أنا أنثى

[Dominique]

قصة قصيرة من جزئين من كتاباتي الخاصة

بليز اللي بتنقلها لموقع ثاني تكتب اسمي عليها


أنا أنثى


الجزء الاول



لا مارحت اليوم بيت خالتي..
صايرة مالي خلقهم.. من اقعد معاهم احسهم يشتغلون نغزات علي
مادري ... قلبي قارصني
ابراهيم صارله جم يوم مو على بعضه متضايق من شي بعد عمري وموراضي يتكلم ولا يقول شفيه

......................................

حاولت سلمى حاولت اساحله
اسحبه بالحجي موراضي ينطق

انا خايفة ان خواته الساحرات قاعدين يشيشونه علي
مع اني متطمنة من ناحيته..
صج بالاول يوم عرفنا اني ما اييب عيال كنت خايفة انه يتزوج علي خصوصا انه ابراهيم الولد الوحيد بالعايلة ولازم اييب ولد يشيل اسمه
لكنه قالي انه راضي بقسمته ويكفي انه معاي..

بيني وبينج انا بعد فترة حسيت اني انانية فقلتله يطلقني ويتزوج

........................................

اي والله بعد شسوي
يومها تهاوشنا هوشة وصلت للسما وصكني كف والله للحين احس فيه **

ابراهيم : (( لوعدتي هالموضوع مرة ثانية ماتلومين الا نفسج فاهمة!! انا ماتحديت اهلي كلهم وخذيتج عقب معاناة انتي ادرى فيها علشان اطلقج الحين باردة مبردة!!
قلتلج انا راضي بقسمتي وهذا اللي الله كاتبه لي
واهلي اذ موعاجبهم عندهم بدل الطوفة عشر يطقون راسهم فيها لين يرتاحون ))


سلمى ادري انه يحبني ويموت فيني، شرايج يعني؟؟ 3 سنين واحنا نحاول باهله علشان يرضون نتزوج وبالاخير اطلع عقيم !!!

.....................................

مادري سلمى مادري شبسوي..
اخاف افتح هالموضوع يصكني كف ثاني واخاف اسكت واسوي روحي موشايفة حالته يقوم بفكر اني بديت اهمله.

دخل ابراهيم الشقة ونادى فاطمة :

فطوم !!

فاطمة : سلمى خلاص اكلمج بعدين.. ابراهيم وصل..
سلمي على امج وخواتج اوكي..
يالله مع السلامة .

ها حياتي وصلت.. تغديت ؟

ابراهيم : لا والله ماتغديت، انتي تغديتي ؟
فاطمة : وانا تهنالي لقمة بدونك، شربت جاي وكليت بسكوت، عيل خل اسوي غدا خفيف .. ماراح اطول

ابراهيم : لامو مشتهي، تعالي ابيج بسالفة .

حست فاطمة بصاعقة ستحل، اسلوب ابراهيم اربكها
يتكلم بضيق وجدية، قالت في نفسها :
الله يستر .

فاطمة : خير انشالله، شكلك متضايق، صار شي ببيت خالتي ؟

ابراهيم : تعالي قعدي .

جلس على الصوفا واجلسها بجانبه ..وبادر :

فطوم حبيبي ماراح الف ولا ادور.. والله يشهد اني شكثر متضايق من اللي بقوله ومن الي بيصير

فاطمة ارتجفت اوصالها وبحلقت بعينيها ودقات قلبها تتسارع

ابراهيم : اليوم امي لزمت علي اتزوج

شهقت فاطمة بقوة واضعة يديها على صدرها

ام ابراهيم : (( والله ثم والله
واللي ماخلق فيني قلبين اثنين
لوما عرست هالسنة
لانت ولدي ولا اعرفك وبرية منك ليوم الدين
لاتقول امي بيلين قلبها
بتزعل يومين وترضى بعدين
لا
مو آنا اللي يلين راسها عن شي صح ومفروض يصير من زمان انت فاهمني
اص ولا كلمة
مابي اسمع رد ولا جواب
ابي تنفيذ وبس تسمعني
يالله.. روح حق مرتك المصون وبلغها الخبر وابي ردك اليوم بالليل عشان اخطبلك عهود بنت خالتك
ماراح نلقى احسن منها اصل وفصل وجمال عشان تصير ام عيالك
موضروري تحبها
ييب منها عيال وبس
ولا تبي الحلال بعد عين ابوك يروح لانسباك الطماعين ؟؟ ))

