حملة لقراءة سورة البقرة كل يوم .........

**ملكة الهدوء** · 2008-06-12, 23:47

السلام عليكم ..

بالفتره الاخيره ما شاء الله زادوا البنات اللي حابين يعرفون اكثر عن فضل قراءة سورة البقره ..

و الكل تشجع انه يقراها كل يوم ..

بس خايفين انه مايقدرون يواضبون عليها ..

انا مجربتها و راح اساعدكم و اشجعكم انه تقرونها و اي وحده تحس انها متكاسله تدخل و تكتب لنا رد وان شاء الله بتلاقي الكل يشجعها على هالشي..

راح نعتبرها مسابقه .. خلونا نبدي في اول 40 يوم ..
وانا مسويه لكم جدول عشان تواضبون على القراءه وكل يوم تقرين فيه سورة البقره تحطين صح في الخانه اللي بالجدول تحت اليوم اللي بديتي فيه ..

و مع تشجيع البنات و التنافس الشريف انه كل وحده تبي تكمل 40 يوم واهيا تقراها كل يوم بدون لا تقطع ان شاء الله راح نقدر انه نخلي اكبر عدد من البنات يواضبون عليها ..

اللي حابه تشارك معاي بهالمسابقه ان شاء الله بتلاقي التشجيع وكل اللي تحتاجه عشان تكون عندها قراءة سورة البقره عاده كل يوم ما تنقطع ان شاء الله ..

هذا الملف فيه جدول تقدرون تعدلون الايام حسب اليوم اللي راح تبدون فيه .. و انا حاطه فيه 4 جداول كل جدول مقسم 40 يوم حسب الاسبوع ..

http://www.box.net/shared/vaz9986tc8

اول جدولين فيهم ايام الاسابيع كاتبتها

ثاني جدولين فاضين ..

رتبو الايام حسب اللي تبون تبدون ..

و الله يوفقكم دام انه عزمتوا على هالشي اللي اكيد قدره كبير و عظيم عند رب العالمين ..

ونبي شعار حق حملتنا منو تتبرع تسويلنا شعار حلوا انا ماعندي برامج مفرمته جهازي ومتوهقه .. لانه كنت متحمسه حق الموضوع مابغيت اتأخر في انه احطه ..

المهم انه اي وحده تبي تشارك معانا خل تحط الشعار اللي راح تتبرع فيه وحده من البنات بتوقيعها عشان نزييد و نشجع البنات على المشاركه معانه لما يشوفون عدد كبيييييير ما شاء الله مشارك ..

والحين بعد ما نزلتوا الجداول

بقولكم جم شغله تشجعكم اكثر على قراءة سورة البقره :

1- القرآن كله معجزه .. وسبحان الله فيه شفاء من كل داء .. فتخيلوا سورة البقره اللي الرسول عليه الصلاة والسلام وصى عليها و ذكر افضالها ..

2- بهالزمن زادوا الناس اللي مايخافون ربهم و انتشر السحر بشكل كبييييير فوق ما تتصورون خصوصا بالكويت و بين الحريم بالذات .. و زادت الاحقاد و الحسد .. و السحور والسوالف هذي كلها تيب النياسه للبيت و اعوذو بالله الجن و المس و الخرابيط هذي كلها .. ممكن ناس وايد عليهم عين او حسد بس مايدرون او حتى مسحورين بعيد الشر عنكم جميعا بس ما يدرون .. سورة البقره بتخليكم تحافظون على نفسكم و اي شي من حسد و عين و سحر و مس و جن الله راح يبطله و يبعده عنكم ان شاء الله .. و هالشي معروووووف.. يعني مو بس اللي فيها تتداوه بسورة البقره .. لأحتى اللي تبي تحمي نفسها من اي شر تقرا سورة البقره ما يقدرون عليها لا السحره الله يدمرهم و يرد اسحارهم عليهم .. و لا الحساد واعوذو بالله من الناس اللي ماتذكر الله .. ولا تنسون انها السورة التي لا يقدر عليها البطله السحره ..

3- اذا الانسان فيه ضيقه و مو مرتاح في حياته و نفسيته تعبانه اقرب شي يلجأ الى الله .. بالدعاء و الصلاة و قيام الليل .. والقرآن .. فمابالكم انه الانسان كل يوم يداوي نفسه بقراءة سورة البقره اللي معروفه انها تهدي النفس و تطمن الانسان و تريح قلبه ..

