قصة خرافية كانت تروى في الامارات للأطفال لينامو ( ادخلو و استمتعوا )

**فرحة الامارات** · 2008-06-12, 09:39

ليوم بقول لكم قصه خرافيه،وهي باللهجة الاماراتيه،وهاي القصه كانت امهاتنا يقولونها لنا في الليل عشان نرقد. . صح طويله بس مشوقه...

كان يا مكان في قديم الزمان،ابو عنده ولد وبنت،وامهم متوفيه،وعندهم مرة ابو...استوى قحط عندهم، تم هذا الابو كل يوم يسير الجبل يجيب لهم اكل و ما يشبعون،والباقي كله توديه بيت اهلها. الين نهار ثاني الابو عجز.كل يوم يسير الجبل يجيب لهم نبق..

وكان يقول لمرته:
- حطي لنا نبق

قالت:
- وين النبق،كله عيالك كلوه؟

قال:
!يالله،كل يوم ياكلون جونية نبق!!!

قالت:
هيه،عيل شو...هاذيل ما يسدهم جذيه الا اذا توديهم السًُيح وتخليهم، ويوم بيسير القحط وبتستوي الدنيا زينه، جيبهم.

قال:
هيه،والله عيل زين.

الين استوى نهار ثاني،اخذوا الجونيه،وودى بنته وولده وياه،وقال:
- يالله يا عيالي نسير الجبل نجيب نبق.

وداهم الابو، ويوم وصلوا تحت النبقه، يسير الابو فوق السدرة ينفضها

(( مرة الابو: زوجة الاب... استوى: صار...تم هذا الابو:بقي هذا الاب...يجيب ما_يشبعون:يجئ بالاكل ولا يشبعون...توديه:تأخذه الى...الين:الى ان... نهار ثاني:يوم اخر...النبق:ثمر السدر...جونيه:الكيس الكبير المصنوع من الخيش...ما يسدهم: ما يكفيهم...السيح: البريه..ينفضها:من نفض، مصدر نفضت الثوب والشجر وغيره انفضه نفضا اذا حركته لينتفض))

والعيال يلقطون منه ياكلون، ومنيه يحطون فالجونيه.. الين شبعوا وترسوا الجونيه واستوى الليل، قال ابوهم:
- الحين استوى الليل وما نقدر نسير البلاد لكن الحين تدرون هناك فيه كهف، جذيه تحت الجبل، غار،وانتوا رقدوا هنيه في الغار الين الصبح، وانا بجلس من برع الغار الين يستوي الصبح بنروح الابلاد.

قالوا:
- انزين.

هم مساكين جهال ما يعرفون بعد.. دشوا الغار ورقدوا، وجاب لهم حصايه عريضه وحطاها جيه قدام الغار، وخلاهم يرقدون ويناخرون الجهال فهالغار، وعقب يوم شافهم راقدين، ياخذ الجونيه ويسير عنهم...
يسير الابلاد عند مرته. وقال:
- يالله خليتهم عيالي، حطيتهم فالغار هناك.

قالت مرته:
- زين سويت يوم سرت، يوم بتستوي الدنيا الدنيا زينه سير جيبهم.

قال:
- زين سويت جيه بعد.

الين استوى الصبح، طلعت الشمس ودشت عليهم من الخبق ودزوا الحصايه يبون ابوهم، ما يشوفونه،وتموا يزاقرون

((منيه: من هنا... ترسو: ملؤا... برع: خارج...
يناخرون:يشخرون... الخبق: الثقب...يزاقرون:ينادون))

ابونا...ابونا ابونا، والابو محد ساير، فتموا يصيحون... وساروا وساروا في هذا السيح الين شافوا بيت، دشوا فيه، ما شافوا حد، دشوا المطبخ. شافوا الخبر واللبن والكامي، كل شي محطاي، ومحد فيه هذا البيت...

تموا ياكلون الاكل، وبعدين ساروا قبل المغرب. ساروا ساروا، في الغار ورقدوا الين باكر، بعد جو الضحى. يوم جو ما يشوفون حد. .يشوفون الاكل جاهز محطاي ومحد فالبيت

تموا هذي المده جذيه، وهذا اصل البيت مال الضبعه ، عندها غنم وبقر. يوم يستوي الصبح تسير تسرح الغنم والبقر، ويستوي المغرب تجيبهم، ويوم تجيبهم في الليل تحلب وتخض وتخبز وتحطه .ليوم بتجي من السرح

قالت الاخت:
- احنا ما يستوي كل يوم نسير ونجي... انا باجيب لك روية ماي - وخبز وتمر وجبن. وانت كل واجلس في الغار وانا بسير باشوف هالبيت من له.. ومنوفيه؟؟ وانت هنيه. يوم بتجوع كل واشرب ولا .تقول شي ولا تصيح عن يجونك الذياب ويسمعون صياحك

قال:
- انزين

((السيح: البريه...الكامي: اللبن المطبوخ...محطاي:موضوع... تسرح: ترعى...مال الضبعه: ملك للضبعه))...

