علاج mesoestetic للتقشير

**الدموع** · 2008-05-11, 15:15

السلام عليكم

الغاليات انا بديت اتعالج واخذ كورس لماركة mesoestetic
اعتقد لها اسم ثاني بعد وهو اميلان 2

المهم صارلي الحين من يوم الخميس بادية وحطيت الكريم البني يومين بس واشوف ويهي محمر وااااااايد ومتحسس ومب قادرة لا احط مرطبات ولا كريم اساس ولا شي شو الحل

والي صار لها نفس الشي تخبرني

المزيد من آخر المواضيع من نفس القسم:

**ashganah** · 2008-05-11, 16:43

هلا يالغالية
انتي من وين اشتريتيه وهو اسمه كوزمولان (رقم 1 و2 وكريم مرطب)و بكم خذيتيه؟؟

انا يالغاليه قبل سنه مسويتنه في كوزموسيرج(مستشفى تجميلي في العين) واخصائية تجميل كانت متابعة حالتي اولا سوتلي رقم 1 وهو قناع سائل واتخليه يوم كامل او 12 ساعة مب متذكره وعقب تغسلين ويهج بالماي فقط وبدون صابون وفي اليوم الثاني استخدمي رقم 2 على المناطق الداكنه من الوجه والرقبة وكريم المرطب واستخدميه كل مااحتجتي له
رقم 1 قناع مركز من كوزمولان ورقم 2 كريم مخفف من كوزمولان

التغييرات:
ومن ثاني يوم اتلاحظين ويهمج محمر ويحرق بس حرقان خفيف ووعقب 3 الى 5 ايام يبدا ويهج يتقشر لان القناع المركز يقشر الطبقة الاولى من البشره وتبدا تظهر الطبقة اليديده وبتم ويهج محمر يمكن اسبوعين وكانج ماخذه حمام شمس قوي بتحتاجين للمرطب وايد

واتحذري اتقشرين ويهج هومن نفسه بطيح وطبعا ممنوع تظهري على الشمس الا للضروره وممنوع كريمات اوصوابين معطره.

والنتيجة اكثر من رائع كان عندي اثار حب شباب والصراحة ارتحت منها وبشرتي استوت ناعمه وملساء.

**الدموع** · 2008-05-11, 17:49

هلا الغالية انا ما اشتريته لاني خذته من عند الدكتور الي اتعالج عنده وهو عطاني اياها وغالي بصراحة
وانا بشرتي صافيه لكن كنت اعاني من البهتان في الويه وشاحب وهذا غير ان في لون داكن في اجزاء من الويه

بقولج عن الي صار لي

اول شي سوالي قناع وخلاه مدة يوم كامل وقالي اليوم الثاني تحطين الكريم البني اميلان 2
وترقدين لين الصبح وتغسلينه ومعطني صابون خاص وكل شي من الماركة

اول يوم احمر شوي ثاني يوم ييت وحطيت الكريم ونفس الشي احمر لكن تقشر بسرررررررررررررررررررعة وخفت صراحة وعقب تم ويهي جنه محروق محمررررررررررررررررررر وااااااااااااااااااااااايد واي شي احط عليه يحرقني سواء مرطب او كريم اساس او اي شي ثاني
وعب عطاني كريم مرطب من نفس الماركة وقالي استمري عليه الحين

وقالي عقب يومين ابتدي حطي صوب الخد والجبهه واليوم الي عقبه حوالي الشفايف
لكن تبين الصدق خايفه يرد يقشر مرة ثانية مب ناقصة لانه واااااااااااااااااااااايد يعور وصدقج جني حاطه ويهي في ماء حار ومنصلخة

**الدموع** · 2008-05-11, 17:50

الغالية خبريني يوم ويهج كان محمر هل استمريتي وحطيتي الكريم البني
وهل كان يحرق بعد لان البشرة الحين حساسة

**"زوزو1"** · 2008-05-13, 12:41

اختي ashganah ممكن بكم سويته الله يخليك ومين الدكتورة اللي سوته لك بالعين ؟؟؟؟؟؟؟؟

**ماما فاطمة** · 2008-05-13, 13:01

صح خبرينى الغاليه وين في العين عند منو ....

**ashganah** · 2008-05-13, 19:50

هلا خواتي اسمحولي اتاخرت عليكم بس لاني ما ادخل النت كل يوم

المهم يالغاليات انا سويته عند الدكتوره كرستي بس هي الحين ظهرت من عند الكوزموسيرج وسوت لها عياده خاصه
وسويته تقريبا على 2500 او2700 ، ويهج تم يحرقج الين ما تظهر الطبقه اليديده ويوم بتستخدمين رقم 2 ركزي على المناطق الداكنه وابعدي عن حولين الشفايف و العين والرقبه اذا هي وايد تتقشر عندج ورقم 2 تقشيره اخف من رقم 1 لانه مخفف واذا زاد التقشير ووصل لدرجه التجريح لا اتسوي رقم 2 عليه واستخدمي الكريم المرطب كل ما حسيتي ان ويهج جاف او يحرقج واي استفسار حاضرين
واسمحولي على التاخير

