نظام PuMpKiN لخسارة الوزن

**pumpkin** · 2008-05-20, 02:33

سلامي عليكم بنوتات و حريمااات

وايد يسئلوني كيف نزلت وزني ، و لأني فعلا استفدت من هذا النظام و بما انكم عزيزات على قلبي حبيت أفيدكم و يا ريت ما تنسوني من صالح دعائكم و تدعولي بالوظيفة و بالزوج الصالح
و ان شاء الله كل بطوطة في هذا المنتدى تتخلص من الوزن الزايد و تستوي شرات غصن البان و يغدي منتدانا اسمه منتدى رشيقاااات الامااااراااااات قولوووووووووا آميييين ،،

المهم ما بطول عليكم و خلونا ندخل في صلب الموضوع ...

انا بشرحلكم النظام اللي اتبعته ،، ،،

و اذا عندكم استفسار لا تترددون ...

عزيزاتي الرجيم اللي انا اتبعته بطيء و يباله نفس طويل لأنه مب شرات الانظمه العاديه اللي تنزل بسرعه الوزن و اول ما توقفين الدايت يرد الوزن دبل ...انا بديت في شهر 10 اللي طاف ،،و نزلت مال 15 كيلو بعدين وقفت شهرين عشان اثبت الوزن كنت اكل بحدود 1500سعرة حرارية و اروح الجيم و أمشي 3 مرات بالاسبوع ، و الحينه رديت مرة ثانية و نزلت 5 كيلو و باقي 6 ان شاء الله بنزلهم قبل حفلة تخرجي

قبل ما تبدين الدايت لازم تفهمين طبيعة انسجة الجسم ،،
انتي لما تسوين الدايت تبين تخسرين من الانسجة الدهنية مب من العضل و لما تخسرين الوزن من الكتلة العضلية مب من الدهون المخزنة في الجسم هذا شي ينعكس سلبيا على شكل الجسم و مرونة الجلد خاصة اذا نزل الوزن بسرعه ..

و بناء عضل الجسم يعتمد على البروتينات (( اللحوم بأنواعها و الألبان و الأجبان و البيض.. الخ)) و مرونة الجلد نستمدها من الكاربوهيدرات (( الخبز و الأرز ...الخ))

يعني لما تحرمين جسمج من هالامور تكون النتيجه جسم مترهل و انهيار في البناء العضلي و معدل حرق الدهون منخفض و المعروف ان العضل يرمم نفسه بسرعه يعني اول ما توقفين الدايت يرد الوزن بسرعه خياليه لان المفقود عضل مب دهون ...

بالاضافه الى ان الجسم لما ينحرم فجأة من السعرات الحرارية يحاول انه يعوض الفاقد بأنه يخفض سرعه حرق الدهون ،، عشان جيه تلاحظين مع الانظمه اللي تمنع الاكل فجأة ان الوزن ينزل بسرعه في اول الايام بعدين يوقف لانج حتى لو ما كنتي تاكلين ، الجسم نفسه ما يحرق لأنه يعوض النقص ،،

بتسئليني شو الحل ؟

الحل اللي انا اتبعته هو كالتالي :

*رجيم 6 أيام و اليوم السابع مفتوح

اليوم المفتوح عشان يرجع الجسم يسرع الحرق و ما يمر بمرحلة خمول

لازم تاكلين الوجبات في اوقات معينه يعني تضبطين الوجبات على الساعه مثلا الريوق الساعه 7 الوجبه الخفيفة بعد الريوق الساعه 9ونص الغدا الساعه 1ونص الوجبة الخفيفة بعد الريوق الساعة 4 ونص الساعه7ونص العشا الوجبه الخفيفة الساعه 9 و تنامين الساعه ونص11 لما تعودين نفسج تاكلين بوقت معين الساعة البيولوجيه في جسمج تنضبط على نفس التوقيت و ما بتحسين بالرغبة بالاكل في غير هالاوقات ..

