أم زوجي وايد ملعوزتني

[همبا]

من إتزوجت لليوم وهي اتنغزني في....
1.ليش أنا حنطيه وإهي بيضه ... (بطرقة غير مباشرة بإنها تمدح بنات إخوانها وخواتها وحريم إعيالها الباجين لأنهم كلهم من أهلها إلا أنا) مع إني جربت وايد خلطات في المنتدى بس مانفعت.

2.تتوصف بالبنات واجسامهم جدامي وجام ريلي (عن رشاقتهم وطولهم وصدورتهم .... مع إني وايد رشيقه وطولي زين بس صدري صغيير):1 (9):

3.أنا ماحط مكياج في البيت لانه ريلي ما إحب وفي نفس الوقت بشرتي صافيه.(ماأدري أرضي إمنوه؟؟؟؟!!!!)

4.لاني ما حملت ليين سنتين وألحين الحمد لله عندي بنوته قمر ماشاءالله عليها.

5.تتكلم جدامي عن البنات وأناقتهم يعني إشجى إطقمون الجلابيه مع لوجايه زين أنا أحاول أطقم بس مرات ماحصل نفس اللون؟؟؟؟!!!!!! والله ماأدري شاسوي معاها كرهتني بنفسي والله.(خبروني من ويين يشتروونها؟؟؟؟؟؟)

الإسبوع الياي عندها عرس بنت أخوها وإتقولي سيري دوريلش فستان قوم بوسبعيين و ستيين (تباني ألبس رخيص عشان ما أخسر ولدها !!!!! وإتقولي لا إتفشلينا) ..... تدرون إهي و حريم إعيالها الثانيين رايحين الجعيدي شارين فساتينهم وأنا تباني أكون\أخس شي بينهم (عد لو تدرون ريلي وايد يسمع لامه)

والله من أقول أي شي حق ريلي إقولي حرام عليش هي وايد إتحبج ودوم تمدحج جدامي ومايصدقني وإقولي إنتي فاهمه غلط هي بس إتسولف معانا؟!!!!! (عجيب)

أبيكم إتساعدوني وتنصحوني شو أسوي؟؟؟؟؟؟؟

المزيد من آخر المواضيع من نفس القسم:

• لأنّه جعل الفقير ييعش مع المؤمنين لا مع...
• الإكتئاب طاعون العصر الحديث بحث مرجعي...
• كيف تكون إيجابيا ؟
• كيف تتعامل مع ذاتك بطريقة صحيحة؟
• كيف تقوي ذاتك؟
• كيفية تطوير الذات بطرق بسيطة
• افضل طرق لتطوير الذات وزيادة الثقة بالنفس
• اهم المهارات التي تحتاجها لتطوير الذات
• طرق تطوير الذات في مجال العمل
• اقتباسات ~ مُهرة القَصر

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[شيامي]

حبوبه شو بتسوين خذايها ع قد عقله وسوي اللي تبينه اهم شي يكون ريلج راضي عنج ومقتنع فيج وماعليج من كلامها اسمعي من اهنه وظهري من الاذن الثانيه

[ماما قصايد]

أنا وياااااهم أهم شي ترضي ربج وزوجتج .........

ما عليه الغالية خذيها على قد عقلها ...وكوني على طبيعتج ولا تجبري نفسج على اللبس الراهي والخلطات علشان تبيضين .. والله حلاته اللون الحنطاوي ..احلى من البيض .." هذا راي "

كوني انتي ولا تكوني مثل ما تبي ....دام ريلج راضي عليج ..خلاص وكلي امرج لله ..

[نعومي]

حبيبتي في محل حلو واسعارهم حلوة يبيع فساتين وعبايا الي في دبي في مركز البستان اسمة غواني
وفية منة فرع ثاني في بوظبي في مركز فتوح الخير اسمة اوكيجن هن المحلين نفس الشي ويبيعن نفس البضاعة بس الاسم غير واقووووووول حبيبتي هذيلا المحلين احلي من الجعيدي بالف مرة روحي والله ماتخسرين شيء والله يوفقج ويعينج عليها واذا سرتي هاذا المحل والله بيعيبج وبتدعين لي اتكشخي وما عليج من حد لو احنا نسسمع كلام الناس مابنعيش وما اوصيج كوني واثقة من عمرج



رديب علينا حبوبة:22 (22):

[همبا]

صدقيني ماما ميرة حاولت وايد اكسبها وإهي تعاملني عادي بس لازم في اليوم نغزتين ثلاث (ما اتروم!!!!! إطوف يوم من دون ما تحاول تجرحني و من دون سبب والله.....

