تأخرت في الولادة وما اعرف شو الحل ؟؟

**MaZiOoNaH** · 2008-06-28, 07:39

السلام عليكم يا بنات

حبيت اطرح موضوعي هنيه عسب اذا ممكن تساعدوني وتقولون لي شو ممكن اسوي فهالحالة؟؟ أو اللي مرت بهالتجربة تفيدني شو سوت

:

انا دكتورتي عطتني موعد ولاده 20-6 على حسب اليوم اللي يتني فيه الدورة ... بس للحين ما ربيت .. مع العلم اني مب متأكده من موعد دورتي بالضبط بس انا عطيتها الرقم الأخير اللي اتوقع الدورة يتني فيه وهو 13 - 9 وبعد انا اتوقع انها يتني قبل << يعني لو قلت هالكلام بتخرب الدنيا اظن !!

:
:

المهم انا يوم حولت على المستشفى اللي بربي فيه ... وفي الشهر التاسع تعرفون يعطوني موعد كل اسبوع ... المهم في اخر اسبوع ما رحت وبعد اسبوع ثاني رحت اطمن عالبيبي ... هالكلام يوم الخميس الماضي ... قالت الدكتورة انتي مطوفه موعد ولادتج بست أيام وانا بخليج ترجعين البيت واذا ما ربيتي للأحد تعالي لازم عالموعد ... وفي احتمال نعطيج ابرة طلق صناعي ... انا قلت للدكتوره انزين في حال ما ربيت ... ليش ما انتظر؟؟ ... لانه اللي سوت لي صورة زمان قالت لي حسب الصورة انا اشوف انج بتربين 4 -7 ... ردت علي الدكتوره لو عندج الصورة (( بالذات اجدم وحدة )) بنمشي عليها ... بس هذا ما يمنع احتمال انج متأخره في الولاده وممكن تكون في خطورة على البيبي ... يعني يمكن ما عنده قدره يدفع عسب يطلع ويصير الطلق او ممكن يطوف موعد الولاده ويشرب ماي او يتبرز (( الله يعزكم )) ويتلوث من برازه

بنات انا محتاره والمشكله في المستشفى يعطوني موعد كل يومين ... وفي كل مره يشوفوني فيها احسهم يقولون لي انتي بعدج ما ربيتي ... وما اعرف اخذ بكلام منو << وعلى فكره كل ربيعاتي كانوا يمدحون اللي قالت لي موعد الولاده بالصورة ويقولون انها تعرف بالضبط متى بتربي الوحده ((والعلم عند الله طبعا)) طبعا هذا الكلام من قبل كانوا يقولونه لي مب الحينه يوم تأخرت ولادتي وهالشي اللي شوي يعطيني امل انه موعد ولادتي بعده

طبعا اخواتي تتخيلون حالتي!!

الحينه طول الوقت افكر متى بربي !! ... ويا رب متى بييني الويع ... عشان ارتاح من الهواجس اللي في بالي

ومن كثر ما تأخرت طول الوقت أدعي انه تمر عليه اعراض الولادة عشان عالأقل أطمن أني بخير والبيبي اوكي

بنات والله قمت احلم احلام انه في شي صاير <<< من كثر ما يخوفوني في المستشفى

ومرات احلم اني اربي بسهوله لدرجه اني ما حسيت بالياهل وهو ينزل ... بس اشوف في الحلم انه الياهل نزل ما يتنفس وتفاصيل اكثر اشوفها فالحلم تخوفني لين ما انش مفزوعه

واقوم اصيح وفي نفس الوقت مب قادر اشكي لأحد

من كثر خوفي من هواجيسي

وامس قلت لامي عن كل اللي صار قالت لي انتظري

وهالايام تمر عليه ببطئ ... واخاف منها جدا

فادعوا لي الله يسهل عليه وأربي جريب

والسموحه عالإطاله

اختكم المزيونه

المزيد من آخر المواضيع من نفس القسم:

**دانة الشرقيه** · 2008-06-28, 07:50

يااااااااقلبي والله مثل معاناتي

لما قرب موعد ولادتي وماكان يجيني طلق تلقفت وشربت عشبة مريم عشان يجيني الطلق واشرب قرفه مع عسل

وفي نفس يوم الموعد رحت عند دكتورتي قالت انتي ماولدتي الى الحين قلت لا بكل حزن ومافيه طلق بعد

المهم تنومت بالمستشفى لان صار المشيمه ناشفه وماتغذي الطفل وبعد 5 اياااااااااااااااااااااااام من المعاناه والتعب والقلق

ولدت بطلق صناعي

نصيحتي لك لاتشربين اي شي يحفز الطلق والسهاله من رب العالمين

ربي ييسر لك ولادتك ويفرحك بطفلك سليم معافى وان شاءالله تبشرينا بكره بولادتك بالسلامه