فاطمة : خالتي شفيها علي؟؟ انا شمسويتلها علشان تكرهني جذي ؟؟
وانت ماقلتلهم شي؟
مارديت بشي؟
عاجبك كلامهم ؟

ابراهيم : شرد شقول؟؟
اقولج كلوني
ماخلولي مجال
استلموني قبل الغدا وتحدوا فيني كلهم
حتى ابوي اللي ولا عمره بطل حلجه بكلمه
صاف مع امي هالمرة وهدد يطردني من الشركة ويسجل الحلال باسم خواتي
فطوم حبيبي شسوي قوليلي، ماكو غير هالحل
ويلي ازعلج واضايقج
وويلي زعل اهلي
بلعنة الفلوس مابي الحلال

قاطعته فاطمة باكية :
وين كلامك عندهم بدل الطوفة عشر يطقون راسهم فيها؟
وين كلامك انك راضي بقسمتك؟
نسيت الكف اللي عطيتني اياه؟ نسيت
وصرخت :
نسيت؟؟؟

ونهضت من الصوفا واخذت تدور بالصالة كالمجنونة وتبكي :
انا شذنبي اني ما فيني عيال، ليش يبون يخربون بيتي
يعني مايرتاحون الا لما يحرقون قلبي

قال ابراهيم بنفاذ صبر : يابعد عمري قوليلي شسوي انا شبيدي
اقولج امي بتتبرا مني وابوي بيطردني من الشركة
اشق هدومي يعني

قاطعته باكية فاقدة اعصابها واخذت تتخبط بالكلام :
لاتحط اعذارك باهلك
قول انت اللي كنت تتمنى هاللحظة ولاجان عاندت مثل كلمرة
شمعنى هالمرة قنعوك

ابراهيم : فطوم انتي شقاعدة تخربطين

فاطمة : موقاعدة اخربط
انت اللي تخربط
كلككم تخربطون


يالله انك تاخذني وارتاح من هالهم

وانهارت على الصوفا مسندة رأسها على كفها الايمن محنية رأسها للاسفل تحملق بالسجادة و كأنها تراها للمرة الاولى ودموعها تنهمر بغزارة صامتة ساهية تبكي بصمت وتشهق

ساد السكون بينهما لفترة

اخذت تفكر في نفسها :

ياربي ليش انا ليش؟؟
اشمعنى انا من بد الحريم اللي يصير فيها جذي؟؟
انا شسويت بدنياي؟؟

اففففف ... استغفر الله العظيم ربي واتوب اليه
اعوذ بالله منك يابليس .. اعوذ بالله منك يابليس

هدأت نسبيا بعد مفعول الجملة السحرية استغفر الله العظيم ربي واتوب اليه
اعوذ بالله منك يابليس

وفكرت بتعقل :
ياربي مواعتراض على حكمك لكن قلبي محروق
فوق ماقلبي ناطف على ياهل اشمه واضمه هم ريلي يتزوج علي ؟!
ياربي اهوا بعد ماينلام
حتى لو اهله موضاغطين عليه
بييه يوم ويتمنى ياهل وبيسويها دوني وبلياي
مالازم اصير انانية جذي

اااااااااااه.

جلس ابراهيم بجانبها وقبل رأسها ومسح على شعرها الغجري وقبل كتفها الايسر مواسيا ومهدئا لحالها :

عمري .. انتي تدرين اني لايمكن ابدلج بحريم الدنيا كلهم
انتي عندي تسوينهم كلهم وانتي عارفة غلاتج عندي..

نظرت اليه بطرف عينها المغرورقة بالدموع

اكمل :

اذا عندج حل ثاني قوليلي
اللي علينا سويناه
اطبا ورحنا
طفل انابيب وسوينا
رحمج مايستوعب جنين!!
شنو الحل .