*النظام اليومي هو كالتالي:
6 وجبات يوميا

اكبر وجبه الصبح و اصغر وجبه قبل النوم ب 3 ساعات تقريبا و ابدا لا تاكلين و تسيرين ترقدين على طول لأنج بتستوين شرات العجينه اللي حطولها خميرة و خلوها تخمر ههههههه

ال6 وجبات 3 رئيسية و 3 وجبات خفيفة (( سناك))

اتبعي نظام حساب السعرات الحرارية ..
و لا تتجاوزين في اليوم الواحد اكثر من 1500 سعرة حرارية في أسوأ الاحوال
*الصبح :لازم تكون وجبة الريوق هي اكبر وجبه في اليوم
على الريج اشربي عصير جريب فروت او كلي شرايح اناناس فرش او عصير اناناس مع ليمون بدون سكر
استبدلي الخبز الابيض بالاسمر مع جبن قليل الدسم و حبة فاكهه حسب الرغبة ، ، او كلي الكورن فليكس الاسمر لانه بيحسسج بالشبع فترة طويلة مع حليب منزوع الدسم ، و حتى لو حسيتي برغبه في تناول قطعه جوكليت يفضل انج تاكلينها الصبح لان الجسم بيلحق يحرقها باقي النهار ..قطعه صغيرة مب تصرطين مصنع جلكسي و تقولين pumpkinقالت !!

*بعد الريوق بساعتين خذي وجبه ثانيه :روب منزوع الدسم او فراوله او صنطرة او شرايح يح او شمام او برتقالتين أو خس أو خيار او جزر يعني ع حسب مزاجج

الظهر ترومين تسوين عيش اسمر بتحصلينه في كارفور يعني (( غرفة ملاس واحد)) او العيش البسمتي العادي بس الرز المصري لأ مع صدر دجاجه مشوي مع خضار ع البخار و حاولي تتفنين في البهارات عشان تحسين بلذة الاكل ، او سمج مشوي مع خبز اسمر و سلطات ،، و اذا تحبين تطلبين من برع شي عند سب واي سندويجات دجاج مشوي تنفع للدايت او سلطة السيزر مال ماكدونالدز بس بدون الصلصة، و اذا تحبين و ممكن حبة بطاطا متوسطة الحجم مشوية مع سلطات بس بدون خبز (( اكيد بتستغربين)) بس الكاربوهيدرات ضروريه عشان ما يترهل الجلد

بعد الغدا بساعتين : سناك خفيف جزر او فاكهة او بسكوت قليل الدسم (( بتحصلينه في كارفور)) او جبس قليل الدسم او جوكليت قليل الدسم (( بتحصلينه في عيادة دكتور نيوترشن)) مع اني ضد النظام اللي يتبعه لانه يسبب ترهل للجسم او جاي مع سكر الرجيم .. الخ

المغرب : وجبة العشا : لازم تكون اصغر من وجبة الغدا و حاولي تمنعين فيها الكاربوهيدرات ممكن تاكلين فيها صدر ديايه مشوي او علبة تونا (( اللي بالماي و الملح مش بالزيت )) مع تبوله او فتوش مع خل و ملح بدون زيت او ستيك او و تسوين كطبق جانبي روب مع خيار مثلا و اذا حبيتي تطلبين من برا اطلبي صحن تكه بالروب صغير او صحن شيش طاووق صغير و كليه مع السلطات بدون الحمص و المتبل و هالسوالف
و عودي نفسج تستغنين عن الخبز في الليل ....

* اذا حسيتي باليوع بعد العشا خذي سناك صغير من الفواكه او الخضار قليلة السعرات الحرارية: مثل الفراولة ، الصنطرة ، اليح ، الجزر ، الخس الخ

* حاولي تشربين لتر و نص ماي يوميا يعني غرشة مسافي من الكبار
* لازم تمشين يوميا ساعة متواصلة مشي سريع و ظهرج مستقم و اشفطي بطنج على داخل لأنه بهالطريقة بتمرنين عضلات البطن و انتي تمشين
* كلي الاكل ببطء و اشربي كوب من الماي قبل الاكل مب اثناءه و لا بعده
* شي كتب يحطونلج فيها نوع الاكل و كم سعرة حرارية فيه عشان تعرفين تحسبين بالارقام و ما تزيدين عن الحد المسموح ،،
مثال: كتاب >>> ألف باء الرجيم و التغذية الصحيحة ‘ مايا نوك بركات
انا ماخذتنه من كارفور
اذا انتي كلتي في وجبة وحده دجاج مشوي مع عيش و سلطه و تفاحه
مكتوب ان حبة التفاح فيها 50 سعرة حراريه
100 جرام دجاج مشوي 300 سعرة حرارية
100 جرام ارز ابيض 90 سعرة حرارية
=440 سعرة حرارية
و انتي لازم ما تاكلين اكثر من 1500 سعرة حراريه في اليوم عشان ما يزيد وزنج

فهمتوا الفكرة يا حلويييييين؟؟

اتمنى اني كنت واضحه و اسمحولي اذا طولت عليكم ..و
اي استفسار انا حاضرة عزيزاتي .....

