القيصرية

**على البال** · 2007-12-30, 01:28

السلام عليكم ورحمة الله وبركاته

ابغي مساعدتكن خواتي اللي ربت قيصرية ...

انا مربية قيصرية ... وبخلص الاربعين قريب ... الجراحة تقريبا زينه بس بعد يبالها وقت لين تبرى تماما ... من فتره قامت اطلع عليه وصخ وعطوني لها مطهر بس ... فابغي اعرف هل هذا طبيعي الكل يمر بهالشي والا ؟!

الشي الثاني بخصوص زوجي هل علاقتي فيه تكون عادية او محتاجة مدة اكثر لين اقدر ارد وياه عادي ( فاهمين قصدي ) ؟!

شو الاشياء اللي اقدر اسويها عادي والاشياء اللي لازم ابتعد عنها ؟!
مثل المشي واليلسة ووضعية النوم ؟!

اتمنى تفيدوني خواتي ويزاكن الله خير ....

اختكم

المزيد من آخر المواضيع من نفس القسم:

**mayadah99** · 2007-12-30, 01:34

اول شي مبروووك عليج ما ياج اختي...والحمدلله على سلامتج
انا شراتج الغالية ربيت بعملية من 3 شهور ونص..وبالنسبة اللي قلي عنه وصخ
هو مب وصخ ..هذا شي طبيعي..وهو انه الجرح بدا يبرى..وبالنسبة للعلاقة
دام بخير وتقدرين..فمافي شي يمنع...وعن الاشياء اللي ماتسوينها..فلا تشلين اشيا وايد
ثجيلة...اما المشي فوايد اوكي ومفيد..ويسرع في البريان,,
واليلسة عادي..ايسلي مثل ماتحبين..حتى النوم ارقدي بالوضعية
اللي اتريحج..انا الدكتورة من ثاني يوم قالتلي لاوم اغير وضعيات النوم..صح كانت صعبة فالبداية
بس الحمدلله..حبيبتي الشي اللي اتشوين عمرج تقدرين اتسوينه فلا تترددين.
واتمنى اني فدتج اختي .

**على البال** · 2007-12-30, 10:36

مشكورة اختي ميادة على ردج .. والله يبارك فيج ...
وانتي بعد مبروك ما ياج ...

بخصوص وضعيات النوم انا عادي اتجلب على الينبين بس لين الحين ما جربت ارقد على بطني
لاني خفت اجرب هالوضعية وتطلع مش اوكي ...
والمشي اتعب تبين الصدق يوم امشي وايد .. بس ان شاء الله شوي شوي ترد الامور لطبيعتها ...
وبخصوص الوصخ مثل ما قلت لج .. عادي اذا كان وياه دم يعني ؟! شي خفيف مش نزيف ...
وسؤال اخير بخصوص الصلاه ... تصليت عادي والا وانتي يالسه ؟!

اختج

**على البال** · 2007-12-30, 14:52

للرفع

**اتعبني@غروري** · 2007-12-30, 15:28

السموحه الغالية ما عندي فكرة بس ما حبيت اطلع بدون ما ارد عليج

**UMSHAHD** · 2007-12-30, 17:21

هلا الغالية مبروك ما ياج
حبيت أشارك وياكم بالموضوع ..أنا ربيت طبيعي بس بعد ما خلصت الأربعين سوو لي عملية لأن كان عندي التهاب بقناة فالوب ومسويه لي تكيس على القناه فالعملية كانت مثل القيصرية بالضبط.. تعبت وايد فيها لأن تعرفين كيف يكون جسم الحرمة بعد الولادة ضعيف ووحمى 20 يوم لين سوو لي العملية.. المهم ما أطول في الكلام بما أني مخلصة الأربعين كان لازم أصلي .. صليت ثاني أسبوع بعد العملية وكنت مجهزة كرسي أيلس عليه بعد الركوع بس الحمد لله الله يسر لي وسجدت بدون ما أحتاج الكرسي..
الغالية تقدرين تصلين بشكل طبيعي بدون حاجة لكرسي أو غيره..
وعندي سؤال؟؟؟؟؟؟؟؟؟ هل العلاقة مع الزوج تضر الجراحة أو تعور لأني ما كملت للحين 4 أسابيع من العملية أنا خايفة من ها الشي بس كاسر خاطري أبو الشباب