تسللت الدموع الحارة متخذة من خدها الغض مجرى لها واسندت ظهرها الى الصوفا مكتفة ذراعيها مغمضة عينيها تسمع كلامه بهدوء

تابع متألما بصدق :

انتي حبيبتي وعمري وحياتي
الود ودي ما اييب عيالي الا منج
لكن حكمة ربج وحكم اهلي
اتزوج وامري لله
على قولة امي : موضروري احبها
وايد ازواج عايشين حياتهم من غير حب
راح اعدل بينكم
انتي الاولى والاخيرة بقلبي وحياتي
ولو تبين
بس تييبلي الولد اطلقها على طول

التفتت اليه فاطمة مستنكرة :
لأ
واللي تبي تاخذها شذنبها تحرمها من ولدها
تبي تتزوج ماعندي مانع
طلقني وبعدين الله يسهللك
انا ماتنزل على راسي شريجة ( ضرة )

صدم ابراهيم وحملق فيها فاتحا عينيه اوسعهما وقال :

شنو؟؟
اطلقج؟؟
طلاق ماكو لو تحطين ريل بالسما وريل بالارض .

فقدت فاطمة اعصابها ونهضت من الصوفا وكتفت ذراعيها وادارت ظهرها
والله هذا اللي عندي
تبي اهلا وسهلا
ماتبي عند يدي اللي راح ولارد انت واهلك .

ابراهيم :هه!! فطوم؟!! شهالكلام
الحين انا اكلمج بهدوء
لو واحد ثاني جان سواها ولا سأل فيج ولا خذا شورج اصلا ولـ..

قاطعته مستديرة مواجهة له فاتحة ذراعيها اقصاهما صارخة :

لا سوها بعد سوها
خو انت تبيها من الله تستانس بمرة يديدة
واشارت باصبعها السبابة في وجهه :

والله.. والله لو سويتها مو محللتك لييما اموت فاهم!!! مو انا اللي تنزل على راسي شريجة

ابراهيم : ماراح اسويها شفيج انتي ينيتي !!
لو ناوي اسويها جان ماعبرتج ولا حتى قلتلج عن اللي صار ببيت امي
فطوم اهدي شوي

تأففت فاطمة بنفاذ صبر وكتفت ذراعيها ورفعت عينيها لأعلى :

افففففف
اللهم طولج ياروح
ياصبر ايوب

ابراهيم :

تعالي قعدي خل نتفاهم
قفلي قلبج شوي وفكري بعقلج
تراني موناقص هم
اللي فيني كافيني

وجلس والحسرة تقطر من فمه والعبرات تخنقه محاولا اقناعها بزواجه عليها واسبابه
وهي تسمع دون ان تنطق
الا من شهيق بكاء صامت ودمعات تقفز من محجريها الدامعين بين الحين والآخر

كانت تفكر بكلامه بهدوء لأنها تحبه وتتمنى سعادته
لكن عاطفتها كانت غلابة معظم الوقت

وبعد مايقارب الساعة ...

قال ابراهيم مقطبا جبينه حزنا على نطقه الكلمات محنيا رأسه لأسفل :
ها.. شقلتي؟ الليلة يبون الخبر


رمقته بطرف عينها المبللتين وشفتيها تتقوسان منذرتين ببكاء مكبوت

قالت بصوت متقطع ومبحوح :

موافقة
لكن بشرط
مابي اشوفها ولا اشوفك
تتزوجها وماتييني الشقة
املج عليها ومابي اشوفك 3 شهور
ولا ابيك تتصل فيني
3 شهور طس عن ويهي ولا تكلمني ولا ابي اشوفك
هذا آخر كلام عندي

ونهضت متجهة لغرفتها واغلقت الباب تاركة ابراهيم في حيرة من امره لقرارها

.
.
.
يتبع...



لا تلومونها

الشريجة تحر لوهي بالقبر

.
.
.

المزيد من آخر المواضيع من نفس القسم:

• الحكاية إنك أجمل من تفاصيل الحكاية
• مجموعة كتب لعميد الادب العربي : طه حسين
• سلسلة مؤلفات الروائية احلام مستغانمي
• لا يهمّ من لا يُذنب...
• أنا تراب...
• فالكاذب يكُنْ ما يريد ..!لعبدالحليم الطيطي
• هاتي جمالك...........لعبدالحليم الطيطي
• يممت الفؤاد
• الحُبّ ترينه إذا نزل...
• طريق طويلة جميلة،،لعبدالحليم الطيطي

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[بيض النوايا]

كمليهااااااااااااااااااااااا


والله القصه تجنننننننننننننن .................. ابراهيم كسر خاطري .. وهم سلمى اكسرت خاطري ماتنلام............

