اختــــــي يا ليتها ترجع ************

**بطاقه** · 2008-09-04, 10:32

السلام عليكم

خواتي بخبركم عن اختي وقولولي شو رايكم شو نسوي وياها

الله يسلمكن من قبل ثلاث سنين تقريبا كانت اختي الصغيره عمرها 14 وايد زينه وايد تضحك وتسولف ودوم تتصل فيني وتحب عيالي ومره زرتها في المدرسه وشاله وياي ولدي الصغير يوم شافتني تخبلت من الفرحه وسارت تركض تنادي بنات صفها عشان يشوفوني انا وولدي .. تقول هذي اختي .

وفي البيت تاكل وتشرب ويا العايله وضحكتها واصله لين الباب ، وهذا طبعها من يوم صغيره ،
والحين هي ثالث ثانوي ، وقبل ثلاث سنين تعرفت على وحده من صف غير تستوي بنت عم ربيعتها اقولكم من عرفتها انجلبت فوق تحت ما ادري شو صار والله كرهتني ولا حتى تصد صوبي يوم ادخل حتى تمر شهور ما اشوفها وهي منخشه داخل حجرتها ولا تتصل مثل قبل ولا تسوي لعيالي سالفه ،
وامي بعد ما تكلمها باحترام هذا اذا كلمتها اصلا ساكته عنها ودوم منتفخه عليها مثل الطبل تطلع للمدرسه ما تسلم عليها وترد من المدرسه وتدخل الصاله ولا كأن امها يالسه ، بس تدخل المطبخ تحط لها شوية غدا في الصحن وتسير غرفتها تتغدى ، و24ساعه انترنت وماسنجر تكلم ربيعتها هذي اللي غسلت مخها .
وتكره اخوانها وتدعي عليهم بالموت وبس حق المصلحه جاهزه يوم تبا شي وتحتاج اتصلت .
ومره سافرت ويا اخوي الكبير ورجعت مشتريه الهدايا حق ربيعتها وامي ما يابت لها شي مول ، وبدال ربيعتها ما اتي تسلم عليها على اساس هي يايه من السفر لا ،، هي شلت الهدايا وسارت بيت ربيعتها ، وكنت يايتنهم هذاك اليوم تصدقون ما صدت صوبي ولا سلمت علي وهي راجعه من سفر اونها .. وبعد واااااااااايد اشياء كم بقول ولا بقول

بس اتمنى شي واحد انها ترجع مثل قبل والله احس اختي هذيك ماتت وهذي وحده غير ، على الأقل تونس امي المسكينه لأنها آخر بنت وكانت تتمنى اتيها بنت آخر شي ويتها على كبر بس للأسف ..

شو نسوي شو الحل ؟؟؟؟؟؟؟؟؟؟؟

المزيد من آخر المواضيع من نفس القسم:

**الحلو حلو** · 2008-09-04, 10:35

الله يهديها .. قعدي وياها وكلميها

**sad girl** · 2008-09-04, 10:39

كلموها ...
ولازم تشدون عليها إذا تمت على هالحال...

ما تدرون بعدين شو اللي بيصير

**مزيونة راك** · 2008-09-04, 10:41

الله يعينكم يالغاليــه

بس حاولي أنج تتقربين منها ، وجوفي شو هو الشئ إلى غيرها حاولي تكسبينها أكثر
هيه طبعاً فـ فتـرة المراهقـه ، وأتعلقت فـ هالبنيه بهدف الأعجاب وإلى منتشره بين بنات المدارس أو الكليات أو الجامعات ولقت أهتمام من هاي البنيه ف كسبتها وتتحكم فيها وأختج مثل الأمعه تتبعها وهالشئ مأثر عليها وااايد

أنتي حاولي تكسبين أختج زوريها وحاولي تاخذين وتعطين معاها فالرمسه وجوفي ردة فعلها وعقب حاولي بأي طريقه تتقربين منها مثل قبل وأكثر

والسموحه منج يالغـاليه

**حزينه مره** · 2008-09-04, 10:41

انا انصحج اترمسينها بهداوه واتقوليلها
شو فيج ليش متغيره وشو صاير منو زعلج

فغ الاخير نحن اهلج مالنا غيرج ولا انتي لج غيرنا

وقوليلها انج اتحسين هذيج ماتت
وانتي ثانية

وامي حرام اللي اتسوينه ف امي
وحاولي تنصحينها وقولي نحن انحب ربيعتج

ونباج اتمين وياها
بس مب على حساب اهلج |..

