بدون لقب !!

[بنت فلانه]

السلام عليكم ورحمة الله وبركاته ,,

اعذروني بس صدق محتارة واحس قلبي مقبوض من كثر ما فكر ,,
بقولكم السالفة وكل وحده تعتبرني اختها وتتخيل الموقف وتقول رايها بكل صراحه ..
انا يا بنات من تقريبا شهر ونص كلمتني اختي العوده عن 2 شباب يبغون يخطبون ورشحتني لواحد منهم لكنها خبرتني ووصفتلي الشخصين ,,
سبحان الله انا تقبلت اللي هي رشحتني له وفعلا استخرت ,,
لكن ماحصل شي واظني الريال سافر واهله سكتو عن السالفه ولا حتى زارونا او كلموو امي والا ابويه ,,
والثاني اللي مول ما فكرت فيه هو اللي اهله اصرو انهم يزورونا ويشووفوني ,, لكني بعد قلت مابغيه ,,
والصراحه رفضته لانه اختي قالت انه متدين متشدد وعنده طلبات وشروط وهاللي نفرني منه ,,,
ما عارض المتدين بس اعارض المتشدد وراعي الشروط من اولها .. بس اختي بدون ما تشاورني اتفقت ويا امي وخلتهم ايوون وخبروني قبلها بيوم ,,
المهم عينت من الله خير وقلت يمكن هذا نصيبي وما بعاند وبستخير ,, واستخرت مره ومرتين وثلاث .. ارتحت لهله وكلهم ارتاحولهم ,, بس للاسف طلع بدون لقب !!!!
يعني في الجواز والجنسية اسم ثلاثي او رباعي وبس " فلان بن فلان بن فلان " بدون الفلاني ,, اهتميت في الموضوع هذا وايد واحسه مهم من وجهة نظري ,,
مستقبلا اذا يبت عيال شو بقولهم انتو منوو ؟؟ والا قوم منوو؟؟ احس وايد هالشي مهم هالايام .. شكيت انهم ما يكونون من الاساس عرب ,,
بس طلعو عرب وبدو بعد لكن ابوهم الله يهديه ما يهتم ولا اهتم انه يسجل لقبهم وقبيلتهم ..
الحين الكل يحاول يقنعني انه هالشي مب ضروري وانهم شاريني ,, بس انا قلبي مقبوض اخاف اتسرع وابتلش ,, معنه من الاستخارة احسه ماشي ,, لكني متردده ,,
احس اني في صراع نفسي .. حتى الموضوع اللي اكتبه الحين احسه ملخبط ..
امي تحاول تقنعني اني اوافق ,, اختي العوده تقولي لو ما وافقتي محد بييج لانج عنستي " مع العلم انه عمري 24 سنه بس خواتي كلهن عرسن وهن 18 , حتى انا ملجت في هالعمر بس تطلقت قبل العرس, وكلهن خذن قبايل وناس معروفين"
مابغي اقارن نفسي فيهم واحس اني اقل من هالناحيه بالذات ,.,

قلت برجع استخير ,, لانهم يبغون الرياييل ايووونا ,, بس يتريوون ردي ,,وتوني قبل لا اصلي المغرب كنت افكر في السالفه وخطرت في بالي فكره احسها شوي غبيه ويهاله مني بس شو اسوي موضوع يهمني ويمكن ما يهم غيري ,,
المهم قلت اذا وافقت بطلب انه يسجل لقبه وقبيلته قبل الملجه وهذا يكون مهري !!!!!!!!!!! << اعرف اني سطحيه ,,
لكني تعبت لانه الريال واااااااااااااااااااايد يمدحونه وطلع لا متشدد ولاهم يحزنون ,, صح متدين بس باعتدال ,, ماعنده خرابيط وماشي سيده ,, ومابغي ارده واندم ..ولا ابغي اوافق واندم !!!