**mayadah99** · 2007-12-30, 17:37

حبيبتي اسمحيلي ع التأخير...
بخصوص النوم حبيبتي..حاليا خليج عالينبين واذا قدرتي ع بطنج فما يخالف بس بالتدريج وشوي
شوي...وعن المشي خليه بسيط ومب وايد..يعني اقصد المشي اللي تمشينه عادي فالبيت ..
والصلاة..انا عقب ما كملت شهرين قدرت اسجد واركع..بس قبل كله ع كرسي..
وحبيبتي الدم اللي اتقولين عنه..هذا دم بريان العملية...نظفي الجرح بروحج كل يوم و
ان شاء الله بترتاحين

**mayadah99** · 2007-12-30, 17:41

اختي ام شهد...
الحمدلله ع سلامتج حبيبتي...

وبالنسبة لسؤالج..دام اتحسين نفسج بخير وقادرة انج اتمارسين العلاقة مع ريلج فعادي
الغالية سوي اللي يريحج..بس الاحسن يكون كل شي بروية وشوي شوي..توكلي على الله
ولا تكسرين بخاطر بوالشباب...

**أم السعف والليف** · 2007-12-30, 18:01

اتحذري من الأشياء الثجيلة لان وايد انعرفهن انفجت عنهن الخياطة عقب 8 سنين!! أي حد مابيصدق بس السالفة صدق الله يعينج

**على البال** · 2007-12-31, 01:46

مشكورات خواتي وان شاء الله الكل يستفيد ...
بس استغربت من كلامج اختي ام السعف والليف .. معناته نحن بنتم نعاني من العملية طول عمرنا ....!!

**mayadah99** · 2007-12-31, 21:39

مب كل الحالات اختي...الحرمة اللي ما بتتحمل من عمرها لازم بتتعب..بعدين الولادات المتقاربة يكون وحد من الاسباب..
انا اعرف حريم اتخيلي كل سنه يحملون ويربون بعملية لين ما الدكتورة منعتهم لمصلحتهم لان الجرح ماعاد
يتحمل,,,وعدد العيال بدا يتجاوز الستة فوق وفي فترة متقاربة عرفتي حبيبتي
لا تخافين ولا اتفكرين بالمعاناه وفكري بالنونو الحلو اللي رب العالمين عطاج اياه...

**على البال** · 2008-01-01, 01:20

مشكورة اختي ميادة على تفاعلج وردودج الطيبة ...

**أم السعف والليف** · 2008-01-01, 11:04

لا المعاناة ما بتستمر بس سبحان الله يعتمد حرمة كانت مربي بقيصرية وهقبها بسنييين وايد حملت عادي ويتها ألام شديدة ويوم سارت قالولها مكان الجرح انفتح...وحده ثانية شلت شي ثجييييل ونفس الشي يعني كانت مسوية العملية من 8 سنين لكن انفتح الجرح واتلعوزت لأن المنطقة رقيقة والحذر الحذر الشغالات والاهل بيشلون كل شي ولا بيقصرون وصحتج أهم

**فتاة الامارات..** · 2008-01-01, 17:54

الغاليه عليج بشرب المره كل يوم كوب ترهاااا وايد ممتازه للجرح الداخلي
وخذي ماي دافي وحطي فيه مره وخذي شاش وبلليه بهن وامسحي الجرح
مره او مرتين مايضر صدقيني احسن حتى عن دويات الدخاتر
من تجربت عمتيه وانا الحين بربي بس قيصري ومجهزه المره
دعواتج لي

**راك_84** · 2008-01-12, 16:43

انزين حمام السونا ما يضر

انا توني مكمله شهر و مربيه بعمليه يضر لو سويت سونا لايعه جبدي ابغي اتنظف اشوي من السواد

الموضوع: القيصرية

أدوات الموضوع

عرض