4- الله سبحانه و تعالى يحب العبد اللي يتقربله بعبادات يجتهد فيها غير العبادات المفروضه .. فقراءة سورة البقره تعتبر عباده .. و اهيا سورة طويله و كل وحده فينا حابه انها تقراها عشان تتقرب الى الله اكثر + يبعد عنها كل شر و مكروه باذن الله + تصون نفسها من داء العصر الهم والحزن و السحر و الحسد و العين و المس و الجن و الامراض النفسيه اللي ما لها علاج الا بالقرآن الكريم و اخلاص النيه لله و الدعاء له ..

5- تقدرون تقرونها في اي وقت من بعد صلاة الفير لي صلاة الفير الثانيه .. لانه يومنا ينتهي ونبدي في يوم يديد بعد صلاة الفير.. يعني فرضا صليتي الفير و نمتي.. صار الصبح رحتي الدوام رديتي تغديتي صليتي و بعدها اي وقت تقدرين تقرينها من اول ما تقومين ليييييين يأذن الفير مره ثانيه .. انا دايما اقراها قبل لا انام .. و ساعات لما اكون تعبانه وادري راح انام امبجر اقراها بعد صلاة العشا او اي وقت احس انه قاعده ماعندي شي لانه الواحد مايدري شنو شغل بيطلعله طول اليوم .. او تصير ظروف تخليني اطلع او شي.. فأي وقت فاضيه اقراها عشان ارتاح انه سويت اللي علي اليوم ..

بنات بعد كل اللي قلته معقوله في وحده راح تأجل قراءة سورة البقره لي باجر ؟؟؟؟؟؟؟؟

حتى اللي تكرومون عليها الدوره .. تقرا من الموبايل .. انا حاطه عندي البرنامج عشان اقرا من الموبايل وقت اللي ماقدر المس المصحف .. والله العمليه سهله انتوا بس خل عندكم نيه في انكم تبدون والله بيوفقكم

اللي تقول عندها امتحان و اللي تقول عندها دراسه و اللي تقول عندي دوام واللي واللي واللي واللي

بسألكم سؤال واحد بس..

اليوم في 24 ساعه .. بهال 24 ساعه كلها تدرسين و تاكلين وتنامين وتصلين فروضج بس؟؟

ماعندج وقت لو ساعة زمن تروحين جمعيه مثلا ولا تيبينلج شغله .. او تريحين وتشوفين تلفزيون متابعه برنامج ولا حلقه .. ولا ماعندج وقت تتسبحين فيه .. او تكلمين رفيجتج بالتلفون .. او تضيعين وقتج في قراية مجله او تسوين اي شي بوقت راحتج؟

بنات والله انه ساعه وحده ماراح تاخذ من وقتج .. و ترا بدايتها ساعه بعدين بتخلصينها بأقل من ساعه مع القرايه العاديه لانه بتكونين مع الوقت اجتزتي الصعوبه في الكلمات و تكونين مع المداومه عليها حفظتي ايات وايد .. خصوصا انه ماره علينا ايات وايد حافظينها من قبل من المدارس و غيرها ..

يالله بنات مانبي اعذار و الله بيعوضكم بالوقت اللي هديتوا في دراستكم ساعه وحده بس و قريتوا فيها سورة البقره .. ان شاء الله بتلاحظون عالشي في امتحاناتكم ..

واللي عندها اي اشغال ثانيه بتلاحظ ان الله بيوفقها في حياتها و عيالها و كل شي

صدقوني ماتحس في هالشي الا اللي تجربها .. يمكن وايد بنات مجربينها بس مايقولون لانه يخافون من العين وانه احد يحسدهم ومايقدرون يواضبون عليها ..

و الله اقولها لكم و عن تجربه اني اقراها كل يوم الحمد لله و ادري انكم بتذكرون الله وماراح تحسدوني..
و اهيا تحفظ من اي حسد .. و دام اني واثقه من ربي و ادري نيتي اني ابي اساعدكم لانكم خواتي و احبلكم الخير .. ادري انه هالشي بيكون له مردود حلو بحياتي من رب العالمين ..

والله يشهد على كلامي انه كل كلمه قلتها صاجه فيها و عن تجربه ..

و الله ابيلكم الخير و ابي دعاءكم ومابي شي غير التوفيق من الله و دعاءكم لي بظهر الغيب ..

والله يوفقكم و يسهل عليكم البدايه هذي و ان شاء الله بنتعاون كلنا

يالله منو المشاركاااات معانه ؟

و منو اللي بتسويلنا شعار حق حملتنه ؟؟؟

نبي شعار مكتوب عليه

حملة قرٍّاء سورة البقره كل يوم(شاركونه)

عشان يكون واضح حق البنات اللي ماقروا الموضوع ..

