موانع الحمل

**راجية_عفو_ربها** · 2008-04-18, 02:27

مرحبا الغاليات

حبيت افيدكم واستفيد منكم من تجاربكم في هالموضوع وياريت اللي عندها خبره ماتبخل علي بالرد

الحمد لله بعد ما الله رزقني بولدي وهو أول بيبي لي الله يحفظه قلت بستخدم مانع لأني أخاف أحمل وولدي بعده صغير

أول مايتني الدورة عقب الأربعين سرت في اليوم الخامس مستشفى الكورنيش وقلت حق الدكتوره إني ابا اركب لولب

قالتلي انتي بجر وأنا ما انصحج تركبين لولب لأنه يسوي مضاعفات حق الحريم اللي عندهم بيبي واحد بس يعني البجر

قالت ممكن يسوي انقلاب في الرحم ونزيف وعقم وكلام وايد يزيغ... قالتلي دام انتي ترضعين خذي حبوب منع الحمل الخفيفه ومن تبتدين ادخلين أكل ويا الحليب حق ولدج تعالي بغيرلج الحبوب

طبعا أختكم خذت الحبه أول يوم ونستها ثاني يوم....... يوم شفت عمري جيه عقيت الحبوب في الزباله وقلت مافيني بعد ايلس يوم اتذكر ويوم انسى واتفاجأ إني حامل

يوم كمل ولدي 4 شهور استخرت اركب اللولب ولا لا وسرت عيادة زينب الشنار وقلتلها بركب لولب........... قالتلي اسمحيلي حبيبتي أنا ما اركب لولب لأنه يسوي وايد مشاكل وأنا اعرف حريم صارلهم 7 و8 سنين ماحملوا وماعندهم إلا بيبي واحد والحين يتعالجون عسب يحملون!!!!!!!!!!!!

وتقول آخر وحده ركبتلها لولب حملت عليه وسارت المستشفى والله ماذكر أي مستشفى وقالولها إنهم شلوا اللولب بس عقب الولاده تمت دوم تحس بألم في بطنها يوم سوت اشعه اكتشفت إن اللولب طلع من مكانه ودخل في معدتها....... أقسم بالله إن هذا كلام الدكتوره بالحرف الواحد......... عقب سوولها عمليه وظهروه.......... تقول من يومها ما اركب لولب مول

وعلى قولتها كل شي زين ومو زين:
1) اللولب: يسوي مشاكل ونزيف وعقم وفوق كل هذا الوحده ممكن تحمل وعقب صعب يظهرونه
2) الحبوب تأثر على نفسية الحرمه وممكن تسبب زيادة وزن وإذا نسيت تاخذينها في موعدها تكون نسبة الحمل كبيره
3) إبر منع الحمل تاخذينها كل 3 شهور وهالإبر الدكتوره زينب كانت تستخدمهم عسب ماتحمل وتقول إنها استخدمتهم مدة 15 سنه وماحملت مول بس مشكلتهم إنهم يخربون الدوره يعني عادي اتييج الدوره 20 يوم كل شهر
4) منع طبيعي (وهذا اللي أنا ماشيه عليه) تقول هذا أحسن شي بس شي رياييل مايستحملون

قالت فيه تحاميل تستخدمينهم قبل الجماع تقتل الحيوانات المنويه عسب مايستوي حمل بس أنا مايربتهم

اللي عندها خبره تفيدنا......... صح إني ماشيه على المنع الطبيعي وولدي كمل 6 شهور والحين فيني الدوره بس أخاف أحمل لأن وايد حملوا ع المنع الطبيعي

اتريا تجاربكم
وفي أمان الله

المزيد من آخر المواضيع من نفس القسم:

**وهج بوظبي** · 2008-04-18, 03:03

هلا الغاليه

بالنسبه للمنع الطبيعي انا الغاليه ما ناسبني لاني حملت عليه

والحبوب بالنسبه لي الغاليه سوت لي نزيف مستمر ما ناسبتني ابدا

واللولب بعد ما ناسبني لانه سوالي بعض التهابات

وسبحان الله كل وحده ونصيبها في هالدنيا

والله كريم

**راجية_عفو_ربها** · 2008-04-18, 03:29

وهج بوظبي
مشكورة فديتج ع الرد
الله المستعان الوحده ماتعرف شو تسوي بعمرها
أنا إذا الله كتبلي وحملت ماعندي اعتراض على هالشي
بس التنظيم وايد مهم وضروري وماشي فايده اليهال ايوون كلهم ورا بعض عسب جيه يالسه ادور حل مناسب

**um_tootah** · 2008-04-19, 19:52

حبيت اشارك وياكم خواتي من خلال تجربتي انا عقب حملي الاول منعت طبيعي بس الريال ما يقدر يتحمل هالشي فتره طويله وانا كنت اخاف انه يخرب في يوم من الايام واحتمالات الحمل كبيره في هالطريقه لأنه وايد اللي حملوا منها.