في انتظار البقية

[الياسية]

وايد حلوووة كمليهاا

[سراب الشارجه]

(((( يتبع ))))

متى بس متى لا تخلينا شرات اللي يتريا نتيجة فحص دم

اللي بالمنتديات واللي برع يعرفوني عجووووووله

[أم الخطاب]

بالانتظار

[Dominique]

الجزء الثاني والاخير








هلا سلمى

...................................

سلامتج...... وينج

باركيلي

يببي واللي يسلم عمرج يببي

....................................

واجهشت بالبكاء المرير :

ااااااااه ... الليلة عرس ابراهيم
الليلة دخلة حبيبي على غيري

واحتد نحيبها :

ااااااااه قاعدة اطبخ اطبخ
نضيت نضيت

.................................

موبيدي غصبا علي سلمى غصبا علي اااه
انشالله يارب ماتتهنى معاه ...
الله ينتقم من اللي كان السبب
حسبي الله ونعم الوكيل فيهم
انشالله كل وحدة شيشت ريلي يتزوج علي
ريلها يتزوج عليها ويقطع قلبها تقطيع

...............................

وين اهدا وييييييين اه ياقلبي
محروق سلمى محروق
ريلي بينام عند غيري
الله لا يهنيهم بهالليلة


وصمتت الاثنتان فترة حتى تهدأ فاطمة
وبعدها :
خلاص سلمى اكلمج بعدين
حاسة اني دايخة
صارلي يومين مونايمة
بروح انسدح شوي يمكن تييني النومة

...................................

صارله اسبوع من طلع من الشقة

..................................

لا ينام بيت ابوه

.................................

يدري اني ما ابيه جدامي عقب اللي مقرر يسويه

................................

ولو .. ولو
المفروض يداحرهم مو يوافق بهالسهولة

.................................

الله كريم

................................

الله يسلمج من الشر

...............................

مشكورة ماقصرتي اهوا قبل لا يطلع حاطلي مصروف بس انا ماطلعت من البيت ولا ابي اطلع

...............................

مالي خلق اشوف ناس ولاني مشتهية آكل شي كلش

...............................

امي؟؟ لا ماقلتلها
اللي فيها كافيها
جسوم النزغة بلاويه مكيفة فيها وموفية
الله يعينها على مشاكله
بعد أشيلها همي؟؟

.............................

أوكي

............................

الله يسلمج سلمي انتي بعد

...........................

مع السلامة
باي




انهت المكالمة والقت بنفسها على سريرها تارجحها الافكار والهموم
تمد يدها لتلامس وسادة خالية حضنت رأس زوجها وحبيبها يوما
تبكي بحركة
تتقلب بألم
تتنهد بحسرة ولوعة

مضى الوقت وهي لاتزال في الفراش تتقلب ولم تنم
قرصتها معدتها جوعا
فهي لم تذق الزاد منذ غادر ابراهيم الشقة.


نهضت من فراشها متكاسلة متثاقلة تحس بوهن عظيم بجسدها
ذهبت الى المطبخ لتحضير كوب من الشاي واخذت قطعتين من البسكويت .

استمر الحال بها من حزن وألم وقلة أكل ما يقارب الثلاثة أسابيع
لاتكلم أحدا
وكلما اتصل بها ابراهيم لاترد اغلب الاوقات
وان ردت كلمته باقتضاب وباسلوب جاف وتغلق الخط سريعا محذرة اياه من القدوم اليها






عهود : ابراهيم.. اذا وصلتني بيت امي وين بتروح ؟
ابراهيم : مادري للحين
عهود : انزين ليش ماتنزل معاي اقعد مع ابوي شوي
كله يسأل عنك فشلة.. شكثر اتعذرله
ابراهيم : عهود مالي مزاج الحين، سلمي عليه وانشالله خلال هالاسبوع امره
عهود : الا فاطمة شخبارها، للحين موراضية انك تمرها؟
ابراهيم : للحين ميبسة راسها
عهود : كل فاطمة راسها يابس


في هذه الاثناء اتصل ابراهيم بفاطمة عل وعسى ترد عليه.... انتظر كثيرا حتى ردت :
خير ابراهيم !
ابراهيم : قوة... شلونج فطوم.. وينج ماتردين؟
فاطمة ردت بنفاذ صبر :
انا موقايلتلك لاتتصل... شتبي؟؟!
ابراهيم : هه!! أسأل عنج ممنوع ولا حرام
فاطمة : انا زينة.. ابراهيم انا الحين موفاضية.. قاعدة اصلي يالله باي .
ابراهيم : الساعة 9.30 بالليل اي صلاة هالحزة ؟!!
فاطمة : والله عاد كيفي.. اصلي وقت ما ابي
ابراهيم: خلاص حبيبي اخليج ( واختلس النظر لعهود بعد كلمة حبيبي فوجدها تنظر من النافذة )
مع السلامة

