خواتي.. شو رايكم برحلة للقرية العالمية ؟

[أم أحمد]

بسم الله الرحمن الرحيم

مرحبا خواتي

شحالكن عساكن بخير ؟

عندي فكرة إنا نروح رحلة للقرية العالمية

ونسوي تقرير مصور :22 (28): ( صور للقرية العالمية فقط ) عن هذه الرحلة كأول نشاط خارجي لنادي سيدات الإمارات

ويكون بنفس الوقت أول لقاء تعارف بينا

وطبعا الإشتراك فيها يكون متاح لجميع العضوات

لكن الموضوع أكيد يحتاج إلى ترتيب وإعداد مسبق

عسب جي أطرح الفكرة هنيه أول لنتناقش فيها ونرتبها

الأمور اللي تحتاج لترتيب كالتالي :

1- المواصلات :

مثل ما تعرفون نحن عضوات من إمارات مختلفة
فكيف إن شاء الله راح نتجمع ..
وهل نروح بسيارة وحدة ( ممكن تكون صعبة للبعض )
أو كل وحدة تروح بسيارتها للقرية العالمية ونحدد مكان للتجمع فيه ؟
أو أي اقتراح آخر


القرار الجماعي : كل وحدة اتيي بسيارتها ونحدد مكان للتجمع فيه ما بين الساعة 4:30 إلى 5 عصراً

2- وقت الرحلة :

في أي يوم ( العائلي ولا السيدات ) وفي أي ساعة بحيث يكون مناسب للكل؟
( وأتوقع يوم السيدات أفضل عسب ما يأذينا حد من الشباب لو قروا الموضوع هذا )


القرار الجماعي : يوم الإثنين غدا إن شاء الله بتاريخ 23 يناير 2006


3- برنامج الرحلة :

طبعا أكيد أول لقاء بينا أو نشاط يجمعنا راح يكون محتاج لبرنامج مرتب
علشان لما نروح ما نطالع بعض ونستحي ومب عارفين شو نسوي وشو نقول؟ :1 (25):

لم يحدد بعد

4- تكاليف الرحلة :

كيف سيتم ترتيبها وتوزيعها ..
مثلا : تكاليف المواصلات إذا أجرنا باص مثلا
تكاليف الوجبة الغذائية إذا كان من ضمن البرنامج إنا نتعشى مع بعض
تكاليف تذاكر الدخول
و هل نخلي كل وحدة تكون مسؤولة عن نفسها ....
أو هل فيه اقتراح حولين هالموضوع

القرار الجماعي : كل وحدة تتحمل مسؤولية نفسها ولك بنتجمع مع بعض ونتعشى مع بعض


الأسماء وفقا لإحصائية أختنا الغالية أمون يعطيها العافية
إلى الآن كالتالي ونرجو من الجميع إنهن يأكدن على الموضوع:

بنت زايد

وين آنجل

بنت الامارات

صدى حنيني

ام اسما

ريانة العود

ميرة دبي

أمووون

ال waiting list اللي ما ندريبهم بييوون و الا لأ

ميرة دبي ... مش متأكدة

بنت بوظبي... ما قالت

ام سعود... ما قالت

بنت الأياويد... مب متأكدة

بنضة قلب.... مب متأكدة

طبعا خواتي هذا اللي استحضرني في هاللحظة .. ممكن تكون في أمور أغفلتها يرجى مشاركتنا فيها

والنقاش مفتوح حولين أي نقطة من هالنقاط أو أي إضافات بانتظاركن خواتي

المزيد من آخر المواضيع من نفس القسم:

• Golden pools
• افضل لعبة اطفال للبحر
• مرحبا انا ساكنة في ابو ظبي
• "لعبة أيام الاسبوع"
• انا جديده وحابه اتعرف ع كل الصبايا
• لعــــبـة الأعــتــراف
• منو حابه تلعب معي شطرنج!؟
• أي الأ سـمـيـن أحـلـى
• وردني الحنين
• مفاجئه رهيبه لصاحب الصوره

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[*أم اسمـــا*]

آاه..
تعبت من كثر ما أكتب وتي أسومه وتخرب..
ما باليد حيله برد أكتب مره ثانيه

اول شي تكاليف الرحلة..تتحملها كل عضوه
يعني كل وحده ومصاريفها.. يا اما مواصلات أو تذاكر أو عشى أو اي شي ثاني

المواصلات: لأنها أول مره فما بنعرف شو تفاعل البنيات بين ما بيّن
فالاحسن انه كل وحده تي بالمواصلات اللي متوفره عندها

برنامج الرحله:
أول شي نتفق على ساعه نتيمع فيها.. خمس العصر مثلا..
واذا مسموح نحط لافته عليها نادي سيدات الامارات في المكان اللي بنيتمع في..
عشان العضوات يعرفون المكان بالضبط.. بدل لا نيلس نسأل..
بعدين من المكان اللي نكون متواجدين فيه نبدا نحوط على القرى..
قريه قريه.. وبعدين نتعشى.. يا انه كل وحده تطلب عشا روحها.. أو نطلب عشا جماعي
ونقسم الحساب بيننا..
وبعدين كل وحده منا تتوكل على الله وترد لعيالها وبيتها

وحلو بعد اذا يمعنا واشترينا تذكارات ..نوزعها على المجموعه
طبعا غير الصور..

