لكل وحده اتقول انها عانس ليش هاللقب؟؟؟

**عسولة راك7** · 2007-12-01, 13:40

هلا خوااتي...

انا حبيت اكتب هالموضوع لشريحه معينه من البنات اللي حاطولهم مسمى يديد وهي كلمة عانس وعانس وعانس؟؟ عفوا ليش حكمتي ع نفسج بي هالحكم؟؟ بتقولي عمري 25 او 26 والخ ولين احين ما عرست صح.. بقولج لا انتي غلطانه وستين غلطانه اتعرفين ليش يا اختي لانج ماشيه وراء كلام المجتمع وحكمتي ع عمرج بي هالحكم اقتنعتي بكلام الناس وخليتي هاللقب كابوس لحياتج وما اقتنعتي بحكمة رب العالمين من هالشي يمكن هو خير لج .. والمشكله انه الحين البنات اللي اعمارهم 20 و19 يحكمون ع نفسهم نفس الحكم اتقولج انا عانس لاني لين احين ما عرست.. عفوا لازم كل وحده اتنظف راسها من هالكلمه وترضى بنصيبها ولازم اتعرفين انه رب العالمين هو اللي اموزع الارزاق مب ع كيفي ولا عكيفج لو عليج يا اختي تبين اتعرسين من باجر بس هالشي مب ابيدج بيد الله سبحانه وتعالى ..

اتعرفين شو المشكله يا اختي انه نحنا شايفين موضوع الزواج من منظور واااحد وهو فستان ابيض وكوشه وزفه وناس وسعاده ووناسه ودلع وسفر وغيره وهذا هو الغلط لا بالعكس الزواج مب السعاده الحقيقيه للبنت بالعكس رضا رب العالمين هي السعاده الحقيقيه.. يا اختي ياللي سميتي عمرج عانس اقري المواضيع اللي في قسم المشكلات الاجتماعيه شو اغلبيتها اتكون مب عباره عن مواضيع خيانه وزوجه ثانيه وطلاق وضرب وغيره وهذا جزء بسيط غير اللي نسمعه دووووم في الجرايد والمجلات والراديو...الحين ابغيج تيلسين ويه نفسج اشوي وبتعرفين انج يالسه في نعمه بس انتي مب حاسه فيها...ليش ما خطر في بالج لحظه انه الله ما رزقج بالزوج الصالح لين احين لانه يبالج الخير يمكن لو كنتي متزوجه كنتي بتكونين وحده من اللي عارضين مشكلاتهم الحين ويالسه اتصحين واتصارخين..صح ولا غلط كلامي هل انتي عارفه حكمة رب العالمين من تاخيرج في الزواج طبعا لا... اتعرفين ليش لانج ماشيه وراء كلام الناس افلانه عرست وافلانه سافرت وافلانه ريلها يابلها كوشه بالمبلغ الفلاني والعلاني وبس ..

انا اقولج كل وحده فينا تتمنى انها تتزوج واتكون اسره .. هاي غريزه في كل البشر بس الواحد يقول الحمدالله ع كل شي واعرفي يااختي انه الزواج يكون حلاته اذا الله رزقج بزوج صالح يخاف ربه ويصلي مب زوج مدمن ع الاغاني والسفرااات والطلعات وناسيج وناسي بيته لانه ربي بيحاسبج يوم القيامه عن هالزوج ليش ما حاولتي اتغيرين منه واتجربينه من ربه اكثر ليش قصرتي في حقوقه... يعني حسابج ما بيقتصر عليج انتي بس بل في زوجج واعيالج... حتى اعيالج بتتحاسبين عليهم لانه الشطاره مب بكثرة اليهال الشطاره هي انه كم واحد بتربينه تربيه صالحه ..ونفس الشي زوجج بيحاسب اذا قصرعليج او ما اعانج في دينج... هل عرفتي انج انتي بنعمه مب حاسه فيها يكفي انه حسابج بيقتصر عليج وع والديج بس...

