قصة ولادتي.. :)

**m_8080** · 2007-12-19, 23:06

السلام عليكم و رحمة الله و بركاته ..

و اخيرا حصلت فرصه عشان اخبركم بقصة ولادتي ..

في اخر موعد لي فتاريخ 10-12يوم الاثنين عقب ما دخلت الاسبوع ال 39 شاورت دكتورتي و قلتلها اذا عادي اسوي طلق صناعي قبل موعدي اللي هو 20-12 قالتلي الحمدالله كل شي زين و البيبي حجمه زين و ما في اي شي يمنع اني اسوي طلق و كان الرحم مفتوح عندي سانتي و نص فقلتلها خلاص انا بفكر و برد عليج و مر الاثنين و الثلاثا و لا فكرت فالموضوع سبحان الله يوم الاربعا فليل قررت اني استخير و ارقد..

و الحمدالله استخرت و رقدت يوم نشيت الصبح كانت نفسيتي واااايد مرتاحه.. و سبحان الله اتصلوبي من العياده الساعه 10 الصبح قالولي الدكتوره تقول اذا قررتي تسوين الطلق روحي المستشفى الساعه 1 و هي بتكون عندج الساعه 2 قلتلها نص ساعه و بأكد عليكم .. و اتصلت حق ريلي و خبرته و استانس و قالي اذا مرتاحه اتوكلي على الله و بنسير ..
المهم سرنا المستشفى الساعه 1 و عطونا الغرفه و خلوني ابدل ثيابي و يابولنا الغدا >> مب كأني سايره اربي لوول
و عقب الغدا حطولي جهاز تخطيط قلب البيبي و الحمدالله كل شي كان اوكي .. المهم يت الدكتوره الساعه 3 تقريبا و كشفت عليه قالتلي سبحان الله الرحم فاتح 5 سانتي و ما يحتاي احطلج تحميلة الطلق الصناعي لانها وايد قويه قالتلي بحطلج المغذي لانه شوي اخف .. و انا استانست ماشاللله 5 سانتي و ما حسيت بويع و لا شي سبحان الله ..
قالت الدكتوره بخليج لين الساعه 5 و بشوف كم بيفتح و بنحطلج الطلق .. المهم رقدت و نشيت عالساعه 5 ودوني غرفة ما قبل الولاده و يت الدكتوره الساعه 6 و فحصتني و قالت بعده 5 سانتي المهم حطولي الطلق الصناعي الساعه 6 و نص تقريبا و الدكتوره فتحتلي ماي الراس الساعه 7 و بدا وياي الويع الساعه 9 بس الحمدالله ماكان هذاك الويع اللي انا مجربتنه في ولادتي الاولى كان اخف .. و بالتدريج بدا يزيد الويع و ريلي و النيرس عندي كل ما يشوفون الرقم مال الطلق زاد في الجهاز يقولولي اتنفسي اتنفسي و ريلي يالس يصورني >> متفيق شوي لوول ..
المهم الساعه 11 و نص دخلوني غرفة الولاده و ريلي واقف عراسي و ماسك ايدي و كل ما ايني الويع ارص على ايده >> شكله ندم انه مسك ايدي ..و الدكتوره تقلي يلا ادفعي انا يالسه اشوف شعر البيبي و انا ادفع و ادفع يمكن دفعت 5 مرات و الساعه 12 الا ربع طلع ولدي حبيبي فديته و يوم طلع يلست اصيح مثل الصغاريه و اقول بصوت عالي الحمدالله الحمدالله .. و ريلي يسكتني يقلي خلاص طلع طلع شوفيه و عقب اختي دخلت و رديت اصيح مره ثانيه لووول و الحمدالله ولادتي كانت سهله بالنسبه للي اسمعه من قصص بس اهم شي ان الوحده تشجع عمرها و ما تزيغ و لا تزاعج و صدقوني يوم ايي الويع و تتنفسون بطريقه صح وااااايد تساعدون نفسكم و تساعدون البيبي نصيحه مني اتعلمو كيف تتنفسون وقت الطلق ..
نسيت اقلكم ان ما كان وياي حد غير ريلي ما خبرنا حد الا عقب ما بدى الويع قلت حق ريلي سو حق اختي و خبرها .. سوالها و ماكملنا ساعه الا و هي يايه حليلها .. فولادتي الاولى كانت وياي امي و عمتي و اختي و ريلي بس اللي دخلت وياي غرفة الولاده عمتي بس هالمره ريلي دخل وياي و اختي برع تتريا.. و بصراحه حسيت براحه اكثر يوم ريلي دخل وياي هالمره