يالله بسم الله نبدي وفتحنا باب الاشتراك وفترة الاشتراك من اليوم .. لييي مدى الحياة

__________________

هذا الكلام منقول لكم من الاخت شري وانا والله لما وجدت الخير في هذه السورة حبيت اننا نسوي حمله هنا في هذا المنتدى المبارك ويالله يابنات خلونا نتعهد هذي السورة من الليله وانا اول وحدة بكتب لكم قصتي
وان شاء الله الكل يتشجع ونكتب حق بعض اخبارنا اول باول

المزيد من آخر المواضيع من نفس القسم:

**ملكة الهدوء** · 2008-06-12, 23:52

السلام عليكم ورحمة الله وبركاته ..

حبيت ان انقل لكم ماتغير فيني من بعد ماصرت اقوم الليل بسورة البقرة فوالله الذي لا اله الاهو اني ماكملي شهر من قيام اليل بها الا وقد تحقق ماكنت ارجوه واطلبه من الله ..
انا يا اخواتي خلصت من الدراسه ودورت على عمل وما لقيت المهم وطبيعي اني انتظر الرجل الصالح زي كل البنات ..
وكل يوم اسمع فلانه انخطبت وفلانه زواجها في الصيف وانا افكر ليه انا لسا ما احد جاء وتقدم لي مع اني مو ناقصني شي والحمدلله وبشهادة الكل ..ودايم نسمع ان بيت فلان يسألوا عنا وفلانه اخذت رقم التلفون وناس كلموا اختي واللي كلم اخوي قسم بالله العظيم ما في شي يتم او يتقدموا بس ما يتكلمون في الموضوع ليه ؟؟؟!!! الله اعلم رحت لرقاة تعددت الاسباب 4 سنوات على يد الشيوخ بس الشكوى لله اخر راقي ظهرت على جسمي بقع غامق لونها وهنا اتاكدت من وجود عاااارض الله المستعان
وكثرت الاحلام المزعجة والكوابيس اللي تأكد كل شي انا شاكة فيه
المهم دايم اقراء عن قيام الليل والاستغفار وكنت اتكاسل ..
وفجأة سبحان الله صرت اقوم الليل بسور صغيرة وادعي وخلاص وشوي صرت اقرأ بس الجزء الاول من سورة البقرة وفي اليوم التاني اكمل ..
وبعدها بفترة صرت اقسم السورة على 3 ركعات مع الوتر ..
وبعديت صارت ركعتين ومرة قلت ابقرائها كاملة في ركعه وحدة وربي يابنات اني مو مصدقه نفسي كنت طايرة من الفرحة بهذا الانجاز وصرت استغفر ..اخذت سبحه واستغفر فيها ...
واكثر من الدعاء ..والله العظيم اني كنت اسال الله ان يسهل امر زواجي في هذا الشهر وكان ماباقي الا 3 ايام وينتهي شهر 4 وكنت ملحة على الله المهم ويوم 26 /4 الا والجوال يدق ناس جايينا وكنت حاسه انو ربي استجاب دعوتي
وفعلا خطبوني والله الذي لااله الا هو اني عرفت ان هذي ثمار قيام الليل وفضل سورة البقرة والجوء الي الله في اليل والناس نيام ..
المهم استخرت كم مرة ولكن ما حسيت برضا ورفضته وانا مبسوطة وفرحاااانة اني ان شاء الله استدليت طريق الخير وعرفت معنى ( واذا سألك عبادي عني فاني قريب ...)

واتمنى من ربي اني استمر وان اتزود من الخير وان يعوضني بدل هذا الشخص بشخص اخر وان يوفقني معاه وان يرزق كل بنات المسلمين الازواج الصالحين
على فكرة والله في اول الايام اللي قمت فيها بسورة البقرة كثرة الاحلام اللي كلها مبشرة وفيها خير والحمدلله

اميييييييييين ...

طلب
كل مين تقرأقصتي تدعي لي بالستر والتوفيق ... لاتنسي ولك مثلها..
دمـــــــــــــــــتم

**عزي قرآني** · 2008-06-12, 23:56

وايد مستانسه اني من الاوائل الي يحبون انهم يواضبون على سورة البقره
انا مصدقتنج والله يااختي
لاني حافظه الجزء الاول من سورة البقره وشوي من الثاني وان شاءالله اكمل
وكنت يوميا اقراها قبل لا انام كامل والحمدلله
بس للاسف ماادري هالايام كله كسل وخموول يايني ومتعايززه عنها مع انها نفس ماقلتي ساعه فقط لا غير
الله يهديني وان شاءالله ارجع نفس اول واحسن
ويزاج الله الف خير
وانا معاكم من المشتركين