فاطمة انهت المكالمة دون ان ترد

هي : القت الموبايل جانبا واطفأت انوار الشقة كلها ودخلت غرفتها لتنام او
لتحاول النوم

هو : في السيارة يتنهد ويتأفف ضيقا


عهود : شفيها؟
ابراهيم: بعد شفيها.. كالعادة ماتبي تحاجيني وتتعذر بأي شي
فاطمة متضايقة وصوتها تعبان
محد يعرفها كثري
عهود : بعد ريلها متزوج عليها شتبيها تسوي
الله يلوم اللي يلومها
ابراهيم : انا بوصلج وبمرها
اشوى ان عندي مفتاح الشقة ولا جان حبستني بره ومادخلتني






ابراهيم اوصل عهود الى بيت امها واتجه لفاطمة
اشتياق ابراهيم لفاطمة لا يفوقه اشتياق

في الطريق اشترى علبة من الشوكولا الفاخرة التي تحبها فاطمة
فهي حلوى العشاق وملهبة الاشواق

وصل ابراهيم الشقة وفتح الباب فصدم بالظلمة الحالكة :
وين اللي تقول بصلي !!

اشعل انوار الصالة ووضع الشوكولا والموبايل ومفاتيح السيارة على طاولة الطعام واتجه لغرفة النوم

هم بفتح الباب واذا به يفتح وتطل منه فاطمة فزعة فصرخت :

يمه !! واي يمه
اففففف
وقفت قلبي شفيك داش جنك حرامي ؟؟

ضحك ابراهيم: انتي خرعتيني...
شفيج مطفية كل الليتات ؟ مو تو تقولين بتصلين !!

فمرت فاطمة من امامه متجهة الى المطبخ لتعد لها الشاي :
كنت بنام دايخة
بعدين سمعت حس
خفت قمت اشوف شالسالفة
انت شيايبك؟!! انا موقايلتلك مابي اشوفك

اتجه ابراهيم الى طاولة الطعام واخذ علبة الشوكولا ولحقها الى المطبخ ووقف خلفها وقدم لها علبة الشوكولا وهمس بأذنها :
ولهت عليج... ماولهتي علي ؟

لكنها اخذت علبة الشوكولا ورمتها جانبا على طاولة المجلى واستدارت وابعدته عنها بدفعة خفيفة من يدها :
لأ
انا قلتلك لا تييني لأني مابي اشوفك
يعني ماولهت عليك

وبداخلها تعتصر الما لما تفوهت به من كلمات
فهي جمعت وله العالم كله وشوقه بصدرها لابراهيم
لكنها لاتريد ان يزيدها عذابا فوق عذاب فراقه وزواجه
انها تحاول التأقلم على بعده ولا تريد ما يضعف من عزيمتها

استنكر ابراهيم ماسمعه وما حس به :
شدعوة!!
فطوم حبيبي طول ما انا عند عهود انتي ماخذة عقلي
يوم دقيت عليج قبل شوي كانت معاي بالسيارة

فاطمة : شسوي يعني ؟
ابراهيم : تقدرين اللي انا فيه
انا متزوج من وحدة ما احبها ولا عمري فكرت اتزوجها..
والله لو اقعد اقنع فيج من الحين ليباجر ماراح تقتنعين بحالتي.. ماعلينا

وقال وهو يفتح باب الثلاجة :
شبتعشينا ياقمر؟ تر...
شنو هذا ؟!!
ليش الثلاجة فاضية جذي؟!

فأجابت فاطمة بلا مبالاة وهي تشرب الشاي :
الاكل عفن وخيس الثلاجة
قطيت الاغراض وغسلت الثلاجة !

فالتفت اليها وهو لايزال ممسكا بباب الثلاجة المفتوح :
وليش بالله مارجعتي ترستيها؟!! انا حاطلج فلوس بالدرج

فاطمة : الفلوس موجودة بمكانها تبيهم اخذهم !
ابراهيم : هه!! انا حطيتهم علشان ارجع آخذهم؟؟
انتي شتاكلين طول هالمدة؟؟ هوا ؟!
فاطمة : جاي وبسكوت
ابراهيم : بس؟!! علشان جذي مختفية
تبين تموتين ؟
فردت فاطمة بنفاذ صبر وحدة :
محد يموت ناقص عمر لاتخاف

واخذت تعبث بخصلات شعرها المموج مشيحة بوجهها عنه.