ألحين عقب حملي الثاني ناويه اتوكل على الله واحط لولب لأنه اضمن طريقه بإذن الله ووايد اللي مركبينه ومرتاين وياه صح انه لبعض الناس يسوي التهابات او الدوره اطول ووحده قالت لي بعد ممكن يسبب في حمل خارج الرحم بس ما باليد حيله ما فينا على الحمل كله من صحة الحرمه. أنا بتوكل على الله وبحط من اظهر من الاربعين.

تحياتي ،،،

**العيناوية عنيدة** · 2008-04-19, 20:54

والله هااي مشكلتي انا بعد ولدي توها باقي له اسبووع وبيخلص الرابع وبيدش الخامس وانا مترووعة كل شهر والله اتريا الدورة وكل ما تتأخر يومين ربعت وسويت اختباار الحمل مب عاارفة شو اسووي والحين فيني لووعة ورااسي يعورني وخايفة اكون حامل ولا انها هااي اعرااض الدورة بعد لان هذا موعدها فمحتاارة والله ومب عاارفة شو استخجم عشاان امنع الحمل وهذا اول بيبي لي ما اريد اظلمه واحرمه من الرضااعة الطبيعية

**فطمطم** · 2008-04-19, 20:57

ان شاءالله يفيدوونج

**بهلولة** · 2008-04-19, 21:01

الله يعينا يا خواتي...توني عرفت ان هاذي مو معاناتي بروحي(الحمد لله)...المهم انا في البداية جربت الطبيعي..بس ريلي مارام يتحمل...ومشيت على الحبوب...وايد حبيتها...وماشيه معاي اووووووووووووووكي....والحين صارلي تقريبا سنتين ماشيه عليها...وناوية احمل مرة ثانيه....ولو حملت مره ثانيه وربيت ....بمشي على الحبوب

**دمووووع** · 2008-04-19, 21:16

هلا اختيه
مشكوره على موضوعج المفيد بصراحه

مادري شو اقولج ....بالنسبه للمنع....بس دام الدكتوره خبرتج بسلبيات كل واحد ليش تعقين عمرج فشي انتي فغنى عنه

بصراحه انا ما اييد اي نوع من انواع المنع...ما احب الحبوب..واخاف من اللولب...الابر بلاويها اكبر من نتايجها...وللعلم اربيعتي حملت وكانت مستخدمه الابر...كيف لا تسأليني لاني ما اعرف ..!!!
مع انها اتقول انها ملتزمه بالمواعيد...بس سبحان الله ربج كاتب الها تحمل..

انا عقب بنوتي الاولى ...كنت امنع طبيعي ..وبصراحه لو مشيتي على حساب ايام التبوييض ..بيساعدج واايد..
الحمدلله كملت بنتي سنتين ونص والحينه حامل.. والله يعينا

مع اني كنت اتمنى احمل قبلها بكمن شهر ...بس سبحان الله قبل كنت امنع وما حملت ..ويوم بغيت احمل ربج ما راد ..طلع عندي تكيس ومنعني من الحمل ...بس الحمدلله تعالجت لمدة شهرين وعقبها حملت...

قولي الحمدلله على النعمه اللي انتي فيها...ترى الانسان طماع بطبعه..اللي ما حملت تبا تحمل ..واللي ما عندها مشاكل ما تبا وتمنع..قولي الحمدلله واللي الله كاتبنه لنا بناخذه...