حطت له الماي والاكل وجت عنه، وانخشت في هذا البيت تحت الشبريه،مكان ان حد جا ما يشوفها... ويوم استوى المغرب تسمع ... حس يزقر: حوش حوش حوش

داشه الضبعه ويالغنم والبقر، فسارت ربطت غنمها وبقرها وحلبتهم وجلست خبزت، وعقب ما خلصت الخبز جلست تسوي الروب، لبن، وتخض وتخض اللبن وهي مزكومه ما ترْوَح شي. هذا الذيل يرْوَح، :تم ذيلها يخبط، يخبط، قالت
ام.ام.ام..ام.ام. ريحه إنس ماشي، اشحقه تسوي جذيه؟؟؟

قالت(لنفسها) اووه يمكن ذيلي يابس يبغي دهان. تخش ذيلها في السعن، هذا اللي تحلب منه، وتخس يديها وطلع لها زبده، وتمش ذيلها، تم ذيلها يزيد، يتخبط روحه. قالت:
هيه انت مأذني. ريحة إنس ما شي شو اسوي الحين؟؟ انت جذيه ما تخليني اخض. سارت وخذت ملبق وحطته على ذيلها، ومن لبق ذيلها، وهو كان فيه دهان، كان تبق بكبرها...بقت وتمت تحاوص. تحاوص الين استوت جمر والجمر استوى رماد...

((انخشت: اختبأت..الشبريه: نوع من انواع الاسره... حس يزقرون: صوت ينادي...حوش: الصوت اللذي تقوله الراعيه لاغنامهاعندما تدخلهم الزريبه...ما تروح: لا تشم واشتق الفعل من الرائح(ريحه): رائحه... اش حقه: ما حقه ولماذا... تخش: تدخل... السعن: القربه... تمش: تمسح... ملبق: كبريت... منخشه: مختبئه...تبق: تشتعل... تحاوص: تدور في مكانها...

عقب تمت البنت منخشه، الحين استوى محد فالبيت. شافت البقر والغنم يتضاربون جوعانين ما جاهم حد يوديهم السرح. كان تطلع ويم طلعت سارت سوت حفره وحطت فيها الرماد ودفنته وسارت عند اخوها وودت الاكل، ونهار ثاني بعد جذيه سارت البيت تشوف منو بيجي في البيت، شافت محد غير هاي الضبعه. فسارت، وجابت اخوها من الغار، وجلسوا هنيه، وكبروا البنت والولد، تموا اول ثنيناتهم يسيرون يودون الغنم والبقرالسرح، لكن يوم كبروا الاخو هو يسير السرح والاخت اتم فالبيت تطبخ وتنفخ، الين سبع سنوات واستوت الدنيا زينه، وصار كل شي رخيض.

تذكر الابو ان له عيال تاركنهم في السيح. قال:
هيه الحين الحمد لله كل شي وايد والخير كثير. انا الحين لازم اسير ادور عيالي

كان يسير الى المكان اللي حاطنهم فيه، شاف محد فيه، كان يسير ويسير ويشوف بيت، كان يدق عالباب... دق البيت، كان البنت تشوفه
قالت:
- من عند الباب.

قال:
- واحد. هل الله ها الله فير شربة ماي، طايف الدرب

فقالت:
- هنيه، ما اشوف احد يجي هالابلاد. شو جايبنك انت هنيه؟؟؟

(هالله: للتوصيه...طايف: مار...)

قال:
- والله شو اقول لج يا بنيتي... (هو اليحن ما يعرفها) قال لها:
كان عندي ولد وبنت، واستوت الدنيا قحط وجبتهم هنيه

قالت:
- ليش تجيبهم هنيه؟؟؟

قال:
- اجيب لهم كل يوم جونيه نبق وما يكفيهم، ومرتي قالت ودهم في الحبل وخلهم هناك ويوم بتستوي الدنيا زينه ورخيصه جيبهم

قالت:
- هذاك النبق مب عيالك ياكلونه... يمكن كانت مرتك توديه لاهلها

قال:
- يمكن جذيه

قالت:
- يوم بتشوف عيالك الحين بتعرفهم؟؟؟

قال:
- هيه ومنو ما يعرف عياله؟؟

وطلعت له واعطته ماي فقال لها:
- والله بنتي تشابهج

قالت:
- انا بنتك يا ابوي.