ابا اسمع آراءكم و تجاربكم و تعليقاتكم .......

و لا تنسونا بصالح الدعاء

المزيد من آخر المواضيع من نفس القسم:

**لولو المزيونة** · 2008-05-20, 02:49

مشكورة وجزاج الله ألف خير الغالية

**pumpkin** · 2008-05-20, 02:59

اشكرج على المرور و ان شاء الله يفيدج الموضوع

**ssoo** · 2008-05-20, 03:15

مشكورة معلومات واااااااايد مفيدة بصراحة....

تسلمين الغلا الله يعطيج العافية....

**الفراشهـ** · 2008-05-20, 03:22

سلمتي اختي ع الطرح

**pumpkin** · 2008-05-20, 18:17

يسلم غاليج و مغليج مشكورة الغالية على المرور

**pumpkin** · 2008-05-20, 18:19

المشاركة الأصلية كتبت بواسطة الفراشهـ

سلمتي اختي ع الطرح

يسلم غاليج و مغليج عنوني

**!!قلب طفل!!** · 2008-05-20, 04:13

ماشاءالله عليج أختي .. ماشاءالله تبارك الله ..
عقبااااااااااالي يارب أنزل هالوزن اللي فوووقي ^_^

بس فديتــــــج .. كم الفتره اللي نزلتي فيهاااا ..؟؟؟؟

**pumpkin** · 2008-05-20, 18:15

المشاركة الأصلية كتبت بواسطة !!قلب طفل!!

ماشاءالله عليج أختي .. ماشاءالله تبارك الله ..
عقبااااااااااالي يارب أنزل هالوزن اللي فوووقي ^_^

بس فديتــــــج .. كم الفتره اللي نزلتي فيهاااا ..؟؟؟؟

انا بديت شهر 10 و استمريت عليه 6 شهور تقريبا .. و قفت فترة لظروف معينه و الحينه راده و بقوة عشان اخسر ال6 الباقيين

و عقبااااالج عنوني و ان شاء الله تبشرينا قريب

**كتكووتة** · 2008-05-20, 04:24

الله يوفقج و تكملين مشوارج.. عقبالي

**pumpkin** · 2008-05-20, 18:20

المشاركة الأصلية كتبت بواسطة كتكووتة

الله يوفقج و تكملين مشوارج.. عقبالي

آمين و يوفقج و يوفق الجميع و عقبال ما تبشرينا قريب

**وسنْ** · 2008-05-20, 06:47

كلام قيم جدا ..

**أسومي** · 2008-05-20, 08:44

هذا هو النظام الصحي لمدى الحياة
لا أدوية لا حرمان لا تعذيب

أنا جربت نفس النظام اللي اتبعتيه تقريبا
ونزلت 18 كيلو
وزني كان 93 والحين الحمدلله 76
وناوية انزل 10 كيلو بإذن الله

يعطيج العافية يالغالية
والله يسعدج ويوفقج ويعطيج اللي في بالج
^_^

**pumpkin** · 2008-05-20, 18:25

المشاركة الأصلية كتبت بواسطة أسومي

هذا هو النظام الصحي لمدى الحياة
لا أدوية لا حرمان لا تعذيب

أنا جربت نفس النظام اللي اتبعتيه تقريبا
ونزلت 18 كيلو
وزني كان 93 والحين الحمدلله 76
وناوية انزل 10 كيلو بإذن الله

يعطيج العافية يالغالية
والله يسعدج ويوفقج ويعطيج اللي في بالج
^_^

فعلا الغالية كلامج صحيح انا ما خليت شي ما جربته و هذا الدايت اعتبره خلاصة كل تجاربي الطويلة مع الدايت و هذا هو النظام الوحيد اللي نفع وياي ..
و على فكرة انا لما بديت هذا الدايت كان وزني 93 بعد

و سبقتج يالله شدي حيلج و نلتقي عند خط النهاية لما نوصل الوزن المثالي

مشكورة على الدعوة الجميلة و ما اقولج الا آآآآآآآآآمين و لك مثل ذلك اسعدني مرورج
تقبلي تحياتي ..

**pumpkin** · 2008-05-20, 18:21

المشاركة الأصلية كتبت بواسطة وسنْ

كلام قيم جدا ..

اسعدني مرورج يالغلا

الموضوع: نظام PuMpKiN لخسارة الوزن

أدوات الموضوع

عرض

العرض المتطور