**reemyah_1** · 2008-06-28, 09:58

الله يسهل عليج انشالله الغالية....المفروض انهم من خلال السونار يعرفون حجم البيبي واذا فعلا تم اسابيع حمله كامله خلاص..وبعدين أختي امشي وايد كل يوم لمدة ساعة أو اكثر هذا بروحه حافز طبيعي للرحم انه ينفج وغير قوة الجاذبية الأرضية وانتي تمشين تنزل الياهل على تحت.....والله يسهل عليج يارب

**قلب طفله** · 2008-06-28, 12:50

الله يسهل عليج وتقومين بالسلامه انتي والبيبي

**الغرام العذب** · 2008-06-28, 12:55

أول شي سلامتج جدامج مثل ما يقولون ,,,,,

لكن اللي أنا متأكده منه من كلامج حساب موعد الحمل والولاده غلط ....

حتى لو عطوج تاريخ عشرين مثلا يعطونج عليه اسبوع كاااامل في حالة أن الحرمه ما
تولد في التاريخ المذكور يعطونها 7 أيام زياده .......

حبيبتي توكلي على الله ومتى يأذن الله بالولاده تراج بتربين ...... ماله داعي تحاتين

وتفكرين متى ربج كاتب تراه بينزل بينزل .......

ومبرووك مقدما ...

**Princess22** · 2008-06-28, 12:58

الله يسهل عليج امشي على رملة البحر و انشالله بتربين و بتقولين برنسيس قالت

**fashions** · 2008-06-28, 13:03

اكلي تمر ركب وملعقة عسل وأمشي أمشي أمشي وتصدقي بكل يوم وادعي ربك ... الله يهون عليك يارب بهالساعه المستجابه ويسهل ولادتك اللهم آمين ويقومكم بالسلامه وطمنينا بلييييييييييييييز ..بإنتظارك

**MaZiOoNaH** · 2008-06-30, 12:18

مشكورات اخواتي على هذي النصايح الغالية

وشكرا على ردودكم الحلوة ودعائكم لي

للحين بعدني ما ربيت واول ما ربي بطمنكم ان شاء الله

بس رحت اخر مره المستشفى وما طلعت لين اطمنت على كل شي

سويت صوره وطلعت كل الصور الجديمه اللي سويتها

وتأكدت من موعد الولاده حسب الصورة وفي اي اسبوع انا فيه

والحمد لله طلع كل شي مثل ما انا متوقعه ... لازال في مجال للانتظار بدون ما اكون متأخره

وطلبت بعد من الدكتورة انها تكتب تاريخ ولادتي المتوقع حسب الصوره في كرت الحمل

عشان ما يحشروني يوم اروح المستشفى الثاني

والتاريخ المتوقع اليديد من 4 - 7 يوليو

وقالت لي الدكتورة عادي حتى لو اكثر شوي عادي

ووصتني اشرب زعتر وامشي وايد

وطبعا هذا بالاضافه للي نصحتوني به

وشكرا

**زوجه الياسي** · 2008-06-30, 12:31

الله يسهل علييج ادعييييييلنااااااااااا...

اللهم ثبت حمل كل حامل وقر عينهن بالطفل الصالح المعافي كامل الخلق والخلقهـ بدون زياده ولا نقصان و ترزق كل محرومهـ عاجل غير آجل يارب العالمين

**ام نوره200** · 2008-06-30, 13:08

الله ييسر الولاده وتقومين بالسلامه انتي والبيبي

**حبيبه ريلي** · 2008-06-30, 13:48

ربي ييسر لك ولادتك ويفرحك بطفلك سليم معافى وان شاءالله تبشرينا بكره بولادتك بالسلامه

**فطمطم** · 2008-06-30, 13:49

الله ايسهل عليج حبيبتي

**MaZiOoNaH** · 2008-07-01, 01:18

شكرا لكم اخواتي

زوجة الياسي

ام نوره200

حبيبة رريلي

فطمطم

دعواتكم في ميزان حسناتكم يا رب

والله يسهل على كل حامل ويرزقكم الذريه الصالحه ويرزق كل محرومه بإذن الله

تسلمون على هالمرور وعلى الدعاء يا اخواتي

اختكم المزيونه

**فلفله** · 2008-07-01, 01:45

الله يسهل عليج وتقومين بالسلامه

**أم شمس** · 2008-07-01, 01:50

الله يسهل عليج إن شاء الله

الموضوع: تأخرت في الولادة وما اعرف شو الحل ؟؟

أدوات الموضوع

عرض

تأخرت في الولادة وما اعرف شو الحل ؟؟

المزيد من آخر المواضيع من نفس القسم:

المواضيع المتشابهه

منو تأخرت عقب الولادة الثانية؟؟؟؟؟؟؟؟؟؟؟؟؟؟؟

ترهل الجسم و الكرش بعد الولادة ما الحل ؟

بنات ابى اعرف لون بشرة الجنين قبل الولادة يصير.؟

بواسير بعد الولادة شو الحل؟؟

ما اعرف شو الحل معاها