حشـــــى هــذي مب عمـــــــه.. احنا عيال اخوها تقول علينا مصرين .. قهر

[حلوه طفولتنا]

عمتي الي هيه اخت ابويه مب عمه كلش ... ما تحبنا كلش .. من زماان .. وما اداني امي تكرهها كل هذا بس علشان امي مصريه .. وتشوف انها هيه اقل عنها .. وانها مب لازم تكلم امي مثل الناس .. لا ديما من رمستها نحس انها تقلل من قيمتنا ومن قيمة امي .. وتقول على عيال اخوها مصرين .. يعني انا الحينه مصريه .. اخويه العود مره شافته في مكان وقالت عليه هذو المصري .. عمي قالها اي مصري .. قالت فلان .. قالها هذا ولد اخوج تقولين عليه مصري .. حتى عصب عليها عمي ..
ومره ولدها قالها خطبيلي بنت خالي .. يعني ( اختي ) طبعا اهيه ما تبى اختيه.. لان اختيه اقل من مستواها .. قالها اريد بنت خالي وباخذها .. المهم خطبته لها وملجت عليها .. وامي ما كانت موافقه لانه تعرف سوالف عموتي .. بتقعد تعج عليها الرمسه .. بس ابوي قالها ولد اختي وما اقدر اردهم .. المهم وافقوا وملجو .. حليلها اختي كل يوم تصيح عند امي .. عموتي كل يوم والثاني تتصل وتقول بنتج تغيظ ولدي .. ترى لا تشوفوا نفسكم .. انا احنا خذنا بنتكم .. ترى انا ما كنت اريدها الا الولد يباها .. ولد عمتي عاد ولد امه دلووع على اي شي يسير يخبر امه . وامه تتصل وتقعد تتشاتم .. واخر شي اختي قالت ما ابااه ... مب ريال .. حتى المصروف كانت عمتي الي تيبه لاختي . . يوم اختي تقوله ليش انته ما تيب المصروف .. يقولها انا اخذ المعاش منيه .. اعطيه امي كله مناك .. وامي الي بتصرف علينا بعد الزواج .. يعني لو تبين فلوس قولي لامي .. اختي انقهرت وقالت له اصلا منو قالك باخذك علشان اخذ فلوس من امك .. قالتله الحمدلله انا حلوه وجميله وبيضه وطول بعرض .. احسن في ريال في العام يقدملي الماس بس علشان اوافق عليه .. لكن انا قلت ولد عمتي واولى باي واحد .. بس طلعت ولد امك .. ولو رمسك ريال بتصيح .. الا تتشطر على بنت .. انقهر قهر .. وسار قال لامه .. وامه اتصلت على امي وحتشرت وامي قالت لها البنت ما تباه .. حشى اصلا انا كنت بموت على بنتي حسره .. لانها عطيتج اياها ولولدج.. وبنفس اليوم ولدها ييه البيت كان يايب حج اختيه هديه اونه موبايل مال اول .. جددددددددديم .. يوم تضارب معاها قالها هاتي الموبايل ما تستاهليه .. عاد اونه هم يقولون انهم هم عيال اكبار واغنيه وعندهم فلووس .. احينه شو بيسويلك موبايل يمكن 300 درهم .. يعني شوفي كيف مصتخصر على اختيه حتى موبايل غالي ..
