قصيدة التوطين

**المرحبانية** · 2008-04-18, 23:30

ما دري اذا مكان القصيده صح بس عجبتني وحسيت انها تتكلم عن واقعنا...

تو .. طين

وش عاد يا دار ٍ بها صار ( توطين )

و في مكتب التوظيف سوسن و ميسون !

مديرهم مدحت و نائبْته نسرين

و على الرسبشن حمّص و فول و زيتون !

كل ما اتصلت اسمع ( الو مرحبا مين ؟

بدّك وظيفه ؟ .. مين دلّك على هون ؟ )

اقول انا لي اتصل صار شهرين

و انتوا وعدتوني متى بس توفون

اسمي ( مواطن ) ( جامعي ) طيب و زين

كني ابخطب عندكم و اتّغلون !

عندي شهاده طايحه بجبدي سنين

عشش عليها شي له ستة عيون !!

لو للشهاده لسان قالت ( على وين

ناوي توديني .. تلف فيني الكون ؟ )

من كثر ما صورتها غارق بدين

للهندي راعي المطبعه صرت مديون

لا ليلي ليل ولا نهاري نوى يبين

دقيت راسي لين ما صرت مينون !

مطلوب خبره عالأقل في مجالين

ولا تجينا بواسطه و سير مدهون !

ولا انثبر في بيتك .. افرك بكفين

يومك يشابه امسك و عيش مغبون

تعدادنا ويّاهم اربع ملايين

و اهل البلد للحين ما صاروا مليون !!

ويلاه من باكر اذا وضعنا الحين

و احنا اقل من الربع حالنا شجون !

و اللي ابتسم له حظه والله مسكين !

حصّل وظيفه .. بس في وين .. تدرون ؟

ساكن في راس الخيمه .. حطوه في العين !!

و اللي سكن في الذيد .. في السلع مدفون !!

يشوف اهله بس في الأسبوع يومين

و اذا حسبتوا الدرب كم ساعه .. تبكون

يعني في كل احواله ذاق الأمرين

شغّال محزون و بلا شغل محزون

و الأجبني اللي راتبه فوق عشرين

فله و سياره و تذاكر .. و طاعون

عنده بدل كل شي عالراتب الفين

حتى بدل معجون اسنان و صابون !

و من بعد ما يجمع من بلادي فلسين

و يربّي م القعده على الكرسي بطون

و يصير في بلاده غني و عنده برجين

يرحل و هو جاحد .. و كم مثله ملعون !

و حتى الجماعه قوم مدحت و نسرين

مردّهم لبلادهم لو يطولون

يرضون بشوية دراهم .. و شفتين

صبح و عصر .. لو حتى في الليل يرضون

بس لو سمعتوا همسهم بينهم بين

وسط القهاوي يلعنون و يسبون !

لا تحسبوني عنصري .. كلنا طين

و الخل لو عاتب محبينه يمون

داري و انا اولى بها من الغريبين

ما يوصلون لحبها لو يموتون

و ( الأقربون اولى ) .. كلام ٍ من الدين

ما جبته من شعري مع الهام و ظنون

ولد البلد ما يبغي لبلاده الشين

بالروح بالدم يفتديها ولا يخون

لكن سؤاله يوم قلتوا له ( توطين )

يا كيف بيد الغرب توظيفه يكون ؟؟!!

شعارهم معروف ( راجعنا بعدين )

و باين من التأجيل .. انهم يخافون

اذا معك خبره .. يا اهلين و سهلين

و اذا شهاده بس .. عنك يصدون

ما عندنا شاغر .. و بطلنا تعيين

ولو تحرق الهاتف ترى ما يردون !

من وين اجيب الخبره ؟ من وين من وين ؟

دام الوظيفه عند سوسن و ميسون !

عندي بمطبخ بيتنا خبره سنتين !

تنفع اذا صاروا المطاعم يوطنون ؟؟!

ولا اهاجر و آخذ الخبره في الصين ؟

صح العيون صغار .. لكن يقدْرون

سؤال يا دار ٍ ..صراحه بترضين ؟

اني اسافر و اطلب الغرب لي عون ؟

و سؤال يا ناس ٍ على الراس و العين

صدق الوظايف واسطه و سير مدهون ؟

اما الجواب الشافي يجيني الحين

او هاتوا تأشيره .. اذا كنتوا ترضون !

الشاعر: ساقي الشوق

منقووول

المزيد من آخر المواضيع من نفس القسم:

**ما ياست** · 2008-04-18, 23:46

اسميه ساقي الشوق جابها صح في الصميم
صح ثم صح ثم صح ثم صح لسانه
الله كريم

**الظاهريه** · 2008-04-19, 04:22

بصراحه صدق في كل كلمه قالها .....

والله يعينا يارب وتفرجها لنا ونتوظف ....

وتسلمين اختي ...

**جواهر الصحراء** · 2008-04-19, 09:41

روعه القصيده وصح لساااااااااااااااااااااانك يا الشاعر ، فعلا تعبر عن واقعنا ، الله يعين بس

**اقتصادية** · 2008-04-19, 09:48

الله يعينا هذا ترا واقعنا المر
ومشكوووووووووووووورة الغالية وصح لسان الشاعر

**The_Lady** · 2008-04-19, 11:15

صح ألسانه

كفى ووفى

**المرحبانية** · 2008-04-19, 22:27

مشكورات خواتي على المرور

**Am Ham00d** · 2008-07-10, 05:31

صح إلسان اخوي العود ساقي الشوق ولا عدمنا شعره ادعو له الله يوفقه في دراسته ويرجع لنا من استراليا طيار يرفع رأسنا ورأس الامارات ويحقق حلمه في الطيران قولوا امين

**الطيوح** · 2008-07-10, 05:39

صح السااااااااااااااااااااااااااااااااااااااااااااااا ااااااااااااااااااااااااااانه الشااااعر

**pink 7** · 2008-07-16, 23:49

صــــــــــــــــــــــح لســـــــــــــــــــــــانـــــــــــــه

هــــذا واقــــــع الخليـــــــــــــــج كلـــــــــــه

**الـــدانه** · 2008-07-17, 14:45

كلمات معبرة ...............................
مشكورة حبوبه.....................

**Am Ham00d** · 2008-09-25, 05:38

مشكورين

**Am Ham00d** · 2008-10-04, 06:57

آمين مشكوره

**Am Ham00d** · 2008-10-05, 09:41

تصحيح غرور القصيده للشاعر ساقي الشوق

**sheery** · 2008-10-11, 09:44

موفقه ويعطيكي الف عافيه

الموضوع: قصيدة التوطين

أدوات الموضوع

عرض

قصيدة التوطين

المزيد من آخر المواضيع من نفس القسم:

المواضيع المتشابهه

اكتبي قصيدة و اهديها لشخص معين....>> انا كتبت قصيدة" ناعم المزايا"

قصيدة القناااااااااااااع أجمل قصيدة قريتها

التوطين وين

التوطين ....