مشكلتي ... ونصيحة اخوي لي

[soul]

سبحان الله كل حد عنده زوج عدل مب حامد ربه وشاكر فيه
الحمدالله انه زوجي وبصريح العباره مدلعني وما يرفض لي طلب بس بعدين خلنا نشوف شو صار .

و بشو نصحني اخوي وفاجأني بكلامه

انا تزوجت عن حب وكل حد يشوفني مع زوجي يخبرون الناس اللي يعرفوني
ووايد وصلتني رمسه انه فلان شافني وا فلانه شافتني او اخت فلانه او او او الخ
يقولون هذيل وايد لايقين ع بعض ويجننوون كأنهم بيذبون في حب بعض وسبحان الله
انا وريلي يوم نطلع كل حد يطالعنا .

مرت سنه ع زواجنا وما اختلفنا في اي شي بس من اشتغلت ريلي انجلب علية مره وحده
وانا واايد اعاند لانه صار يرفض طلباتي وطلعاتي . والله انه كان يخليني اطلع مع اربيعاتي وكان عادي ابيت في بوظبي معاهم شوفو لاي درجه هو كان ما يرفض لي طلب حتى لو بسافر مع وحده من صديقاتي ما راح يقول لا.طبعا سافر هو للدراسة 3 شهور وانا في هالفتره اشتغلت وراتبي الحمدالله واايد زين .. رجع وتخيلو اول ما شافني شو سوى طبعا ما حضني ولا باسني نزل يبوس لي ريلي وانا كنت بصيح وابوه وقف الصرف بعد ما رجع علشان انا ابدا اصرف علية وعلية .. وانا والله ما قلت لا
وكنت اصرف عالكهربا واكل البيت وبترول السياره والانترنت وتليفون البيت واعطية كل شهرمصروف علشان يطلع يستانس مع ربعه وبدت المشكل يوم اني سالته وين تودي كل هالفلوس وابوك ليش ما يعطيك
علاقل مصروفك او بترول ل سيارتك عصب وقال انتي الذليني وبدا يعاند ويقولي ماشي طلعه
ومشاكل وانا اعاند وهو يعاند وكل واحد يغلط عالثاني وطفح الكيل عادي راضين يوم وزعلانين 4 ايام
وتمت مشاكلنا شهر وشوي جذي وكل واحد يقول ل ثاني احسن ننفصل .. صج الفلوس تفرق وتسوي مشاااكل .. ومره اتصلت لابوه وقلت له انا وولدكم مب بخير ويا ابوه ويوم شافنا كيف نتكلم تعرفون شو قاااااااااااااااااااااال:

احسن لكم تنفصلون عن بعض اذا مب قادرين تكملون مع بعض وهذه عشرة عمر ..انا بطلت عيني وقلت هذا شو يقول

ومن طلع ابوه من عندنا طلعنا بعض وقعدنا نضحك ع خبلنا بهستيريه صج يهال .. وبعدها ردت
حليمه ل عادتها القديمه ..

المهم اخوي مره زارني وقلت له اني خلاص مليت وابي اطلق منه عفته خلاص مب قادره اتحمل جذي

بشو نصحني اخوي وشو سويت اول ما طلع من البيت وشوفو كيف رجعنا نفس زماااااااااان

قالي هذا زوجج ولا تراددينه بالكلام واي شي يقولج قولي انشاءالله (طبعا انا الساني طويل وماعرف اسكت عن حقي )
كاليوم البسي له لبس جديد وشوفي شو يحب وتابعي معاه امبارياته اللي يحبها (والله حفظة اللاعبين وكل ما اتكلم عن لاعب يستانس ويقولي كيف تعرفين واعرف مواعيد المباريات وايبله المجلات الرياضيه )

غيري تسريحة شعرج حطي يوم ميك اب خفيف ومره لاتحطين وغيري من شكلج
اهديه شي ورود او حطيله ورقه تحت المخده قبل لا يدخل يسبح حطيله ورقه في الحمام وشور جل انتي تحبيه وقوليله تعجبني ريحته عليك قوليله انا بعطرك بالعطر اللي يعجبني وعطريه قبل لاينام طرشيله مسجات حتى لوكان قاعد حذالج وقوليله انج
مشتااقه له وكلام حب.. قوليله اني لو الف الدنيا ما راح الاقي نفسك وبطيبتك
قوليله اهلي مستانسين بك ويقولون انك طيب وبتسعدني لانه اخلاقك عاليه
قولي ابوي دووم يمدح فيك وامي تحبك واايد خواني دوم يسالون عنك .
قوليله سمعت امي وابوي يقولون انك احسن وااحد من ريايل خواتي وشوفي كيف بيكون
( اخوي طلع مب هين وانا بطلت عيني هذا شو دراه ومب متزوج وفيني ضحكه وماسكتها) اذا شفتيه ياي من الحلاق امدحي شكله لبسه واناقته ..الخ .

من طلع اخويه انا سرت عنده ومسكت ايده وكبريائي تعاندني وانا اعاندها لانه قبلها بليله صج تضاربنا
واتفقنا على الانفصال (اسباب سخيفه جدا)
صج استانس وقالي انا اصلا ما اقدر اعيش دونج وسامحيني ورجعنا نفس قبل والحمدالله .. بس بعدني
اعاند وهو يهدي فيني .. صج شريره
وقلت له مستحيل اصرف من اليوم ورايح وانت واهلك ملزوميني فيني حتى لو اشتغل وفلس مب حاطه في البيت .. تخيلو يا بنات صرت ارجع من الشغل اشوفه امبخر ومنظف البيت ومجهز سفرة الغدا ومغسل اصحون العشا
وطبعا ما عندنا خدامه وييب الغدا من بيتهم ..(نفس ايام زمان)
ومن يومها انا وهو بخير ورجعنا نفس ايام قبل نموت في بعض ونضحك ع سوالفنا
وايام الملجه وبيتنا واخواني ونستانس صج ع ايام زمااااااان ..