**ملكة الهدوء** · 2008-06-13, 00:15

حياك الله عزي قراني وان شاء الله ربي يعزك بكتابه قولي امين

وان شاء الله من اليله لازم تبدين وتواظبين عليها وتبشرينا عنك يالغاليه

والله يجعلك من السباقين دايم للخير

**الرهايف** · 2008-06-13, 00:16

ااحب اشارك وياكم

والله يوفقنا

**ملكة الهدوء** · 2008-06-13, 00:36

المشاركة الأصلية كتبت بواسطة الرهايف

ااحب اشارك وياكم

والله يوفقنا

حياك الله يالغاليه
ان شاء الله نستفيد ونفيد ويالله شدي حيلك وخبرينا عن اخبارك بستمرار

**HATAAN** · 2008-06-13, 00:53

ااحب اشارك وياكم

والله يوفقنا

**بنوته كفالي** · 2008-06-13, 01:07

انا بعد احب اشارك وياكم

**بنت كشيش** · 2008-06-13, 01:39

ان شاء الله اني ببدي من اليوم معاكم
مع انه والحمدلله مخليه المسجل يشتغل تقريبا على طول وفيه شريط سي دي القران كامل بصوت ماهر المعيقلي كل ما يخلص يشتغل اتماتيكلي يختم كل يوم 5\6 مرات والحمدلله (5)شهورعلى هالحاله حتى ساعات لما حد ايينا يقولون بسم الله عندكم عزا اقولهم المهم اني مرتاحه

**بنت الاحمدي** · 2008-06-13, 01:45

مشكورة جزاج الله الف خير

**شهدودة** · 2008-06-13, 01:46

وانا بعد ابا اشارك وياكم واتمنى اواضب عليهاااااااااااا

**شمسية** · 2008-06-13, 02:48

أنا وأعوذ بالله منن كلمة أنا إنني والحمد الله رب العالمين أقرأ سورة البقرة كل يوم إثنين وخميس .
والله يقدرني على قراءتها دائما

**ملكة الهدوء** · 2008-06-13, 05:44

المشاركة الأصلية كتبت بواسطة HATAAN

ااحب اشارك وياكم

والله يوفقنا

حياااااك الله وياهلا فيك وعاد بشرينا عنك بستمرار وايش يتغير فيك بعد ما تقرين السورة
واتشرف فيك يالغاليه

**ملكة الهدوء** · 2008-06-13, 05:47

المشاركة الأصلية كتبت بواسطة بنوته كفالي

انا بعد احب اشارك وياكم

نتشرف فيك يالغاليه وان شاء الله بتتحقق امنيتج بس مع سورة البقرة لان اخذها بركة وتركها حسرة ولاتستطيعها البطله
يالله عاد شمري عن ساعدج وابدي معانا هني ويااااارب تفرحينا باخبارج الطيبه قريب قولي امييييين

**ملكة الهدوء** · 2008-06-13, 05:50

المشاركة الأصلية كتبت بواسطة بنت كشيش

ان شاء الله اني ببدي من اليوم معاكم
مع انه والحمدلله مخليه المسجل يشتغل تقريبا على طول وفيه شريط سي دي القران كامل بصوت ماهر المعيقلي كل ما يخلص يشتغل اتماتيكلي يختم كل يوم 5\6 مرات والحمدلله (5)شهورعلى هالحاله حتى ساعات لما حد ايينا يقولون بسم الله عندكم عزا اقولهم المهم اني مرتاحه

ياهلا فيك يالغلا والله يمتع اسماعنا بالخير دايما والاخبار الطيبة يالله ان شاء الله نستفيد منك وتستفيدي منا

والله يكتبلنا وياااااج الراحة دينا واخره قولي امييييييين

الموضوع: حملة لقراءة سورة البقرة كل يوم .........

أدوات الموضوع

عرض

حملة لقراءة سورة البقرة كل يوم .........

المزيد من آخر المواضيع من نفس القسم:

مرحبا

المواضيع المتشابهه

"""حملة قراءة سورة البقرة في قيام الليل بنية الرقية للحمل"""

✿ هــل تعانيـن من الهموم والمشاكل ؟ شاركي في حملة قرأة سورة البقرة توجد قصص واقعية✿

حملة قراءة سورة البقرة يومياً لمدة شهر

حمله لقراءة سورة البقرة كل يوم ... ((الجزء الثاني ))

قصة حقيقية مؤثرة... لقراءة سورة البقرة