رايحه البحرين ...!!

**قمرuae** · 2008-03-06, 00:58

السلام عليكم ورحمه الله وبركاته

تعالوا يا بناااات ..
باجر ان شاء الله رايحه البحرين .. ريلي سوالي مفاجأه اليوم العصر

قال لي هاي التذاكر تجهزي باجر السفر

وبموووت من الوناسه خاطري اروح البحرين

المهم اريد فزعتكم شو الاماكن الحلوه ..

واماكن للتسوق حلوه

يالله يا بنااااات

همتكم معاي

ادري ما بتقصروووون

المزيد من آخر المواضيع من نفس القسم:

**رويــانــة** · 2008-03-06, 03:35

تروحين وترجعين بالسلامة

ان شاء الله حد يفيدج

**e7sasi** · 2008-03-06, 08:08

اذا تحبين الاسواق الشعبية فعليج بسوق المحرق والمنامة القديم وبالنسبة للعصرية مجمع السيف والدانة وعالى وتردين بالسلامة

**قمرuae** · 2008-03-06, 09:46

شكرا خواتي

بعد يالله نبي نسمع المزيد

باجي كم ساعه...

**ذكرى غير** · 2008-03-06, 09:55

يا هلا فيج اختي في البحرين و تنورونا ان شاء الله

لقيت لج هالبرنامج الحلو و ان شاء الله يعجبج و اذا حبيتي تغيرين فيه شي راجع لج حسب رغبتكم و للامانه الموضوع منقول

نبتدي بسم الله الرحمن الرحيم....

اليوم الأول : بيكون إن شاء الله وصولكم بالسلامة من الامارات .. أنا افترضت انكم بتوصلون العصر ... يعني على بال ما تاخذون السيارة من المطار وتوصلون شققكم في الجفير ... بيكون الوقت عقب المغرب ...

طبعا تصلون وترتاحون شوي .. بعدها ... تطلعون في شارع المطاعم في الجفير ... وفيه سوبر ماركت كبير اسمه (ميغا مارت) .. اكيد محتاجين شوية أغراض للشقة ... تختارون لكم مطعم حلو من هالمطاعم وتتعشون فيه .. أو تاخذونه البيت ..

لو حبيتوا مطاعم ثانية .. عندكم منطقة العدليه ... غاصة بالمطاعم طبوا وتخيروا ... أو ممكن تروحون كورنيش شارع الملك فيصل .. اللي جنب جامع الفاتح .. فيه هناك مطعم اسمه CORAL BEACH .. قعدته حلوه وأكله حلو ... يطل على البحر .. ممكن تقضون سهرتكم هناك ... وفيه في هالمنطقة بعد مكان ألعاب للأطفال .. بيفرحون فيها ....

بعدها الرجوع للبيت .. والنوم ...

اليوم الثاني: بعد ما تصبحون بالخير ان شاء الله ... تتريقون ... وأقترح عليكم تزورون متحف البحرين الوطني ... فيه شغلات حلوه .. ومفيده تاريخيا ... بعد المتحف .. تروحون تتغدون في مطعم الصواني اللي جنب المتحف ... هو مطعم يقدم اكلات شعبية بحرينية .. بس أسعاره شوي غالية .... لكن اكله حلو ..

العصر ..أقترح تروحون مجمع اللؤلؤ في وسط المنامة ... بتلقون فيه جلابيات وشيلات .. واكسسوارات .. هو مجمع نوعا ما شعبي ...
وعقب ما تخلصون منه ... جنبه فيه محلات رامز .. فيه مواعين ودلال وفناجين واستكانات .. أشكال والوان .. وكله بدينار! ... يعني تسوق على خفيف ...

ممكن بعد ما تخلصون .. إذا ما تعبتوا ...تروحون المارينا مول .. وهذا جنبهم على طول ... هذا فيه HOME CENTRE . وسبلاش وشوية محلات ثياب لكل الأعمار ...
بعدها تاخذون لكم عشا خفيف مثل: شاورما من شاورما اكسبرس .. موجوده في الجفير ... وترحون تتعشون بالبيت وتريحون ... وحرية الاختيار متروكة لكم ..

اليوم الثالث: بعد ما تتريقون ... تتوكلون على الله وتروحون محمية العرين ... مثل ما انتوا مخططين ... تقضون الصبح هناك ...
بعد ما تخلصون من العرين ... تنزلون الرفاع ... فيه مجمع اسمه THE CENTRE مجمع حلو وهادي ... ممكن تتغدون هناك .. تتسوقن لو حبيتوا ... فيه محلات مثل كمايو .. ألدو الاكسسوارات .. الخ ... يعني بتلقونهم بعد في السيف هالمحلات ..
لو حبيتوا بعد ما تخلصون من المجمع تروحون سوق الرفاع ... أو شارع البوكوارة .. دامكم في الرفاع ... بعد حلو .. سوق الرفاع شعبي .. مثل سوق المحرق ... بس المحرق فيه خيارات أكثر .. وأسعاره احلى ...
بعدها الرجوع للبيت ... والعشا مثل ما تحبون ..

