صديقتي والطلاق.

[بوهيميا]

مع أني مقتنعة برأيها لكن حبيت أشوف رأي الأخوات العاقلات واللي مرن تقريبا بنفس ظروفها..

صديقتي متزوجة من رجل خليجي منذ 15 سنة، عنده مركز عالي في دولته عايش في الإمارات بسبب عمله وتجارته،عندها أبناء كبار من زوجها أولاد وبنات الله يحفظهم، قبل مدة خبرت اهلها أنها يضربها من اول ماخذها، واهلها طبعا اتضايقوا أنها ماخبرتهم من قبل بس تعرفون في مجتمعنا وايد تشوف الواحدة انها كبيرة تقول لاهلها خاصة إذا كانت هي بعد مركزها الوظيفي ممتاز، المهم اهلها حذروه من ضربها وحاولوا يصلحون بينهم، بس مشاكلهم وايده يعني من 15 سنة وهم في مشاكل بس هي ماكانت تقول لاهلها، زوجها مايصلي، راعي بنات، سكير، مايصرف عليها، مافي مجال أنك تاخذ وتعطي وياه في مرة كنت عندها والله اللي في سماه أنه صارخ عليها صريخ يعني تقولون جني ومستلبسنه ما حشم من كل الحاضرين والحاضرات في بيتها، مثل الافلام تقولين شوي وبيجتلها، وبعد ما زالت المفاجاة قالتلي هاللي شفتيه ماشي من اللي يسويه كل يوم ويايه وعلى مسمع من عيالها، قبل فترة عق عليها اليمين في موقف غريب دخل قالها بقولج شي.. إنتي طالق ...وكانت المرة الوحيدة اللي إييها يبا يكلمها من سنوات ! هي تحرت ياي يتفاهم وياها بس هو طلقها، صديقتي ما تاثرت مولية ...والله يوم اقول موليه بمعنى مولية وكانت تعد أيام العدة علشان تخلص و تفتك منه ومع ذلك قالها اطلبي مني أرجعج سكتت عنه، وفي النهاية رجعها، هو واهله عندهم مبدا انه الحرمة مالها رأي وشور علشان جيه أهله واقفين ضدها انها تجرات وقالت ماباه وماطاعت تردله بعد ماطلقها، وخذوا منها موقف، في نهاية الطلاق ردها بدون مايكلمها ولاحتي يشوفها إذا تبا ترد وإلا لا ويوم حصل وقت وسالته ليش قال علشان الصغارية قالت انزين وتغير مدة اسابيع وبعدها حجز غرفة وسار ويا صحيبته!..عياله ما يبخل عليهم بشي بس يدخلهم في مشاكل والله انهم صغار عليها يعني كل التصرفات السيئة جدامهم.. أبسطها أنه ماييلس وياهم إلا علشان يتابع نور ولميس .. تخيلوا ريال يحرص يتابع نور ولميس يوم ييلس أطول مدة ويا عياله..... صديقتي عمرها أربعين وعيالها مراهقين وهو يسبها ويقلل من احترامها جدامهم ... وكل مابغت تتفاهم وياه يقولها إنتي ((قـحـ...)) وهذا لفظ بسيط بالنسبة لسلسة ألفاظ يقولها.... ويبدا يصارخ.... والصغار يتعلمون .. ويشفون وباجر بيطبقون في حياتهم ... وهي الحين حست بهذا الخطر بالإضافة لكل حياته السلبية وياها...

الصدق أني اشوفها تذوي جدامي.... ... ماخذه واحد ما يستاهلها ... ومهما حاولت واهلها نصبرها على حياتها بس بشو نصبرها ... عايشه ميتة وياه...

الحين هي وصلت لقرار الطلاق... بعد ماوصلت لطريق مسدود وياه... أكيد تحاتي حضانة عيالها الصغار وبتدخل في محاكم سبة عيالها المراهقين... بس هي خذت قرارها .. أدعولها في ظهر الغيب أنه الله يسهل لها امورها ويرد كيده عنها... والله محتاجة الدعاء فعلا..

وياليت اللي مرت بتجربة طلاق في المحاكم أنها تشاركنا برأيها ... خاصة انه زوجها مركزه حساس ومسنود ...

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

[فطمطم]

الله يكوون بعوونها الصراحه ويصبر قلبها
هذا مايخاف ربه

[بوهيميا]

مشكورة اختي فطمطم .... والله مايخاف ربه فيها و في عيالها... وظالمنهم...ماخذتنه الدنيا في دروب الذنوب .... لكن كل شيء عند الله مايضيع ... وبحساب..

[وردة لا تذبل]

الله يهديه

[غرشوبة ال غرشوب]

الله يخس ابليسه انشاءالله عالاقل يحترمها ويحسن الفاظه حتى لو ما يباها ومايحبها

[سااروه]

الله يهديه ويصلح باله ويصبرها واذا نوت الطلاق اذا كان في خير لها الطلاق الله يسر له ياه والله يكون بعونها وحسبي الله ونعم الوكيل فيه

[Um_Rakan]

همممممممممممم مركزه حساس!!! مشكله!؟ المسنوديم والله انهم لوعه، أعرف فالشارقة عندي حكم حبس تنفيذ مؤخر صارله فوق ال 5 شهور وينفذون عكيفهم، دبي مب متأكده بس ركيض المحاكم فيه تعب، فعلا هي لازم ماتعيش وياه وتبدا تلقط مابقى من معاني لحياتها، الصغار طبعا حضانتهم للأم لكن نصيحة اذا الموضوع مشى بالإجراءات تخلي المحامي يتصرف وتحط كل شي عالورق وماتسمح للمحامي يقص عليها، عالنقطة ادفعي 5 أو 6 آلاف.

الله يسهل أمورها، لو نحن برع شان صلبوهم لكن والله العظيم قانونا فالبلاد ماينصف الحرمة عقب الطلاق، أونه خذوها ب 20 ألف ومؤخرها 30 ألف لكن عقب، ينلعن خيرك عشان السكن والمصرف وأونه حاطين موجهين أسريين (نقاب وكنادير قصيرة) يبتدي الجلسة بسطرين فالدين وعقب يألف التسوية الخ . . .

الله يرحم أبوي زايد ويوصل همومنا نحن الحريم حق الشيوخ الله يحفظهم

[جنيبية بهواها]

الله المستعان

[يقين بوظبي]

الصراحة مش عيشة...ضرب وإهانه و قهر...
تطلق وتنفتك منه..عله ما شافته العين...!!!!!

[xenamax]

الله يفرج همها

[ديــايــه]

الله يعينها ويصبرها على ما ابتلاهاا ...

الله يكون ف عونهاا يااارب

[حزن قلبي]

الله يعينها، ما لها الا الصبر عشان عيالها.

[khaleejiya]

الله يكون بعونها ويفرج عنها همها

[شيطونة]

الله يفرج همها
ويفكها منه ومن شره
ويخلي عيالها جدام عيونها

[بوهيميا]

خواتي العزيزيات:

وردة لا تذبل
غرشوبة ال غرشوب
سااروه
Um_Rakan
جنيبية بهواها
يقين بوظبي
xenamax
ديــايــه
حزن قلبي
khaleejiya
شيطونة

يزاكن الله ألف خير .... وماقصرتن الله ييسر أموركن ولا يسلط عليكن ظالم أبد..
.... وفي انتظار خبرة أخواتي الموقرات ...