والحين امي مع ابويه تخبره وتشووف رايه ,, وبالنسبه لخواني محد تشجع عشان نفس السبب ,,

قولووولي شو اسوي

المزيد من آخر المواضيع من نفس القسم:

• لأنّه جعل الفقير ييعش مع المؤمنين لا مع...
• الإكتئاب طاعون العصر الحديث بحث مرجعي...
• كيف تكون إيجابيا ؟
• كيف تتعامل مع ذاتك بطريقة صحيحة؟
• كيف تقوي ذاتك؟
• كيفية تطوير الذات بطرق بسيطة
• افضل طرق لتطوير الذات وزيادة الثقة بالنفس
• اهم المهارات التي تحتاجها لتطوير الذات
• طرق تطوير الذات في مجال العمل
• اقتباسات ~ مُهرة القَصر

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[الأصالة]

موضوعج مهم صدقيني

بس والله ما اعرف اذا ابوج شايف ان ما فيه اي مشكله من هاي الناحيه
وان الريال زين وانتي طبعا في الاول والاخير استخرتي كذا مره وشفتي ان الريال زين وما يعيبه شيء

فاتوكلي على الله

لان الرسول عليه الصلاه والسلام قال اذا جاءكم من ترضون دينه وخلقه فزوجوه

يعني عليه الصلاة والسلام ما قال لقبه واسمج جبيلته

الله يوفقج ونفرح فيج عن قريب يارب العالمين

[احبه موت]

كيف بدون لقب يعني ؟ غريبه سألوا عنه اكثر واكثر

استخيري والله يتمم لج ع خير ان شاءالله

[tmyz]

وافقي عليه بارك الله فيج لانج مصليه استخاره ف ان شاء الله الامور بتتيسر وترى اللقب مب مهم مثل اهميه الاخلاق و الدين

[حلوه طفولتنا]

اختيه توكلي على الله وافقي .. انتي ببتزوجين ريال مب قبيلته .. واهم شي انه مواطن وعنده جنسيه . وانتي مستخيره ومرتاحه .. ليش عاد الحيره .. لو رفضتيه شو عرفج انه ممكن ايج واحد زين وبعدين تتاخرين في الزواج .. لانه هذا مب سبب عند رب العالمين علشان ترفضينه.. انا اعرف بنات اي واحد ايهم لازم يطلعون فيه عيب واحينه ما احد ايهم خير شر ..
كل الي اطلبه من سهلي امرج ولا تعقدي .. اذا امج موافقه وتشجعج توكلي على رب العالمين .. الريال خلوق وزين ومدين ومصلي وما عليه كلام توكلي على رب العالمين

[ام زايــد]

سؤال الغاليه وحطيه ببالج ... بلقب وريال مب زين .. بدون لقب وريال زين .؟؟؟ ايهما تختارين ؟؟

الاجابه واضحه

سؤال اخر ... اللقب شو بيسوي ؟؟؟ عشان اخق اقول انا لقبي شو ولا انا خذت الريال الي من الجبليه الفلانيه ؟؟؟ولا شو السالفه ؟؟؟ شو بيسوي بي اللقب ؟؟؟ بيمشي كل اموري في الحياه؟؟؟ ... ليش هالتعصب للقب ؟؟؟

بعدين الغاليه الريال مب انه ما عنده جواز وجنسيه .... مجرد انه ماشيء لقب ؟؟؟ وحتى لو شرطتي انه يحطون لقب ... تعتقدين هالريال بيهتم لج بعدين ؟؟؟؟ بيفكر فيج كزوجه ؟؟؟فكرت بكونه انسان خير ودين وصالح ؟؟؟ ولا بيفكر كونج وافقتي المهم تعرسين وهو من اي عايله وعساس جي وافقتي عليه ؟؟؟

انضجي الغاليه ... واتركي هالافكار عنج .... لانه الانسان بمعدنه مب هوه ولد منو ولقبه شوه ... ولا تقارنين حالج بحال خواتج ... يمكن رياييلهم عندهم لقب وغيره ...ولكن يمكن الي بتاخذينه بيطلع احسن منهم سواء كان له لقب ولا ماكان له لقب .... يعني كونهم هم لهم لقب مب فريدين من نوعهم وهم بيكونون الاحسن !