يمكن لاني دوم ساكته عنها وابتسم مع كل نغزه اتعجها عليه ,,,,,,, اليوم مثلا أنا قاعده معاها على الغدى جان اتقول لي العروس أمس الي رحنا عرسها مب وايد حلوه (يعني مثلج جي بس بعد أحلى منج إشوي لانها أفتح عنج!!!!!!! (شوفوا القفطة !!!!! ياربي :1 (9): بس والله طنشتها وابتسمت وقلت إلها " صدق, الله أهنيها" والله قهرتني من الخاطر ......

بس إنشا الله بسوي إبنصيحتكم ومشكوريين وايد لانكم رديتوا عليه.

[العين الدامعة]

الله يعينج
عندج وعندنا الخير
ما تعرفين كيف ترضينهم

[dyaanah]

الله يعينج
والله قلبي تقطع عليج بس ما ازيد على كلام خواتي و اي شي تبينه والله من عيوني و كلنا ما بنقصر معاج انتي اختنا عزيزة و غاليه بعد

[همبا]

تسلمون حبايبي ما اتقصرون

[محد شراتي]

الله يعينج ويساااااااااعدج

انا من رايي انه أهم شي ترضين ريلج ..........دامه راضي عليج يعني خلاااااااص

سايريها باللي تباه...........وان شاء الله الله بيهديها

[غرام الشوق]

الغاليه اصبري والله ايعينج ..اصبري وكل شي بيصير احسن من دون ما اتحسيين ...((ان مع العسر يسرا ان مع العسر يسرااا)) ..اختي الرسول عليه الصلاة والسلام ..قال في شرح هالايااات ان العسر في الايتين وااحد ..بس اليسر مرتيين وما يغلب العسر يسريين ابد ... هذاا اولا بعدين كل شي محدد اجره في الدنياا الا الصبر ( انما يوفى الصابرون اجرهم بغير حسااب)
الغاليه اولا الصبررررر والاحتسااب لله

واذاا ع النغزات ترى محد ساالم منهااا يعني لا اتحطين في خاطرج ..من اتقولج شي ضحكي وردي برد طيب ابد لا لالالالالالالالا تغلطين عليهاااا ولا تردين الشين بالشين ..

سالي عمرج شوو اتحب وتعالي من هالصووب لي اتحبه ويرضي الرب سايسيهاا ترااهن كبار في السن وام ريلج -

واذاا ع ريلج ان صدق ولا ما صدق في امه تراااهاا امه اشدرااج اذاا وصلت بها الرمسه الى هالحد فاكيد عنده علم وملاحظ بس الرياال ما يطييع في هله دووم ..وهااي امه لا تذمينهااا عداله ..

والكشخه لا اتقصرين في عمرج كشخي واتلبسي واتعدلي وعدلي بنتج ولا عليج من حد ..كشخي لعمرج ولريلج واللي مب عايبنه هب لازم هب فرض عليج تلبسين ع ذووقهم ..عليج بريلج وما يحب ..

ومثل ما قالت اختي نعومي المحل واايد حلووو سيري صووبه وخذي احلى وااحد ولبسيه ..وما عليج من شي لا تنغثيين ولا شي ..

هيه الا دنياا شوو بنااخذ منهاا ..ضحكي فديتج واستاانسي ولا اطوفين ثانيه من عمرج بحزن وضييج ..

والسمااار مطلووب واعرفي الله خلقج في احسن تقويم ..وانتي الاجمل


ردج يوم قلتي الله ايهني العرووس عيبني ..يوم تطري سالفه - اطري سالفه ثانيه ولا اتردين عليييهاااا ..


والله يحفظج لبنتج ولريلج ..

اختج غرام الشوووق

[همبا]

تسلمين الغالية على محاولاتج لرفع معنوياتي...... والله إخليلج كل إلي تحبينهم إنشاء الله:22 (22):

[العذوب]

حبوبة ... بعطيج وصفتي السحرية .. ودخيلج جربيها لو مرة .. وما بتملين من تجربتها ..


