اعطوني حل مع هالبنات

[ميثا]

السلام عليكم

خواتي شو الحل مع هالفئه من البنات الي بلا اخلاق ولا خوف من الله .. تغازل ولاهمها ريال متزوج ولا عزابي تخون ثقة اهلها وتخرب بيوت الناس وماتخاف من عذاب القبر ..

اريد اعرف شو الحل ؟؟ المشكله هالبنات قوايا
هل في رقم شرطه ولا آداب نتصل ونشتكي على صاحبة الرقم الي تغازل؟؟

ياريت تساعدوني



ما في داعي تدعي وتشلي اثم اهلهم

المزيد من آخر المواضيع من نفس القسم:

• لأنّه جعل الفقير ييعش مع المؤمنين لا مع...
• الإكتئاب طاعون العصر الحديث بحث مرجعي...
• كيف تكون إيجابيا ؟
• كيف تتعامل مع ذاتك بطريقة صحيحة؟
• كيف تقوي ذاتك؟
• كيفية تطوير الذات بطرق بسيطة
• افضل طرق لتطوير الذات وزيادة الثقة بالنفس
• اهم المهارات التي تحتاجها لتطوير الذات
• طرق تطوير الذات في مجال العمل
• اقتباسات ~ مُهرة القَصر

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[حزن قلبي]

الله يهديهن و يستر عليهن.
صدق يبالهن حد يأدبهن.

[zooz1]

راقبي ريلج عدل اول شي.. اذا هو سمح لها تكلمه فهو غلطان قبلها..
البنات هالايام وايد سطحيات.. يدورن واحد يصرف عليهن بدون مايطلب زواج.. يعني بس سوالف..هن يتحسبن ان هذا شي عادي اونها ما بتسرقه من حرمته..

الله يهديهن ان شاء الله.. رمضان باجر.. لاتدعين عليهن.. ادعي لهن ولريلج بالهداية

[ميثا]

حزن قلبي المشكله انها تغازل بقواة عين بعد ؟؟ جنه ريلها ويحق لها مثل مايحق لج فيه يعني لاتغلطين عليها
!!!!!!!!!!!!!

شوفي الوقاحه وين وصلت..

بليييز الي تعرف كيف نشتكي عليهن ونأدبهن ونوقفهن عند حدهن ماتبخل علينا

[rwa2232]

لا حول ولا قوة الا بالله ...الغالية ما في حسيب ولا رقيب لهن وصدقيني لو يلحقن الريال لو يبا بيطالعهن بس شبعوا مناظر زايفة ولا تهتمين انا ما سميهن الا صراصير وخاصة في المارينا في الوكيند المسا خاصة كانت بعض البنات يلحقن الشباب ....
ولا الدنيا بالعكس صارت.....واذا شافن الحرمة ويا ريلها حراااام يتحسن نفسهن احلى بس مثل ما اقولج الله يعزن عن ها الاشكال الي عندهن نقص في الدين والعقل وكثرة في الجمال الزايف.................الحمدلله كل وحدة تثق في نفسها ولا تنقهر من الاشكال هاي بس ربي يهديهن ويهدي اهلهن الي ربي يعينهم....

[ميثا]

zooz1
المشكله يقول انها عنده في الدوام وفنشت وتتصل بها اونها تباه يرجعها الشغل !!!
بس مادخلت مزاجي..حسيت انه فيه شي بينهم..بس الحمدالله انه الفتره ماكانت طويله الي كانو يرمسون فيها..4 ايام وسويت لهم فضيحه..بس XXXXX ابا اسويلها فضيحه عند اهلها عشان يصلبونها..يوم اطرشلها مسج اسبها تروح تطرشه حق ريلي.. شوفو وين وصلت بها اللعانه ؟؟

[جيون اللولو]

السلا م عليك خواتي

سالفة تراقبين ريلج هاي موب عملية ابدا
لأنج في النهاية بتتضاربين وبتحشرين الدنيا ولو مايباها بتكبرينه في عينها

بصراحة وهاي تجربة شخصية ..
عرفت عن واحدة انها تتصل بزوجي .. بالصدفة عرفت أن ا لظاهر انها تتصل له ع التلفون الثابت في السيارة
وكانت السيارة عندي هذاك اليوم

المهم رديت وتمت صاخة وعقب بندت
ورديت اتصلت بها وتم يرن لين انقطع

خذت الرقم واتصلت ع واحدة ربيعتي في اتصالات وجابت لي البيانات
اتصلت لها كم مرة ماردت علي
ارسلت لها مسج اني عرفتج من تكونين وانتي فلانة الفلانية وتشتغلين في المكان الفلاني
ورقمج هذا اتصلت على خدمة الامين في شرطة دبي وعطيتهم كل بياناتج انج مغازلجية وخرابة بيوت

وكان بتصدقون اتصلت تصيح وتناشغ وتقول ان ريلي هو اللي يلاحقها وهي مسكينة فقيرة في حالها
وانا مسكت اعصابي ومول ماقلت لها شي قلت يمكن انها تسجل المكالمة
كله انزين ... وبعدين ....