اليوم الرابع : اشرايكم تتريقون برا اليوم (للتغيير) ... مثلا ستاربكس .. أو عندكم محلات الفاست فود اللي حواليكم عندهم ريوق ... حتى chilis اللي هناك عنده ريوق ...

بعد الريوق ... أقترح عليكم تروحون معرض الأسر المنتجة ... هذي الله يسلمج موجود في منطقة كرباباد (منطقة مقابلة التوسعة الجديدة لمجمع السيف) .. مبنى كبير لون بيج ... ومحطوطه اللافته عليه ... هذا بتلقون عنده الأشيا اللي تسويها بعض الأسر البحرينية ...مثال: ( بخور – بهارات – مخللات – بعض الملابس للأطفال – مصنوعات خشبية ... الخ) .. أشياء وايد حلوة ...

بعد ما تطلعون ... روحوا مجمع البحرين (جيان هايبر ماركت) ... تغدوا هناك ... وفيه شوية محلات لو حبيتوا ... وممكن تتمشون في جيان (هايبر ماركت) عشان بكرة ...

أو ممكن تروحون مجمع الدانة .. قريب عليه .. هناك فيه ألعاب شاكازولو لليهال ...وفيه (لولو هايبر ماركت) .. مثل جيان .. بس أجدد ... ممكن تتقضون منه الأغراض... وفيه ساحة للمطاعم ...

وهني ...تركت لكم فترة المغرب مفتوحة .. ممكن تروحون أي مكان .. تفترون .. أو تتعشون ... أو ممكن تتمشون في سوق المنامة لو حبيتوا ... يعني على راحتكم ..

اليوم الخامس: أقترح عليكم تقضونه في الصخير (بر البحرين) .. طبعا تكونون مجهزين الأغراض اللي محتاجينها من جيان أو من لولو ... من بسطات مؤقته .. مناقل للشوي (فيه انواع ممكن ترمينها بعد ما تشوين) لحم، دجاج، خبز، سلطات ... الخ من اغراض الرحلات ..

أول ما تقعدون .. تسوون لكم دلال شاي بالحليب وقهوة وحليب زنجبيل لو كان الجو بارد ...وتمرون على مطعم البيروتي للفول والحمص والفلافل ... هذا موقعه في المنامة ... شارع القصر القديم .. ولا تحاتين اذا ما دليتيه .. أوصفه لج وبتدلينه ...
عقب ما تاخذون الريوق تتوجهون للصخير ... يوم مفتوح في البر .. ريوق .. غدا .. شوي .. لعب .. هناك بتلقون كل شي ... وان شاء الله بتستانسون ...

اليوم السادس: بافتراض انه اليوم الأخير قبل السفر... تروحون مجمع السيف ... هناك عاد ما يحتاج أقول لج ... تقضون يومكم هناك .. غدا .. تسوق .. سينما .. ألعاب أطفال ... قهاوي ... واقترح عليكم تتغدون او تتعشون في المطعم الايطالي اللي جنب الحواج .. البيتزا جدا لذيذة .. على طريقة إيطاليا ..

وممكن بعدها تروحون العالي ... هناك بعد شوية محلات (أرقى) خاصة في التوسعة الجديدة ... وفي الطابق الأخير .. فيه ألعاب للأطفال Mariam Land .. وممكن تتعشون في المطعم الايراني اللي هناك ... اكلوا من عنده تكة .. وشربوا شاي بالنعناع ...

اليوم السابع : لو كان سفركم في الليل .. أقترح عليكم تروحون سوق المحرق ... وتتسوقون هناك على كيفكم ... وطبعا ما تنسون الحلوى البحرينية .. والسمبوسة الحلوة ... لاااازم ... وبعدها تتوكلون على الله ... وتسافرون بالسلامة ان شاء الله ....

لو ما كفاكم الوقت .. وكان سفركم الصبح ... ممكن تروحون في اليوم الرابع ...

سامحيني أختي على أي تقصير .... بس حاولت أغطي لج أكثر المناطق ... وأنوع لكم ... وأي شي أنا حاضرة ..

**ذكرى غير** · 2008-03-06, 09:57

و أن شاء الله هالموضوع يفيدج بالنسبه للاسواق و السكن و السموحه ع التقصير

http://www.uaewomen.net/showthread.php?t=197556

و اذا عندج اي استفسار انا حاضره

**(( عيون ))** · 2008-03-06, 17:21

اسرين وتردين بالسلامه

البحرين حلوة وايد وناسه

لا تنسين تبين حق الاهل حلوى ورهش من عند شويطر

ومتاي من عند متاي المحرق

والله يوفقج ان شاء الله

**حنايا اروح** · 2008-03-07, 13:11

اتروحين وتردين بالسلامه فديتج

الموضوع: رايحه البحرين ...!!

أدوات الموضوع

عرض

رايحه البحرين ...!!

المزيد من آخر المواضيع من نفس القسم:

المواضيع المتشابهه

سيدات البحرين او اي حد رايح البحرين بغيت خدمه صغنونه

رايحه زيارة البحرين ... وين يا بنات البحرين فزعتكم في الأسواق

بنات البحرين لو الي بتسير البحرين بليز ادخلو

بناااااااااااااااات البحرين أو تاجرات البحرين بليييييييز خدمة