المهم سارت عمتيه المحكمه .. واحتشرت .. وقالت هم ما يبونا .. واريد المهر والطقم منهم .. القاضي سال امي انتوا طلبتوا الطلاق .. قالت امي لا .. قالها خلاص لو انتي على عمتي تبين الطلاق مالج اي حق .. قالت لامي كيف انتي مب اتصلتي عليه امس وقلتي تبين الطلاق .. قالت امي قلت .. بس انا ما سرت المحكمه انتي الي رايحه تركضين المحاكم .. المهم ما طالت ولا شي ابدا ... لا مهر ولا طقهم .. وزطيه موووت .. كانت بتموت على فلوسها .. سار ابويه عطها المهر 20000 الف .. وطقم قالها البنت باعته ما تريده وخذت فلوسها .. شو زطيه .. والحمدلله اختيه بعد ماا تطلقت بسنه عرست ما شاء الله ..
حتى امي من بعدها قامت اي عرس يصير عندنا اطرش بطاقه لها للبيت تقول مب زين علشان ما نحط الغلط علينا ولا تيي ..
والله يا بنات لو شافتنا في مكان ما تسلم علينا ولا كانها تعرفنا .. ولو احنا قمنا وسلمنا سلمت علينا من غير نفس .. حتى الحين لو نشوفها باي عرس ما نسلم عليها .. حتى بناتها .. يتقابلون مع خواتي في الجامعه ويطالعونهم باحتقار ..
ولدهم الصغير عمره 23 شاف اخويه العود عمره29 سنه .. في عرس .. قام اخويه فديته سلم على كل الموجودين .. وهو من بينهم .. يوم وصل صوبه .. مد ايده اخويه .. فشله وقاله انته مب من مستويا علشان اسلم عليك .. يوم بتكون من مستوايا مد ايدك وسلم . . قاله اخوويه .. انا علشان فيه اصل اكثر عنك بسلم عليك .. قاله اي اصل انته ولد مصريه .. قاله المصريه ماعلمتني الحقد والحسد والغيره .. المصريه ربتني وطلعتني ريال .. قلبي نظيف وابيض .. ما فيه حسد .. انقهر وكان بيتضارب .. لو لا الناس دخلوا في الموضوع .. والله فديته اخوويه يحلف يقول والله اني مسلم عليه ما فيه خاطري اي شي من صوبه .. على كل الي سوه في اختي ..
الحين هذي عمه جي تعلم عيالها الحقد والحسد حتى على عيال اخوها .. ما اقدر شو اقولكم عنها .. ماخذه يدوه صوبها .. مع يدوه ما كان فيه اطيب عنها ..
بس الله يسامح يدوه .. لكن هذي عموتي ما احبها .. ما ادري ليش تكرهنا هيه وبناتها واولادها .. والله اني ادور سبب واحد مب عارفه .. يعني كل السبب انه احنا امنا مصريه يعني احنا ما نشرفها .. الحمدلله احنا نفتخر انه امي مصرريه .. والله انها الطيب ام في العالم .. وفي عمرها ما كرهتنا في الناس .. وديما تقولنا لا تحقدون على حد .. خلو قلوبكم بيضه.. حتى خلاتي خوات وخوان امي نموت عليهم .. يحبونا .. ويزعلون لزعلنا ويفرحون لفرحنا .. علشان صج ناس تحبلنا الخير ..
.. بس شو انسوي اذا هذي عمتي اقرب الناس لنا جذيه تعالمنا .. مع والله معاملة الغريب احسن عن معاملة القريب
حشى مب عمه .. هذي نسره

