ممكن استفسار شوي ؟؟!!

[buss-girl]

السلام عليكم ورحمة الله وبركاته

خواتي انا فبالي مشروع محل شيل و عبايا ..

فالي تعرف او عندها خلفية .. كم تقريبا يكلف هالمشروع ؟

انا ابغي ابدأ صغيرة .. يعني اذا فتحته انا ضامنه شوية زباين ...

فممكن الي عندها علم تقول بكم تقريبا يكلف هالمشروع ؟؟

المزيد من آخر المواضيع من نفس القسم:

• ابا نصيحتكم ..
• سداد القرض ، القرض الشخصي ، تمويل المشروع.
• أطقم مواليد
• وين القى مخاوير جمله
• مشروع مختص بحقوق المراه
• تصميمات ڤلل و بنايات رائعة
• تاجرة جديدة تبغي فزعتكم
• فرصه عمل مميزه
• طلب من بنات العين
• كيف بدات بزنسي من البيت

[فولك دبي]

الغاليه التكلفه تعتمد على هل انتي بتعتمدين على معمل يطرز لج و يخيط لج
ولا انتي بتيبين عمالج و مكاينج؟

خبرينا و ان شاء الله نساعدج باللي نعرفه و بخبرات البعض

[اناناسة]

ربيعتي تقول اذا بتيبين عمالج طبعأ وااااايد بس ان بتعتمدين على احد المشاغل شئ ثاني

[buss-girl]

انا اعرف اصمم عبايا..

بس منو الي بيخيط مادري؟؟


انتوا شو تشوفون احسن اني اييب عمال بروحي ويا المكاين.. طبعا اذا يبت فالبداية ما بحط وايد 2 بالكثير ..

او اني اعتمد على مشغل يخيط ؟؟

لاني انا اصلا اذا بفتحه بفتحة في منطقة ما فيها وايد محلات ؟؟ وفيها محلات شوي بس مب لين هناك ؟؟

[اناناسة]

لا تيبين عمال

[buss-girl]

مادري بصراحة مايا فبالي قبل اني ما اييب عمال

احس احسن جيه و خاصة اذا فتحت محل تعرفون ايجار و رواتب العمال يعني اذا يبتهم بروحي وسويت فالمحل الربح بيكون اكبر لي من اني اروح لمحل ثاني...

مادري و الله الي عنده خبرة في هالشي ممكن يفيدني

[فولك دبي]

انا بعطيك راي و شوفي ان كان يناسبج...

بالنسبه للعمال.....حلو مثل ما قلتي هاتي لج عاملين...بس الاهم فيهم انهم يعرفون يقصون و يخيطون..يعني مب بس يخيطون عالمكينه...لانه شي عمال بس يعرفون يشتغلون عالمكينه و ما يعرفون يقصون..
هاتهم الاثنين يعرفون يقصون و يخيطون....يغطون مكان بعض اذا صار شي..
وهاتي وحده تاخذ القياسات..وتهتم بالفواتير..طبعا لازم انتي تشرفين عالمحل...
كل عامل تكلفة اقامته حسب دبي..6000 درهم..

عن الخامات تعاملي مع محلات الجمله او المصانع...انا عن نفسي اشوف محلات الجمله اوفر لانه الخامات المطلوبه اكثر شي معروفه صالونه رقم واحد و كريب سعودي و الشيل برج الامارات و دجى الليل و دبل ساري....
مثال طاقة برج الامارات عرض 44..لو بتقصينه وارين و ربع لكل شيله بتطلع لج 22 شيله طولها وارين و ربع وعرضها 22...قيمتها من 300 لين 350 درهم الطاقه..عند محلات الجمله..
وعقب ماا نشاء الله محلج يتوسع بشغله جيه تعاملي مع مصانع يوردون لج خامات بكميات اكبر..

بالنسبه للتطريز...تقدرين تتعاملين مع مشغل..او تيبين لج عمال يطرزون..واسعار المشغل للتطريز تتراوح من 100 لين 150 للشيله..حسب مساحة الشغل و كمية المواد المستخدمه و نوعها..وعقب ان شاء الله تيبين لج عمال خاصين فيج..
حتى ما يحتاج يطرزون في المحل...او الخياطه تكون في المحل...ترومين تستأجرين غرفتين في بيت قديم..يمكن تحصلين اجار الغرفه الف درهم في السنه..غرفه يشتغلون فيها و غرفه لهم...

وكبدايه ترومين تحطين مبلغ من 20 الف الى 40 الف للبضاعه .من طاقات العبي و الشيل ..والخيوط و الابر..واغراض الدايزاينات من دانتيلات وشرايط حسب الموديلا ت اللي صممتيها شو تحتاج...وتفتتحين بهم محلج..وتحطين راس مال 15 او 10 احتياط....وعقبها من يمشي المحل بتعتمدين على الربح ان شاء الله

مكاين الخياطه للعبايات..اسعارها من 2000 الى 4000 الاف هاتي مكينتين
وفي مكينه لخياطة اطراف الشيله قيمتها حوالي 2000 الى 2500 درهم

الديكور حسبي له من 30 الى 60...سوي ديكور بسيط لكن حلو....وعقب شوي شوي زيدي في الديكور من يتوسع شغلكم..

بتبقى عندج تكاليف اصدار الرخصه..تأكدي منها في الدائرة الاقتصاديه...وبيبقى ايجار المحل..
والاكياس الخاصه بالمحل و الفواتير هاي شوفي المصانع والمطابع بكم بتسوي لج...و كل شهر كم كيس بتحتاجون...
..

و يمكن اكون نسيت شي...وان شاء الله ان ذكرت بخبرج...والبنات اللي عندهن خبره اكثر بعد ان شاء الله ما بيقصرن

وبالتوفيق الغلا

[أم الـغـالـي]

تدرين الغاليه في شخص انعرفه شو سوى

بدى صغير وكان يشتغل صبي بمحل

وبعدها ياب له كم عامل واجهزه ودبر لهم مكان للشغل بدا شغله بالبيت وشوي شوي وقام يربح مبالغ حلوه

طبعا كان يشتري بالجمله فتطلع عليه الاغراض مب غاليه تكلفتها

الحين مشاء الله عنده محلات بمركز ساره وصحاري وكم مكان ومب بس عنده محل عبايات بعد صار عنده محل ملابس ..

[buss-girl]

فولك دبي

فديييت روحج ما قصرتي و الله .. نفعتيني و الله الكلام الي قلتيه يعني كنت عارفة نصه بس مادري كل شي كم يكلف وانتي ما قصرتي..

يطولي بعمرج ما قصرتي و نخدمج في عرسج ان شاء الله

وان احتجت شي ان شاء الله بسالج

................................



بنت الاياويد .. و الله احين شي الواحد يبدا صغير و يكبر شوي شوي ... وان شاء الله انه الله يفتحها علينا

...............................


ربي يعطيكن العافيه ...

[فولك دبي]

العفوا الغاليه

ولا شكر على واجب و نحن خوات و لازم نتساعد فديتج..

واذا في اي شي لا تترددين حبوبه

وبالتوفيق

[#ام خليفة#]

مشكورين عالموضوع الحلو وانشالله الفايده تعم عالجميع...