بخبركم ......

[بطاقه]

السلام عليكم

بصراحه بدخل في الموضوع على طول ........ يعني كنت بخبركم

اني أقرأ مواضيع العضوات اللي يسوون حق رياييلهن حفلات صغيره
وتكون فيها ورود وشموع وقلوب وكيك وهالأشياء يعني
المهم
انا أعرف ثلاث حريم متزوجات طبعا ما يخصهن في بعض يعني مب أقارب
كل وحده بعيد ، كلهن يسوون هالأشياء لكن اللي عرفته من فتره أن وحده
منهن ريلها خطب وحده من صوب ربيعه ، والثانيه ريلها خطب زميلته في
العمل ، والثالث يدور بس مب أكيد يعني يتكلم في هالموضوع ..
وطبعا زوجاتهم ما يدرون احليلهن على نياتهن ..

انا يوم شفت هالشي قلت عيل انا والله لا بسوي حق زوجي حفله ولا ورده
لأني بس مره سويت حركه صغيره بس حطيتله رساله تم يضحك وكانت
ضحكة تطنيز ( استغفر الله ) .
يعني صدقوني هالخرابيط ما تعيب الريال بس شو يسوي يجامل حرمته اونه
ما يبا يحرجها ، ولا شو تفسرون هاللي سووه هالأزواج .

انا بس حبيت أنبهكم ولا تفسرون كلامي غلط بس نقلت لكم قصص من
الواقع حولي .

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[دلوعة_أحمد]

انا بعد احس ريلي ما يعيبه ..
ولا التعدل الزايد. يقول بيجاما و بس.

[بدايه درب]

اااممم انا بالنسبه لى اذا سويت شى لريلي وضحك ولا ابتسم يعنى عيبنه ومايقوول ولا متلووم منى
ولاحظت ان بالعكس يعيبه والله اعلم
وتسلمين خيتي ع المعلوومه

[maha99]

حد يعجبه وحد لا

[كيوت ومن]

ع حسب نصهم يعيبهم ونصهم لااا

[أم توتة]

مب الكل طبعا !!

انا عن نفسي من فترة لي فترة عسب ما يمل ,, وبالعكس يعيبه

[بطاقه]

http://uaewomen.net/showthread.php?t=204100

شوفوا المسكينه ،، شو ايي من وراهم
يمكن الحرمه اللي تعق عمرها على الريال عق يسوي بها جيه
ما تكبر في عينه بورده ولا شمعه هذي اشياء انثويه مب للريال
بس اللي تثجل يسوي لها ألف حساب .

يعني مره كنت بطبق شي لزوجي قريت عنه وكان عباره عن مساج
للريول والأصابع فقال لي شو ها انا ليش انا مب ريال تسوين لي جيه أخ

[الحلوووه19]

امممممممممممممم على حسب فديييتج


بالعكس هذا يعتبر تغير جووو

يعني مب كل يووم

بين فتره و فتررررره !!

[ميميه88]

هههههههههههه

امممممممممم
يمكن مب كلهم نفس الشي وحلو التغير عن الروتين اليومي ويمكن هن يسون هالشي بس انتي شفتي فقط من هالناحيه يمكن مقصرات في اشيا ثانيه

[العيون السوود]

صدق حد يعجبه وحد لا
انا الحمدالله ريلي يعجبه صح في البدايه استغرب لان في اول سنه لنا ماسويت ليالي رومنسيه بس من بعد سنه من زواجي بديت في الشهر اسوي اكثر عن مرتين والصراحه يوم ما سويله يقول ليش ماتسوين ليالي رومنسيه

[Q8ia_100%]

ما احب جذيه لا انا ولا ريلي
وما احب الشمع اخاف من هالحرايق
اشتسوى علي اشب شمعه عقب يشب بيتي اعوذ بالله

[قصص]

بصراحه

انا ما اسوي له شي مول

انا موب مقصره كزوجه

لكن لا اسوي حفله ولا اوراق ولا رسايل ولا شي

لكن اللي ايسون جذه ما يخالف بعد

فيه رياييل يحبون هالسوالف

و كل وحده تعرف ريلها شو يحب

وتسوي له

لكن لا تقلد الغير

عن ما تنحرج

[ظبيانيه_قمررر]

اوكي الغاليه هو يعتمد حسب الريل
يعني الي ريلها يبا بس مايقول..وهي تعلمت من المنتدى كثر الله خيرهن البنات الي علموها
واكيد بيستانسسسسسسسسسس وايد وبيتم دوم يسألها هذا امبين ان هالشي عيبه وايد..ولازم من فتره لفتره تسوي له

والي يقول لها كاش مب شي..شراتج ختيه.. او مايحب هالسوالف وهي تعرف ريلها
كيف وشو يحب وشو مايحب
المفروض ماتسوي وتغطي الصوب الي هو يحس ان الواجب عليها تغطيه

يعني هالاستنتاج بديهي و
ماعرف شو المقصد من موضوعج
يعني يا بنات لاتكشخن!!واهملن رياييلكن !!


السمووحه منج

[أم غـلا]

مب كل الرياييل

[الغاالية]

مب كلهم جى
بعضهم جافين خشنين
وبعضهم يحبن يدلعن يغدون شرات الاطفال
لزم كل حرمه تعرف طبيعت ريلها
وبعضهم ما يحبون وجافين بس لو سمع حد يسوي جى يقول مالت على الحرمه الى عندي ما تعرف ادلع
وجهة نظر