المزيد من آخر المواضيع من نفس القسم:

• لأنّه جعل الفقير ييعش مع المؤمنين لا مع...
• الإكتئاب طاعون العصر الحديث بحث مرجعي...
• كيف تكون إيجابيا ؟
• كيف تتعامل مع ذاتك بطريقة صحيحة؟
• كيف تقوي ذاتك؟
• كيفية تطوير الذات بطرق بسيطة
• افضل طرق لتطوير الذات وزيادة الثقة بالنفس
• اهم المهارات التي تحتاجها لتطوير الذات
• طرق تطوير الذات في مجال العمل
• اقتباسات ~ مُهرة القَصر

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[rozee]

الله يهديــها


والله قهرتنـــــــــــي

[اناحلوة]

الله يهديها الناس اصلا الناس كلهم واحد


هاي وحدة حسودة خلكم منها ودايما كونوا احسن عنهم .

[tilkalora]

ما عليج هاي حالت العمات وعيال العمات
الاخوان يحبون ويموتون الاخوات وعيال الخوات اما الخوات يكرهون الخوان وعيال الاخوان وينزلون من مستواهم
الله يعنا كلنا
شكوى لغير الله مذله انا صارلي 25 سنه اتحمل

[غــلاوي]

سبحان الله

شوفوا الحين منو اللي فيهم الخير و يعرفون الاصول

عيال المواطنه و لا عيال المصريه

بلا مواطنه بلا عيال مواطنه

عافانا الله

الله يعينكم عليها الصراحه

استغفر الله و اتوب اليه

[dm3t dubai]

الله يهديها

[ام مريوومة]

انا عمتي وامي اهل ومواطنين وكل شي
بس سالفتنا ويا عمتنا نفس الشي وايد تكرهنا
شو السبب ماعرف

عقب وفاه ابوي كل مرة اتيي حتى سلام ماتسلم علينا

اخرتها واجهتها وقلت لها ليش ماتسلمين
قامت ونكرت كل شي وتضاربنا انا وهي تلاسنا
والله طردتها من البيت وقلت لها لو حطيتي ريلج في هالبيت بحشهن لج حش

لين يومج هذا ماشفناها
والله مرتاحيييييييييييين منها ومن غثاها


عمتج يبالها وقفه محترمه يوقفها عند حدها

[ميروووه]

ما عليج منها ختيه وكل واحد ايعامل الناس باخلاقه وتربيته دوم عامليها باحسن عن معاملتها لكم دوم راووها انكم الاحسن ..شقايل بانكم تبدون بسلام الله سبحانه وتعالى ايقول والكاظمين الغيظ والعافين عن الناس يعني دوم خلو اقلوبكم صافيه ومب شاله على حد ..بتثبتوا لها هاذيج الساعه وبتراونها اشقايل المصريه ربت اعيالها وذهبتهم ..وعلمتهم الطيبه والتسامح وانهم ما ايشلون على حد ..اهم شي ابا اقوله لا تتاثرين برمسة حد يعني يوم حد يزقرج ببنت المصريه هاي هب سبه لانه المصريه جنسيه هب سبه والله ايوفقكن ان شاء الله ويهدي عمتج يارب



ميروووه

[BINKI GIRL]

الغلالالالالالا

كوني كلج فخر انه امج ربتج احسن تربيه انتي و وخواتج و اخوانج

ربي يحفظلج ماماتج

وخليها في بالج مصريه هب سبه

[Tuxido]

الله يهديها

[الحزينه55]

حبيبتي اسميني انقهرت من عمتج ... *_*

ما عليج منها ترا لازم حد بالعيله يخرب العلاقات .. .. افتخري باصل امج وما عليج منها ...

سلمتي حبيبتي بس والله ما تضايقين نفسج

يعني يكفي رد اخوج عليه .. والله انج المفروض ترفعين راسج برمسة اخوج .. الله يحفظه لكم ....

ولدهم الصغير عمره 23 شاف اخويه العود عمره29 سنه .. في عرس .. قام اخويه فديته سلم على كل الموجودين .. وهو من بينهم .. يوم وصل صوبه .. مد ايده اخويه .. فشله وقاله انته مب من مستويا علشان اسلم عليك .. يوم بتكون من مستوايا مد ايدك وسلم . . قاله اخوويه .. انا علشان فيه اصل اكثر عنك بسلم عليك .. قاله اي اصل انته ولد مصريه .. قاله المصريه ماعلمتني الحقد والحسد والغيره .. المصريه ربتني وطلعتني ريال .. قلبي نظيف وابيض .. ما فيه حسد ..

السموحه اختي بس صدج وايد استانسة على رد اخوج

[ايمان الجنيبي]

صدقيني بيي يوم عمتج بتحس ترى الدنيا دواره . وانتي ونعم فيج والله

[المكياج عشقي]

هذي اكيد تحس بنقص وانكم احسن منها فالعلم فالتربيه فالاخلاق


والله اني لما اسمع هالسوالف فمجتمعكم وااااايد انقهر




مافي مراعاه للمشاعر ابدا



الله يصبركم اختي ....وماعليج منها

[عمري زايد]

الله يعينكم ...!!

[عشان الحب]

اللي عليكم سويتوه خلي بينكم سلام بس حتى لو من بعيد
لاتحتكون فيهم
الحقران يقطع المصران هذي شكلها ماتتغير...
بس قولي
اللهم عافنا بما ابتليتهم....<<<<<حشى كله حقد وحسد