تغيرتي يافلانه

[حرم المهيــري]

بنات بخبركن مشكلتي

البارحه ريلي قالي بنسير العين مليت من جو بوظبي وبنقعد اسبوع قتله اوكي(نحن عندنا قسم خاص في بيت اهلي واهله رغم انه عندنا بيتنا الخاص)

المهم سرنا و عيننا من الله خير طبعا هو كله عند اخواني (وعلاقته فيهم حلوه خاصه ان ماعنده اخوان شباب )

المهم الفليل قالي : نحن بنسهر في البيت ما بنظهر مكان واذا بتنامين نامي وانا ع صلاة الفجر بتصلبج اوعيج للصلاه(هو خايف لان انا توني طالعه م المستشفى من ايام بس) وسألته مته بترقد ؟ قالي عقب الصلاه

المهم سرت ارقد و رقدوا عيالي وصدق اتصلبيه ع وقت الصلاه و قالي سايرين المسيد وسألته مته بتيي قال : ع طول عقب الصلاه

المهم صلوا وردوا البيت و ما اتصل و لا شي هني انا زعلت الصراحه اول مره يطقع لي واول مره يوعد ويخلف مارقدت م القهر

وحدر الغرفه الساعه سبع وشي تم يرمس وان سكت وقال : اذا فيج شي بشلج الدختر !
طنشته

عقب سأل : شفيج قتله : اذا مب قد الوعد لاتوعد قال : كيف؟؟ شرحت له الموضوع وهني (........تناقشنا.......) لين تزاعلنا

وظهر سار بوظبي و ماخبرني بس من وصل طرش مسج(وصلت بوظبي وبصراحه تغيرتي يا فلانه)

المهم اخوي درى ان ريلي سار بوظبي وشايفنه يوم ظهر بس احتار ليش؟؟؟ ف سار وقال حق امايه والصبح سألتني و بعد الحاح منها خبرتها

وماقصرت حرجت و خبرت اخوي العود وقالي : (كيف اصلا هان عليج تخلينه يقبض خط وهو فيه رقاد ونحن افتشلنا فيه ولان نحن اقنعناه يسهر هو مبونه مايبا الخ

وقال : انتي كله تدلعين وتتغلين ونحن محد فينا مسوي حق حرمته شرات اللي يسوي فلان لج ونحن وياه ويتصلبج و يخبرج وين نحن وين بسير الخ و24 ساعه وياج عالخط وقالي ان ماراضيتيه ترانا كلنا زعلانين لان هو كان بيترخص عننا بس نحن جبرناه يتم ويسهر ويانا لان كلنا اجازه ولعلمج قال رجعنا م الصلاه و شفنا مباراه اعاده للفريق اللي هو يحبه واذا ماتصدقين سألي فلان وفلان وفلان اللي هم خواني وقالوا صح)

هني حسيت بالذنب وطرشت له مسج بس مارد،، عقبها بساعه اتصلت حميتي وسألتها عنه قالت راقد كان سهران البارحه وقالت لا تغدا ولاتعشى هني قلبي عورني عليه

عقب طرشلي مسج وقال انا كنت راقد عشان ماتقولين بعد مطنش(وقالي تغيرتي يافلانه)

المهم قتله تعال العين ماطاع .. والحين والله مضايجه خاصتن ان خواني يقولون انتي الغلطانه والريال ماعليه قصووور وحاشمنج بس انتي ماحشمتيه وانا ماحب هالكلام وامي زعلانه وتقول : (انا ماعلمتج تكونين قاسيه)

المهم انا طرشت له مسج تعال و ماطاع

الحين مب عارفه كيف اراضيه وشرايكن مب من حقي ازعل هو طنشني نزين والله يجزيها الجنه اللي بتعطيني حل

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية