اشوة اسوي ؟؟؟

[BinKhadim]

السلام عليكم....

اسمعو قصتي وقولو لي اشوة اسوي....

اهل ريلي يابو خدامه من مكتب في الشارجه وكانت زينه ... وسرت انا يبت خدامه من عندهم واول ما دخليتها البيت واتلاقن الخدامات ... ما اسمع الا الصريخ والصياح .... طلعن بنات خاله ....

اول ايام كانن زينات .... وعقب بدات الخدامه الاوليه اتفتن على خدامتي وكله تتشكا عنها عند ام ريلي .... واذا طلعت خدامتي وياي السناتر علشان اتساعدني ويا اليهال اتم خدامتهم منتفخه في البيت وتتأفف كل ما يقولون لها شي وحتى لو اوديها بيت اهلي نفس الشي ... وكله تجذب على ام ريلي اتقولها "ان خدامتي كله ترقد وما اتنش الى الساعه 8 او 9 الصبح ... وانها اتفر كل الشغل عليها ... وحتى اثيابنا هي تغسلهم والكوي هي تكوي .... وخدامتي مرتاحه في حجرتها...."

وكل يوم اسمع كلام بسبتها ..... والحمد لله خدامتي وايد زينه واتحب البنات واتسويلي كل شي اباه وانا مرتاحه منها لاكني تعبت من الكلام الي اسمعه .... قمت اتم في بيت اهلي طول ايام الاسبوع وارد بيت ريلي في الويك اند بس ...
والله اني احسن ان علاقتي اختربت ويا اهل ريلي بسبب الخدامات ....

والمشكله ان ام ريلي ما اتصدق الا كلام خدامتها ... ويوم اقول الها اني ابعيني اشوف الخدامه اتسوي كل شي وانها اتساعد الخدامه الثانيه في كل شي ... وانها اتنش من الفجر اتجهز لي الريوق حق الدوام.. اتقول لي "انتي اشعرفج انا خدامتي هي الي تشتغل انتي الا راقدة في حجرتج وما اتعرفين اشوة اتسوي خدامتج ..." وكل ما ايلس وياها اتقول" خدامتي مسكينه كل الشغل عليها ...."

واليوم اخت ريلي تسألني كم كملت خدامتي؟؟؟ ... لـــــــــــيــــــــــش...." والله اذا كملت عندج سنتين لا اتجددين لها" ... اونه" بيكبر راسها... سفريها وهاتي لج وحدة يديده احسن" ..... مع العلم ان خوات ريلي ولا وحد عندها بشكارة زينه ... وحدة منهن شردت بشكارتها من شهرين تقريبا والثانيه البشاكير عندها ما يكملن شهرين ...

والله ريلي قام يقول لي ... يلسي في بيت اهلج احسن لج علشان ما تسمعين هالكلام ... ويتم طول الوقت امعصب بسبت الكلام الي يسمعه...

والله اشوة اسوي؟؟ ....لين متى؟؟ .... عطوني حل ؟؟

المزيد من آخر المواضيع من نفس القسم:

• لأنّه جعل الفقير ييعش مع المؤمنين لا مع...
• الإكتئاب طاعون العصر الحديث بحث مرجعي...
• كيف تكون إيجابيا ؟
• كيف تتعامل مع ذاتك بطريقة صحيحة؟
• كيف تقوي ذاتك؟
• كيفية تطوير الذات بطرق بسيطة
• افضل طرق لتطوير الذات وزيادة الثقة بالنفس
• اهم المهارات التي تحتاجها لتطوير الذات
• طرق تطوير الذات في مجال العمل
• اقتباسات ~ مُهرة القَصر

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[غلا راك]

اللله يعينج يالغلا ونحن شغالتنا اختها تشتغل عن قوم عمتي
والحمدللله ماتقصر بس هذيل الثنتين شكلهم علاقتهم مب اوكي ويا بعظ وشغالت اهل
ريلج
تغااار من معاملتج لشغالتج

اللله يعينج ان شاء اللله ويفكنا من شرور هالشغالات

[.Um Hamad]

وشر البليه مايضحـك...

عزيزتي...

ماعليج اسمعي وطوفي

لاتحطين في بالج

اذا اتشكو عليها قولي ان شاء الله بهزبها وبرمسها و و و (المهم تسايرينهم)

واذا تذمروا عليها قولي المهم ويا البنات واليهال نافعتني

واذا انتي مرتاحه منها لاتسمعين كلام فلانه ولا علانه

عطيهن الاذن الصمخــا ^_^

ولاتحاولين توصلين الرمسه لـ ريلج عسب مايطفر من البيت

ويطفر منـج

تراهم مايصدقون

المهم كوني مع اهل ريلج زينه وعطيهم من الرمسه الطيبه

وبنفس الوقت ماعليج منهم ... ^_^


يعني الحينا خلصت الاسباب عسب تضيج عـ البشاكير

[BinKhadim]

انا من اكثر من سنه لابستنهم ... وادخل من صوب واطلع من الصوب الثاني....
لاكن المشكله اللحين انهم قامو يزقرونها كل اشوي ويتأمرون عليها طوول الوقت لا وتنهزب بعد ... حتى لو انا امخلتنها اتسوي شي يزقرونها ويقولون الها خليه وسوي الي احن نباه ....
وهالايام قامت تنتفخ واتويم يوم اسير بيت ريلي من كثر الكلام الي تسمعه ....