يوم خلصت رمستها قلت لها شوفي ... اذا شفت رقمج او حتى بدلتي رقمج لأني بعرفج مثلما عرفتج المرة الأولية
حرام اني اجي مكان شغلج وجدام كل الموظفين امسح فيج الارض واكشفج
واروم اوصل لين بيتكم واسوي لج فضيحة في الفريج كله ...


وبس ومن يومها انقطعت عنه ..
وجان تبون تضحكون ..تمت تطرش لي مسجات ادعية وجمعة مباركة ...

[روح الــــورد]

خبري اهلها عليها ... بتتادب ...

[zooz1]

عادي ترومين تتصلين في الشرطة وتشتكين عليها..
انا مرة لحقني واحد في كارفور..ما أدري على شو لحقني (شكلي كان وايد غلط..لول)
وفي نفس الدقيقية اتصلت على الشرطة وسألته لو واحد يتحرش في وحدة.. شو عقابه؟
على سألني وين مكانج الحين بطرش لج التحريات..

انتي قولي انه وحدة تتصل وتسب.. بياخذون رقمها وبيتصلون فيها.. ولاتقولين حرام.. ترى هي ماعرفت الحرام يوم اتصلت تغازل ريلج (ومنها ريلج بعد بيخاف منج شوي..لول)

الله يهدهم ويصلح حالهم

[عالية الغالية]

عادي باجر بتكتب قصتها السخيفة وحبها الاسخف عنها في قسم المشاكل الاجتماعية


وعقب بتقول انا ما اجاهر بالمعصية



خل اسكت احسن

[rwa2232]

الغالية رفعي نفسج عن ها الانسانة لا تبينين لها انج مقهووووورة من افعالها حتى لريلج لانج قاعدة اتنبيه اكثر لها سوي نفسج انها ما تهمج ويا كثرهن في الدوام بس اهتمي اكثر في ريلج وثقي فية وبيني له انج اتثقين فيه لان الريال ايدور راحة لو بكلام معسول منهن .. لا وايد تهدم بيوت الغيرة والشك وبعدين اكيد هو بيصدها وبيمل من اتصالات المصلحة هاي لا تكبرين الموضوع اختي ووكلي ربج بس واحتسبي امرج لله وحده وربي بيفرجها انشالله صدقيني ودايما ادعي ان الله يحفظ بيتج وريلج دااااااااااااااااايما وحسسه بحنانج وثقتج فيه الريال مثل اليهال يحب الكلمات الحلوه والدلع ويطفر من المشاكل والزن وجربي انج اتخلين الموضوع مب هامنج وشوفي شو بيصير ...

[أم عبادي وحسوني]

الله يهدي الجميع الريال غلطان هي بعد

يعني ما نقدر نلوم واحد فقط منهم اثنينهم دوم الزوج يجيب له مبررات سبحان الله وهو عايبنه

والبنت صدقيني بس خوفيها من الفضيحه بتوب

[ميثا]

عادي عندها البنت المشكله .. تواجعني جني انا الي اغازل ريلها ؟؟ شو الحل معاها

[المكياج عشقي]

قبل لا اتسبي البنت واهلها وباجر رمضان ....شوفي من اللي فتح الها المجال اولا .... ليش ماتكلمي ريلج بكل هدوء...يعني لو ريلج صدها ونازعها جان بتتصل فيه ! .....


الغلط اشوفه من الشباب اولا واخيرا .....ومعظمهم يحسوا بنقص ويفتحوا المجال لبنات برع ...وبعضهم تسلايه ...وبعضهم حاطين نية الزواج ...وبعضهم وبعضهم ...الخ

ليش مايكون ريلج اللي عاطنها الرقم وهو اللي فتح الها المجال!! ليش ماتنظروا للاحتمالين

والله انا كذا مره شايفه بعيني رياييييل مع حريمه يتمشوا في السوق....الحرمه تشتري والريال عندها ويرقم البنات من ورى حرمته

اذكر مره كنا فدبي نتشرى لعرس اختي ...واتخيلوا كنا في قسم الملابس الداخليه وانا يالسه تحت اخنار واراوي اختي...واسمع صوت يرقم ...وانا مشغوله مب منتبهه ....رفعت راسي وحصلت ريال طول وعرض ويالس يعطيني رقمه !...وكنا شايفينه هو وحرمته ياحليلها داشين المحل ...ويالسه حرمته تتشرى.....قلت لاختي هذا ماعنده احترام لحرمته!!! حرمته عنده ويالس يرقم بنات الناس !


فاللي حابه اوصله الغلط من الطرفين
بس اللي يسمح بهالشي هو يتحمل الغلط الاكبر


الله يهديهم جميييييع

ادعي لهم بالهدايه فهالشهر الفضيل



شوشو

[shawwagah]

وبس ومن يومها انقطعت عنه ..
وجان تبون تضحكون ..تمت تطرش لي مسجات ادعية وجمعة مباركة ...

ههههههههههههههههههههههه


والله انج خطيييييرة