تراكمات ....

[مشكلتي]

السلام عليكم ورحمة الله وبركاته

اتمنى اللي بتقرا كلامي ترد علييه حتى لو بدعوه طيبه تغير حالي للأفضل


انا متزوجه صارلي 5 سنوات و لله الحمد مستقره مع زوجي في بيت بروحنا و زوجي من ناحية الماده مب مقصر مع في شي ولله الحمد و المنه ..
انا كنت من النوع اللي احب اطلع وايد و احب اخالط الناس و اجتماعيه وايد وايد و اوجب الناس دايماً و علاقتي بأهلي وايد قويه و دايماً اظحك و احل اي مشكله تواجهني بكل سهوله وبساطه وبدون ما اكبرها يعني اقصد اني اخذها ببساطه ما أكبّر المواضيع وايد وهالشي اللي يخلي اهلي و ربيعاتي وايد قريبين مني ..
تزوجت و كالمعتاد أول سنه تكون وايد صعبه لين الاثنين يتأقلمون مع بعض وانا وايد تعبت في أول سنتين لان ريلي وايد صعب فالتعامل و أبداً ما يحب يتنازل ولا يحب يكون غلطان حتى لو هو في قرارة نفسه يعرف انه غلطان .. يحب ان الشور يكون شوره هو ولا يحب يتناقش وايد .. مايحب يطلع من البيت ولا يحب السفر و لا الفنادق و لا الحواطه .. اذا بيطلع مره فالشهر زين ..
وايد تعبت لين وصلت لقناعه انه حياتي ما بتمشي الا اذا بديت انا اتنازل و اتغاضى عن بعض الأشيا و اذكر الأشياء الزينه اللي فيه و انسى الأشيا اللي تضايقني منه .. ومن هالنقطه بديت كل يوم و الثاني افقد شخصيتي و افقد نفسي ..
بديت اتنازل عن اشيا احبها .. بديت اسوي اشيا ما احبها ولا متعوده عليها بس بالغصب عشان حياتي تمشي .. بديت اخسر ثقتي في نفسي .. ولا اسوي شي لنفسي الا ناااادر
انا مابغي اتكلم بالشينه عن ريلي فيه وايد اشيا زينه لكن فالمقابل في اشيا بعد وايد تضايقني واحسني مب قادره اتحملها خلاص

وزني زاد خلال اول سنتين من الزواج ووصل لين 101 .. و لاحظت الضيق عليه و على نفسي بعد و قررت اني اتغير و شديت على عمري و نزلت وزني لين 73 خلال 6 شهور ووايد كنت فرحانه بالنتيجه .. وو كلام زوجي كان دايما ( انتي ماسويتي شي .. انتي بس كلام .. متى بتضعفين .. انتي ما تتحملين .. ) تتخيلون الوزن اللي انا نزله وهو كلامه يكون جذي !!!
ودايما يدخل علي بقصص أصدقائه .. ( ربيعي نزل 10 كيلو ووايد تغير !! فلان نزل 15 كيلو ماااعرفته ... الخ ) انزين انا نزلت 28 كيلو ولا بين في عينك ؟؟؟

شي ثاني
تميت شهر كامل اشتغل فالبيت بدون عامله و نظفت البيت كامل و الثياب مغسوله و مكوايه و مرتبه في الكبت ودايما معطره و البيت مدخن .. يوم واحد نسيت غرض مب في مكانه .. يقول لي ( انتي ماتعرفين تحطين شي في مكانه ؟؟ ) !!! تتخيلون نفسيتي كيف ممكن تكون بعد هالكلام ؟!!

كنا مأجلين الحمل لظروف و بعد 4 سنوات من الزواج حملت ولله الحمد و طول فترة الحمل الحمدلله كنت مرتاحه ولا اشتكيت له من شي ابد ابد ابد .. يوم وصلت الثامن بديت اتعب شوي و ارقد اكثر و كله ابغي انسدح .. بديت اسمع منه (( انتي ما تتحملين .. انتي مب قد الحمل .. انتي مب اول وحده تحمل .. انتي 24 ساعه منسدحه ولا تتحركين )) وفوق هذا كله كنت اسكت ولا اقول حرف

وقت الولاده صارت لي مضاعفات وخيروني بين الطلق الصناعي و القيصريه و قررت اخذ طلق صناعي وتميت 3 ايام طلق و الجنين يتعب اكثر و اخر شي قلتلهم خلاص ودوني قيصريه .. و الحمدلله ولدت و الجنين كان شوي تعبان لانه الحبل السري كان ملتف عليه و مايقدر يتحرك بس الحمدلله عدت الفتره هذي .. تميت في بيتي فالاربعين ماخلاني اسير بيت اهلي .. الله حق كان يساعدني هو بس بعد تعب القيصريه و الرضاعه و شغل البيت و اخر شي يقول لي ( انتي ماتتحملين شي ولا قدرتي تتحملين تربين طبيعي وانتي اللي بغيتي قيصري )

الحين ولدي فديته بيكمل سنه .. وبروحي اجابله 24 ساعه .. ولا لي وقت حتى امشط شعري او ارتب نفسي .. ماعندي حد ساعدني في تربية الولد لا عامله فالبيت ولا اهلي ولا اي حد و الحمدلله هذا اعتبره انجاز كبير بالنسبه لي و الكل مستغرب اني كيف تحملت هذا كله وهو مولودي الأول و القيصرية وغيره وغيره .. و ريلي يشوفني اني انا ماسويت شي خارج عن الطبيعه و لا سويت شي متعب وهذا شي عادي و يشوفني مهمله في حق نفسي .. انزين اذا انا بهتم في نفسي الولد منو بيشوفه ؟؟ اذا هو مايرضى اني اخلي الولد عند اي احد لا اهلي و لا اهله ..