انتي استخرتي .. والحمدلله ارتحتي باستخارتج ... والقرار يعود لج...يا ترفسين النعمه الي ربي ارسلها لج بريلج عشان لقب لا بيطلعج فوق !او انج تقبلين بها ! مع العلم لو كانت غيرج جان وافقت عليه ...وبدون تردد كونه انسان تقي صالح واحسن من غيره بوايد..وتترين لين غيره ايي ... وعاد هذا غيره ماادري متى بيي ... وانتي مب صغيره 24 سنه...

لج الخيار

[ME_ME]

والله حرام شوفوا لوين وصلنا !!!!!!!!!!

صدقيني لو الريال درى عن الموضوع بيروح ولابيرد هذا لوعنده كرامة

[نـادره]

ماعتقد بيوافق ع شرطج او بيقبل فيج

انا اعرف وايد بنات ماعندهم لقب بس هم اصلا عرب وبدو لكن ماشي لقب!! مافيها شي


شو يعني انا ماهتم في هالسوالف المهم اخلاقه وولد ناس والكل يشهد

[KK12]

لو ما عنده جواز بقول هيه عندج حق

الحين اللقب شو بيفيدج اذا طلع الريال مب زين ...؟؟؟؟ ...من متى الالقاب والقبايل هي اساس الزواج؟؟؟..

حرم والله هالتفكير...

[ام عبدالله 70]

اممم برايي اهم شي الاخلاق والدين ..

والحمدلله ان الريال متدين وعارف ربه ..

وسالفة اللقب مو مهمه .. انتي بتاخذينه هو ولا اللقب ..

الناس ياختي باخلاقها ودينها وتصرفاتها مع الناس مو بالالقاب ..


صلي الاستخاره وتوكلي على الله ..

وصدقيني ما بتلقين احسن من هالريال ..


والله يوفقج ان شاء الله

[السيده نفافه]

انا سمعت في الاذاعه انه بيفتحون المجال لتسجيل الالقاب والواحد يسير وياخذ شاهدين والاوراق الثبوتيه بس انت اتاكدي من ها الموضوع ما كنت مركزه وايد مع المذيع.......وبالتوفيق

[رمااال]

الله يوفقج اختي ... استخيري

[أم شمسان]

يسوا عليج والله ياختي واايد اعرف ناس جيه والحين معرسين وعندهم عيال بعد شو المشكله تقدرين تتفاهمين وياه عقب العرس انه يسجل لقب بالجنسيه مب واايد صعبه اما على كلامج عادي يتحسبها اهانه او شوي او مب حلوه تشرطين عليهم هالشرط

[اميرة السيدات]

أختي الغالية اللحين اللقب مهم تشوفينه يعني
أنا أحسه شئ تافهه
يعني محتارة ع لقب عيني من الله خير الغالية و توكلي
وودري عنج هالخرابيط

[بنت فلانه]

انا ما هتميت باللقب الا لشي واحد ووضحته في الموضوع .. المستقبل والعيال وانتو شايفين الحين ما شالله كل واحد ويفتخر باهله وقبيلته ,, صحيح هالشي مكروه وعارفه وفاهمه ,, بس اخافهم يتعقدون .. وبعدين ماعتقد تفكيري هذا فيه شي وكل وحده لها رايها ,, والاختلاف في الراي لا يفسد للود قضيه .. شكرا لانكم نبهتوني انه هالشي ممكن يمس بكرامة الانسان .. حتى لو ما وافقت عليه اخر شي بس بعد احس حرام بينجرح لو طلبت هالشي..
بس الافكار توديني وتيبني ,, وبعدني انا متردده ماقلت اني ارتحت من الاستخاره بس اللي قلته اني شفت الامور ماشيه بس قلبي مقبوض من هالناحية ..
امي خبرتني شو راي ابويه.. وسبحان الله رايه مثل راي وحده من الخوات .. قال يمكن يكون عنده لقب في الجواز ويطلع خايس ويمكن يكون مايعرف اصله وفصله ويطلع احسن القوم .. ماعرف شو اسوي !! هل هالتردد طبيعي ؟؟ والا انا مكبره الموضوع !!