قبل لا اتسيرين صوبها اقري سورة يس من أوللها لحد " فأغشيناهم فهم لا يبصرون" .. ثلاث مرات وإذا ترومين سبع مرات .. وقولي : " اللهم إني أجعلك في صدورهم وأعوذ بك من شرورهم " سبع مرات والمعوذات .. وسيري لها .. صدقيني بينربط لسانها عنج ولا بتروم تقول لج شيء ..


جربي يا الغناة وشوفي النتيجة ..


صدق فيه دعاء دوم خليه ع لسانج عسبة الله يعطيج الفصاحة في الرد :
" اللهم يسر لي أمري واشرح لي صدري واحلل عقدى من لساني يفقهوا قولي"

وصدقيني ما بنتدمين ..


عموما لو لمحت لج مرة ثانية ع البياض والسمار ..قوليلها .. الحنطي لايق علي ..بس الأبيض ما يليق على أي حد .. بعض البياض برص .!

[ام هزاع]

الله يعينج ويعين الجميع

[أم ماريا]

عيبني ردج يالعذوب ههههه رغم اني بيضه ثلج و كل ربعي يقولولي يالايرانيه من بياضي! بس صدقيني يا همبا (اسمج لذيذ!!) السمر يبون يبيضون و البيض يبون يسمرون و آخرنها ما يليق عليهم غير خلقة ربهم
و لا تنسين انها ام ريلج ، حطيها ع العين و الراس، يوم من الايام اكيد بتحتاجلج و يمكن ما تحصل حد ثاني غيرج انتي يساعدها هناك بتعرف قيمتج
انا اول امس ام ريلي مسويه حادث بالسيارة و الله اتقطع قلبي ما قدرت اخليها في المستشفى بروحها .. كل يوم اقعد وياها من الظهر لين وحده و نص بالليل رغم منع الزيارات.. اعرف اني كبرت في عينها بس ما ودها تقول ..
و هيه الحمدلله ما تزعجني في سوالف سخيفه بالعكس تقوللي تكشخي جدام الناس عشان يقولون هاي مرت ولدي ..
صح انها وايد تتدخل في حياتنا.. و مرة ما خلتني اروح عرس ربيعتي في بوظبي لان حد من ربعها متوفي من 40 يوم تقريبا .. و الله صحت صياح الدنيا ذيج اليوم بس ما خبرت ريلي ليش كنسلت الصالون و الروحه على العرس و لين الحين يسألني و اقوله كنت تعبانه من الدوره و مقطعه بجبدي !!!

اكسبي ودها باي طريقه حبيبتي و بتجوفين انها تحبج بس ما ودها تقول.. و لو هي ما تدانيج جان ما اختارتج حق ولدها لان الام في حياتها وما تبا الا كل الخير حق عيالها

[شمس المحبه]

هـمــبــــــــــا

شكلج يوم اخترتي النك نيم كنتي وايد يوعانه من جذه خطر على بالج ههههههههههههه


اختي والله ولا تزعلين ولاتحطين على خاطرج مافي ام زوج ماتسوي شي ومافي وحده ماتعق نغزات

والله العظيم انا ام ريلي راقده تعق نغزات وناشه من الرقاد تعق نغزات وتغايضني بعد لكن ما باليد حيله

كم بقول لزوجي والله لو تميت اقوله بيكرهني انا آخر شي لأنه مهما كان هذي امه ومابيبديني عليها لوتنجلب السما على الأرض

اتحملي عشان خاطر ريلج وابو عيالج ( هذي كلمه قوم امي حقي ) والله ترا محد بيكون لج في هالدنيا ظهر وسند غيره

وخلي عنج هذا كله ترا مافي فايده من اي شي .. وحاولي تكسبين ودها صدقيني لازم بتتلوم فيج في يوم من الايام وبتقول شوفوا المسكينه شو تسوي لي وانا شقايل اعاملها

حاولي تشترين لها هدايا من فتره لفتره .. حاولي تمدحينها من بين السوالف اونج ترمسين عن ربيعتج انها تذم ام ريلها فقوليلها الحمد لله ان الله عطاني عمه شرات امي ماتسوي بي جذه

يعني عطيها من هالزين ولازم بتلين صدقيني لو مب جدامج بينها وبين نفسها لازم بتضايج عشانج