عمري 27 لكن احس عمري 50 .. تعبانه وايد .. ماعرف شو اسوي ولا اعرف كيف اتصرف .. ولا اقدر اني اواجه ريلي و اقوله هالكلام لاني اعرف انه ماشي فايده .. ابغي كلمه طيبه بس مب محصلتنها دايماً يقول لي انا ما اقدر امدحج ولا اقدر اشكرج على شي تسوينه فالبيت او شي تسوينه لي .. حياتي وياه كلها انتقادات .. نفسيتي فالحضيض

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

الكلمة الطيبة صـــدقة

[ساحره العين]

حبيتي الله يكون فعونج ... انا ما عندي خبره فالزواج بس جربي تصارحينه ترا اذا كتمتي كل شي فقلبج انتي اللي بتمرضين ، يلسي وياه فهدوء وقوليله 1 ،2،3 وجربي اذا بيتغير او لا

[أم حور26]

الله يكون في عونج حبيبتي...
حاولي تقوليله ان انت كله تنتقدني وعمرك ما مدحتني حسسيه انج فعلا مضايجه من هالشي

[رسايل غلا]

لا تكتمين، عامليه بالمثل فهالحالة هو ينتقد انتي انتقديه بنفس طريقته، وبعدين اذا هو عاتبج قوليله انت دوم تنتقدني وانا ساكته ما اقول شي جرب شعوري.
الله يسهل امورج ويوفقج

[غلآ نفسي]

موضوعج هذا اللي كتبتيه لنا سويه كوبي وطرشيه حقه فالواتس اب

وعقب سكتي عنه يومين ثلاث

هالنوعيه ينفع معاه الطاااف

بالتوفيق

[ورده خضراء]

المفروض هو اللي يحس فيكي مو أنتي تقولين له

جزاكي الله خير ما قصرته معاه

[بسمه دبي]

اقعدي معاه وطلعي كل الي في قلبج

الله يسخره لج

[شوشيتا]

الله يهديه ويسخره يارب والله يعوضج

[مالتيزرس]

مشكلتج مب ريلج مشكلتج مع نفسج اللي هي الكتمان انج مب قادرة تواجهينه .تمي يوم واحد لا تشتغلين ولاتكوين ولا تطبخين شوفي ردة فعله .خذيها مني الريال لاتدلعينه وايد خليه يسوي لج شغالة خليه يعرف قدرج سوي شغالة وانتي اهتمي فعمرج والبيبي .ترا الريال مايحب اللي ماعندها شخصية خلستيه يركب ع راسج .كله تكتمين ع حساب راحتج وصحتج صدقيني الرياييل مايحاتون شي .اقل شي يفكر فالثانية

[ريم العسووله]

حبيبتي ، زوجج انتقادي و وايد رياييل هالنوعية ، الكلام الطيب و الزعل و العتاب ما منهم فايدة ابدا مع هالنوعية من الناس ، بتتعبين و بينشف ريجج عالفاضي و لا راح يتغير ، بالاضافه انج من كلامج واضح انج انسانه حساسه و تتأثرين ، افضل حل انج تنمين عندج موهبه التطنيش ، تثقفي في هالجانب ؛ في كتب و اخصائيين يعلمونج شلون تطنشين ردود الناس و تكونين مثل الجبل جدام كلامهم و ما تتأثرين ابدا و لا تسمحين لهم يحبطونج ، هاي افضل حل اذا حابه تستمرين بالزواج مع هالانسان ، كلامي هاي من واقع تجارب وايد ناس ... و هذا هو الحل المثالي لان ما في حلول ثانيه و بالتوفيق

[قمر زماني 28]

سبحان الله وبحمده .. سبحان الله العظيم

[ام احلى بنات]

شو رايج تسيرين بيت هلج يومين ؟ مش من زعل لا بس قولي حابة اريح ، لعل و عسى يحس بقيمتج

و اذا ما نفعت هاي الطريقة وياه، خلج صريحة و اطلبي بشكارة وضحي له انج خلاص ما ترومين ع الشغل و الكراف.

و دوم سيري الصالونات و اشتري حق عمرج كل اللي في خاطرج و لا تقصرين في حق عمرج، اذا هو ما دلع دلعي نفسك.

بخصوص السفر و الطلعات ، حاولي ترفهين على نفسك انت و ولدج ، يعني لو يسمح لج سافري ويا هلج ، قولي له انت ما تحب تطلع او تسافر و انا بروح اغير جو، بس ها لا تهميلنة او تهملين واجباتج كأم و زوجة ، حاولي تمسكي العصا بالنص.

و اهم شي صلي الاستخارة قبل لا تسوين اي شي و عليج بالدعاء.

بالتوفيق،،،