قال:
- انتي بنتي؟؟

قالت:
- نعم

لوى عليها وقال لها:
- سامحيني. مب مني. هذا كله من مرتي

فقال لها:
- وين اخوج؟؟؟

قالت:
- اخوي في السرح. عقب المغرب يبجي..

ودته داخل، وحطت له اكل وماي، وجلس، الين جا الاخو من السرح جايب الغنم والبقر، كان يشوف رجال داش على اخته، هاوش اخته،فقال لها:
- شو جايب هالرجال هني؟؟؟

قالت:
- لا يا اخوي هذا ابونا انت ما تحيده، كنت صغير، جايبنا هنيه، طايحنا، عشان كان قحط، ومرة ابوي قايله حقه.

قال الاخو:
- الحين هو جاي يبغينا؟؟ يوم استوت الدنيا رخيصه؟؟ الحين يبي عياله؟؟

((لوى عليها: عانقها...هاوش: خاصم...ما تحيده: لا تذكره... طايحنا: رمانا...))

قالت:
- ما عليه يا اخوي هذا مهما كان ابونا، برايه

قالت له:
- سير..سير سلم عليه

فسار وسلم عليه وواجهه وقال له:
- سامحني يا وليدي

وتم الاخو يصيح، وقال لهم الابو:
- ما عليه، ما عرفت الدنيا وقصت علي مرتي وخذت بشورها

فقال الاخو:
- والحين انت عقب هالسبع سنوات جاي تدور عيالك؟؟ الحين يوم ثلاث ايام ما فيه اكل الواحد ما بيعيش، ولو بيعيش بعد فالاجبال، الوحوش بتاكلهم...

قال:
- هيه.. والله صدقك وليدي

قال:
- الحين يالله نسير البلاد.. الحين شفتكم ما بصبر عليكم بوديكم

( برايه: سامحه... وواجهه: تقلب الجيم ياء، وتلفظ
(وايه) وتعني المقابله والمصافحه، وفي اللهجه العاميه ووايهه اي لامس انفه بانف من يصافحه... بشورها: برايها)

قال الولد:
- لا... الحين ما بنجي، الحين كان انت تبانا تعال وعيش معانا، وبشرط، ان كان تبي تجي انت تسير تسرح الغنم والبقر، ومرتك تطبخ وتنفخ وتخم

قال:
- انزين

سار عند مرته، وقال لها:
- يا مره، انا شفت عيالي متساعدين وعايشين عيشه زينه في بيت، عندهم غنم وبقر، والحين نسير عندهم، وبشرط انت يوم بتسيرين تخدمينهم شكل ما هذي السبع سنوات طحناهم في السيح، وانت اطبخي وانفخي، وانا اودي الغنم السرح، كانج تبيني، وما تبيني كيفج، انا بسير.....

قالت:
- لا .. باجي معاك

وجت عندهم، واستوت خادمه، والابو راعي، وجلسوا البنت والاخو متساعدين وخليتهم وجيت عنهم.... وعطوني ثلاث جنايا واحد فر، وواحد زر، وواحد دفنته تحت الخرس واخضر....

(تخم: تكنس.. شكل: مثل... طحناهم: اسقطناهم... كانج: كانك...
الخاتمة تقليديه لكل حكايه

من كتاب حصاة الصبر

منقول
اقصد
مسرووووووووووق

الموضوع: قصة خرافية كانت تروى في الامارات للأطفال لينامو ( ادخلو و استمتعوا )

أدوات الموضوع

عرض

العرض المتطور

قصة خرافية كانت تروى في الامارات للأطفال لينامو ( ادخلو و استمتعوا )

المزيد من آخر المواضيع من نفس القسم:

المواضيع المتشابهه

فعلاً الأم أم مهما كانت .. الصورة تتكلم (ادخلو وبتعرفون قصدي)

أحاديث باطلة تروى في الأسراء والمعراج ..........

محتاجة نشيدة اقرأ كانت أول كلمة للأطفال ضرووووري

سحب شراب محلى للأطفال من الامارات

قبل كانت فراشة وبس...الحينة طقم الفراشة للأطفال...يحق لبنتج تتميز بكل الأحجام