**شيطونة** · 2008-09-04, 11:19

أنا راي انج تكونين عادي معاها
ابدي سولفي معاها في أشياء هي تحب تكلم عنها
طلعيها معاج الاماكن اللي تحبها..حاولي تكسبينها
بعدين كلميها في سالفة التغير اللي صار

**بطاقه** · 2008-09-04, 11:54

تعرفون اذا حد بدأ بيتكلم وياها شو تقول وتسوي

تقول افففففففففففففففففففففففف يا ربي يا ربي وتحط ايدها في شعرها من الصوبين

واتم تنافخ اف واف حتى حق امي دوم تقول اف .

انا اتفقت ويا امي نسير بيت هالبنت ونكلمها هي وامها ،، امها شكلها ملسونه من اللي سمعته

شو رايكم ؟؟

**...(مريّة)...** · 2008-09-04, 12:05

صاااااااااااارحوها . . لا تسكتون عنها يا أختي . .
لازم في شي ، لازم في سالفة أو موضوع معين خلاها
تتغير بهالطريقة ! أفضل حل للمواجهة . . المصارحة !

**Hno0odah** · 2008-09-04, 12:25

الغاليه لازم اترمسونها بالطيب

لأنها هي حاليا في سن مراهقه وعادي اتضيع من بين ايديكم

راقبو تصرفاتها جوفوا شو اللي غير عليها لا تسكتون ابدا

وامنعوها من اشياء اللي هي اتحب اتسويها لين ما اتعرف انها غلطانه واتعذر

وابعدوها عن اربيعاتها اللي هي سبب تغيرها

والله يعينكم

**الـدمـانـي** · 2008-09-04, 13:58

حببتي حاولي تتقربين منها وكلميها بهدوء وحاولي تدخلين لها من باب ربيعتها يعني قوليلها منو اعز ربيعاتج خاطري اتعرف عليها واذا رمستج عنها حاولي تمدحين عشان تكسبينها هاذي الخطوه الاولى وعقب حاولي تخلينها تعزم ربيعتها ويلسي وياهن وسولفي وعطيهن ويه وايد ومدحي وضحكي هاذا كله عشان تسايرينهن ومن خلال اليلسه اكيد بتكتشفين شخصيت ربيعتها وعقب حاولي بطريقة ذكيه انج تكسبين اختج اكثر عشان تكونين اهم من ربيعتها هاذي واكيد هالبنت هيه السبب حاولي تبعدينها عنها ..

والله يهديها ..

**عيو دبي ون** · 2008-09-04, 14:36

الله يعيييييييييييييينكم .. حاااولي اطلعين رقم البنت وكلميهاااااا ..
اذاااا البنت امشيه اختج .. قوليلهاااااا ما تعاملكم زين وانا يوم كلمتج
أعرف انج بتغيرينهاااااااا بس هاااي الرمسه بيني و بينج .. لازم في حل للموضوع

**malakmaroc** · 2008-09-04, 15:19

حبيبتي لازم تسالزن عن البنت صديقتها من بعييد وبحدر بدون ماتحس لانو لو حست بالامر راح تكرهكم لاني اشك انو البنت صيقتها من النوع ............مابي اخرعكم بس توصل الامور لانها تحب ربيعتها اكتر من امها الامر مب طبيعي حاولتي تعرفين عنها وعن صديقتها كل شي بدون ماتحس ولو تقدرين تشيكين على الكمبيوتر مالها اعرف انو الامر صعب بس مشكلتكم تحتاج هالشي ولاتنسين انو اول ماتكون وياكم تحطون لها ايات قرانية الي تحت على احترام الواللدين يالله حبوبة طمنينا عليك وعلى اختك ويارب يكون خير يارب

**يابس رقيص** · 2008-09-04, 16:14

لازم تتحركون ولا تسكتون عنها رمسوها حاولوا فيها وخذوها بسياسه

**بطاقه** · 2008-09-04, 16:33

والله اكثر شي قاهرني اني شفتها كاتبه اسم ربيعتها وحاطه عنده صورة قلب وكاتبه love

**Al_Dloo3aa** · 2008-09-04, 23:23

رمسوا ربيعتها وشوفو شو السالفة..

الموضوع: اختــــــي يا ليتها ترجع ************

أدوات الموضوع

عرض

اختــــــي يا ليتها ترجع ************

المزيد من آخر المواضيع من نفس القسم:

المواضيع المتشابهه

يا ليتها كانت كثيرة يا ليتها كانت----------)

يدتي راحت يا رب ترجع أدعو بنات انها ترجع

ليتها على قيد الحياه لتزعجني

ليتها حيه لتزعجني

ليتها ما جات ما بين الحضور ... ليتها في يوم عرسي ما درت:(