اغلق باب الثلاجة وانضم اليها على الطاولة المستديرة في المطبخ
قرب كرسيه منها فتأففت
مد يده ليلاطفها ويقرص وجنتها فابعدت يده عنها بعصبية :
لاتلمسني
لاتفكر مجرد تفكير ان تقرب صوبي
مو تزوجت؟!! بعد ليش يايني
خلاص انا زوجتك جدام الناس وبس
فاهم؟؟؟

ابراهيم : لاوالله؟؟ على كيفج لأنه !
فاطمة : أي على كيفي
ابراهيم لاتطولها وهي قصيرة
اذا ماعندك شغل
ترى انا موفاضية
فارج ولاتييني مرة ثانية لوسمحت

ابراهيم : ياسلااااام!!
قالها وهو ينهض :
فطوم..
اذا طلعت من هالشقة ترى مالي رجعة مرة ثانية
فاطمة : ابركها من ساعة
الله معاك يسهل دربك

صعق ابراهيم ورفع حاجبيه دهشة من قوة بأسها، فهي لم تبك ولم تظهر عليها بوادر البكاء :
من قلبج ؟؟؟
فاطمة : من قلبي وعقلي
الله معاك

ابراهيم: على ارحتج
بس ترى اذا انتي تهون عليج العشرة
انا ماتهون علي

التفتت اليه فاطمة ببطئ مستنكرة مندهشة رافعة حاجبا واحدا وفاتحة عينيها اقصاهما :
احلف
قول وراس امي

يعني انت مو طبيعي
تقتل القتيل وتمشي بجنازته
الحين منو اللي هانت عليه العشرة انا ولا انت؟؟!!!!

انا رحت تزوجت عليك ولا انت اللي خليت وحدة ماتسوى ظفر ريلي على راسي شريجة
لكن ماعاش من يحط على راسي شريجة لا انت ولا اللي اكبر منك

صرخت واخذ صوتها بالارتفاع :

اطلع بره

ثم اقتربت منه وضيقت جفونها ووجهت اصبعها السبابة بوجهه :
لوعندك ذرة كرامة ورجولة تطلقني الحين
يالله طلقني
قولها
وصرخت :
قولها

فرد وهو متجه نحو طاولة الطعام لأخذ الموبايل ومفاتيح السيارة :
لااااااااه انتي ينيتي رسمي
وأخذ يضرب كفا بكف
المشكلة انج تدرين وتعرفين السبب اللي خلاني اتزوج وهم بعد راكبة راسج بهالطريقة
انا باعتبر الكلام اللي قلتيه ماصار..
وعاذرج على اللي انتي فيه
بخليج تهدين جم يوم وبـ...
فاطمة : مابي اهدا
ليش اهدا ؟
شايفني مينونة ؟
فارشة كشتي واركض بالشارع!!
اخلص فارج يالله

ابراهيم : الله بيهديج انشالله

ويخرج من الشقة

فاطمة : الله بيهدي الجميع
واغلقت الباب خلفه بقوة واوصدت الاقفال
واستندت على الباب مقطبة جبينها وشفتاها تتقوسان وعينيها تدمعان
وعزمت ان تغير قفل الشقة بجديد



سلمى سلمى لاتهاوشين..
انا ادرى باللي اسويه

.....................................

ادري اني قسيت عليه وكسرت بخاطره لكن هذا اللي لازم يصير

......................................

سلمى انا لو شنو يصير ما اسمح لنفسي اني اشارك ريلي بوحدة ثانية
ودام هالشي صار غصبا علي
لايمكن اسمحله يقرب صوبي لو يموت

.....................................

بس
انا ما استحمل اقعد يم ريلي وانتاسى انه كان عند الثانية قبل شوي
اموت قهر

.....................................

ماكو
لاتحاولين
مايرجع الشقة يعني مايرجع
انا غيرت قفل الشقة وماني معطيته المفاتيح
علشان يعرف منو فطوم

.....................................

ااااااه ياسلمى
اللي معور قلبي اني ادري ان خالتي وعمي ضغطوا عليه علشان يتزوج
لكنه سواها والسلام

....................................