هذا اللي عندي حاليا<<مب قادره تفكر بسبب أسومه

[صدى حنيني]

والله كنت افكر بها الشيء يابنت زايد .. ماشاءالله عليج تقرين افكاري ..
لي عوده ان شاءالله ..

[أم أحمد]

خواتي أم أسما وصدى حنيني دومكن سباقات

وبانتظار آراء البقية

[بنت الامارات]

اليوم تونا نسولف عن السيرة للقرية العالمية وان شاء الله تعالى ناوين الاثنين عشانه يوم الحريم ونرتاح فيه 00 وكنت اقولهم خاطري اخبر بنات منتداي عسب اشوفكم هناك 00 يلا انا معااااااكم بس خلوه الاثنين ان شاء الله تعالى 00 والمواصلات كل وحده اتيي في مواصلاته 00اما العشاء مثل ما قالت ام اسماء ندفع كلنا وناكل مع بعض 00 واهم شي نتعرف على بعض ونتقرب من بعض اكثر 00

[أمووون]

السلام عليكم و رحمة الله و بركاته

طبعا أنا وياكم... مثل ما يقولون وياهم وياهم عليهم عليهم...

الاثنين الياي يا بنات وايد زين.. قولوا ليش... لأنه المدرسات اجازة.. مثل بنت بوظبي و الباجيات.. فبيكون وايد زين لهم.. و المعرسات رياييلهم ان شاءالله ما يقولون شي لأنه يوم حريم...

يقولكم انا كل يوم اقول بسير و ما اسير... محد وياي و محد يشجعني... و ربيعتي قالت لي يوم بتتفيج...

شجعتوني بصراحة....

يالله نتريا البقية..

[منى الحمادي]

فكرة وايد حلوة وانا اشوف ان كل وحدة تروح بسيارتها واذا في مجموعة من العضوات في امارة وحدة ممكن بباص وهناك نتفق على مكان نتجمع فيه

[أمووون]

الظاهر البنات ما يبون يسيرون ...

بصراحة كنا نبا مجموعة كبيرة تسير..

يالله ما عليه .. البركة بالموجودات

[المخملية]

وأنا بعد وياكم...........فخاطري أتعرف عليكم
وزين أنه يوم الأثنين عشان يرضى بوشباب
بس أي أثنين تقصدون أتمنى يكون الياي23/1/2006
تسلمين بنت زايد على هالفكره....

[أمووون]

اعتقد البنات يقصدن الاثنين الياي 23-1 لأنه المدرسات اجازة.. و سهل عليهم يسيرون...

انا بظهر من الدوام و طيران على القرية هههههههههههه بس اخاف تسوون فيني مقلب و ايلس بروحي هناك مثل الهبلة هههههههههههه

[المخملية]

بليز ردوااااااا علين إذا أكيد عزمتن عالروحه من اليوم

[أمووون]

يا بنات .. عزموا يالله.. اللي ما تبا تسير براحتها.... بس انا أول وحدة ابا اسير...

ترا يوم الاثنين وايد زين.. نص الاسبوع و مناسب و بعدين يوم الحريم.. يعني بنرتاح بالمياعل و المياحش في القرية

[مــــيره دبــي]

هلا والله ((ببنت زايــــــــــد))

ياويلي على الأفكار الجهنميه...

بصراحه الفكره ولا أروع...

بالنسبه للمواصلات...(( بما أنها كأول مره أقترح أن كل وحده تسير بروحها))...وكل عضوه ايضاً تتحمل تكاليف الرحله كلها من حيث الوجبه و التذاكر

أما لوقت الرحله...(( أشوف وقت العصر واااايد مناسب.. وبالذات الساعه 5 المساء ))


وبرنـــــــامج الرحله..(( راح نتفق على محطه الالتقاء على سبيل المثال القريه التايلنديه ..وبعدها راح يتم تقسيم العضوات المشاركات الى مجموعات ..وكل مجموعه تترأسها عضوه .. وراح يتم التقسيم بحيث كل مجموعه تروح لقسم معين من القرى بما انه القريه كبيره وايد وماراح نقدر نخلصها كلها اذا كنا مجموعه وحده..وطبعاً علشان نرجع نلتقي مره ثانيه راح نحدد موعد للعوده في مطعم معين نجتمع فيه بعد مانحدده وبالمره عشان نتعشى مع بعض .. ))

وعندي راي آخر حبيت اضيفه ياريت قبل موعد الرحله نتأكد من عدد العضوات اللي بيسيرون اكيد عسب نوزع هدايا تذكاريه على بعضنا البعض

وان شاء الله تعجبكم ارائي ..

مودتي ومحبتي
.
.
ميرة دبي

[المخملية]

صج لسانج ميره وأنا رايي من رايج

[مــــيره دبــي]

صح لسانج ميره وأنا رايي من رايج

تسلمين عزيزتي WEE ANGEL

وفي أنتظار أراء البقيه..:1 (81):