الزواج حلو بس يوم قالوا الزواج مسووليه صدقج مسووليه لانج بتكونين مسووله عن اسره وزوج وبيت يعني مسووله عن حياه يديده... فلازم اتكونين قد المسووليه وتبنين هالاسره ع اسس صحيحه.. السالفه مب لعبان

فارجو من كل وحده تطلق ع نفسها اسم عانس انها تمسح هالكلمه من راسها وترضى بنصيبها واتعيش حياتها مثل باجي البشر ولا تحبس عمرها بين اربع جدران خوفا من انه الناس يقولون عنها عانس... لا حبيبتي هذا نصيبج ولازم تعلمين لو رب العالمين كاتبلج نصيب بتتزوجين راااح تتزوجين حتى لو كان عمرج50 سنه ولو امنو يوقف افطريجج ولو مب كاتبلج نصيب انج تتزوجين ما راح تتزوجين حتى لو اتسيرين عند 1000خطابه...يمكن الله كاتبلج نصيب في شي ثاني مثل الوظيفه وغيره

بعطيج مثال بسيط شوفي الناس اللي امهم هنديه وامهم مصريه او من اي جنسيه ثانيه كل وحده فيهم كانت حاطه في بالها انها بتاخذ ولد ابلادها بس شوفي ربج راااايد انها تاخذ ابوج وتي الامارات واتعيش اهني ويصير حالها من حالنا...يعني نصيبها ياها وهي قاعده في بلادها...سبحان الله

شوفي يا اختي اهم شي اذا اقتنعتي انه هذا نصيبج ورضيتي صدقيني راااح ترتاحين واتعيشين حياتج صح ولكن اذا كانت قناعتج مشوشه ومب حاسه بالرضا راااح تتعبين افحياتج وان شاء الله ربي بيرزقج في الاخره ع صبرج بالزوج الصالح اذا ما اتزوجتي في الدنيا ان شاء الله بتتزوجين في الآخره وبتنسعدين...فالقناعه اهم شي ..

واخيرا... إلجي يا اختي لرب العالمين كل ما حسيتي بضيجه واكثري من الاستغفار والالحاح في الدعاء انه الله يرزقج بالزوج الصالح وكوني ع يقين انه ربي بيرزقج عاجلا غير اجلا وواظبي ع صلاة قيام الليل وادعي ربج من خاطرج وان شاء الله ربي بيرزقج من حلاله...

والله يرزق كل بنت ما اتزوجت بالزوج الصالح عاجلا غير اجلا ..

المزيد من آخر المواضيع من نفس القسم:

**عسولة راك7** · 2007-12-01, 13:50

كل وحده ادش الموضوع لا تطلع من غير رد..

**islam girl** · 2007-12-01, 13:53

بعطيج مثال بسيط شوفي الناس اللي امهم هنديه وامهم مصريه او من اي جنسيه ثانيه كل وحده فيهم كانت حاطه في بالها انها بتاخذ ولد ابلادها بس شوفي ربج راااايد انها تاخذ ابوج وتي الامارات واتعيش اهني ويصير حالها من حالنا...يعني نصيبها ياها وهي قاعده في بلادها...سبحان الله >>>>>> أكثـــــــــــــــــــــــــــ{ شي عيبني

تســــــــــــــــــــــــــــــــــــــــــــلمين

**نجمه الــياه** · 2007-12-01, 15:11

المشاركة الأصلية كتبت بواسطة عسولة راك7

كل وحده ادش الموضوع لا تطلع من غير رد..

لييييش؟

**عسولة راك7** · 2007-12-01, 15:25

اشكركم ع المرور خواتي

واختي نجمة الياه انا قلت جذي عشان يمكن وحده فيكم يكون ردها مقنع ويفيد بدل ما يضر

وبحفظ الله

**mahra ahmed** · 2007-12-01, 18:36

انا بقووولج ليش البنت اتقوول هالكلاااام ؟!!!

البنت مابتحس بعمرهاا عادي لو كانت 27 او 30 !!

بس اذا اختها اللي اصغر عنها تزوجت!!
وبنت خالتها ؟!! بنت عمها !! اي وحده من اهلهاا .