الحين ماخذه الشوق والوله على قولتج لأن السالفة بعدها حارة
باجر ليابتله عهود الولد بتصير اهيا الكل بالكل وبيلهى مع الياهل وطلباته وينساني شوي شوي صدقيني
والايام بتثبتلج وبتقولين فطوم قالت

...................................

أنا ؟؟

...................................

باتعود على فراقه شوي شوي
خلاص ماقمت اتضايق لما ادخل غرفة النوم نفس اول ايام اللي طلع من الشقة
نشفت دموعي بسبته




مر شهران منذ آخر زيارة قام بها ابراهيم للشقة

في وقت ما من الضحى اتصل ابراهيم على فاطمة ليبشرها:
عهود حامل

ارتجفت ساقا فاطمة فلم تحملاها اكثر وانهارت على كرسي طاولة الطعام :
صج؟!! بشر امك خل تكت نون

وانهت المكالمة واقفلت الجهاز ورمته بعيدا

بكت وبكت وبكت
وازداد نحيبها حتى سقطت من على الكرسي جاثية على ركبتيها تحضن بطنها وتقرب رأسها من الارض ثم فجأة رفعت رأسها وصرخت بأعلى صوتها

اااااااااااااااااااااااااااااه اه
حرام عليييييييك تسوي فيني جذي

انا انثى
انثى


استمر بكاؤها مدة طويلة
ثم هدأت شيئا فشيئا










الاخ داق يبشرني بحمال عهود

...........................................

تدرين من حرتي
دعيت عليها انشالله ماتتهنى فيه
بعدين قلت حرام اهيا شذنبها

.....................................

استغفرت ربي الف مرة
الله يصبر قلبي بس

الله يصبر قلبي



خلال فترة حمل عهود قلت اتصالات ابراهيم بشكل ملحوظ
كان منشغلا بوحام عهود ومواعيدها الطبية ثم انشغل بالتجهيز لولادتها

صدقت حينها سلمى كلام فاطمة
حصل ماكانت تتوقعه
قل اهتمام ابراهيم بها وركز اهتمامه بعهود
فتوقفت سلمى عن لوم فاطمة لطردها ابراهيم في وقت سابق واخذت تحاول مواساتها اكثر والتخفيف عنها بشغلها بأشياء اخرى



وضعت عهود مولودها يوسف
واصبح ابراهيم بويوسف
وانقطعت اتصالات ابراهيم بفاطمة الا ماندر

وكما كان ابراهيم فرحا وسعيدا بيوسف ومنشغلا به عن الدنيا كلها



كما كانت فاطمة تعاني من مرارة العقم وتندب حظها الذي فرقها عن حبيبها وتوأم روحها

تندب حظها الذي جعل منها انثى

غير كاملة







تمت



مجرد قصة قصيرة من خيال بنات افكاري



ميرسي
.
.
.

[Dominique]

مشكورين على المرور
انشالله تعجبكم البقية

كملوها

ميرسي

[سراب الشارجه]

بعد فاطمه كانت قاسيه مع ابراهيم وهي تعرف سبب زواجه

وتبقى الغيره نار ما يطفيها نهر دجله

[بيض النوايا]

وااااي يمه حرااااااااااااام ليش جذي الريايل مايحسوووون ((بعد رايح يبشرها الأخ))
انا مالوم سلمى ومالوم ابراهيم كل واحد له موقفه وقناعته في التفكير.......!!! وهم بعد مالوم الاهل لانهم اجبروه يتزوج ..ماينلامون يبون يفرحون فيه.............. تسلميين فديتج ع القصة الحلووة ... والله عورت قلبي ...وان شاء الله نشوف جزء ثااني للقصة في القريب العاجل ..وو ميرسي لوووول ....

[Dominique]

صح والله الغيرة نار محد يقدر يطفيها

اللله لا يوري اي وحدة باللي كانت فيه فاطمة

فاطمة بطلة القصة

سلمى صديقتها

تسلمولي على مروركم الحلو ورايكم

[بهلولة]

حرام عليج ..ليش النهاية جي...والله قلبي عورني
بس يسلم مخج على القصة

[Dominique]

الله يسلمج بهلولة

لووووووول انا نسيت اني نزلت القصة

[فجر_دبي]

مشكوووره الغالية

[اماراتيه2009]

بالتوفيق يالغلا