محتايه مساعدتكم :(

**الظبيانية** · 2006-02-24, 21:45

السلام عليك خواتي الكريمات

انا عندي بنت عمرها 5 شهور .. الله يحفظها ..
بنتي الله يسلمكم ترتفع درجة حرارتها بشكل كبير .. وما تروح عنها الا يوم أعطيها أدول ومن يخوز مفعول الأدول ترد ترتفع درجة حرارتها .. وديتها المستشفى .. وفحصوها و قالو انها الحمد لله ما فيها شئ .. لا التهاب في أذنها ولا خشمها ولا في أي سبب لارتفاع درجة الحرارة .. وقالولي أستمر على الأدول .. وصارت البنت ما تتقبل الأدول .. ومن أعطيها اياه ترجعه .. ووصفلي الدكتور تحاميل و استخدمها .. و لين الحين الحرارة اتيها وما تروح الا بالتحاميل .. استوالها 5 أيام .. وهي على نفس الحال .. وحتى يوم يكون مافيها حراره .. اتم تصيح و ترفض الرضاعه .. هي ماياها سهال .. بس حراره و صياح طول اليوم .. حتى لو ما فيها حراره تصيح ..
والله اني خايفه عليها و أحاتيها .. مب عارفه كيف أتصرف معاها .. شو أسوي يا بنات .. حد منكم مر بفس التجربه بلييييييييز يخبرني .. هذي بنتي الأولى و أول مره من ولدتها أشوفها بها الحال .. هي من العاده هاديه ماشاءالله عليها ولا تصيح الا اذا تبا ترضع أو ترقد .. شو اسوي

الله يخليكم خبروني كيف أتصرف .. أخاف أوديها من دكتور لي دكتور و تتبهدل البنت ..

المزيد من آخر المواضيع من نفس القسم:

***أم اسمـــا*** · 2006-02-24, 22:09

اختي الظبيانية.. ان شالله ما عليها شر..
لثتها وارمه؟؟ يمكن أسنانها بتطلع.. ومن جيه تيها الحمى
ترا حد من اليهال اسنانهم تطلع من وقت.. والاسنان تسوي حمى واسهال وزواع وانتي بكرامه
واحيانا واحد من هالثلاثه

**التــووح** · 2006-02-24, 22:23

الله يعافيها يارب وماتشوف شر.. انا رايي من راي ام اسما
وعن الادول.. هاي شغلت ولدي بعد مايتقبله موول.. بس احطله ايا في حليبه.. بس انتبهي لا يكون الحليب دافي بزياده لانه مفعول الدوا يخوز

**الظبيانية** · 2006-02-24, 23:09

الشر ما ايكم انشاءالله عزيزاتي .. تبون الصراحه ما أعرف اذا لثتها وارمه .. مادري ما مبين .. كيف أعرف اذا بتطلعلها أسنان .. يعني يبين السن؟ هي دوم تعض شفايفها .. بس ما أعرف يعني الدكتور فحص عليها وما ياب طاري أسنان ..

**الظبيانية** · 2006-02-24, 23:10

بعد الشئ اللي مضايجني زياده انها ما تمسك المرضعه .. لو تمسكها كنت بحطلها الدوا ويا الحليب .. بس هي ما ترع الا من صدري .. مادري كيف أعلمها على المرضعه .. حاولت كذا مره .. حطيتلها ماي مع سكر .. وحليب .. بس ماشئ فايده ..

**العيناوية** · 2006-02-25, 00:03

الغالية ...اذا حسيتي انها واااايد تبا تعض الأشياء يعني أسنانها بتظهر ...
و اذا تبين اسم دكتور أطفال اوكي خبريني و بقولج *_*

**الظبيانية** · 2006-02-25, 00:06

قوليلي الله يخليج ..
ويجزيج الله كل الخير انشاءالله

**العيناوية** · 2006-02-25, 00:11

المشاركة الأصلية كتبت بواسطة الظبيانية

قوليلي الله يخليج ..
ويجزيج الله كل الخير انشاءالله

الغالية ...اسمه دكتور عبدالله الخياط ....بس في دبي

صراااحة في بوظبي ماشي عيادات أطفال تخصصية عدلة :22 (4):

عنده عيادة خاصة يداوم فيها فالمسا و الصبح يداوم في مستشفى الوصل أوراشد فدبي

**الظبيانية** · 2006-02-25, 00:52

زين اختي ..انا بسيرله انشاءالله ها المره .. شو اسم عيادته؟
بس يا ليت لو تعرفين دكتور اوكي في بوظبي .. لاني اريد أستمر عنده .. وصراحه صعبه كل ما تعبت البنيه أضرب فيها خط لين دبي .. أريد شئ قريب ..

**الظبيانية** · 2006-02-25, 00:54

زين اختي ..انا بسيرله انشاءالله ها المره .. شو اسم عيادته؟
بس يا ليت لو تعرفين دكتور اوكي في بوظبي .. لاني اريد أستمر عنده .. وصراحه صعبه كل ما تعبت البنيه أضرب فيها خط لين دبي .. أريد شئ قريب ..

**مــــيره دبــي** · 2006-02-25, 01:35

هلا...

الغاليه أسمحيلي في بوظبـــــي ماعرف...

بس أذا حبيتي في دبــــي..

(( 1- مســــــــتشفى الوصل)) تخصص أطفـــــــال..

العيــــــادات الخاصه..

1- الدكتور خالد.. في بور سعيد
2-عيـــــــادة زليخه..
2-الدكتور عبدالله الخيـــــاط..
4- الدكــتور عادل- عيادة الراشــــــديه تخصص أطفال

وأن شاء الله ماعليها شــــــــر

**جواهر** · 2006-02-25, 12:31

مرحبا اختى الظبيانيه....اكيد بنتج تسنن ..وماتشوف شر ان شا الله.

**العيناوية** · 2006-02-25, 17:04

المشاركة الأصلية كتبت بواسطة الظبيانية

زين اختي ..انا بسيرله انشاءالله ها المره .. شو اسم عيادته؟
بس يا ليت لو تعرفين دكتور اوكي في بوظبي .. لاني اريد أستمر عنده .. وصراحه صعبه كل ما تعبت البنيه أضرب فيها خط لين دبي .. أريد شئ قريب ..

اسمها عيادة الدكتور عبدالله الخياط
امممممممممممممممممممم ...بحاول أتخبرلج عن عيادة أوكي فبوظبي .....

**بنت بوظبي** · 2006-02-25, 17:21

في بوظبي في دكتور سامي كندريان اوكي للاطفال وبعد دكتور الدجاني بس ماعرف اسمه الاول
والله يعافي بنتج وماتشوف شر

**DesigneR StylisH** · 2006-02-25, 17:27

أختيه دكاترة الأطفال اللي في .. مستشفى الخليج التشخيصي...... انصحج فيهم الصراحه انا ولدي من يبته .. والحين ماشالله سنه ونص واعالجه عندهم .. واطعم عندهم بعد ... انا اتعامل مع الدكتور غياث صندوق وإذا مش موجود دكتوره ياجا ....

وأي سؤا ل انا حاضره ....

والله يشفيها إن شالله ..

الموضوع: محتايه مساعدتكم :(

أدوات الموضوع

عرض