**ولوف** · 2008-05-13, 20:02

التقشير يبيض ولا بس يطلع بشره صافيه ؟

**ashganah** · 2008-05-13, 20:06

وايه اختي دموع فديتج كملي العلاج واستخدمي رقم 2 على المناطق الداكنه مثل الخدود واليبه واي مكان بويهج محتاج تقشير اكثر وابعدي عن اي كريمات غير كريم الترطيب من الماركه نفسها ولا تستخدمي كريم اساس لمده شهر الا للمناسبات وبيني بينج لو اتحطين كريم اساس ينبان البشره متقشره اكثر وعسب لاتتهيج بشرتج نصيحه مني ابعدي عن اي كريمات غير رقم 2 كل يوم الليل والترطيب لمده شهر عسب اتحصلي احسن نتيجه بشره ملساء وصافية ويرجع لونج الطبيعي وخدود ورديه ... والاهم اتحافظون على بشرتكم عقب ماينتهي العلاج يعني لا اتكثري من كريم الاساس الا للمناسبات واستخدمي كريم اولاي التوتال افيكت كريم النهار بحماية15 وكريم الليل قبل النوم وعلى وقت المغرب سيرم لتجديد البشره ولوشن البشره. ملاحظه اذا انتي تستخدمين كريم مختلف واتحسينه اوكي تمي عليه لان مب كل الكريمات تنفع لكل الناس وبس هذا اللي نصحتني به خبيره التجميل ان مجموعه التوتال افيكت من اولاي عطى نتايج رايعة على مجموعة مختلفة من البشرات. واي وحده حابة رقم الدكتوره كرستي بطرشلها على الخاص لاني وايد ارتحتلها.

**ashganah** · 2008-05-13, 20:33

وللمعلومه خواتي وحده سالتني عن الفرق بين الكوزمولان والاملان:

هلا يالغالية تبين نصيحتي من تجربتي الدكتوره اللي سويت عندها كانت عطتني بس تكلفة المنتج مع ربح بسيط لها مثل ماقلتيلي في الكوزموسيرج يسوونه 4000 وهي عندها اتسوي 2700 وحلو انها اتتابع حالتج لان سبحان الله اتحسس بشرتج بتلحق تنصحج وفي فرق بين الكوزمولان والاملان اثنيناتهم تقشير بس الكوزمولان تقشيره اخف من الاملان ومن تجربتي الكوزمولان بروحه قوي فما اتخيل كيف بكون الاملان؟؟
واذا حابه بعطيج رقم الدكتوره واساليها وعادي اتزورينها بس للاستفسار وبتخبرج شو بشرتج محتاجه وكم التكلفه وبتخبرج عن كل شي بدون ماتدفعين ولا فلس الين ماتبدي العلاج وهي بعد بتخبرج نسبة نجاح العلاج لبشرتج يعني مابتقولج والله بتغدين بيضه او بدون اي نقطه لا بتكولج مثلا العلاج بفديج بنسبه 80 بالميه و تعجبني صراحتها.

**ashganah** · 2008-05-13, 20:42

اختي ولوف
العلاج يعيد لون بشرتج الطبيعي يعني يشيل تاثير اشعة الشمس والكريم اللي اتحسست بشرتج منها يعني تبقعات واسمرار وبهتان لون بالشره اثار حب الشباب والكلف بالاختصار يعيدلج لون بشرتج الطبيعي.

**"زوزو1"** · 2008-05-14, 09:10

المشاركة الأصلية كتبت بواسطة ashganah

وللمعلومه خواتي وحده سالتني عن الفرق بين الكوزمولان والاملان:

هلا يالغالية تبين نصيحتي من تجربتي الدكتوره اللي سويت عندها كانت عطتني بس تكلفة المنتج مع ربح بسيط لها مثل ماقلتيلي في الكوزموسيرج يسوونه 4000 وهي عندها اتسوي 2700 وحلو انها اتتابع حالتج لان سبحان الله اتحسس بشرتج بتلحق تنصحج وفي فرق بين الكوزمولان والاملان اثنيناتهم تقشير بس الكوزمولان تقشيره اخف من الاملان ومن تجربتي الكوزمولان بروحه قوي فما اتخيل كيف بكون الاملان؟؟
واذا حابه بعطيج رقم الدكتوره واساليها وعادي اتزورينها بس للاستفسار وبتخبرج شو بشرتج محتاجه وكم التكلفه وبتخبرج عن كل شي بدون ماتدفعين ولا فلس الين ماتبدي العلاج وهي بعد بتخبرج نسبة نجاح العلاج لبشرتج يعني مابتقولج والله بتغدين بيضه او بدون اي نقطه لا بتكولج مثلا العلاج بفديج بنسبه 80 بالميه و تعجبني صراحتها.

مشكورة الغالية وماقصرتي

واليوم عندي موعد عندها

الله يوفقك

**chocolate.coffee** · 2008-05-19, 00:08

ببنات اي مشكلة تواجهونها اثناء التقشير لا تترددون و اسألوا الدكتورة نفسها و هي اللي نتفيدكم

الموضوع: علاج mesoestetic للتقشير

أدوات الموضوع

عرض