندق ورقدنا . هذا اول يوم وعدى .

اليوم الثاني وصل.

طلعنا من الفندق سايرين MBK وحصلنا هذا في ويهنا وقلت ما افوته طبعاً اكيد عرفتوه

وبنتي مدت بوزها على طول لانها تخاف من صوته وأول مرة تركبه بس ولدي مستانس وكل مره نركب فيها يلس هو على الطرف ما يخليني ايلس هناك على قد ما حاولت وياه طول فترة يلستنا هناك خلاني مره وحدة بس

وبنتي وحليها تيلس عند بوها ولازم تمسك الحديد الا فوقها وفي بعضهم ما يكون فهم تيلس تصيح ودور.

ما صورت MBK بس الاغلبيه منكم شايفين صورة في مواضع ثانية . تمشينا فيه لحد ما ريلي عورتني . وبعدين صار البحث عن المطعم للغداء . حصلنا في الطابق الخامس على ما اعتقد معطم واحد بس مقسم لعدة مطاعم ( عربية وهندية ومكسيكية وايطاليه .............الخ) اول ما تدخلون يعطونكم كرت واليهال يحطون ختم على ايدهم ولما تطلبون من الركن الا تبونه تعطونهم البطاقة بس ولما تخلصون تعطونهم الكرت وتدفعون عند الكاشير. بس اكلهم روعه انا جربت الاكل الهندي ، وهذي صورة ولدي يالس معصب لعشان ابوه ما خذاله ايسكريم.

وبعد ما خلصنا سرنا لمكتب السياحه لعشان نغير الفندق ونحجز لشنغماري ، حجزنا لشنغماي على طيران TAHI والفندق اسمة (CENTARA) وسعره (2000) بات . وحجزنا فندق ليوم واحد قبل لنسير شنغماي . وحجزنا فيه اربع ايام لما نرد من شنغماي واسمة ( Royal Ivory) وسعره ( 2500) بات وموقعه في نانه 4 . وبعدها ردينا الفندق نريح ، وطلعنا المغرب وسرنا شارع العرب لين اخر الليل طبعاً والعشاء كان في مطعم ايراني بعد حلو. وطبعاً سرت محل فريدة علي وليلى وما عيبني شئ عندهم وبعد هذا كله ردينا الفندق نرقد لليوم الثالث.

يتبع >>>>

**أم أسعود20** · 2008-11-08, 14:18

[/S
اليوم الثالث

من الصبح طلعنا من الفندق وسرنا الفندق الثاني الا اسمة ( Royal Ivory) وهذي صوره الفندق حلو ونظيف ومكانه فيه حركة طول اليوم.

ولما وصلنا الفندق طلعنا للغرفة ورقمها،

وهذي صور غرفتنا استديو والارضيه كلها باركيه ، السرير وطبعاً نحن طلبنا سرير اضافي لولدي وكان مجاناً بكل فنادق تايلاند سرير للاطفال مجاناً والسرير كبير يسع لطفل عمرة خمس سنوات

وهذا الممر

وهذا الفندق من تحت الاستقبال والحلو فيه انه مفتوح على برع

وهذا محل في الفندق للمساج ، طلبتهم مره لغرفتي سولي مساج ، صج يخدر الواحد ، ولدي طول ما هم يالسين يسون لي مستانس ويترياني اخلص لعشان يسون له ، اخر شئ لما يلست اتسوي مساج كتوفي عورني ولما خلصت ادور ولدي لعشان اتسويله حصلناه ورى السرير خايف وحليله لانها عورتني شوي مسكين طول هذا الوقت وهو يتريا وموب طايع يرقد واخر شئ ما سوله.

وهذي الواجهه

يتبع >>>>>

**أم أسعود20** · 2008-11-08, 14:19

وبعدين ظهرنا سرنا نركب القوارب ونتمشى في النهر ، ركبنا ساعة بـ (2000) وهذي بعض الصور

ونحن طالعين من الفندق

وهذا ولدي في التكسي

والحين لما ركبنا

وهذا الا يسوق وحليله

وهذا المبنى من الاصنام على اشكال انسان ( اعوذ بالله)

وهذي صورة اقرب

وشفت شئ ، حسيت باحساس غريب زادت دقات قلبي تبون تعرفون شو شفت هذا

المسجد

والمكاين الا محطينا على القوارب مكاين سيارات والله عليهم افكار ، المهم يمشون حالهم.

وبعد ما خلصنا سرنا معطم عند البازار الليلي وهذا كان غدانا

ربيان

وسمج

وهذا ولدي مستعد للاكل

وبعدها دخلنا البازار عيبني عندهم البجايم الحرير مالت اليهال. وبعدين سرنا كارفور خذنا بعض الاغراض ونحن طالعين شوفو شو صار لنا

الجو روعه الكل واقف محد رايم يتحرك.

ترينا لحد ما خف شويه ، وبعدين مثل كل يوم شارع العرب لحد الليل ، وبعد ما خلصنا منه ردينا الفندق لانه اليوم الا بعده طيارتنا بتكون الساعة 10 الصبح الى شنغماي.

إنشاء بعد جم يوم راح احط لكم الرحله الى شنغماي.
IZE][/SIZE][/SIZE]

**أم أسعود20** · 2008-11-08, 14:44

المشاركة الأصلية كتبت بواسطة @swanky@

waaaaaaaaaaaaaaaaaw
ذكرتيني بتايلند الله لا يرد ذيج الايام
ما حبيتها مرة انا من اول يوم تميييييييييييت متملله وطفرانه وتمنيت ارد البلاد
تايلند وايد وصخه واللي فيها اوصخ (سوري عالكلام بس من الي شفته)

بالعكس نظيفة بس شارع العرب هو يكون وصخ شويه

المراكز عندهم نظيفة وايد والمناطق الخارجيه عندهم بعد نظيفة

على العموم مشكوره على مشاركتج

**أم أسعود20** · 2008-11-08, 14:45

المشاركة الأصلية كتبت بواسطة الجـــــوهرة

هاهاهاها بصراحه موقف ايفشل الى صار لاج ان شاء الله ما يصير لى شرات موقفج

يالله نتريا باقي التقرير والصور حبوبه

^^

إنشاء الله ما يصير لج

مشكوره الغالية على ردج

**أم أسعود20** · 2008-11-08, 14:47

المشاركة الأصلية كتبت بواسطة قمره

بصراااحه شوقتينا سردج للرحله ممتع

ننتظر باقي الرحله

مشكووووووره عالتقرير
متاابعه

مشكوره الغالية

إنشاء الله اقدر افيدكم

مشكوره على الملاحظة

**أم أسعود20** · 2008-11-08, 14:49

المشاركة الأصلية كتبت بواسطة الشوووخ

هههههههههههههههههه ... يالفشلة لو أنا جان عقيت بعمري من الطيارة

لا عاد موب لهدرجة

مشكوره على المرور

الموضوع: تقرير مصور عن رحلتي مع عائلتي الصغيرة لتايلاند....

أدوات الموضوع

عرض

تقرير مصور عن رحلتي مع عائلتي الصغيرة لتايلاند....

المزيد من آخر المواضيع من نفس القسم:

المواضيع المتشابهه

||| تقرير مصور عن رحلتي الى Milano |||

فيرمونت باب البحر .. تقرير مصور

رحلتي إلى ( سويسرا + النمسا + المانيا ) تقرير مصور اكثر من رائع

+[ حفلة خطوبتي ]+ تقرير مصور