طريقة الشوربه البحريه نفس مطعم الشوكه الذهبيه

**بنت زايد.2** · 2008-08-16, 09:07

طبعا بعد كثرة الطلبات على في الخاص حبيت انزل طريقة الشوربه البحريه واتمنى تعجبكم :
فديتج اول شي لازم يكون عندج محار وقباقيب و ربيان و نغر وسمك فليه الحين يا ستي تاخذي المحار وتغليه 10 او 15 دقيقه لين ينفتح ثم تا خذي اللحمه الطريه اللي داخل المحار وبعدين تنظفي الربيان وتقطعيه بالنصف والقبقوب تخلي ريلج لما يبه يقطعه عند الريال راعي السمك بالنصف ثم النغر يقطعه راعي السمك دوائر صغار وبعدين تغلي الجميع داخل قدر تحطي فيه ماء لين يغطي الفواكه البحريه لمدة 20 او 25 دقيقه وبعدها تطفي النار و تحطي قدر ثاني يكون فيه بطاطس مقشره وبصله ويكونون متوسطي الحجم وتغليهم لين يكون البطاطس لينه ثم تاخذي البطاطس والبصله بدون الماء وتحطيهم في قلاس الخلاط مع علبة قشطه ويستحسن تكون البطاطس والبصله شوي بارده ثم ينخلطوا عدل حتى يصبح خليط متجانس
ثم نحضر حليب المراعي 2 ليتر وتحطيه داخل القدر اللي بتسوي الشوربه فيه وطبعا تاتي قلاس الجبن ابو 240 وتحطي طحين كوب ونصف مع الحليب ويخلط عدل حتى يتجانس ثم تاتي بخليط البطاطس وتحطيه مع الحليب ويخلط بخلاط الكيك حتي يتجانس الحليب مع خلطة البطاطس وتاتي بالفواكه البحريه وتشخليها من الماء لكن الماء لا ترميه احتفظي بقليلا منه ثم تضعي الفواكه البحريه على خلطة الحليب وتكونين مقطعه جزر صغار جدا وفلفل رومي الاخضر صغار جدا والفطر ايضا صغار
ثم تضعيهم على خلطة الحليب ايضا وتضعيهم على النار وتكونين حريصه لانه لازم يتحرك بستمرار حتى لا يتكتل البشاميل او خلطة الحليب وطبعا قبل ما تسوين الشوربه تكونين منقعه زعفران مع ماء ورد وهذا سر لون الشوربه
وبعد ما تثقل خلطة الحليب تحطي الزعفران عليها وتخليها شوي على النار لمدة 10 او 15 دقيقه ثم بالهناء
صح نسيت اذا سارت ثقيله وايد تقدرين تخففيها بماء الذي احتفضنا به سابقا مال الفواكه البحريه .
اتمنى انكم فهمتوني واللي تجربها امانه تحط رايها وتقول اذا كانت نفس المطعم او لا

وطبعا هذي نفس شوربة مطعم الشوكه الذهبيه اللي في بوظبي

المزيد من آخر المواضيع من نفس القسم:

**ظبيه AD** · 2008-08-16, 09:37

الله يعطيج العااافيه الغاليه بصراحه عجبتني وبسويها ان شاءالله

**جوهرة الدوحه** · 2008-08-16, 10:00

طريقتج وايد روعه وتسلم الا يادي

**كشيخة** · 2008-08-16, 14:26

وااااو..بجربها فرمضان ان شاء الله

**ام الصيصان** · 2008-08-16, 14:30

يزاج الله خير
من زمان كنت ابا اطبقها لريلي .؟.....

**أم سلامه2006** · 2008-08-16, 14:31

عاد انا مووووول ما حب الاشياء البحريه
بس قلت بطمش شويه
هههههه

**شيوخ الامارات** · 2008-08-16, 14:51

مشكوره الغاليه

**الضياء** · 2008-08-16, 15:16

تسلم الايادي

**Candle** · 2008-08-16, 15:21

مشكورة ..

**همس الوطن** · 2008-08-16, 15:24

تسلمين الغاليه

ان شاء الله بجربها فارمضان

**دلوعه حماده** · 2008-08-16, 15:32

وتسلم الا يادي

**يانور عيني** · 2008-08-16, 16:27

حبيبتي مشكورة على الخلطة بس بغيت اعرف الطحين انحط اي رقم لاني ماعرف والجبن اي نوع وكم الكميه بالضبط وعادي نسويها بلا الفواكه البحريه لاني ماحب المؤكلات البحريه بس اطلبها واشربها بلا ماكل اللي فيها

**أم شدا** · 2008-08-17, 20:17

شكر كتير الله يعطيك العافيه

**بنت زايد.2** · 2008-08-18, 01:54

يا نور عيني
الطحين رقم واحد والخلطه ما فيها جبن انا اقصد قياس او كمية الطحين تكون في قلاس الجبن كرافت او المراعي ابو 7 دراهم . واتمني انج فهمتيني . واشكر الجميع على المرور

**مـــودي** · 2008-08-18, 03:37

ريايلنا يموتون عليهاااااااا

بخبر اختي بالخلطة

اكيد بتسويها

الموضوع: طريقة الشوربه البحريه نفس مطعم الشوكه الذهبيه

أدوات الموضوع

عرض

طريقة الشوربه البحريه نفس مطعم الشوكه الذهبيه

المزيد من آخر المواضيع من نفس القسم:

المواضيع المتشابهه

الشوربة البرتقاليه الي في مطعم الشوكه الذهبيه يم يم يم...

ممكن طريقة الشوربه البحريه البيضا

الشوربه البحريه الي فالقريه التايلنديه

اللي اتعرف طريقة عمل الشوربه البحريه تدخل لو سمحتوا

الشوربه البحريه..........