الله يسهل على الجميع انشالله و لا تنسون وقت الولاده تدعون باللللي فخاطركم و تذكرون الله و تستغفرونه ..

المزيد من آخر المواضيع من نفس القسم:

**راحله لله** · 2007-12-19, 23:13

اللهم يجعله من الذرية الصالحة يارب ...

ويسهل على اخواتنا المسلمين يارب ..

بس انا يمكن عشاني توني عروسة

لو ربي من علي بالحمل ماراح اخليه يدخل معي ههههه

يالله الله يوفقك يارب والحمدلله على السلامة

**الحولا 202** · 2007-12-19, 23:26

مبروك ويتربا في عزكم

**..>روح غاليها<..** · 2007-12-19, 23:34

مبروك ما ياكم
وان شاءالله يتربي بعزج وبعز ابوه ان شاءالله

**cheep** · 2007-12-19, 23:36

مبروك ويتربا في عزكم

**ام اسامي** · 2007-12-19, 23:46

مشاء الله تبارك الرحمن ..

احسن شئ سويتيه انج ماخبرتي حد عن الطلق الا يوم يا الويع بسوي نفسج اجوفني بسير وخليهم يحطون لي طلق من غير حد يدري ويوم بيي الويع القوي بقول لهم تراني في المستشفي بربي محد بيدري ..

حمد الله على سلامتج .. ومبروك ماياج ..

**ليماا** · 2007-12-20, 03:14

ماشاءالله

::::::::::الله يباركلكم فيه::::::::

**المـــها** · 2007-12-20, 07:01

للهم يجعله من الذرية الصالحة يارب ...

ويسهل على اخواتنا المسلمين يارب ..
الله يباركلكم فيه

**ميميه88** · 2007-12-20, 11:22

تصدقين صحت يوم قريت الموضوع ههههههه كل ماشوف حد يربي والااسمع سالفه اصيييح مادري ليش الله يصبرني علولاده مع انيه توني الا بالخامس

**دانة الصحراء** · 2007-12-20, 11:30

مبروك الغاليه ويتربى فعزكم ان شا الله

***nawari*** · 2007-12-22, 04:16

مبروك ما ياج و يتربى فعزكم إن شاء الله

**دانة جميرا** · 2007-12-22, 11:45

مرحبا ختيه .. الحمدالله عالسلامه وبالبركه والله يجعله من الذريه الصالحه ويطرح فيه البركه ان شاء الله .. الله ايسهل علينا ان شاء الله .. والسموحه عالقصور

**Traneem** · 2007-12-23, 02:58

ما شاء الله، الله يهون علينا و ع كل الحوامل المسلمات الولاده!
الحمدلله ع سلامتج! و يتربا في عزكم ان شاء الله! مبروكين ان شاء الله

**الطرف_الذبوحي** · 2007-12-23, 03:04

الله يسهل عليج ف كل ولاده ..

**فاطمةالحمادي** · 2007-12-23, 08:36

مبرووووووووووووووك
الله يخليه لكم ويجعل فيه البركة انشالله

الموضوع: قصة ولادتي.. :)

أدوات الموضوع

عرض

قصة ولادتي.. :)

المزيد من آخر المواضيع من نفس القسم:

المواضيع المتشابهه

قصة ولادتي ...قصدي معركة ولادتي بدندونة فديتها...

قصة ولادتي

قصة ولادتي

قصة ولادتي الكاذبه و ولادتي الحقيقيه !!!!!