يالله انك ترزق كل محرومه يارب ... وتفرحها بشوفة ظناها فحظنها

وتعين كل حامل ..وتقومها بالسلامه ..وتفرحها بشوفة ظناها

تحيتي

**حراااير** · 2008-04-20, 23:39

هلا الغالية حبيت اشارك في الموضوع لان بصراحه وايد مفيد وفي معلومات وايد تنفعنا وعندي معلومات يمكن تنفعكم انا صراحة بعد حملي الاول ما استخدمت موانع جربت الموانع الطبيعية وبعد ثلاثة اشهر حملت خارج الرحم وصارت لي بلاوي وبعدها الحمدلله هرمون الحمل بدا ينقص لين صار صغير ومات وانتهت المشكلة وبعدها سرت حطيت لولب وكان كل شي اوكي لين صارعمر ولدي سنة وثلاث اشهر فكيتة وبعدها على طول حملت
بعد الحمل الثاني استخدمت حبوب منع الحمل 3 اشهر فانقطعت الدورة وحسيت اني مضايقة فركبت لولب مره ثانية وخليتة لين صار عمر ولدي سنتين وقررت افكة بسسسسسسسسسسسس قبل ما افكة بشهر حملت مرة ثانية حمل خارجي بس هالمره كان وايد غير لان سويت عملية وشلولي واحد من انابيب الحمل والحين انا بانبوب واحد وبعدين حملت للمرة الثالثة وربيت والحمدلله صار عمره سنة ومحتاره وايد لان الدكتوره منعتني من اللولب ومن الحبوب وسبحان الله انا اريد وانت تريد والله فعال لما يريد

**دلوعة حبيبي** · 2008-04-20, 23:52

**trtr** · 2009-04-29, 03:01

وانااااااااااااااااااااااااااااااااااااااااا دورولي حل وياكن بليز بين ماااااااااااريد احمل
جسمي مب متحمل الموانع ركبت الالولب وعقيته الصراحه متعب مووووووووون
والابره مستحيل افكر والحبوب لالالالالالالالالالالالالا ماناسبني وبمووووووووت من الخوف كل 10 ايام افحص تتخيلون ... والله بموت لان بنتي صغيره وعندي ولد ماكل السنتين وماقدر احمل اريد اربيهم والله صغار...

**قمر بدر** · 2009-04-29, 10:19

أنا من تجربتي بعدلدى الأول استخدمت حبوب لمدة سنتين بعد السنتين ودرتها وتميت خمس شهور وبعدها حملت بولدى الثاني وبعد ولدى الثانى استخدمتها بعد سنتين وبعد السنتين ودرتها وتميت ست شهور والحين أنا حامل بولدى الثالث وبعد برد استخدمها بس إلا مب متعود إني ياخذذ حبوب ما انصحه لانها أنا بنسبالي واااااااااااااااااااااااااااااااايد متندني صرت دبه منها وبهد السنه والنص أتيينى آلام في رأس فضيعة كلها من الحبوب أنا ناوية أغير بعد ما ابربي بولدى هذا ابغي استخدم اللولب بس وايد خايف أحمل عليه صح أني بموووووووووووت خاطري ببنوته لان بيسير عندى إنشاء الله 3 أولاد وبموت خاطري ببنت الحمدلله اللهم لا اعتراض بس ما ابغي أحمل قبل ما يكمل ولدى على الأقل سنه ونص أنا بين كل عيالي الثالث 3 سنين و3 شهور فرق وتحياتي

**شهدات** · 2009-04-29, 10:42

اممممممممممم انا بالنسبه لي اكره اللولب مووووووووووووووووووت مووول مادانيه من السمعته عنها استخدمت الحبوب بس عشان الوقت كنت حاطه منبه التلفون حسب ينبهني للوقت والحين وقفتهم لي شهر بنتي عمرها سنه وعشره شهور والحمد لله مامتنني وماحملت عليها وارتحت فيها نفسيا الحين يوم احمل ان شاء الله مره ثانيه برد استخدمهن نفسهن

**راجية_عفو_ربها** · 2009-05-30, 12:53

مشكورات ع المرور
أنا استخدمت المنع الطبيعي لين ماكمل ولدي سنه وشهرين وعقب تركته لأني كنت ابا احمل والحمدلله حملت عقبها بشهرين وبإذن الله بستخدم هالطريقه عقب ماربي لأن هالطريقه اريح شي وأحسن من الأدويه وبلاويها والله يسهل ع الجميع

**عيوز مرتبشة** · 2009-05-30, 13:20

هلا أختي
انا اسوي منع طبيعي بس انا اخاف من الحمل الاني والده قيصري ثلاث مرات. هذي المره استعملت لزقه تمنع الحمل اخذتها من مستشفي زليخه

الموضوع: موانع الحمل

أدوات الموضوع

عرض