الحمدالله لك يارب

الله يدوم السعاده ما بين كل اثنين ياااااااااااااارب

ونصيحت اخوي نفعتني اني اتم ساكته حتى لو هو غلطان بيرد يتأسف لي
وبيعرف انه لو لف الدنيا كلها ماراح يلاقي مثلي ولا انا مابلقي مثله.

المزيد من آخر المواضيع من نفس القسم:

• لأنّه جعل الفقير ييعش مع المؤمنين لا مع...
• الإكتئاب طاعون العصر الحديث بحث مرجعي...
• كيف تكون إيجابيا ؟
• كيف تتعامل مع ذاتك بطريقة صحيحة؟
• كيف تقوي ذاتك؟
• كيفية تطوير الذات بطرق بسيطة
• افضل طرق لتطوير الذات وزيادة الثقة بالنفس
• اهم المهارات التي تحتاجها لتطوير الذات
• طرق تطوير الذات في مجال العمل
• اقتباسات ~ مُهرة القَصر

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[الاترجة]

الحمد لله انه النهاية سعيدة ...و الله يهنيج اختي ويهدي سركم ويرزقج بالذرية الصالحة ان شاء الله ... وحافظي بعد على الاذكار لانها تحميج من الحسد ... ترى الناس يحسدون الميت في يوم الجمعة .......

[soul]

سبحان الله الادعية تحفظ وانا دوووم اقرا ادعية الصباح واطرشها لصديقاتي والاستغفار ما انساه
ابدآ استغفر كاليوم 100 مره وسبح كاليوم 100 مره
ادعية المساء والمعوذات ما انساه لا الصبح ولا المغرب ولا قبل النوم
ودوم اقول الحمدالله واشكر واحمد في ربي واحاول اكتب الادعية في وقتها واطرشها مسجات لصديقاتي

[نسيم_البر]

بسمالله الرحمان الرحيم

الحمدالله فرحتييييييييييييني الله يديم المحبه ..و كلام اخوج 100 % صح ؟؟؟ وهذا اللي يبونه الريايل

[ريـًٍٍالِـِ¤عْ¤ودـٍانِةُ]

الله يسعدكم ..حبيبتي لا تفكرين في الطلاق حاولي انج تخفين من عصيبتج واطبقين كلام اخوج ..

[شيما]

الحمد لله انه النهاية سعيدة

[تولاي]

الله لا يغير عليكم ان شاء الله....
ويارب يسعد كل المتزوجين ويجعل بينهم مودة ورحمة

[مراحب الحلوة]

الله يهنيج إختي و طبيعي في حياة أغلب أزواج تحدث مشاكل بسيطة بين الزوجين بس تبقى المشكلة في الزوجين كيف إنهم المفروض يحلون هذه المشاكل

[ساميه]

الله يهنيكم

لكن اختيه انا فهمت من رمسج انه بعده ما يشتغل !!!

لين متى مفروض اشجعينه على انه يدور له شغل ويتحمل مسؤلية بيته :::

لكن بحكمه مب بضرايب وزعيج ترا طبعكم انتو لثنين العند

والله يحفظ لج اخوج

ويهنيج ويا ريلج ياربيه ويسعدكم ويبعد عنكم العين

[soul]

ربي يتقبل دعائكم يارب ويسدعكم ولا يحرمكم متعة الحياه .

عزيزتي ساميه والله دووم اشجعه عالشغل واللحين من حلفت ما اصرف.. اكيد خبر ابوه
وابوه يعطيه ولا يسالني عن راتبي . وبيكمل دراسته لانه يبي ياخذ الماجستير وبعدين يتفرغ للشغل.

احس تأدب..

الله يديم السعاده في كل بيت يااااااااااارب

[ملاذ الروح]

مشاء الله عليج ... الله يحفظكم ويدوم الوناسة عليكم.

[أم حبتور]

الله يهنيكم ان شالله يااااااااااااااارب..والمشاكل الزوجيه لابد منهااااااا..مهما كاااااااااااااااان ^_^ اثنين يحبون او يعشقون بعض..

والحمدالله انكم رجعتو نفس قبل واحسن ..والله لايغير عليييييييييكم ان شالله

[ميرال]

الله يسعدكم ويسعدنا جميعا ان شاء الله

[شما المحيربي]

شحلات الواحد ايفضفض الي فيخاطرة ولله ان السالفة وايد عيبتني ^_^ الله ايهنيكم يارب ^_^

[دبدوبة]

الله يهنيكم يا رب

بس اختي ..اسمحيلي معلش ..بس هالسالفة شوي محيرتني !!

كيف ريلج ما يشتغل ؟؟؟
وهو راضي بوضعه انه ما يشتغل يعني ؟؟؟؟؟

حتى لو انسان زين ويحبني و و و الخ ...... بس ما اتخيل انه لو عرست مستقبلا بإذن الله ... انه ريلي يقعد في البيت وانا اطلع اشتغل !!!!!

وياخذ مصروفه من ابوه بعد !!

انزين لحد متى بيقعد في البيت وابوه يصرف عليكم ؟؟؟

مادري اختي لا تزعلين مني ... هو كان استغراب مني لا اكثر

واذا انتي راضية بهالوضع ..اكيد هاذي حياتج وانتي حرة فيها

والله يخليكم لبعض يا رب