[BinKhadim]

وعن اني انا الي اتشكا عند ريلي ......

الغاليه .... هم ما يقصرون .... ويزيدون الحط على البشكارة يوم يكون موجود ... وعمد يزقرونها جدامه ويسمعونها كلام ...

[احلى ما فيني]

ما عليج حبوبه طنشيهم ،، ولا اتخلين الشغلات هم اللي يخربون العلاقه من بينكم ....

ما دام ريلج متفهم وانتي مرتاحه من شغالتج ،، طنشيهم ومثل ما قالت الاخت ،، سايريهم فالكلام وخذيهم على قد عقلهم لين ما ايملون او ينشغلون بشي ثاني ..

والله يحفظج ويسهل عليج حبوبه

[بداية new]

الله يعين

[ياقوته]

الله يعينج حبوبه

وطنشيهم

[gucci549]

ليش ..................
ابغي اعرف اهل الريل ليش يسوون جيه في مرت ولدهم.........
ليش يحبون يغصصون عليها و على ولدهم

[BinKhadim]

كم بطنش خواتي .....
انا الحين من متى يالسه في بيت اهلي ... وما اسير حق ريلي غير في الويك اند ....
وهم كل ما ياهم يزيدون ويزيدون وحاطين دوبهم ودوب البشكارة.... وانا من النوع الي ما أرادد ولا أطول ألساني....
والله اني الشهر الي طاف حلفت له اني ما ارد البيت وكنت ادور شقه .... مع ان ظروفنا ما تسمح للشقه .... وبالزور ريلي قدر يقنعني ارد البيت في الويك اند .... وعلى هذا كله ... من ارد البيت يستلموني .... وكل حد ماط بوزة من صوب ... وام ريلي ما اتصدق اتحصل علي شي .... وقامت لا اتحشمني ولا تحترمني جدام عيالها وطول الوقت اتحط علي .... حتى على ثيابي ... وجدام كل اولادها .....
وما اتصدق اقول كلمه الا شبت في ويهي .... الاسبوع الي طاف كنت ابا ارقد الظهر وبنتي كانت في حجرة يدتها فسرت ازقرها وما طاعت تي وياي ... وقفت عند الباب وقلت الها اني بسير عنها ... انا ما قلت بسير عنها ... الا ام ريلي شابه فيي .... "انتي ما اتعرفين تيلسين في البيت ، بتموتين اذا ما يلستي يوم واحد "، وكلام وايد سمعته وانا ساكته وهذا بعد جدام اثنين من اولادها واحد اصغر عني بكم شهر والثاني بكمن سنه. وما سكتت لين ما قلتلها اني ابا اسير ارقد... وهالكلام صار وريلي في الدوام ... ويوم رد فليل اخته تباه يوصلها بيتها وقالت لي انها تباني اسير وياها علشان ايود عيالها في السيارة ...وللعلم كان يايب سيارته اليديدة وما ركبتها لين هاك الوقت ..... ويوم يا وقت الطلعه قال لي ريلي يله لبسي عباتج الحين بنوصلها وكنا يالسين في الصاله ويا اهله كلهم .... تدرون اشوة قال لي حميي الي اصغر عني بكمن شهر؟؟......... "انتي ما اتعرفين تيلسين في البيت كله اتنططين تبين تطلعين"........... وهالكلام جدام ريلي واهله كلهم...... وطبعا ريلي كالعادة ما يرد عليهم .... انا من القفطه ما قلت شي وسرت حجرتي وما طلعت وتم ريلي اشكثر يترياني في السيارة وما طلعت له ...


الموضوع الحين اطور وما صار موضوع بشكارة وبس ....

[s0fty_soul]

عنبو حتى ف السوالف العمه تدخل .... الله يعيني ان شاء الله

[السمارية]

حبيبي لو تبغين نصيحتي طنشي لان السالفه بعد صايره عندنا فالبيت وكثرت المشاكل فالبيت والسبب الخدامات عالنهاية قمنا نطنش بس عسب ما نزعل الوالد والوالده وتعالي شوفيهن الحين زينات وما بينهن شي
اهل ريلج بيسوون وبيسوون وبيسوون تراهم عالنهايه اكيد بيملون وما عليج من حد لا تخربين علاقتج ويا اهل ريلج بسبب الخدامه لانها هي عالنهايه بترد عند اهلها بس هاييل اهلج فحاولي تحافظين عليهم مب تخسرينهم

[BinKhadim]

المشكله ان هالمشكله مب من الحين ..... انا اعاني منها من ييتهم البيت وانا ساكته وامطنشه وحاطه اهله فوق راسي وحرتي في قلبي .... والله اني استحملت منههم كل شي .... لدرجه ان اخوه يطردني من البيت جدام امه واخته وريـــــــلـــــــي ... ليش ؟؟؟ لان بنتي صاحت الظهر وخربت رقاده ...... وبعد ريلي ما قال شي ......
والله اهلي لو يدرون بنص الي اعاني منه والكلام الي اسمعه جان ما خلوني يوم واحد ....

[رافعه خشمها]

غيري الخدامه واشتري راحة البال

[قصة حنين]

الله يعينج