عاد لو كانت اصغر عنها !! والرياال اللي ماخذتنه ريال صالح ومب من هالشباب ؟!!

شو بتتوقعين بتكون ردة فعلها !!! بتقول ليش انا لا؟!! ليش غيري تزوج وانا لا !!

بتقول شو ناقصني ؟!!
دين !!
جمال ؟!!
مال ؟!!
حسب ؟!!
نسب؟!!
افكار بتاخذها وافكار بتييبها !! وعاد اذا ريال عمره 28 تزوج وحده 21 من اهلها وهي عمرها 25!! بتقول خذ الصغيره وخلاني انا !!
حبيبتي هاي غريزه عند الكل !! تشووف اللي اصغر عنها من اهلها تزوج !! ؟؟تصيبها حاله نفسيه واتقول انا عانس

والله المستعاان

**سوارفسكي** · 2007-12-01, 19:42

متابعه و لي عوده للرد

**ستايلي غير** · 2007-12-01, 21:18

انا بعد احس بهذا الشي لان بنات هلي كلهن اتزوجن قبل 22 و الي ما اتزوجن قبل 22 اونه عوانس ... يختيه ما اتعرفين شو الي احس فيه بس الحين خلاص الدنيا مب كل شي ريل و انا قمت احب حياتي اسير اي مكان و عندي كل شي ابوي مب امقصر وياي و اخاف اخذ واحد واوهقه بطلباتي خلاص اتعودت ع الدلع...

والله يرزق كل بنت ما اتزوجت بالزوج الصالح عاجلا غير اجلا ..

امييييييييييييييييييييييييييييين يا رب العالمين

**عسولة راك7** · 2007-12-02, 11:37

اشكركم ع المرور

**نقطة تحول** · 2007-12-02, 12:45

يزاج الله خير اختي على هالكلام الطيب

**أندلسية** · 2007-12-02, 18:45

آالله يرزق الجميع بالرجل الصاااااااالح
آآآآآآآآآآآآآآآآآآآآآآآآمين يارب العلمييين

**نور حياتي** · 2007-12-02, 19:09

اول شي اشكرج ع طرح هذا الموضوع
وبعدين انا وحدة ما احب مول كلمة عانس
يعني مثلا لما يقولون هاي عانس ان ا اعصب اقول عزابية او انسة يعني شو عانس؟؟؟

وبعدين لاحقات ع الزواج و ع عوار الراس و الصدعة و المسؤولية
وعيبتني هاي الجملة:
" نحنا شايفين موضوع الزواج من منظور واااحد وهو فستان ابيض وكوشه وزفه وناس وسعاده ووناسه ودلع وسفر وغيره وهذا هو الغلط لا بالعكس الزواج مب السعاده الحقيقيه للبنت بالعكس رضا رب العالمين هي السعاده الحقيقيه"

**جروح_دمية** · 2007-12-02, 20:55

هي والله...صدقتي في كل كلمة قلتيها
الله يرزقج الزوج الصالح ويرزق كل وحده تتمنى تعرس

**عالية الشان** · 2007-12-02, 21:22

متى تصير مشكلة عودة؟؟؟

يوم البنية تاخذها بالها وتفكر فيها ليل على نهار واتم اتحاتي كلام الناس ..

ليش وليش؟؟؟؟

المفروض كل وحدة تشغل نفسها باللي يفيدها ولا تفكر بهالامور لانه كل شي مقسوم بهالدنيا ...

**شيامي** · 2007-12-02, 22:07

صدقتي يا اختي في كل كلمه قلتيها ... الزواج مب كل شي في الحياه اهم شي رضا رب العالمين

الموضوع: لكل وحده اتقول انها عانس ليش هاللقب؟؟؟

أدوات الموضوع

عرض

لكل وحده اتقول انها عانس ليش هاللقب؟؟؟

المزيد من آخر المواضيع من نفس القسم:

المواضيع المتشابهه

كـل وحده ادش اتقول لنا كيف عرفت انها راح تولد ~

كل وحده اتقول لنا...................!!^^

دشو بليييييز كل وحده اتقول هدفها

كل وحده اتقول اول ويعه كيف يتها...